Ia Poto ma Mataʻu i le Atua!

“O le mataʻu iā Ieova, o le amataga o le poto lea.”—FAATAOTO 9:10.

1. Aiseā ua faigatā ai ona malamalama le toʻatele i le manatu o le mataʻu i le Atua?

SA IAI se taimi na manatu ai, o se faaupuga faaviivii mo se tasi pe a taʻua faapea, o se tagata e mataʻu i le Atua. Ae i aso nei, ua faapea mai le toʻatele, o le mataʻu i le Atua o se manatu faaanamua ua lē o toe faigofie ona malamalama i ai. Latou te ono fesili mai, ‘afai e alofa le Atua, aiseā la e tatau ai fua ona ou mataʻu iā te ia?’ I lo latou manatu, o le mataʻu o se mea e lē lelei, o se faalogona e faafefe ai se tasi. Peitaʻi, o le mataʻu moni i le Atua, e lautele atu se isi ona uiga, ma o le a tatou iloa ai, e lē na o se uiga po o se lagona.

2, 3. O le ā e aofia ai i le mataʻu moni i le Atua?

² O loo faaaogā i le Tusi Paia le mataʻu i le Atua, i sona uiga lelei. (Isaia 11:3) O se migao ma se faaaloalo loloto mo le Atua, o se faanaunauga malosi ia lē faia se mea e faatigā i lona finagalo. (Salamo 115:11) E aofia ai le talia ma pipii i tapulaa o amioga tatau a le Atua, ma faanaunau e usitaia mea ua ia fetalai mai e saʻo pe sesē. E taʻua i se tasi tusitusiga, o lenā mataʻu aogā o loo faamatala ai “se uiga autū e faaalia i le Atua, lea e iʻu ai i amioga atamai ma ʻalofia ituaiga uma o mea leaga.” Ua talafeagai la le faapea mai o le Afioga a le Atua: “O le mataʻu iā Ieova, o le amataga o le poto lea.”—Faataoto 9:10.

³ O le mataʻu i le Atua e sootaga atu i vala eseese o meafai a le tagata. E fesootaʻi i le poto, ae faapea foʻi i le olioli, le filemu, le tamaoaiga, le faafualoaina o le soifua, le faamoemoe, le faatuatua, ma le mautinoa. (Salamo 2:11; Faataoto 1:7; 10:27; 14:26; 22:4; 23:17, 18; Galuega 9:31) E sootaga vavalalata i le faatuatua ma le alofa. Lona uiga e aofia ai mea uma e fesootaʻi i la tatou faiā ma le Atua ma isi uso a tagata. (Teuteronome 10:12; Iopu 6:14; Eperu 11:7) E aofia ai foʻi se talitonuga maumauaʻi, o loo silasila alofa mai le Tamā faalelagi iā i tatou taʻitoʻatasi, ma e nofosauni e faamagalo a tatou agasala. (Salamo 130:4) Na o tagata amioleaga lē salamō e tatau ona fefefe i le Atua. *—Eperu 10:26-31.

Ia Aʻoaʻo e Mataʻu iā Ieova

4. E faapefea ona tatou ‘aʻoaʻo ina ia mataʻu iā Ieova’?

⁴ Talu ai o le mataʻu i le Atua o se uiga sili ona moomia mo le faia o filifiliga ma le mauaina o faamanuiaga mai le Atua, e mafai la faapefea ona tatou ‘aʻoaʻo ina ia mataʻu iā Ieova’ i se tulaga talafeagai? (Teuteronome 17:19) E tele tala o faaaʻoaʻoga a tane ma fafine o ē na matataʻu i le Atua, o loo faamauina i le Tusi Paia “e aʻoaʻo mai ai iā te i tatou.” (Roma 15:4) Ina ia tatou malamalama po o le ā le uiga moni o le mataʻu i le Atua, seʻi tatou toe tepa i le soifuaga o se tasi na faataatia na faaaʻoaʻoga, o Tavita le tupu o Isaraelu anamua.

