Ia Mataʻu iā Ieova ma ia Fiafia!

“Amuia [pe fiafia] le tagata o lē mataʻu iā Ieova.”—SALAMO 112:1.

1, 2. O le ā e maua pe a mataʻu iā Ieova?

E LĒ faigofie ona maua le fiafia. O le fiafiaga moni e faatoʻā maua pe a saʻo filifiliga e fai, ia faia mea lelei, ma liliu ese mai le faia o mea sesē. Ua foaʻi mai e Ieova o Lē na Faia i tatou, lana Afioga le Tusi Paia, ina ia aʻoaʻo ai i tatou i le auala e maua ai se olaga e sili ona fiafia. O le saʻili atu i le taʻitaʻiga a Ieova ma mataʻu iā te ia, o le a tatou maua ai le faamalieina ma le fiafiaga moni.—Salamo 23:1; Faataoto 14:26.

² O le a tatou talanoaina i lenei mataupu, ni faaaʻoaʻoga anamua ma aso nei e faaalia ai, o le mataʻu moni i le Atua e maua ai e se tasi le malosi e teena le faia o mea sesē, ae lototele e fai le mea saʻo. O le a tatou iloa ai, e maua le fiafia pe a mataʻu i le Atua, auā e uunaʻia ai i tatou e faasaʻo se ala sesē, e pei ona faia e le tupu o Tavita. Tatou te iloa ai foʻi, o le mataʻu iā Ieova o le tofi sili lea ona tāua e mafai e mātua ona faasolo mai i a latou fanau. Ioe, ua faamautinoa mai e le Afioga a le Atua iā i tatou: “Amuia [pe fiafia] le tagata o lē mataʻu iā Ieova.”—Salamo 112:1.

Ua Toe Faafoʻisia le Fiafia

3. O le ā na mafai ai e Tavita ona toe maua lona malosi ina ua mavae lana agasala?

³ E pei ona talanoaina i le mataupu na mavae atu, e tolu ni taimi iloga na lē faaalia ai e Tavita lona mataʻu i le Atua, ma faia ai le agasala. Peitaʻi e iloa i lana tali atu i le aʻoaʻiga a Ieova, e ui ina agasala, ae o se tasi e mataʻu moni i le Atua. O lona migao faaaloalo i le Atua na uunaʻia ai e taʻutino lana agasala, faasaʻo ona ala, ma toe faalelei le la faiā ma Ieova. E ui sa mafatia o ia ma isi ona o āuga o lana agasala, ae o lona salamō faamaoni na toe finagalo malie ai Ieova iā te ia, ma toe maua Lana lagolagosua faifai pea. O le faaaʻoaʻoga a Tavita e mautinoa le faalototeleina ai o Kerisiano i aso nei, o ē ono paʻū atu i se agasala matuiā.

4. E mafai faapefea e le mataʻu i le Atua ona fesoasoani i se tasi e toe maua ai lona fiafia?

⁴ Manatu i le mea na tupu iā Sieni. * E ui sa  auauna o se tagata talaʻi faataimi atoa, ae sa leʻi lelei ana aumea, ma iʻu ai ina aafia i ni amioga lē faa-Kerisiano, ma faateʻaina mai le faapotopotoga. Ina ua toe saʻo lona mafaufau, sa ia faia mea uma e toe faalelei ai le la faiā ma Ieova. Mulimuli ane sa toe faaaʻe mai. I le taimi atoa na faateʻa ai, sa lē taitai muta le faanaunauga o Sieni e fia auauna iā Ieova. Na iʻu ina toe foʻi i le auaunaga paeonia, ma mulimuli ane sa faaipoipo atu i se uso lelei, o se toeaina Kerisiano. I le taimi nei ua la auauna fiafia i le faapotopotoga. E ui e faanoanoa Sieni ona o si taimi lea na see ese ai mai ala o Ieova, ae ua fiafia ona sa avea lona mataʻu i le Atua, ma fesoasoani iā te ia e toe foʻi mai ai.

E Sili ai le Mafatia na i lo le Faia o le Agasala

5, 6. Faamatala mai pe na faapefea ma aiseā na faalua ai ona faasaoina e Tavita le ola o Saulo.

