O le ā le Malo o le Atua?

PAGĀ se mala inā leaga na aafia ai tagata i le amataga o le talafaasolopito! Na fouvale se agelu i le pule a Lē na faia o ia. Na maileia e lenei fouvalega le uluaʻi fafine o Eva e ʻai le fua faasāina. I le faasino atu iā Eva ma lana tane o Atamu, na faapea atu le agelu: “Lua te lē oti lava; auā ua silafia e le Atua, o le aso lua te aai ai, e pupula ai o oulua mata; ona avea ai lea o oulua e pei ni atua o loo iloa le lelei ma le leaga.” (Kenese 2:16, 17; 3:1-5) Na iʻu ina taʻua le agelu fouvale o le Tiapolo ma Satani.—Faaaliga 12:9.

Pe na usitai Eva i upu a Satani? Ua taʻu mai iā i tatou e le Tusi Paia: “Ona vaai atu lea o le fafine i le laau e lelei lava pe a ʻai, ma ua matagofie mai, o le laau foʻi e aogā e maua ai le poto, ona tago ai lea o ia i lona fua, ma ʻai ai; na ia avatu foʻi i lana tane faatasi ma ia, na ʻai ai foʻi o ia.” (Kenese 3:6) Ioe, na auai le uluaʻi ulugalii o Atamu ma Eva i le fouvalega a Satani. O le iʻuga, na la melea ai le Parataiso mo i laʻua ma a la fanau. O fanau o ē na tatau ona fananau mai e lelei atoatoa faatasi ma le faamoemoe e ola ai e faavavau, o le a aafia uma i le agasala ma le oti.—Roma 5:12.

Na faapefea ona tali atu Ieova, le Pule Silisili ese i le aoao o mea? Na ia fuafua se sauniuniga mo le faamagaloina o agasala. (Roma 5:8) Na faavae foʻi e Ieova se faatulagaga o se malo e foʻiaina le mala. E taʻua lenei faatulagaga o “le malo o le Atua.” (Luka 21:31) E iai se fuafuaga faapitoa o lenei Malo, lea na faatūina e lona lua le tāua i le pule silisili ese a le Atua.

O le ā le fuafuaga o le Malo o le Atua? O ā nisi o ona vala, ma e faapefea ona faatusatusa atu i pulega a tagata? O anafea na amata pule ai le Malo? O le a talanoaina nei fesili i le mataupu o sosoo mai.