5. Na faapefea ona aogā leoleoga mamoe a Tavita, na te aʻoaʻoina ai le mataʻu iā Ieova?

⁵ Na teena e Ieova Saulo le uluaʻi tupu o Isaraelu, ona o le fefe i tagata ma lona lē mataʻu i le Atua. (1 Samuelu 15:24-26) Peitaʻi o Tavita, o lona olaga atoa ma le la faiā māfana ma Ieova, na mātauina ai o ia o se tagata e mataʻu moni i le Atua. Mai lava i lona talavou, sa masani ona alu e leoleo mamoe a lona tamā. (1 Samuelu 16:11) Atonu o taimi na o le pō a o leoleo ana mamoe i le susulu mai o fetu o le lagi, sa mafai ai e Tavita ona malamalama i le mataʻu iā Ieova. E ui sa na o sina vaega itiiti o le vateatea ofoofogia na malamalama i ai Tavita, ae na ia faia se faaiʻuga talafeagai—ua onomea i le Atua la tatou faaaloalo ma le faaeaea. Mulimuli ane na ia tusi mai: “A ou vaai atu i lou lagi, o le galuega a ou tamatamaʻi lima, o le masina atoa  ma fetu na e faia; se ā ea le tagata e te manatu mai ai iā te ia; ma le atalii o le tagata e te asiasi mai ai iā te ia?”—Salamo 8:3, 4.

6. Na faapeʻī lagona o Tavita ina ua ia iloa le silisili ese o Ieova?

⁶ Ua tatau ai le maofa o Tavita a o ia faatusatusa atu lona tulaga faatauvaa, i le lagi sili ona telē ma fetu o loo susulu mai ai. Na i lo lona fefe ai la, o lona iloaina o lenā mea na uunaʻia ai o ia e vivii iā Ieova ma faapea atu: “Ua tala mai e le lagi le mamalu o le Atua; ua faaalia foʻi e le va nimonimo le galuega a ona aao.” (Salamo 19:1) O lenei migao mo le Atua na atili ai ona vavalalata Tavita iā Ieova ma manaʻo ai na te aʻoaʻoina ma mulimuli i Ona ala lelei atoatoa. Seʻi faaata i lou mafaufau lagona o Tavita ina ua pese atu iā Ieova: “E sili oe, o loo e fai foʻi vavega; o le Atua oe, na o oe lava. Ieova e, ia e faasino mai iā te aʻu lou ala, ou te savali i le mea moni mai iā te oe; ia e faia ina ia tasi loʻu loto e mataʻu i lou suafa.”—Salamo 86:10, 11.

7. Na faapefea ona fesoasoani le mataʻu o Tavita i le Atua, i lana taua faasaga iā Koliata?

⁷ Ina ua osofaʻia e ʻautau a Filisitia laufanua o Isaraelu, sa taufaifai mai lo latou toa o Koliata i le fanauga a Isaraelu ma faapea mai: ‘Aumai se tagata ma te tau! Afai na te mafaia ona tau ma manumalo, o le a matou auauna iā te outou.’ (1 Samuelu 17:4-10) Sa matuā fefefe Saulo ma lana ʻautau—ae leʻi fefe Tavita. Sa ia iloa o Ieova e tatau ona mataʻu i ai, ae lē o se tagata, e tusa lava po o le ā le malosi o lea tagata. Na taʻu atu e Tavita iā Koliata: “Ou te alu atu iā te oe i le suafa o Ieova o ʻau, . . . E iloa ai foʻi e lenei faapotopotoga uma, e lē faaolaina tagata e Ieova i se pelu ma se tao; auā o loo iā Ieova le taua.” Na o lana maatā ma si maa e tasi—ma le fesoasoani a Ieova—na mafai ai e Tavita ona faatoʻilalo lenei tagata tino ese.—1 Samuelu 17:45-47.