⁵ E sili ona lelei pe a mafai e le mataʻu i le Atua, ona fesoasoani i se tasi e lē faia ai le agasala i le uluaʻi taimi e tau tofotofoina ai. Na faamaonia lenā mea iā Tavita. Sa iai se taimi na ō atu ai Saulo ma lana ʻautau e toluafe e tuliloa Tavita. Sa latou ulu atu i se ana —lea e lalafi tonu ai lava Tavita ma ona tagata i le muliana. Sa tauanau e tagata Tavita ina ia fasiotia Saulo. Pe lē o lea ea ua tuuina mai e Ieova lona fili i ona lima? Na tolotolo lemū atu Tavita i le itu o loo moe ai Saulo, ma sesele ese lona pito ofu. E oo lava i sia gaoioiga itiiti na fai e peiseaʻī e lē afaina, ae na matuā tuia ai le loto o Tavita, ona o lona mataʻu i le Atua. Na ia taofia ona tagata ma faapea atu: “Ia faamamao e Ieova iā te aʻu ona ou faia lenā mea i loʻu alii, lē ua faauuina e Ieova.” *—1 Samuelu 24:1-7.

⁶ I se isi taimi mulimuli ane, a o tolauapi Saulo i le pō, ‘sa faamoegase e Ieova’ o ia ma ona tagata. Sa tolotolo atu Tavita ma Apisai i le ogatotonu o le togālauapi, ma tutū i luga aʻe o le ulu o Saulo a o moe. Sa manaʻo Apisai e fasioti Saulo i lenā lava taimi, ae na taofi e Tavita ma fesili atu i ai: “Po o ai ea na te faaoo lona lima i lē ua faauuina e Ieova, a e lē nofo sala ai o ia?”—1 Samuelu 26:9, 12.

7. O le ā na taofia ai Tavita mai lona faia o le agasala?

⁷ Aiseā na lē fasiotia ai e Tavita Saulo ina ua faalua ona ia maua le avanoa e fai ai? Talu ai sa sili ona mataʻu Tavita iā Ieova, na i lo lona fefe iā Saulo. Ona o le mataʻu o Tavita i le Atua, na nofosauni ai e mafatia pe a talafeagai, na i lo le faia o se agasala. (Eperu 11:25) Sa matuā talitonu o ia i le tausia e Ieova o Ona tagata, aemaise foʻi iā te ia. Na iloa e Tavita, o le usiusitai ma le faatuatua i le Atua o le a maua ai le fiafia ma le tele o faamanuiaga, ae o le lē amanaʻia o le Atua e iʻu ina lē toe talia ai o ia e Ieova. (Salamo 65:4) Na ia iloa foʻi, o le a faataunuu e Ieova lana folafolaga e fai o ia (Tavita) ma tupu, ae faatulaʻi ese Saulo i Lana taimi ma Lana auala talafeagai.—1 Samuelu 26:10.

O le Mataʻu i le Atua e Maua ai le Fiafia

8. Ua avea faapefea le amio na faaalia e Tavita a o feagai ma omiga, o se faaaʻoaʻoga lelei?

⁸ Ona o i tatou o ni Kerisiano, tatou te faatalitalia ai tauemuga, o sauāga, ma isi tofotofoga. (Mataio 24:9; 2 Peteru 3:3) I nisi taimi, atonu tatou te fesagaʻi ma ni toʻatugā e aofia ai nisi uso tapuaʻi. Ae ia tatou mautinoa o loo sisila mai fofoga o Ieova i mea uma lava, o loo ia faafofoga mai i a tatou tatalo, ma o le a ia faasaʻoina foʻi mea i lana taimi tatau, e tusa ma lona finagalo. (Roma 12:17-21; Eperu 4:16) O lea la, na i lo le fefefe i ē tetee mai, ae tatou te matataʻu i le Atua ma taulaʻi atu e na te laveaʻia i tatou. Ia tatou pei o Tavita, tatou te lē faia le taui ma sui, tatou te lē suia foʻi taʻiala amiotonu ina ia ʻalofia ai mafatiaga. O le iʻuga, e tatou te maua le fiafia. E faapefea?

9. Taʻu mai se faaaʻoaʻoga o le faapefea i le mataʻu i le Atua ona iʻu ai i le fiafia e ui i sauāga.

⁹ Na faamatala mai e se tasi uso ua leva ona auauna o se misionare i Aferika: “Ou te  mafaufau lava i le faaaʻoaʻoga lelei a se tinā ma sana tama teine talavou, na mumusu e faatau se pepa mo se vaega faapolotiki, talu ai lo la solitū faa-Kerisiano. Sa sasa faamoʻamoʻa i laʻua e ni tamāloloa ona tuu atu lea e ō i lo la fale. A o la savavali, sa taumafai le tinā e faamāfanafana i si ana tama o loo tagi, ma e leʻi malamalama le teine pe aiseā ua tupu ai lenei mea. Atonu e leʻi fiafia i lenā taimi, peitaʻi sa iā i laʻua se lotofuatiaifo mamā. Mulimuli ane sa matuā fiafia i lo la usiusitai i le Atua. Pe ana la faatauina pepa faapolotiki, semanū o le a fiafia tagata na iai. Semanū e avatu e tamāloloa ni a la faguinu ma sisiva i o la autafa a o savavali i le fale. Peitaʻi na semanū e matuā faanoanoa ai lenei tinā ma lana tama, ona ua lē faamaoni iā Ieova.” Ioe, o lo la mataʻu i le Atua, na faasaoina ai mai na mafatiaga uma.

