E Lē Mafai Ona E Teua E Sili la Ona Faaaogā Lelei

E LĒ faatali le taimi i se tagata. E faaalia i lenei muagagana, e lē mafai ona e toe faafoʻi maia le taimi. E lē mafai ona e teuina e faaaogā i se isi avanoa. E lē mafai ona e sefeina le taimi, e ala i lou lē faaaogā o le taimi. O le ā e tupu pe afai e valu itula o e moe, ona e taumafai lea e sefe isi itula uma o totoe o le aso, e ala i le leai o sau mea e faia ai? E iʻu ane le aso, ua maʻimau uma na itula sa leʻi faaaogāina.

E mafai ona faatusa le taimi i se vaitafe tele o loo tatafe atu i se itulagi e tasi. E lē mafai ona e taofia, e lē mafai foʻi ona e faaaogā uma vai o loo tafe mai ai. I tausaga ua mavae, sa fausia ai e tagata ni afi e vili ai le vai i auvai o vaitafe. Na latou faia ina ia taofiofia pe pulea ai le tatafe o le vai, ae faaaogā le malosiaga mai le suāvai e faagaoioi ai a latou maaolo, o ʻililaupapa, o pamu, ma samala tetele e sasa ai uʻamea. E faapena foʻi le faaaogāina o le taimi, e lē mafai ona e teua, ae mafai ona e faaaogā e faataunuu ai se galuega lelei. Peitaʻi, e lua ni mea autū o loo alu lē aogā ai le taimi, ma e tatau ona e taumafai e foʻia—o le fai mea tuu, ma le tele o mea lē manaʻomia. Seʻi tatou talanoa muamua la i le fai mea tuu.

ʻAlofia le Fai Mea Tuu

Fai mai se fuaitau e masani ai nisi tagata, Aua e te tuua mo taeao se mea e mafai ona e faia i le asō. Peitaʻi ua liliu e nisi tagata lenā fuaitau, i se manatu e tai uiga faapea, Aua le popole fua e vave fai se mea, auā e leʻi taitai se taimi. Pe afai e iai se galuega ua matuā manaʻomia ona fai, latou te manatu, e sili pe a tuu e fai i se isi taimi. O le faamatalaga a se tasi lomifefiloi e tusa ai o le “fai mea tuu” o lona uiga, o le “faataatia ese ma le loto i ai, ma o se mea ua fai ma masani; e faataatia ese ma le loto i ai se mea e tatau ona fai.” O lenā ituaiga o tagata, ua fai mana masani le faataatia ese o mea e tatau ona ia faia. Pe a oo la ina vevesi le mafaufau ona o ni mea e tatau ona fai, na pau le itu e mapu i ai, o le faataatia ese o na mea ae evaeva ai lava i le taimi lea ua ia manatu o sona “taimi avanoa”—seʻi oo foʻi ina toe vevesi ane mea e tatau ona fai.

E iai taimi, atonu e manaʻomia ona tolopō le faia o nisi galuega po o galuega uma, pe afai e lē o fetaui ma le malosi o o tatou tino po o faalogona. E iai foʻi taimi e manaʻomia ai e tagata taʻitoʻatasi ona mālōlō mai a latou faasologa masani o aso taʻitasi. Sa faapena foʻi le Alo o le Atua. Sa galue malosi Iesu i lana faiva i taimi uma, ae sa ia faaavanoa foʻi se taimi e mālōlō ai ma ona soo. (Mareko 6:31, 32) E aogā tele lenei mālōlōga. Peitaʻi e lē tutusa lenā ma le fai mea tuu, auā o se uiga e ono iai ni lamatiaga. Seʻi manatu i le faaaʻoaʻoga lenei.

 E tolu vaiaso e tatau ai ona tapenapena se teine aʻoga mo lana suʻega o le numera. E tele tusi ma isi faamaumauga e tatau ona toe autaluina, ma ua ia lagona le faigatā. Ua mafaufau nei e sili ai pe a faataatia seʻi fai i se isi taimi, ma o le mea lenā na tupu. Na i lo le fai o meaaʻoga, ua matamata le televise. Ua faasolo pea aso, ae o loo tolopō pea le faiga o meaaʻoga mo le suʻega. Ua oo i le pō ae taeao aʻe le suʻega, ma ua faatoʻā faasaga atu e fai uma ana meaaʻoga i lenā pō e tasi. Ua saofaʻi ifo ma amata faasolo lana faitau i faamaumauga uma ma isi tusi.