8. O le ā ua aʻoaʻoina ai i tatou e faaaʻoaʻoga a le Tusi Paia e faatatau i le mataʻu i le Atua?

⁸ Atonu tatou te fesagaʻi ma ni toʻatugā po o ni fili e pei foʻi le faigatā, o mea sa fesagaʻi ma Tavita. O le ā se mea tatou te faia? E mafai ona tatou faia le auala e tasi lea na fai e Tavita ma isi auauna faamaoni anamua—ia tatou matataʻu i le Atua. O le mataʻu i le Atua e mafai ona foʻia ai le fefe i tagata. Na augani atu Neemia i ona uso Isaraelu, o ē na fetaiaʻi ma omiga mai tagata tetee: “Aua neʻi fefefe outou ona o i latou; ia outou manatunatu i le Alii silisili ma le mataʻutia.” (Neemia 4:14) O le lagolagosua a Ieova na mafai ai e Tavita, Neemia, ma isi auauna faamaoni a le Atua, ona taulau manuia e faatino o latou tofiga mai le Atua. E mafaia, pe a tatou matataʻu i le Atua.

Ia Foʻia Faafitauli i le Mataʻu i le Atua

9. O ā tulaga sa faaalia ai e Tavita lona mataʻu i le Atua?

⁹ Ina ua uma le fasiotia e Tavita o Koliata, sa toe avatu foʻi e Ieova isi manumalo iā te ia. Peitaʻi, na iʻu ina taumafai le tupu matauʻa o Saulo e fasiotia Tavita. Muamua sa ia matuā vilivilitaʻi, sosoo ai ma ni auala faaʻoleʻole, ma iʻu ai ina ia faaaogā se ʻautau. E ui sa faamautinoa e Ieova iā Tavita o le a avea o ia ma tupu, ae tele ni tausaga sa tatau ai ona solasola Tavita; sa tatau foʻi ona tau, ma faatalitali iā Ieova mo le taimi talafeagai e avea ai o ia ma tupu. I nei taimi uma sa faaalia ai lava e Tavita lona mataʻu i le Atua.—1 Samuelu 18:9, 11, 17; 24:2.

10. Na faaalia faapefea e Tavita lona mataʻu i le Atua a o fesagaʻi ma lamatiaga?

¹⁰ I se tasi taimi, na saʻili atu ai e Tavita sona lafitaga iā Akisa, le tupu o le aai Filisitia o Kata, o le nuu lea o Koliata. (1 Samuelu 21:10-15) Na faapea mai auauna a le tupu, o Tavita o so latou fili. Na faapefea ona tali atu Tavita i lea lamatiaga ua la fesagaʻi? Sa tatalo faatauanau o ia iā Ieova. (Salamo 56:1-4, 11-13) E ui sa gaoioi Tavita e faatagā foliga atu o se tagata valea ina ia sao ai, ae na iloa lelei e Tavita, o le mea moni, o Ieova lea na laveaʻiina o ia e ala i le tauia o lana taumafaiga. O le faalagolago atoatoa o Tavita iā Ieova ma lona mautinoa iā te ia, na faaalia ai sa mataʻu moni lava Tavita i le Atua.—Salamo 34:4-6, 9-11.

