Ua‘i Atu i Lelei o le Faalapotopotoga a Ieova
Uaʻi Atu i Lelei o le Faalapotopotoga a Ieova
“E maoona i matou i mea lelei o i lou fale.”—SALAMO 65:4.
1, 2. (a) O le ā na iʻu i ai tapenapenaga a tagata o le Atua mo le fausiaina o le malumalu? (e) O le ā le fesoasoani a Tavita mo le fausiaina o le malumalu?
O TAVITA mai Isaraelu anamua, o se tasi o tagata sili ona mataʻina o loo talanoaina i Tusitusiga Eperu. Sa faalagolago atoa atu iā Ieova lenei alii leoleo mamoe, o ia foʻi o se faimusika, o se perofeta, ma o se tupu. O le māfana tele o le faiā a Tavita ma Ieova, na aʻe ai iā te ia se faanaunauga e fausia se fale mo le Atua. O lenā fale, po o le malumalu, o le a avea ma taulaʻiga o le tapuaʻiga moni i Isaraelu. Na iloa e Tavita, o le a iai le olioli ma le faamanuia a le Atua i ona tagata, a o fai a latou tapenapenaga mo le fausiaina o le malumalu. O le ala lea o le pese o Tavita: “Amuia [pe fiafia] lē ua e [Ieova] filifilia, ma e faalatalataina o ia iā te oe, e nofo o ia i ou lotoā; e maoona i matou i mea lelei o i lou fale, o lou lava malumalu paia.”—Salamo 65:4.
2 E leʻi faatagaina Tavita na te vaaia le fausiaina o le fale o Ieova. O le faaeaga lenā sa tuu e faatino e lona atalii o Solomona. E leʻi muimui Tavita faapea ua tuu atu i se isi tagata le faaeaga ua leva ona ia moomoo i ai. O le mea na sili ona tāua iā te ia, ia mautinoa e fausia le malumalu. Sa ia lagolago atoatoa i le galuega, e ala i lona avatu iā Solomona o le ata atoa o le fausaga o le malumalu, e pei ona tuuina mai e Ieova iā te ia. Sa faatulaga foʻi e Tavita le faitau afe o sā Levī i vaega e auauna ai, ma foaʻi atu le anoanoaʻi o auro ma ario e fausia ai le malumalu.—1 Nofoaiga a Tupu 17:1, 4, 11, 12; 23:3-6; 28:11, 12; 29:1-5.
3. O ā uiga faaalia o auauna a le Atua i fuafuaga mo le tapuaʻiga moni?
3 Na lagolagosua tagata faatuatua o Isaraelu i fuafuaga sa fai mo le tapuaʻiga moni i le fale o le Atua. Ua faapena foʻi i auauna a Ieova i aso nei, ona latou lagolagosua i fuafuaga mo le tapuaʻiga lea o loo fai i le vaega o le faalapotopotoga a Ieova i le lalolagi. O le faia faapea ua tatou faailoa atu ai, e tutusa o tatou faanaunauga ma Tavita. E tatou te lē muimui, ae tatou te taulaʻi atu i lelei o le faalapotopotoga a Ieova. Po o e manatu ea i le tele o mea lelei e mafai ona tatou matuā lotofaafetai ai? Seʻi tatou talanoa i nisi o na mea.
Talisapaia i Latou o Taʻimua
4, 5. (a) Ua faapefea ona faataunuu e “le auauna faamaoni ma le mafaufau” lona tofiga? (e) O ā ni lagona o nisi Molimau i taumafa faaleagaga o loo latou maua?
4 Ua iā i tatou māfuaaga tatau e talisapaia ai “le auauna faamaoni ma le mafaufau” lea na tofia e Iesu Keriso e pule i ana mea o loo i le lalolagi. O loo taʻimua le vasega auauna o Kerisiano faauuagagaina, i le talaʻia o le tala lelei, le faamaopoopoina o sauniga mo le tapuaʻiga, ma le lomia o lomiga faale-Tusi Paia i le silia ma le 400 gagana. E faitau miliona tagata i le lalolagi aoao o loo latou talia ma le faafetai nei ‘meaʻai faaleagaga i le taimi tatau.’ (Mataio 24:45-47) E leai lava se māfuaaga e tatau ai ona muimui i lenei faatulagaga.
