‘Ia Anaana i le Atua i lo Tagata’

‘E Mafai e lo Matou Atua Ona Laveaʻi i Matou’

E MATUĀ maofa mataʻu tele i le mea na tupu. Na faatū se tupua auro telē i le fanua laugatasi o Turu, e foliga e lata i le aai o Papelonia. Sa tatau ona faamamaluina le tupua a o faia se sauniga faapitoa, lea na auai ai ni tagata maualuluga o ē na tatau ona ifo i le tupua pe a tā mai mea faifaaili. Na faatonu atu le tupu Papelonia o Nepukanesa, o le a oti i se ogaumu aasa so o se tasi e lē ifo i le tupua. E mautinoa o le a usiusitai tagata uma i lenei faatonuga.

Na taufaiofo ē na vāai ane, ona e leʻi ifo Sataraka, Mesako ma Apeteniko—o ni tagata tapuaʻi o Ieova e matataʻu iā te ia. Na latou iloa o le faia faapea, o le a faaleagaina ai lo latou tuutoina atu atoatoa iā Ieova. (Teuteronome 5:8-10) Ina ua fesiligia e faamatala le pogai o lo latou tūmausalī, na latou taʻu atu ma le lē fefe iā Nepukanesa: “Afai o lea, ua mafai lo matou Atua, matou te auauna i ai, ona laveaʻi mai iā te i matou ai le ogaumu e mū ai le afi, na te laveaʻiina mai lava i matou ai lau pule le tupu. A e peitaʻi, a lē o lea, ia e silafia e oe le tupu e, matou te lē auauna i ou atua; o le tupua auro foʻi ua e faatūina, matou te lē ifo i ai.”—Tanielu 3:17, 18.

Ina ua lafo talavou Eperu e toʻatolu i le ogaumu e mū ai i le afi, na laveaʻiina o latou ola i se vavega. Na auina mai e le Atua se agelu e puipuia Ana auauna faamaoni. Peitaʻi, na latou filifili e tusa lava po o le oti, e lē mafai ona latou lē usiusitai iā Ieova. * E talitutusa lo latou tulaga ma le mea na tupu i aposetolo o Iesu, o ē na folafola i luma o le fono maualuga a Iutaia i le silia ma le ono senituri mulimuli ane e faapea: “E tusa ona sili o lo matou anaana i le Atua i lo matou anaana i tagata.”—Galuega 5:29.

Lesona Tāua mo i Tatou

O Sataraka, Mesako, ma Apeteniko, o ni faaaʻoaʻoga lelei o le faatuatua, usiusitai ma le faamaoni. Na faatuatua talavou Eperu e toʻatolu iā Ieova. E leʻi faatagaina i latou e o latou loto fuatiaifo ua aʻoaʻoina i le Tusi Paia, e auai i so o se gaoioiga faatapuaʻiga sesē po o le lotonuu. E ao foʻi i Kerisiano i aso nei ona matuā faatuatua atu i le Atua moni. Ua taʻitaʻia i latou e o latou loto fuatiaifo ua aʻoaʻoina i le Tusi Paia, ma e lē auai i ni gaoioiga o tapuaʻiga sesē po o ni sauniga e solia ai tulafono ma mataupu silisili a le Atua.

Na talitonu talavou Eperu faamaoni e toʻatolu iā Ieova, ma teena le faafesuiaʻi o lo latou usiusitai iā te ia mo se tulaga maualuga, aloaʻia po o le mamalu. Na loto malilie na tama talavou e pagatia ma maliliu ai, na i lo le faaleagaina o la latou faiā ma le Atua. I le pei o Mose, na faaauau ona latou ‘faamalosi pei o sē iloa atu i lē lē o vaaia.’ (Eperu 11:27) E tusa pe na filifili Ieova e laveaʻi talavou e toʻatolu mai le oti pe leai, ae na latou maumauaʻi e  tumau pea le faamaoni iā te ia, na i lo le faagutugutulua ina ia faasaoina ai o latou ola. E manino mai, i le faasino atu i la latou faaaʻoaʻoga, na taʻua e Paulo nei tagata faamaoni o ē “na tinei ai le malosi o le afi.” (Eperu 11:34) Ua faaalia e auauna a Ieova i aso nei lea ituaiga faamaoni ma le usiusitai, a o fesagaʻia tofotofoga o le faamaoni.

Ua tatou aʻoaʻoina foʻi mai le mea na tupu iā Sataraka, Mesako, ma Apeteniko, e tauia e le Atua le faamaoni iā te ia. Na pese le faisalamo: ‘E lē tuua e Ieova ona tagata amio Atua.’ (Salamo 37:28) I aso nei, tatou te lē faatalitalia e laveaʻi faavavega i tatou e le Atua e pei ona ia faia i talavou Eperu e toʻatolu. Ae tatou te mautinoa po o ā mafatiaga tatou te fesagaʻia, o le a saunia e lo tatou Tamā i le lagi le fesoasoani. E ono aveesea e le Atua le faafitauli, foaʻi mai le malosi e tumau ai, pe toe faatutūina i tatou pe a tumau i le faamaoni e oo i le oti. (Salamo 37:10, 11, 29; Ioane 5:28, 29) Ia faatuatua, usiusitai, ma faamaoni i taimi uma e tofotofo ai lo tatou faamaoni, ma filifili e anaana i le Atua i lo tagata.

[Faamatalaga pito i lalo]

[Pusa/Ata i le itulau 9]

PE NA E SILAFIA?

• E taʻi 20 ma ona tupu tausaga o talavou Eperu e toʻatolu ina ua tofotofoina lo latou faamaoni.

• Na matuā aasa le ogaumu.—Tanielu 3:19.