10, 11. O ā ni iʻuga lelei na maua e se fafine ona o lona mataʻu i le Atua?

¹⁰ O le mataʻu i le Atua e iʻu ai foʻi i le fiafia pe a fesagaʻi ma ni tofotofoga e aofia ai le manatu e paia le ola. Ina ua maʻitaga Maria i lana tama lona tolu, sa uunaʻia o ia e le fomaʻi e faapaʻū le pepe i le faapea atu: “E tugā tele le tulaga o loo e iai. E ono tupu faafuaseʻi se mea mataʻutia ma e oti ai i totonu o le 24 itula, ona oti ai foʻi lea ma lau pepe. Po o le ā lava le tulaga e iai, ae leai se faamautinoaga pe ola mālōlōina lau pepe.” O le taimi lea o loo fai le suʻesuʻega faale-Tusi Paia a Maria ma Molimau a Ieova, ae leʻi papatiso. Fai mai Maria: “Na ou filifili e auauna iā Ieova, ma sa ou maumauaʻi e usitai pea iā te ia e tusa lava po o le ā le mea e tupu.”—Esoto 21:22, 23.

¹¹ A o faagasolo lona maʻitaga, sa pisi pea Maria e suʻesuʻe le Tusi Paia ma tausi lona aiga, seʻia oo ina fanau mai le pepe. Fai mai a ia: “Sa tau faigatā teisi lava laʻu fanauga lea na i lo isi muamua e lua, peitaʻi sa leʻi iai se toʻatugā mataʻutia.” O le mataʻu o Maria i le Atua na mafai ai ona ia tausia se lotofuatiaifo lelei, ma e leʻi leva ae papatiso loa. A o tuputupu aʻe le pepe, sa aʻoaʻoina foʻi lenei tama e mataʻu iā Ieova, ma o loo auauna nei o ia i se ofisa o lālā o Molimau a Ieova.

Ia ‘Faamalosia Oe e Ieova’

12. Na faapefea e le mataʻu o Tavita i le Atua ona faamalosia ai o ia?

¹² O le mataʻu o Tavita iā Ieova, na ia faia ai nisi mea e ese mai le taofia o le faia o le mea sesē. Na faamalosia ai o ia e gaoioi maumauaʻi ma le atamai pe a fesagaʻi ma tulaga faigatā. E tausaga atoa ma masina e fā o lalafi Tavita ma ona tagata mai iā Saulo i Sekeleka i Filisitia. (1 Samuelu 27:5-7) I se isi aso a o ō ese atu tane o le nuu, na osofaʻia ai e Amaleka le aai ma susunu i lalo, ma ave foʻi avā a tamāloloa, o atalii ma afafine, ma lafumanu. Ina ua foʻi ane Tavita ma ona tagata ma vaaia le mea ua tupu, sa latou fetagisi. Na vave ona liua lenā faavauvau i le lotoa, ma na tautala tagata o Tavita o le a latou fetogi iā te ia. E ui sa mafatia Tavita ae sa leʻi faavaivai ai. (Faataoto 24:10) O lona mataʻu i le Atua na ia liliu atu ai iā Ieova mo se fesoasoani, ma sa ‘faamalosia o ia e Ieova.’ O inā na mafai ai e Tavita ma ona tagata ona latou manumalo mai ia Amaleka, ma toe faafoʻi mai mea uma na aveesea.—1 Samuelu 30:1-20.

13, 14. Na faapefea i le mataʻu o se tasi Kerisiano i le Atua, ona fesoasoani e faia ni ana filifiliga lelei?