5 E tele tausaga sa faamaonia ai e se tasi o Molimau a Ieova e suafa iā Elifia, o sē ua afu lona soifua, le lelei ma le aogā o le faatatauina o fautuaga faale-Tusi Paia o loo maua i lomiga a le vasega o le auauna. O le agaga talisapaia lenā o Elifia na ia tusi mai ai: “Ou te matuā lagona le loto faafetai mo le faalapotopotoga a Ieova!” E tele tausaga o auauna Peter ma Irmgard i le Atua. Ua faaleo mai foʻi e Irmgard lona talisapaia o sauniuniga ua faia e le ‘faalapotopotoga alofa a Ieova.’ O nei lomiga o loo aofia ai foʻi ma lomiga ua fuafuaina faapitoa lava e faitau ai tagata e iai o latou manaʻoga faapitoa, e pei o ē ua pō le silasila pe logonoa fo’i.
6, 7. (a) E faapefea ona vaavaaia galuega a faapotopotoga o i le lalolagi aoao? (e) O le ā se faamatalaga na faia e faatatau i le faalapotopotoga a Ieova o i le lalolagi?
6 O le “auauna faamaoni,” o loo fai ma ona sui le Vaega Pule o Molimau a Ieova, o se vaega itiiti lea o tane faauuagagaina, o loo auauna i le ofisa ulu o Molimau a Ieova, i Purukulini, i Niu Ioka. E tofia e le Vaega Pule auauna agavaa a Ieova e auauna i ofisa o lālā, lea o loo latou vaavaaia galuega i le silia ma le 98,000 faapotopotoga i le lalolagi aoao. O tane ua ausia agavaa faale-Tusi Paia, ua tofia foʻi e avea ma toeaina ma auauna o le faiva i nei faapotopotoga. (1 Timoteo 3:1-9, 12, 13) E tausolomua toeaina i le leoleoina ma le alofa o le lafumamoe a le Atua ua iai i la latou tausiga. Maʻeu se faamanuiaga i le avea ma vaega o lenā lafu, ma mātauina ai le alofa ma le autasi o loo iai i ‘o tatou uso uma lava’!—1 Peteru 2:17; 5:2, 3.
7 Na i lo le faia o ni faitioga, ae ua masani ona faaleo mai e nisi tagata lo latou talisapaia o le taʻitaʻiga alofa faaleagaga o loo latou maua mai toeaina. Mo se faaaʻoaʻoga, o le tulaga o Birgit, o se avā Kerisiano ua 30 ma ona tupu ona tausaga. A o talavou, sa leaga ana aumea, ma na toetoe lava paʻū atu ai i le faia o mea leaga. Peitaʻi o fautuaga manino mai le Tusi Paia na avatu e toeaina, faapea le lagolagosua a uso talitonu, na mafai ai ona toe laveaʻia o ia mai se tulaga lamatia na semanū e oo i ai. O ā faalogona o Birgit i le taimi nei? Fai mai a ia: “O laʻu faafetai sili ona o loo oʻu iai pea i totonu o le faalapotopotoga ofoofogia a Ieova.” Fai mai se faamatalaga a se talavou e 17 ona tausaga e igoa iā Andreas: “O le faalapotopotoga moni lava lenei a Ieova, ma e sili atu ona lelei na i lo se isi lava faalapotopotoga i le lalolagi.” Pe tatou te lē loto faafetai ai ea, ona o le lelei o le faalapotopotoga a Ieova o i le lalolagi?
E Lē Lelei Atoatoa i Latou o Loo Taʻimua
8, 9. Na faapeʻī uiga na faaalia e nisi sa ola i le vaitaimi o Tavita, ae o le ā le tali atu a Tavita i na uiga?
8 O le mea moni lava, e lē lelei atoatoa i latou o loo taʻimua i totonu o le tapuaʻiga moni. E iai uma lava o latou masei, ma o nisi o loo iai pea o latou vaivaiga o loo taumafai malosi e pulea. Pe tatau ai ea la ona tatou popole i lenei mea? E leai. E oo lava i ē sa faatuatuaina i ai le tele o tiute tauave i Isaraelu anamua, sa latou faia foʻi ni agasala matuiā. Mo se faataʻitaʻiga, a o avea pea Tavita ma alii talavou, sa amia o ia e auauna e tāina le musika ina ia faatoʻamālie ai le atuatuvale o le tupu o Saulo. Mulimuli ane sa taumafai le tupu o Saulo e fasioti Tavita, ma na iʻu lava ina sola ese ai Tavita mo lona saogalemu.—1 Samuelu 16:14-23; 18:10-12; 19:18; 20:32, 33; 22:1-5.
