Fesili Mai le ʻAufaitau

Pe mafai ona faateʻaina se tasi mai le faapotopotoga Kerisiano ona o amioga lē mamā, e pei ona faateʻaina ai se tasi i le faitaaga ma amioga lē taupulea?

Ioe, e mafai ona faateʻaina mai le faapotopotoga se tasi pe afai na te faia pea ma le lē salamō le faitaaga, nisi o amioga lē mamā, ma amioga lē taupulea. Na taʻua e le aposetolo o Paulo agasala uma nei e tolu faatasi ma isi agasala e tatau i ai le faateʻaina ina ua ia tusi faapea: “Ua iloa tino foʻi galuega a le tino, o mea faapenei; o le faitaaga, o amioga lē mamā, o amioga lē taupulea . . . ou te muaʻi taʻu atu nei iā te outou . . . o ē faia mea faapena, e lē fai le malo o le Atua mo latou tofi.”—Kalatia 5:19-21, NW.

O le faitaaga (faa-Eleni, por·neiʹa) e faatatau atu i faiga faaleituaiga lē faatulafonoina i fafo atu o le faaipoipoga faale-Tusi Paia. E aofia ai le mulilua, faiga faatalitane, feusuaʻiga faaleituaiga i le va o tagata e leʻi faaipoipo, ma feusuaʻiga e faaaogā ai le gutu ma le māliuga ma le loteina ma le loto i ai o totogasā o se tasi e lē o sana paaga faaipoipo. O sē e faia ma le lē salamo le faitaaga e lē tatau ona iai i le faapotopotoga Kerisiano.

 O amioga lē taupulea (faa-Eleni, a·selʹgei·a) e faasino atu i “amioga tuufau; lē pulea; amioga lē māsiasi; amioga matagā.” O loo faamatalaina e le lomifefiloi o le New Thayerʻs Greek-English Lexicon le uiga o le upu Eleni e faapea, o “tuʻinanauga lē taofiofia, . . . faiga soona fai, lē māsiasi, faamaualuga.” E tusa ai ma se faamatalaga a se isi lomifefiloi, o loo faamatalaina faapea amioga lē taupulea, o se uiga tuufau “e lē faatapulaa e tusa ai ma faiga e masani ai tagata lautele.”

O loo faamatala e lenei lomifefiloi, o “amioga lē taupulea” e aofia ai ni vala se lua: (1) E lē gata ina solia ai tulafono a le Atua i le amioga o loo fai, ae (2) o uiga faaalia a lē o loo faia le amioga sesē e iloa ai le lē faaaloalo ma le faamaualuga.

O lea la, e lē o faasino “amioga lē taupulea” i mea sesē laiti. E fitoi tonu lava i gaoioiga e ono matuā solia ai ma le loto i ai tulafono a le Atua faatasi ai ma ni uiga faasausili po o le manatu faatauvaa—se uiga e lē faaaloalo pe manatu faatauvaa i pulega, tulafono, ma tapulaa e tatau ona iai. Sa faafesootaʻi e Paulo amioga lē taupulea ma feusuaʻiga lē mamā. (Roma 13:13, 14) Talu ai o loo lisi faatasi mai i le Kalatia 5:19-21 (NW) amioga lē taupulea ma isi agasala e ono taofia ai se tasi mai le fai o le Malo ma ona tofi, o amioga lē taupulea la e mafai ona aʻoaʻia ai pe ono faateʻaina ai mai le faapotopotoga Kerisiano.

O amioga lē mamā (faa-Eleni, a·ka·thar·siʹa) e lautele atu lona uiga mai faaupuga e tolu, lea ua faaliliuina i le “faitaaga,” “amioga lē mamā,” ma “amioga lē taupulea.” E aofia ai so o se ituaiga lē mamā lava, i mataupu tau feusuaʻiga, i le gagana, i gaoioiga, ma faiā faaleagaga. O “amioga lē mamā” e aofia ai le tele o ituaiga agasala matuiā.

E pei ona faamauina i le 2 Korinito 12:21 (NW), na faasino atu Paulo iā i latou “o ē na agasala anamua, ma ua lē salamō i le amioga lē mamā, ma le faitaaga, ma le amioga lē taupulea lea na latou faia.” Talu ai o loo lisiina faatasi mai “amioga lē mamā, faitaaga ma amioga lē taupulea,” e iai nisi vala o ni amioga lē mamā e ono tatau ai se gaoioiga faafaamasinoga. Peitaʻi o le faaupuga amioga lē mamā e mafai ona lautele lona faaaogāina e aofia ai ma ni mea e lē ono tagofiaina faafaamasinoga. I le pei lava o se fale e lē palapalā tele pe matuaʻi palapalā lava, e eseese tulaga po o le matuiā o amioga lē mamā.