¹³ O loo fesagaʻi foʻi auauna a le Atua i aso nei ma tulaga e manaʻomia ai lo latou faatuatua iā Ieova ma le lototele e gaoioi maumauaʻi. Mo se faaaʻoaʻoga, o Susitina. A o talavou, sa fai sana suʻesuʻega faale-Tusi Paia ma Molimau a Ieova. Sa manaʻo e avea o ia ma tāpiano i koneseti, ma sa lelei tele lana agaʻigaʻi i luma i lenā tomai. Ae sa faamamafa naʻuā e Susitina lana talaʻi, o le mea lenā sa fefe ai e talia ni tiute tauave e tatau ona ia faatino pe a uma ona papatiso. A o faaauau pea lana suʻesuʻega, sa amata ona ia lagona le mana o le Tusi Paia. Sa ia aʻoaʻoina le mataʻu iā Ieova, ma iloa foʻi e faatalitalia e Ieova ana auauna ia alolofa atu iā te ia ma o latou loto atoa, manatu, agaga, ma le malosi atoa. (Mareko 12:30) O inā na uunaʻia ai Susitina e tuuina atu lona ola iā Ieova ma papatiso.

 ¹⁴ Sa ole Susitina iā Ieova mo se fesoasoani ina ia agaʻigaʻi pea i luma faaleagaga. Fai mai a ia: “Sa ou iloa o le olaga o se tāpiano i koneseti e aofia ai le femalagaaʻi i taimi uma, ma ni konekarate e tatau ona tātā ai i le tusa ma le 400 ni koneseti i le tausaga. Ona ou manatu lea, e sili ai pe a ou faiaʻoga, ina ia ou maua se seleni e tausi ai aʻu ma ou auauna ai o sē talaʻi faataimi atoa.” A o le taimi lenā ua uma ona faatulaga ai lana uluaʻi faaaliga e fai i se maota e lauiloa mo koneseti i lona atunuu. Fai mai a ia: “O laʻu faaaliga muamua, o laʻu faaaliga mulimuli foʻi lenā.” Ua faaipoipo atu Susitina i se toeaina Kerisiano, ma o loo la auauna nei i se ofisa o lālā o Molimau a Ieova. Ua fiafia ona sa foaʻi atu e Ieova iā te ia le malosi e fai ai ana filifiliga saʻo, ma ua mafai ai nei ona faaaogā lona taimi ma lona malosi i le auaunaga iā Ieova.

Se Tofi Sili Ona Tāua

15. O le ā sa manaʻo Tavita e faasolo atu i lana fanau, ma na faapefea ona ia faia?

¹⁵ Na tusi mai Tavita: “Le fanau e, inā ō mai ia, inā faalogologo mai ia iā te aʻu; ou te aʻoaʻo atu iā te outou ia matataʻu iā Ieova.” (Salamo 34:11) I le avea o Tavita o se tamā, sa ia faanaunau e faasolo atu i lana fanau le tofi sili ona tāua—o le mataʻu moni ma le aogā, iā Ieova. E ala i upu ma gaoioiga, na faaatagia mai ai e Tavita Ieova, e lē o se Atua e tagisā ma faafefe tagata, pe saʻiliʻili masei i so o se tasi e solia Ana tulafono. Na i lo lea, o Ieova o se Tamā e alofa, e tausi mai, ma loto faamagalo i Ana fanau i le lalolagi. “O ai ea na te iloa [pe mātau] amio sesē?” o le fesili lea a Tavita e faaalia ai lona mautinoa e lē o vaʻiliʻilia e Ieova i taimi uma o tatou sesē. Ae sa mautinoa e Tavita, pe afai na te faia le mea silisili, e mafai ona talia e Ieova ana upu ma ona mafaufauga.—Salamo 19:12, 14.

16, 17. E mafai faapefea ona aʻoaʻo e mātua a latou fanau ina ia matataʻu iā Ieova?

 ¹⁶ Ua avea Tavita ma faaaʻoaʻoga mo mātua i aso nei. O Lafaele, o loo auauna faatasi ma le isi ona uso i se ofisa o lālā o Molimau a Ieova. Na ia faapea mai: “Sa tausia i maʻua e o ma mātua i se auala na avea ai le upu moni o se mea fiafia. A o ma laiti, sa la faaaofia i maʻua i a la talanoaga i meafai a le faapotopotoga, ma sa ma naunau maelega ai i le upu moni e pei foʻi o laʻua. Sa la taumafai e faatalitonu i maʻua, e mafai ona ma faia mea lelei i le auaunaga iā Ieova. O le mea moni, e tele tausaga sa nonofo ai lo matou aiga i se atunuu sa telē ai se manaʻoga mo ni tagata talaʻi o le Malo, ma fesoasoani e faavae ni faapotopotoga fou.