9 Sa faaʻoleʻole amioga a nisi tagata Isaraelu. Mo se faataʻitaʻiga, na fasiotia e le taʻitaʻiʻau a Tavita o Ioapo, le tauaiga o Saulo, o Apineru. Sa fai e Apisaloma se faufauga e foua ai le tulaga tautupu o lona lava tamā o Tavita. Na toe faalataina foʻi Tavita, e lana lava faufautua faamoemoeina o Aitofele. (2 Samuelu 3:22-30; 15:1-17, 31; 16:15, 21) Peitaʻi, e leʻi avea na mea ma itu na ita ai Tavita ma faitio. E leʻi liliu ese ai foʻi mai le tapuaʻiga moni, ae sa tuufaafeagai le mea na ia faia. Na avea mala na oo iā Tavita ma pogai o lona matuā piiama atu iā Ieova, ma tausia pea sona uiga lelei, lea na iai ina ua sola ese mai iā Saulo. I lenā taimi, na pese ai Tavita: “Le Atua e, ia e alofa mai iā te aʻu, ia e alofa mai iā te aʻu; auā ua ou faatuatua lava iā te oe; ou te faatuatua foʻi i le paolo o ou apaʻau, seʻia mavae atu nei mea leaga.”—Salamo 57:1.
10, 11. O le ā na oo i se Kerisiano e suafa iā Gertrud a o talavou o ia, ma o le ā lana faamatalaga e faatatau i vaivaiga o ona uso talitonu?
10 E leai se māfuaaga tatou te faitio ai fua i se tulaga lē faamaoni e ono tupu i totonu o le faalapotopotoga a le Atua i aso nei. E lē o tuufauina e Ieova, po o ana agelu, po o leoleo mamoe faaleagaga ni tagata amioleaga lē faamaoni e iai pea i le faapotopotoga Kerisiano. Peitaʻi ane, ua tatou fesagaʻia uma o tatou tulaga lē lelei atoatoa faaletagata, ma lē lelei atoatoa o isi auauna a le Atua.
11 O Gertrud, o se auauna tapuaʻi a Ieova mo le tele o tausaga. A o avea o ia ma tamaʻitaʻi talavou, sa tuuaʻia sesē faapea o ia o se taufaasesē ae lē o se auauna moni faataimi atoa o le Malo. Na faapeʻī lana tali atu i na tuuaʻiga? Pe na muimui ai ea i na uiga na faaali ane iā te ia? E leai. A o latalata lava i lona maliu i le 2003, i le 91 o ona tausaga, na ia toe tepa ai i tua i lona soifuaga ma faapea mai: “O nei mea na tutupu faasolosolo i loʻu olaga, na ou iloa ai, e ui lava ina faia e tagata mea sesē, ae o loo faatonutonuina pea e Ieova lana galuega sili, lea o loo ia faaaogā ai tagata lē lelei atoatoa.” Pe a fesagaʻi Gertrud ma vaivaiga o isi auauna a le Atua, sa ia tatalo faatauanau atu iā Ieova mo se fesoasoani.
12. (a) O le ā le faaaʻoaʻoga leaga na fai e nisi Kerisiano i le uluaʻi senituri? (e) O ā mea e tatau ona faasagatonu i ai o tatou mafaufau?
12 O Kerisiano uma lava e lē lelei atoatoa, e oo lava i ē ua sili ona faamaoni ma tuutoina. O lea la, afai e faia e se auauna tofia se mea sesē, seʻi o tatou faaauau pea ona “faia mea uma lava ma le lē muimui.” (Filipi 2:14) Pagā se lē lelei pe afai tatou te faataʻitaʻi i le faaaʻoaʻoga leaga a nisi sa iai i le faapotopotoga Kerisiano i le uluaʻi senituri! Fai mai le soo o Iuta, o aʻoaʻo pepelo i na aso sa “latou taʻufaatauvaa i alii, ma upu leaga i ē ua mamalu.” O na foʻi tagata faimea leaga sa “muimui i latou ma faameo.” (Iuta 8, 16) Aua lava neʻi o tatou uia le ala o ē muimui, ae ia faasagatonu o tatou mafaufau i mea lelei o loo tatou maua mai le “auauna faamaoni.” Seʻi o tatou talisapaia le lelei o le faalapotopotoga a Ieova, ma “faia mea uma lava ma le lē muimui.”