E tusa ai ma le Efeso 4:19 (NW), na taʻua e Paulo e iai nisi ua latou lē lagona se mea, ma ‘ua tuuina atu i latou i amioga lē taupulea, e fai amioga lē mamā ma le tuʻinanau i ai.’ O lea la, o loo faatulaga faatasi e Paulo ‘amioga lē mamā e fai ma le tuʻinanau i ai’ i le tulaga lava e tasi e iai amioga lē taupulea. Pe afai e faia ma le lē salamō e se tagata ua papatiso se ‘amioga lē mamā e fai ma le tuʻinanau i ai,’ e mafai ona faateʻaina mai le faapotopotoga ona ua faia se amioga lē mamā matuiā.

Seʻi faapea o se alii ma se tamaʻitaʻi ua faamau, ma ua fai ma la masaniga le fusifusi ma milimili itutino i se tulaga lē pulea e ono faagaeeina ai faalogona faaleituaiga. Atonu e ono iloaina e toeaina e faapea, e ui e lē o faaalia se uiga faasausili e na tagata lea e maitaulia ai amioga lē taupulea, ae ua faaalia i o la gaoioiga le iai o sina lē pulea po o le tuʻinanau. O lea la, e ono faia e toeaina se gaoioiga faafaamasinoga ona ua aafia i amioga lē mamā matuiā. O amioga lē mamā matuiā foʻi e ono faavae ai le taulimaina o se mataupu e aofia ai se tagata e faia pea lava ni upu po o faamatalaga taufeusuaʻiga lē mamā i luga o le telefoni i se isi tagata, aemaise lava pe afai na aʻoaʻia muamua ai o ia e uiga i lenei mea.

E manaʻomia e toeaina le tofā mamao i le faia o nei faamasinoga. Ina ia filifili pe ono tatau ona faia se gaoioiga faafaamasinoga, e ao ona latou iloiloina le mea na tupu ma le matuiā o le mea na faia. E lē faapea o le a tuuaʻia i amioga lē taupulea so o se isi e lē talia aʻoaʻiga faale-Tusi Paia pe faapea foʻi o le a faitau le aofaʻi o taimi e faia ai e se tasi se gaoioiga agasala ona faatoʻā tatau lea iai o se gaoioiga faafaamasinoga. E ao i toeaina ona faautauta ma tatalo faatauanau a o iloilo e faatatau i le mataupu ma ia saʻiliʻili po o le ā le mea na tupu ma pe faafia ona faia, le pogai ma le matuiā o le amioga sesē, le māfuaaga tonu na faia ai ma faanaunauga o lē na faia le mea sesē.

E lē na o agasala tau i feusuaʻiga e aafia ai i amioga lē mamā matuiā. Mo se faaaʻoaʻoga, e ono ulaula e se tama ua uma ona papatiso le tapaa mo sina taimi ae uma ona ia taʻutino lea i ona mātua lana mea ua fai. Ua ia maumauaʻi ia lē toe ulaula. O lenei mea, o le amioga lē mamā,  peitaʻi e leʻi oo atu i se tulaga ua faia ai se amioga lē mamā matuiā po o le ‘amioga lē mamā e fai ma le tuʻinanau i ai.’ O se fautuaga mai le Tusi Paia e avatu e se toeaina pe toʻalua foʻi, ma le lagolagosua a mātua ua lava lea e fai ma aʻoaʻiga. Ae afai e faifai pea e le tama le ulaula tapaa, o le mea la lenā o le faaleagaina o le tino ma le loto iai, ma ua tatau la ona fuafua e tauaaoina e se komiti tau faamasinoga le mataupu ona ua faia se amioga lē mamā matuiā. (2 Korinito 7:1) Pe afai e lē salamō le tama, ona faateʻaina lea o ia.

