Fesili Mai le ʻAufaitau

E faapefea ona tatou iloa o le faamatalaga e uiga i le poto o loo i le Faataoto 8:22-31, e faasino iā Iesu Keriso i lona uluaʻi soifuaga i le lagi a o leʻi afio mai i le lalolagi?

O lenā faamatalaga faagaeeina e uiga i le poto o loo maua i le tusi o Faataoto, e faitau faapea: “O Ieova e ona lava aʻu, o le amataga o lona ala, e muamua i ana galuega anamua. . . . Sa fanaua aʻu, a o leʻi faavaeina mauga, e leai foʻi ni mauga iti; . . . A o faatumauina e ia le lagi na ou i ai; . . . na ou i ai ma ia, o aʻu o le tufuga; na fai foʻi aʻu mona fiafia i lea aso ma lea aso; sa ou olioli i ona luma i aso uma lava. . . . O loʻu fiafia foʻi, sa i le fanau o tagata lea.”

E lē mafai ona faasino lenei faamatalaga i le poto mai le Atua po o le poto faalemafaufau. Aiseā? Ona o le poto o loo faamatala i le mau lenei o loo taʻua faapea, na faia pe na foafoaina e avea ma amataga o le ala o Ieova. Ua leva ona iai le Atua ma iai lona atamai. (Salamo 90:1, 2) E leai se amataga o lona atamai; e leʻi foafoaina foʻi. E leʻi “fanaua” foʻi. E lē gata i lea, o loo taʻua faapea o le poto lenei e tautala ma gaoioi, ua atagia mai ai o se tagata.—Faataoto 8:1.

O loo taʻua i le tusi o Faataoto, ua leva ona iai faatasi le poto ma Ieova, o Lē na Faia Mea Uma, e avea o se “tufuga.” E mautinoa e faasino iā Iesu. A o leʻi taitai afio mai Iesu i le lalolagi, na la galulue vavalalata ma Ieova, lea ua faapea mai ai le Tusi Paia: “O ia foʻi o le uluaʻi o mea uma lava, o loo faatumauina foʻi mea uma lava ia te ia.”—Kolose 1:17; Faaaliga 3:14.

Ua talafeagai le faaatagia e le Alo o le Atua o le poto, ona o ia na faailoa maia fuafuaga ma poloaʻiga atamai a Ieova. I le uluaʻi soifuaga o Iesu i le lagi a o leʻi afio mai i le lalolagi, na avea o ia o le Upu po o le Fofoga Fetalai a le Atua. (Ioane 1:1) O loo faamatalaina o ia o le “mana o le Atua, ma [le] poto o le Atua.” (1 Korinito 1:24, 30) Maʻeu se faamatalaga matagofie e uiga i le Alo o le Atua, o lē na fiafia i le fanau a tagata ma uunaʻia ai e tuuina atu lona soifua e fai ma togiola mo i latou!—Ioane 3:16.

[Ata i le itulau 31]

“Sa fanaua aʻu, a o leʻi faavaeina mauga”