Mamalu Faaletagata o se Aiā ua Masani Ona Lē Amanaʻia

“O vala uma i le olaga i le togālauapi, o le isi lenā laasaga i le faalumaina ma le lē faamamaluina.”—MAGDALENA KUSSEROW REUTER, O SĒ NA SAO MAI LE FALEPUIPUI A LE ʻAU NASI.

O SAUĀGA faamanu sa faia i falepuipui i le taimi o le Taua Lona Lua a le Lalolagi, sa lē o le amataga po o le faaiʻuga lenā o osofaʻiga i le mamalu faaletagata. Pe tatou te vaʻiliʻili maia mea i aso ua mavae po o aso foʻi nei, ae ua manino le manatu: “O le faalumaina ma le lē faamamaluina o tagata” o se mea ua leva ona tupu ma o loo faia pea.

Ae o le lē amanaʻia o le tulaga mamalu o tagata, e lē na o gaoioiga lē pulea ia ua aafia ai le talafaasolopito o tagata. Ua masani ona lē amanaʻia le mamalu faaletagata i ni auala iloagatā. Seʻi manatu i se tamaitiiti o lē e ulagia ona o foliga vaaia. Po o se tagata ese mai se isi atunuu o loo ulagia ona o le “ese” o lana aganuu. Po o sē o loo mafatia i faiga faailoga lanu ona o lona lanu po o le atunuu e sau ai. E ono manatu ē o loo faia nei faiga leaga i le mataupu o se mea e tala sua ai, ae o le tigā ma le faalumaina o loo aafia ai ē o loo faamasiasia, e lē o se mea e mālie.—Faataoto 26:18, 19.

O le ā le Mamalu Faaletagata?

Ua faamatala e se lomifefiloi le mamalu o ‘le uiga po o le tulaga faatāuaina, faaaloalogia, po o le faasilisilia.’ O lea, e aofia i le mamalu faaletagata le auala tatou te manatu ai iā i tatou, ma le auala e  feagai ai isi ma tatou. Talu ai e eseese vala e ono aafia ai o tatou faalogona iā i tatou lava, o le auala la e manatu ma feagai ai isi ma i tatou, e telē se aogā i o tatou uiga i le olaga i aso uma.

I so o se faalapotopotoga o tagata, e iai ē matitiva, lē mafesoasoania, ma vaivai. Peitaʻi o le aafia i nei tulaga, e lē o se mea e ono faaitiitia ai le tulaga mamalu o se tasi. E mafai ona faaleagaina le tulaga mamalu o se tasi ona o uiga ma amioga e faaali mai i ai e isi. O le mea moni e faanoanoa ai, ona o tagata o loo i tulaga faalētonu, o i latou na ua masani ona lē amanaʻia o latou tulaga mamalu pe ua lē faatāuaina. E masani ona tatou faalogo i faaupuga e pei o le “lē aogā,” “lē tatau i ai,” ma le “faatauvaa” i le faileagaina o ē matutua, o ē matitiva, po o ē ua lē lelei le mafaufau pe lē atoatoa le malosi o le tino.

Aiseā e faalumaina ai e le tasi le isi? Po o le a iai ea se taimi e amanaʻia ai le aiā tatau a tagata mo le faamamaluina? O le a saunia e le mataupu o sosoo mai le tali faamalieloto mai le Afioga a le Atua, le Tusi Paia.