11. E faapefea ona tatou matataʻu i le Atua a o fesagaʻi ma tofotofoga, e pei ona sa faia e Tavita?

¹¹ E mafai foʻi ona tatou faapei o Tavita, i lo tatou matataʻu i le Atua, e ala i le faatuatua i lana folafolaga, o le a ia fesoasoani mai e foʻia o tatou faafitauli. Fai mai Tavita: “Ia e tuuina atu  lou ala iā Ieova, ma faatuatua iā te ia, ona faia lava lea e ia.” (Salamo 37:5) E lē o le uiga o lenei mea, e na ona lafo atu lava o o tatou faafitauli iā Ieova na te foʻia maia e aunoa ma sa tatou gaoioiga e fai. E leʻi tatalo Tavita i le Atua mo se fesoasoani ona nofonofo ai lea ae faagaoioi e Ieova mea uma. Na i lo lea, sa ia faaaogā ona tomai faaletino ma faalemafaufau na foaʻi mai e Ieova iā te ia, ma taumafai foʻi e foʻia lona faafitauli. Peitaʻi na iloa e Tavita, e lē lava na o taumafaiga a le tagata lava ia e taulau manuia ai. E faapena foʻi tatou. E tatau ona faia mea uma tatou te mafai, ona lafo loa lea iā Ieova le isi vaega na te faaatoa maia. O le mea moni, e masani ona leai se mea e mafai ona tatou faia vaganā le faalagolago iā Ieova. O inā loa ua matuā manaʻomia ai ona faaalia lo tatou matataʻu moni iā Ieova. E faamāfanafanaina i tatou i upu a Tavita: “O loo faaali e Ieova lona finagalo i ē matataʻu iā te ia.”—Salamo 25:14.

12. Aiseā e manaʻomia ai ona manatu mamafa i a tatou tatalo, ma o le ā le uiga e lē tatau ona iā i tatou?

¹² Ua tatau la ona tatou manatu mamafa i a tatou tatalo ma la tatou faiā ma le Atua. Pe a tatalo iā Ieova, e tatau ona tatou “talitonu o loo soifua o ia, o ia foʻi na te tauia mai o ē matuā saʻili iā te ia.” (Eperu 11:6; Iakopo 1:5-8) Pe a ia fesoasoani mai, e tatau ona tatou “saga faafetai,” e pei ona fautua mai le aposetolo o Paulo. (Kolose 3:15, 17) Aua neʻi pei i tatou o tagata sa taʻua e se Kerisiano faauuina e faapea: “Ua latou manatu i le Atua e pei o sē o loo tautua mai le lagi. A latou mananaʻo i se mea, na ona fiti lava o o latou tamatamaʻilima ona faavave mai loa lea o le Atua e talia o latou manaʻo. A uma foʻi le mea na latou manaʻomia, ona lē toe manaʻomia foʻi lea o le Atua.” O uiga faapena ua taʻu mai ai le leai o se mataʻu i le Atua.

Pe a Leai se Mataʻu i le Atua

13. O anafea na lē taulau ai ona faaaloalo Tavita i le Tulafono a le Atua?

¹³ O le tofo o Tavita i le fesoasoani a Ieova i taimi o puapuaga na atili ai ona mausalī lona mataʻu i le Atua, ma faamalosia lona mautinoa iā te Ia. (Salamo 31:22-24) Peitaʻi, e tolu ni taimi iloga, na lē mataʻu ai Tavita i le Atua, lea foʻi na oo ai i ni āuga matuiā. O le taimi muamua, o lona faia o ni sauniuniga e avatu ai le atolaau o le feagaiga a Ieova i Ierusalema i se fata faataavalevale, na i lo le amo e le ʻau sā Levī e pei ona faatonuina i le Tulafono a le Atua. Ina ua taumafai Usa, o lē na taʻitaʻia le fata faataavalevale e taofiofi le atolaau mai le paʻū ese, na  oti ai lava i le taimi lenā ona o lana ‘gaoioiga sesē.’ Ioe, na matuiā le agasala a Usa, ae a tuu lava i le pogai tonu o mea uma, ona sa lē taulau ona faatumauina e Tavita lona faaaloalo tatau i le Tulafono a le Atua, ma iʻu ai i lea iʻuga mataʻutia. O le mataʻu i le Atua o lona uiga, ia faia mea i lana auala.—2 Samuelu 6:2-9; Numera 4:15; 7:9.

14. O le ā na iʻu i ai le faitauina e Tavita o le nuu o Isaraelu?

¹⁴ I se isi taimi mulimuli ane, sa faaosooso ai Satani iā Tavita, ona faitau ai lea e Tavita o tane Isaraelu. (1 Nofoaiga a Tupu 21:1) O le faia faapea na faaalia ai ua leai se mataʻu o Tavita i le Atua, ma iʻu ai i le maliliu o tagata Isaraelu e toʻa 70,000. E ui sa salamō Tavita i luma o Ieova, ae na tugā lava mafatiaga na latou iʻu i ai.—2 Samuelu 24:1-16.