Ua matuā umi se taimi o punou i meaaʻoga. Ua momoe uma tagata o le aiga, ae o lea lava o loo tauivi malosi e aʻo faatauloto fua eseese uma e suʻe ai tali i fesili o le suʻega. Ina ua oo i le aso e sosoo ai, le aso o le suʻega, sa faigatā i lona mafaufau ona faavasega tali o fesili, ona ua matuā vaivai i le lē lava o sana moe. E leʻi lelei lana suʻega ma e leʻi pasi foʻi. O lea na manaʻomia ai ona ia toe suʻesuʻe i le mataupu lava lea, ma atonu foʻi ua lē agavaa e sii atu i le isi vasega e sosoo ai.

Na matuā taugā āuga o le fai mea tuu i lenei teine aʻoga. Ae o se mataupu silisili lenei o le Tusi Paia e mafai ona fesoasoani iā i tatou e ʻalofia ai le ono oo i lenā tulaga. Na tusi le aposetolo o Paulo: “Ia faaeteete outou ina ia outou savavali ma le faautauta, aua neʻi faapei o ē valelea, a ia faapei o ē popoto; [“i le faatauina mai o le taimi tatau mo outou lava,” NW].” (Efeso 5:15, 16) O le timaʻiga a Paulo mo Kerisiano, ina ia faaaogā ma le atamai lo latou taimi mo fuafuaga faaleagaga, ae o taʻiala foʻi na e aogā i le tele o isi meafai o le olaga. Talu ai e masani ona tatou filifilia le taimi e faatino ai se galuega, e vave la ona faataunuu le galuega ma iai ni iʻuga lelei, pe a vave ona tatou amata faatino lenā galuega i le taimi “tatau,” po o le taimi ua sili ona talafeagai e faataunuu ai. O inā e iloa ai le tagata e “faautauta,” e pei ona taʻua e le mau.

O fea le “taimi tatau” mo le teine aʻoga e suʻesuʻe ai ana meaaʻoga mo le suʻega? Atonu sa tatau ona ia faaalu pe taʻi 15 minute pe sili atu foʻi i pō uma e suʻesuʻe ai. Na semanū e faasolosolo lelei le toe autaluina o ana meaaʻoga, ma lē vevesi solo ai i le pō mulimuli e tau fai ana meaaʻoga i le taimi ua tatau ona lava lelei ai sana moe auā le suʻega i le aso fou. Na semanū e toʻafilemu lelei ma sauniuni lona mafaufau i le taimi o le suʻega, ma iʻu ai i se taunuuga lelei.

Afai e tuuina atu iā te oe se galuega e fai, ia e filifili lelei le “taimi tatau” e faatino ai, ma fai loa. Ona lē maileia ai lea o oe i le fai mea tuu, ma e selesele i āuga leaga. E malie ai foʻi lou loto pe a māeʻa se galuega ua lelei ona e faatino. E tāua tele lenei manatu pe afai o le galuega lea e te faia o le a aafia ai isi tagata, e pei o ni tofiga i totonu o le faapotopotoga Kerisiano.

Faaitiitia Mea e Lē Manaʻomia

E pei ona muaʻi taʻua, o le vala lona lua mo le faaaogāina lelei o o tatou taimi tāua, o le ʻalofia o le tele naʻuā o mea lē manaʻomia e tau faavasega. Ua tatou iloa, e tele naʻuā le taimi e alu e taulima ai mea, e faavasega, faaaogā, fufulu, teu, ma tausi faalelei. A tele mea, ua tele foʻi le taimi e alu ai. O le galue i totonu o se potu po o se fale e anoanoaʻi mea o iai, e tele le taimi e alu ai ma fiu ai foʻi, na i lo le galue i potu ma fale e telē le avanoa ma tau leai ni mea o iai. O le faateleina o mea e tuu i se fale, o le tele foʻi lenā o le taimi e alu ai i le tau suʻeina o se mea pe a manaʻomia.