¹⁷ “E la te leʻi faia ni tulafono faigatā se tele e tausi ai i maʻua i le ala saʻo, peitaʻi sa mataʻina iā i maʻua le talitonu o o ma mātua, e matuā moni lava Ieova, ma e sili ona lelei o ia. Sa la taumafai e iloa lelei Ieova ma faamalie lona finagalo, o inā na ma aʻoaʻoina mai ai le mataʻu moni i le Atua ma le alofa mo ia. E tusa pe ma te faia se mea sesē, e la te leʻi tuua iā i maʻua se lagona faapea ua lē toe alofa mai Ieova iā i maʻua; e la te leʻi feita foʻi ma soona faia ni faasāsāga ia i maʻua. O le tele o taimi, matou te nonofo ifo ma talanoa mai iā i maʻua, o nisi taimi e talanoa mai lava lo ma tinā ma ona loimata, a o taumafai e pāʻia o ma loto. Sa aogā na taumafaiga. O upu ma gaoioiga a o ma mātua na ma iloa ai, o le mataʻu iā Ieova o se mea matagofie, ma o le avea o se tasi o sana Molimau o se mea e olioli ma fiafia ai, ae lē o se avega mamafa.”—1 Ioane 5:3.

18. O ā mea tatou te maua pe a mataʻu i le Atua moni?

¹⁸ I nisi o ‘toe upu a Tavita’ tatou te faitau ai: “O lē ua pule i tagata ia faia ma le tonu; ia pule ma le mataʻu i le Atua; e pei o le malamalama o le taeao ina ua alu aʻe le lā.” (2 Samuelu 23:1, 3, 4) E foliga na malamalama Solomona, le atalii o Tavita i le moni o nei upu, auā na ia talosaga atu iā Ieova ina ia foaʻi mai iā te ia “le loto matala” ma le tomai “ia masino ai i le lelei ma le leaga.” (1 Tupu 3:9) Na mautinoa e Solomona, o le mataʻu iā Ieova o le ala lea e maua ai le poto ma le fiafia. Mulimuli ane, na ia toe taaofaʻi mai ai le tusi o Failauga i upu nei: “Seʻi o tatou faalogo ia i le iʻuga o ia mea uma, Ia e mataʻu i le Atua, ma e anaana i ana poloaʻiga; auā o mea ia e tatau i tagata uma. Auā e faamasinoina e le Atua galuega uma, atoa ma mea lilo uma lava, o mea lelei atoa ma mea leaga.” (Failauga 12:13, 14) Afai tatou te utagia lenā fautuaga, e mautinoa o le a tatou iloa ai “o le taui o le faamaulalo ma le mataʻu iā Ieova” e lē na o le poto ma le fiafia, ae o le ‘oloa, le viiga, ma le ola.’—Faataoto 22:4.

19. O le a mafai faapefea ona tatou malamalama i le “mataʻu iā Ieova”?

¹⁹ O faaaʻoaʻoga o mea na tutupu anamua faapea foʻi i aso nei ua tatou iloa ai, o le mataʻu talafeagai i le Atua, o loo faatinoina se vaega lelei i olaga o auauna moni a Ieova. O le a taofia ai i tatou mai le faia o mea e lē fiafia ai lo tatou Tamā faalelagi, ma tatou maua ai foʻi le lototele e fesagaʻia tulaga mafatia, ma le malosi e onosaia ai tofotofoga ma toʻatugā e tulaʻi mai. O lea la, seʻi tatou vilivilitaʻi e suʻesuʻe le Afioga a le Atua, ia mafaufau loloto i mea o aʻoaʻoina, ma mafuta vavalalata iā Ieova, e ala i le tatalo e lē aunoa. O le faia faapea, o le a tatou maua ai “le poto i le Atua,” ma tatou malamalama ai foʻi i le uiga o le “mataʻu iā Ieova.”—Faataoto 2:1-5.

[Faamatalaga pito i lalo]

Pe Mafai Ona E Faamatala?

E faapefea e le mataʻu i le Atua ona

• toe maua ai e se tasi le malosi ina ua mavae se agasala matuiā?

• aumaia le fiafiaga a o feagai ma tofotofoga ma sauāga?

• faamalosia i tatou e faia le finagalo o le Atua?

• avea o se tofi moni mo a tatou fanau?

[Fesili mo le Suʻesuʻega]

[Ata i le itulau 26]

O le mataʻu o Tavita iā Ieova na ia lē fasiotia ai le tupu o Saulo

[Ata i le itulau 29]

O le mataʻu i le Atua o se tofi sili ona tāua e faasolo atu e mātua i a latou fanau