“O le Upu Faigatā Lenā”
13. Na faapeʻī uiga o isi tagata sa faaalia i nisi o aʻoaʻoga a Iesu Keriso?
13 O nisi i le uluaʻi senituri sa muimui i auauna tofia, a o isi sa muimui i aʻoaʻoga a Iesu. E pei ona faamauina i le Ioane 6:48-69, na fetalai Iesu: “O lē ʻai i loʻu tino ma inu i loʻu toto, ua iā te ia le ola [e] faavavau.” O ana fetalaiga nei na “faalogologo ai isi ona soo e toʻatele, ona faapea ai lea o i latou, ‘O le upu faigatā lenā; o ai ea sē na te mafaia ona faalogologo i ai?’” Na silafia lava e Iesu o loo “muimui ona soo i lenā mea.” E lē gata i lea, ‘sa ō ese isi o ona soo e toʻatele, e leʻi toe feoaʻi ma ia.’ Peita’i e lē o soo uma na muimui. Mātau le mea na tupu ina ua fesili atu Iesu i aposetolo e toʻa 12: “Pe tou te fia ō ese fo’i?” Na tali mai le aposetolo o Peteru: “Le Alii e, a matou ō ea iā te ai? O iā te oe upu o le ola [e] faavavau. Ua matou talitonu, ma ua matou iloa o oe o le Paia o le Atua.”
14, 15. (a) Aiseā ua lē fiafia ai isi i nisi vala o aʻoaʻoga faa-Kerisiano? (e) O le ā se lesona tatou te aʻoaʻoina mai le mea na tupu i se tamāloa e suafa iā Emanuele?
14 I aso nei, ua na o sina vaega toʻaitiiti lava o tagata o le Atua, o loo iai le uiga lē faamalieina i nisi o vala o le aʻoaʻoga faa-Kerisiano, ma latou muimui ai i le faalapotopotoga a Ieova o i le lalolagi. Aiseā e tupu ai lenei mea? E masani lava ona māfua lenā muimui, ona e lē o matuā malamalama lelei i le auala o loo faafoe ai e le Atua mea. O loo faasolosolo mālie ona faailoa mai e Lē na Foafoaina Mea, le upu moni i ana auauna. O lona uiga, e tatau ona faaleleia atili lo tatou malamalamaga i le Tusi Paia mai lea taimi i lea taimi. O loo olioli se vaega tele o tagata o Ieova i na faamalamalamaga atili. E iai nisi ua ‘faafia amiotonu naʻuā’ ma feita ai pe a iai ni suiga. (Failauga 7:16) O le faamaualuga foʻi le isi pogai, ma ua lolo atu ai nisi i le mailei o le tautū i mafaufauga o le tagata lava ia. Po o le ā lava le māfuaaga, ae o na muimuiga e mataʻutia tele, auā e mafai ona toe toso atu ai i tatou i le lalolagi ma ona ala.
15 Mo se faataʻitaʻiga, o Emanuele, o se Molimau sa suʻesuʻe masei tele i nisi o mea na ia faitau ai i lomiga a le “auauna faamaoni ma le mafaufau.” (Mataio 24:45) Na ia lē toe faitauina a tatou lomiga ma iʻu lava ina ia taʻu atu i toeaina o lana faapotopotoga faapea, e lē toe fia avea o ia ma se tasi o Molimau a Ieova. Peitaʻi, e leʻi leva mulimuli ane, ae toe iloa e Emanuele, o lea lava sa saʻo lelei aʻoaʻoga a le faalapotopotoga a Ieova. Na ia toe faafesootaʻi maia Molimau, faailoa i ai lona sesē, ma toe faaeaina ai e avea o se Molimau a Ieova. O le iʻuga, na toe avea ai o ia o se tamāloa fiafia.
16. O le ā e mafai ona fesoasoani iā i tatou ina ia aveesea o tatou lē mautonu i nisi o aʻoaʻoga faa-Kerisiano?
16 Ae faapefea pe afai ua tatou lagona le fia muimui ona tatou te lē o mautinoa i nisi o aʻoaʻoga o loo masani ai le faalapotopotoga a Ieova? Ia lava pea le onosaʻi. Atonu e mulimuli ane o le a lolomi mai e le “auauna faamaoni” se faamatalaga e tali ai a tatou fesili ma faamanino ai o tatou lē mautonu. E atamai lo tatou saʻili atu mo se fesoasoani a toeaina Kerisiano. (Iuta 22, 23) O le tatalo, o suʻesuʻega a le tagata lava ia, ma le aufaatasi ma isi uso talitonu e malolosi faaleagaga, e mafai ona fesoasoani e aveesea o tatou lē mautonu, ae tatou matuā talisapaia ai upu moni a le Tusi Paia, lea o loo tatou aʻoaʻoina mai le auala o loo fesootaʻi mai ai Ieova.
