Le Ofutino Fulufuluʻoti ma le Faaleagaga

SA LAʻEI ai Lui IX, le tupu o Falani. A o feagai Sir Thomas More i le vaitaimi o lona talavou ma ana aʻoaʻoga i le suʻeina o lona faailoga faaloia, sa ia ofuina e faaala ai ona mata mo le 19 i le 20 itula i aso taʻitasi mo le tele o masina. Na lauiloa More i le toetoe lava o aso uma o lona olaga sa ia ofuina ai. Ma ina ua tagatavaleina le akiepikopō a Canterbury, o Thomas Becket i le malumalu tapuaʻi i Canterbury, o se itu na faateʻia ai le maua atu o loo ofuina e le akiepikopō lenei ofu e faapito i totonu o ona laʻei sa fai. O le ā na tutusa ai nei tagata sa iloga i le talafaasolopito? Sa latou faatigāina o latou tino, ina ia taofiofi pe pulea ai o latou faanaunauga ma tuʻinanauga, e ala i le ofuina o se ofutino fulufuluʻoti.

O le ofutino sa gaosi mai i fulufuluʻoti, ma sa ofu e pipii i le paʻu o le tino, ina ia talatala ma māʻiniʻini ai le tino ona matuā lē toʻafilemu ai lea o lē o ofuina. Sa faigofie ai foʻi ona avea ma nofoaga e faaputuputu ai utufiti i le tino. Na taʻua faapea, na ofu faatasi i totonu e Thomas Becket lona ofutino ma ona ofuvae vaepupuu sa fai foʻi i fulufuluʻoti, seʻia oo “ina tumu utufiti i lona tino.” Ina ua mavae le senituri lona 16, na amata ai ona mou atu le faaaogāina o fulufuluʻoti e gaosi ai ofutino, ae ua faaaogā fasi uaea tuaiti e maamaʻai pito e faaū i le tino. O le faia faapea o le ofutino ua matuā atili ai ona lē nofonofo lelei le tagata o loo ofuina.

Na taʻua i le faamatalaga a se lomifefiloi, o le fuafuaga o lenei ofutino fulufuluʻoti, ina ia “faatoʻilaloina tuʻinanauga agasala o le tino ina ia mafai ona atiaʻe se mafaufau ma se olaga ua matuā tuutasi atu i mea faaleagaga.” E lē gata sa oofu ai i latou o loo ola i ni olaga e faafitia ai manaʻoga o le tagata lava ia, ae faapea foʻi tagata lotu e aofia ai ma ē sa iai i so o se tofiga maualuga. E oo lava i aso nei o loo iai lava ni vaega faalotu o loo tausisi pea i le ofuina o lenei ofu.

Po o le ofuina ea e se tasi o se ofutino fulufuluʻoti, pe faafitia ona manaʻoga faaletino, e mafai ai ona tuutasi atu lona mafaufau i mea faaleagaga? E leai, e lē o gaoioiga faapena e faalagolago i ai. Sa tautala tetee le aposetolo o Paulo i gaoioiga e peiseaʻī o loo ‘faasaunoa i le tino.’ (Kolose 2:23) * Na i lo lenā, o le uaʻi o se tasi i mea faaleagaga ma faamalieina moni le finagalo o le Atua, e maua pe a saʻilia le poto e uiga i le Atua, e ala i le suʻesuʻeina maelega o lana Afioga ma faatatauina e se tasi lenā poto i lona olaga.

[Faamatalaga pito i lalo]

[Faamatalaga i Ata i le itulau 32]

Le tupu o Lui IX, luga: Mai le tusi Great Men and Famous Women; Thomas Becket, ogatotonu: Mai le tusi Ridpath’s History of the World (Tusi IV); Thomas More, lalo: Mai le tusi Heroes of the Reformation, 1904