E tusa ai ma faamatalaga a i latou ua tomai faapitoa i le teufale, e toetoe lava o le ʻafa o le  taimi e tatau ona tapena ai le fale, e maʻimau uma i le “tau fetuunaʻiga, ma le fesiitaʻiga solo o le mau mea, ma tau tapena ese le lapisi.” O le tulaga foʻi lenā o loo iai i isi vala o le olaga. O lea, afai e te fia faaaogā lelei lou taimi, seʻi toe tagaʻi tasi ane lava i lou siʻosiʻomaga. Po o tele naʻuā se gasu o iai i ou autafa, ua tau lē mafai ai ona e minoi, aemaise ai le maʻimau o lou taimi i le tau faavasegaina? Afai o loo e aafia i lenā faafitauli, ua tatau nei loa ona faaitiitia le tele o mea e lē manaʻomia.

Atonu e lē faigofie ona e lafoaʻia nisi mea. E ono tigā ai lagona pe afai o ni mea sa pele iā te oe, ae ua tatau ona tiaʻi auā ua lē o toe iai se aogā—e tai pei ua motusia le mafutaga ma se uō mamae. E faapefea la ona fai lau filifiliga i le mea e teu ma le mea e tiaʻi? O nisi ua latou faia se mea e taʻu o le tulafono mo le tasi le tausaga. Afai ua atoa le tausaga e te lē o faaaogāina se mea, ua tatau loa ona tiaʻi. Faapefea pe afai o loo e faalotolotolua pea pe tiaʻi, ina ua mavae le tausaga? Toe teu i se mea mo se isi ono masina. Afai e te toe tilotilo atu i ai ma e iloa ua atoa le tausaga ma le ʻafa e te lē o faaaogāina lava, ua tatau la ona faigofie loa le tiaʻi ese. Po o le ā lava le tulaga, ae o le sini autū, ia faaitiitia le tele o mea e lē manaʻomia—ma ia faaaogā lelei ai lou taimi.

O lenei faafitauli e lē o patino i na o mea o i lou fale pe i lau galuega. Na taʻua e Iesu “le loto popole i mea a lenei lalolagi, ma le pepelo o le ʻoa,” lea e mafai ona “fetinaʻiina ai le upu” a le Atua ma avea ai se tasi ma sē ua “lē fua mai” i le tala lelei. (Mataio 13:22) E mafai ona tele naʻuā meafai ma mea o loo saʻilia i le olaga o se tasi, ma ua faafaigatā ai iā te ia ona maua se taimi lelei e tausia ai lana faasologa ma lona paleni faaleagaga, o ni mea e sili atu ona tāua. E iʻu ina pagatia ai faaleagaga, ma lē oo atu ai i le lalolagi fou ua folafola mai e le Atua, lea o le a faavavau ona maua ai le taimi e fai ai mea uma tatou te fiafia ma faamalieina ai.—Isaia 65:17-24; 2 Peteru 3:13.

Po o fai pea mau masani le tau faavasega o ni taimi e fai uma ai mea e te lagona e tatau ona fai—po o ni mea o lau galuega, i le fale, le taavale, i ou mausa, ni faigāmalaga, ni faamalositino, ni faatasitasiga faasamasamanoa, po o nisi lava manaʻoga? Afai o lou tulaga lenā, o le taimi la lenei ua tatau ai ona e faaitiitia nisi mea, ina ia lava sou taimi mo manaʻoga faaleagaga.

O le isi muagagana masani, O le taimi ma le tai e lē faatali i se tagata. E fetafeaʻi le taimi e pei o le tafe a se vaitafe. E lē mafai ona toe faatafe mai i tua pe sefe foʻi; o le taimi lava e uma ai, e mou ese loa e faavavau. Peitaʻi, o le utagia o fautuaga a le Tusi Paia ma uia nisi laasaga talafeagai, e mafai ai ona tatou faafesootaʻi atu le taimi o loo faatino ai ‘mea e sili atu ona tāua,’ ma lo tatou manuia e faavavau, ma le ‘viiga ma le faaneeneeina o le Atua.’—Filipi 1:10, 11.

[Ata i le itulau 8]

E pei le taimi o se vaitafe o loo tatafe, e mafai ona faaaogā mo galuega lelei

[Ata i le itulau 9]

O lē fea “le taimi tatau” mo le teine e suʻesuʻe ai ana meaaʻoga mo le suʻega?

[Ata i le itulau 10]

O le galue i se vaipanoa o loo tumu ai mea, o le a tele se taimi e alu ai, ma e lagona ai foʻi le fiu