Ia Iai Pea le Uiga Mautinoa
17, 18. Na i lo le muimui, o le ā le uiga e tatau ona iā i tatou, ma aiseā?
17 O le mea moni, e iai lava i tagata lē lelei atoatoa le faanaunauga e fai le agasala, ma e iai nisi e matuā malolosi o latou faanaunauga e faaleo atu a latou faitioga lē faavaea. (Kenese 8:21; Roma 5:12) Ae afai ua fai ma a tatou masani le muimui, o le a tatou tuua ai i se lamatiaga la tatou faiā ma Ieova le Atua. E manaʻomia la ona tatou puleaina lelei so o se faanaunauga e fia muimui.
18 Na i lo le muimui i mea i le faapotopotoga, e lelei pe a iā i tatou pea se uiga mautinoa, ma ola i se olaga e tele ai pea mea tatou te faia, ma tatou olioli, faaaloalo, paleni, ma sologa lelei ai i le faatuatua. (1 Korinito 15:58; Tito 2:1-5) O loo pulea e Ieova mea uma lava i totonu o lana faalapotopotoga, ma o loo silafia lelei mai e Iesu mea o loo tutupu i faapotopotoga taʻitasi, e pei lava ona sa iai i le uluaʻi senituri. (Faaaliga 1:10, 11) Ia faatalitali pea i le Atua ma Keriso, le Ulu o le faapotopotoga. E mafai ona faaaogā leoleo mamoe agavaa e faasaʻoina mataupu na o loo manaʻomia ona toe fetuunaʻi.—Salamo 43:5; Kolose 1:18; Tito 1:5.
19. A o leʻi oo ina pule aoao le Malo i mataupufai a tagata, o le ā e tatau ona tatou taulaʻi atu i ai?
19 Ua toe o se aga ona faamuta lea o lenei faiga leaga o mea, ae o le a pule aoao le Malo Faa-Mesia i mataupufai a tagata. Peitaʻi, a o leʻi oo atu i lenā taimi, maʻeu le tāua mo i tatou taʻitoʻatasi ona faatumauina se uiga mautinoa! O inā e mafai ai ona tatou amanaʻia uiga lelei o o tatou uso talitonu, na i lo le taulaʻi atu i o latou masei. E tatou te fiafia ai foʻi pe a taulaʻi atu i vala lelei o o latou uiga faaletagata. Na i lo le alu uma o lo tatou malosi e muimui, ae o le a faalaeiauina ma faamalosia ai i tatou faaleagaga.
20. O ā faamanuiaga o le a tatou maua pe a iā i tatou se uiga mautinoa?
20 O se uiga mautinoa o le a mafai ai fo’i ona tatou manatua le tele o manuia ua tatou maua ona o lo tatou auaumea faatasi ma le faalapotopotoga a Ieova o i le lalolagi. Ua na o le pau lenei o le faalapotopotoga i le lalolagi o loo faamaoni atu i le Pule Silisili Ese aoao. O le ā sou manatu i lenā mea moni, aemaise foʻi le faaeaga o le tapuaʻi atu iā Ieova, le Atua moni e toʻatasi? Talosia ia pei ou uiga o Tavita, o lē na pese: “Le faafofoga tatalo e, e ō atu iā te oe tagata uma lava. Amuia lē ua e filifilia, ma ē faalatalataina o ia iā te oe, e nofo o ia i ou lotoā; e maoona i matou i mea lelei o i lou fale.”—Salamo 65:2, 4.
E te Manatua?
• Aiseā e tatau ai ona tatou talisapaia i latou o loo taʻimua i le faapotopotoga?
• E faapeʻī o tatou uiga e tatau ona iai pe a faia e uso o loo taʻimua ni mea sesē?
• E faapeʻī o tatou manatu e tatau ona iai, i ni toe fetuutuunaʻiga atili i le malamalamaga o le Tusi Paia?
• O le ā e mafai ona fesoasoani i se Kerisiano ina ia foʻia ni ona manatu lē mautonu?
[Fesili mo le Suʻesuʻega]
[Ata i le itulau 20]
Na tuu atu e Tavita iā Solomona le ata tusi o le malumalu, ma ia lagolagoina le tapua’iga moni
[Ata i le itulau 23]
E fiafia toeaina Kerisiano e saunia mai le fesoasoani faaleagaga