O nisi Kerisiano ua aafia i le matamata i ata matagā. O se mea e inosia e le Atua, ma e ono faateʻia le ʻautoeaina pe a iloa ua faia e se uso talitonu lenei mea. Peitaʻi, e lē o tulaga uma e aafia ai le matamata i ata matagā e tatau ai ona avatu i luma o le komiti tau faamasinoga. Mo se faaaʻoaʻoga, seʻi faapea na matamata se uso i nisi taimi i ni ata matagā. Ua ia lagona lona māsiasi, ona ia taʻutino lea o lana mea na fai i se toeaina, ma ua ia maumauaʻi e lē toe faia lenā agasala. Atonu e manatu ifo le toeaina, e leʻi faapea na oo atu le amioga a le uso i se tulaga ua ia auai i ni “amioga lē mamā . . . e fai ma le tuʻinanau i ai”; aemaise e leʻi faaalia e le uso se uiga faasausili, lea e maitaulia ai amioga lē taupulea. E ui e leai se gaoioiga faafaamasinoga e faia, ae o lenei ituaiga o amioga lē mamā e manaʻomia ai ni fautuaga tuusaʻo mai le Tusi Paia ma atonu foʻi o le a aogā ni fesoasoani faifai pea mai le ʻautoeaina.

Ae peitaʻi, seʻi faapea o se Kerisiano ua tele tausaga o ia matamata faalilolilo i ni ata matagā ua faia ai ni feusuaʻiga matuā tuufau ma lē taupulea ma ua ia faia taumafaiga uma e nanā ai lenei agasala. O nei ata matagā e ono aofia ai ni faiga e faamalosia ai se tasi e se kegi, le saisai o se tasi a o faia iai ni faiga faaleituaiga, o ni feusuaʻiga e faia ma le faatigā po o le sauā, o le faileagaina o fafine, po o ata matagā e faaaogā ai tamaiti i faiga faaleituaiga. Ina ua iloa e isi lana amioga, ua ia lagona le matuā māsiasi. Na te leʻi faaalia se uiga faasausili, peitaʻi e ono iloa e toeaina ua ia ‘tuuina atu o ia’ i lenei masaniga leaga ma ua ia auai i le ‘amioga lē mamā e fai ma le tuʻinanau i ai,’ o le amioga lē mamā matuiā le mea lenā. O le a taulimaina e se komiti tau faamasinoga lenei mataupu e faavae i amioga lē mamā matuiā. O le a faateʻaina pe afai na te lē faaalia le salamō moni lea e talia e le Atua ma naunau ia lē toe matamata i ata matagā. Pe afai na ia valaaulia nisi i lona fale e matamata faatasi ai nei ata matagā, o lea la, ua ia faasalalauina atu, o se faamaoniga lea o lona faasausili lea e maitaulia ai amioga lē taupulea.

O le faaupuga faale-Tusi Paia lenei, “amioga lē taupulea,” o taimi uma e aofia ai se agasala matuiā lava, ma e masani ona faasino i mataupu tau feusuaʻiga. Pe afai o loo taumafai toeaina e saʻiliʻili mo amioga lē taupulea, e ao ona latou tilofaʻia pe iai ni uiga faasausili, lē pulea, lē mamā, lē māsiasi, pe iai se uiga tuufau e tusa ai ma faiga ua masani ai le lautele. I le isi itu, o agasala matuiā ua solia ai tulafono a Ieova e se tagata, e ui e lē o faaalia ai se uiga faasausili peitaʻi e ono aofia ai le “tuʻinanau.” O nei mataupu e ao ona taulimaina e faavae i le amioga lē mamā matuiā.

O le taumafai e iloilo po ua faia e se tasi se gaoioiga e nofosala ai i le amioga lē mamā matuiā po o amioga lē taupulea o se matafaioi tāua tele, auā o loo aafia ai ola o tagata. O i latou ua iai lenei tiute tauave o le faamasinoina o nei mataupu e ao ona faia ma le tatalo faatauanau, ma fesiligia le fesoasoani a le agaga paia o le Atua, ma le tofā mamao, ma le utaga malamalama. E manaʻomia i toeaina ona tausia pea le mamā o le faapotopotoga ma e ao ona faavae a latou faamasinoga i le Tusi Paia ma le taʻitaʻiga a “le auauna faamaoni ma le mafaufau.” (Mataio 18:18; 24:45) Ma i nei aso sili ona leaga, ua sili atu ona manaʻomia e le ʻautoeaina ona manatua upu nei: “Ia outou lava i mea tou te faia; auā tou te lē faamasino mo tagata, a o Ieova.”—2 Nofoaiga a Tupu 19:6.