15. O le ā na māfua ai ona paʻū atu Tavita i le agasala tau feusuaʻiga?

¹⁵ O le isi taimi na lē mataʻu ai Tavita iā Ieova, lea na taʻitaʻia ai o ia i le faia o se amioga lē mamā ma Patesepa, le avā a Uria. Na iloa lelei e Tavita le sesē o le mulilua po o le manaʻo atu i le avā a le isi tagata. (Esoto 20:14, 17) Na amata le faafitauli ina ua iloa atu e Tavita le fafine o Patesepa o loo tāʻele. O le mataʻu o Tavita i le Atua sa tatau ai ona uunaʻia o ia i lenā lava taimi e tilotilo ese ma mafaufau i se isi mea. Ae e foliga mai sa ‘vaavaai atu pea’ Tavita i le fafine seʻia oo lava ina ua manumalo lona tuʻinanau. (Mataio 5:28; 2 Samuelu 11:1-4) Ua galo iā Tavita le fesoasoani a Ieova iā te ia i vala uma o lona olaga.—Salamo 139:1-7.

16. O ā āuga mataʻutia na oo iā Tavita ona o ana gaoioiga?

¹⁶ O le faatasiga lē mamā lea a Tavita ma Patesepa na maua ai le la tama. E leʻi umi mulimuli ane, ae auina mai e Ieova lana perofeta o Natano e faaaliali le agasala a Tavita. Ina ua toe sagatonu lona mafaufau, sa toe mataʻu Tavita iā Ieova, ma salamō ai. Na ia ʻaiʻoi atu iā Ieova ina ia aua neʻi lafoaʻiina o ia pe aveese Lona agaga  paia mai iā te ia. (Salamo 51:7, 11) Na faamagalo e Ieova Tavita ma faamāmā le faasalaga, peitaʻi e leʻi taofia e Ieova le oo iā Tavita o āuga leaga o ana gaoioiga. Na oti le atalii o Tavita, ma na amata mai ai lava i lenā taimi ona oo mala ma mea mataʻutia i lona aiga. E mataʻutia iʻuga pe a leai se mataʻu i le Atua!—2 Samuelu 12:10-14; 13:10-14; 15:14.

17. Taʻu mai se faataʻitaʻiga o tigā e oo i ai ona o ni gaoioiga agasala.

¹⁷ I aso nei, o le leai o se mataʻu i le Atua e tusa ai o mataupu i amioga tatau, e ono faapena foʻi ona iai ni āuga matuiā faaumiumi. Seʻi manatu i tigā o se avā talavou ina ua ia iloa ane sa lē faamaoni lana tane iā te ia a o faigaluega i se atunuu mamao. I lona teʻi ma le matuā faanoanoa, sa ia pupuni ona mata ma tagi auēuē. O le ā se umi o le a iai faatoʻā mafai e lenei tuafafine ona ia toe faatuatuaina ma faaaloalogia lana tane? E lē mafai ona iai ni āuga mataʻutia faapena, pe a iai le mataʻu moni i le Atua.—1 Korinito 6:18.

O le Mataʻu i le Atua e Taofia ai i Tatou Mai le Faia o le Agasala

18. O le ā le sini autū o Satani ma lana auala o loo faaaogā?

¹⁸ Ua matuā saosaoa le faaleagaina e Satani o tapulaa o amioga tatau a le lalolagi, ma o lona manaʻoga faapitoa ia faaleagaina Kerisiano moni. Faapefea? I lona faaleagaina o le mea o loo faatupu aʻe ai o tatou lagona, aemaise lava o tatou mata ma taliga. (Efeso 4:17-19) O le ā sau gaoioiga pe a faafuaseʻi ona e fesagaʻi ma ni ata, ni upu po o ni tagata o loo faaali maia amioga lē mamā?

19. Na faapefea e le mataʻu o se tasi Kerisiano i le Atua, ona foʻia ai se faaosoosoga na la fetaiaʻi?

¹⁹ Seʻi manatu i le mea na tupu iā André, * o se toeaina Kerisiano, o se tamā, ma o se fomaʻi i Europa. A o tiutepō André i le falemaʻi, na fai ma masani a ni tamaʻitaʻi sa faigaluega i le falemaʻi ona tusia ni faaupuga ma tusi le ata o le fatu o le tagata, ma faapipii i lona aluga e tauanau ai o ia ina ia latou faia ni feusuaʻiga. Sa matuā maumauaʻi André e teena faatosinaga a nei mafine. E lē gata i lea, na ia taumafai e ʻalofia lenei siʻomaga leaga, e ala i le toe saʻilia o se isi ana galuega. O le mataʻu i le Atua na mautinoa le atamai tele, ma taʻitaʻia ai i faamanuiaga, auā i aso nei, o loo auauna faavaitaimi André i le ofisa o le lālā a Molimau a Ieova i lo latou atunuu.

20, 21. (a) E faapefea i lo tatou mataʻu i le Atua, ona fesoasoani mai ina ia ʻalofia ai le faia o le agasala? (e) O le ā le mea o le a talanoaina i le mataupu o sosoo mai?

²⁰ O le faaputuputu pea e se tasi o ona mafaufauga sesē e iʻu ina mafaufau ai e sili ona lafoaʻi le la faiā tautele ma Ieova, ae fai se mea e mautinoa e leai sana aiā e faia ai. (Iakopo 1:14, 15) Peitaʻi afai tatou te matataʻu iā Ieova, o le a tatou ʻalofia ai pe taumamao mai tagata, o nofoaga, o gaoioiga, ma faafiafiaga, e mafai ona faavaivaia ai lo tatou malosi e teena amioga lē tatau. (Faataoto 22:3) O le faia faapea atonu e iʻu ai i ni mafatiaga po o ni manaʻoga o le a faataulaga. Peitaʻi e lē taitai ona faatusatusa na mea, pe a tatou lē toe mauaina le finagalo malie o le Atua. (Mataio 5:29, 30) O le mataʻu i le Atua, o le matuā lē tatau lea ona tatou matamata i ni mea o faaalia ai amioga lē mamā, e aofia ai so o se ata o amioga lē mamā faaleituaiga. Na i lo lea, ia ‘liliueseina o tatou mata neʻi o tatou vāai i mea lē aogā.’ Pe a faia faapea, o le a tatou faatuatua ai iā Ieova, na te ‘faaolaina i tatou’ ma foaʻi mai mea uma tatou te manaʻomia moni.—Salamo 84:11; 119:37.

²¹ Ioe, o le gaoioi ma le mataʻu moni i le Atua, o se ala atamai lea. O le puna foʻi lea o le fiafiaga moni. (Salamo 34:9) O le a faamanino mai lenei manatu i le mataupu o loo sosoo mai.

[Faamatalaga pito i lalo]

Pe Mafai Ona E Faamatala?

• O ā uiga faa-Kerisiano o loo aofia i le mataʻu i le Atua?

• E faapefea e le mataʻu i le Atua ona faatoʻilaloina ai le fefe i tagata?

• E faapefea ona tatou faaalia o loo iā i tatou se vaaiga saʻo i le tatalo?

• E faapefea e le mataʻu i le Atua ona taofia ai i tatou mai le faia o le agasala?

[Fesili mo le Suʻesuʻega]

[Ata i le itulau 23]

Na aʻoaʻoina e Tavita le mataʻu i le Atua, a o ia mātauina galuega na faia e Ieova

[Ata i le itulau 24]

O le ā sau mea e fai pe a faafuaseʻi ona e fesagaʻi ma se tofotofoga?