O le Mataʻu i le Atua—“O le Aʻoaʻoina Lea e Poto Ai”

UA SAUNIA se tausamiga e le poto moni. “Ua ia auina atu lona galu teine; ua talaʻi i mea maualuluga o le aai, Ai sē faigofie, ia afe mai o ia iinei; o lē ua leai sona mafaufau, ua ia faapea atu i ai, Ō mai ia, inā aai laʻu areto, ma inu i laʻu uaina ua ou suia. Ia outou tuulafoaʻi atu i ē valelea, tou te ola ai; ma ia outou ui atu i le ala e atamai ai.”—Faataoto 9:1-6.

O le ʻai i le laoai a le poto e lē taitai oo atu ai i se mea leaga pe tigā. O le faalogo i le poto po o le atamai mai le Atua lea o loo i faataoto faagaeeina ma talia ana aʻoaʻiga e na o iʻuga lelei e oo i ai. E pei o upu matagofie o loo i le Faataoto 15:16-33. * O le utagia o nei fautuaga tuusaʻo o le a fesoasoani ia lotomalie ai i nai mea ua tatou maua, ia agaʻigaʻi i luma, ma olioli ai i le olaga. O le a fesoasoani foʻi iā i tatou e faia ni filifiliga atamai ma tumau ai i le ala i le ola.

E Sili Ona Lelei o Mea Iti

Na faapea mai le tupu o Isaraelu anamua o Solomona: “E sili ona lelei o se mea itiiti, a o i ai le mataʻu iā Ieova, i le oloa tele, a o i ai le atuatuvale.” (Faataoto 15:16) O le lē amanaʻia o Lē na Foafoaina Mea ae avea le saʻilia o meafaitino ma sini autū o le olaga o se tasi, o se mea valea. O se olaga faapena, e na o taumafaiga e fiu ai ma popolega. Pagā le faanoanoa i le iloa mulimuli ane ina ua afu le soifua, na alu lē aogā le olaga ma leai se faamoemoe! E lē o se mea atamai le faaputu o meafaitino a o iai le “atuatuvale.” E sili atu le aʻoaʻoina o le ala e maua ai le lotomalie moni ma ola ai! E maua le lotomalie moni i le mataʻu iā Ieova—la tatou faiā ma ia—ae lē o meafaitino.—1 Timoteo 6:6-8.

Na faamamafa mai e Solomona, le tautele o faiā lelei ma isi na i lo le tele o meafaitino i lona faapea mai: “E sili ona lelei o le faaalumaga o laau ʻaina, a o i ai le alofa, i le povi ai le fale povi, a o i ai le ʻinoʻino.” (Faataoto 15:17) Ioe, o se ʻauaiga e iai se siʻomaga alofa e sili lea na i lo le anoanoaʻi o mea taumafa. I aiga e toʻatasi le matua, e ono lē lava le tamaoaiga. I nisi atunuu, na o taumafa faigofie po o taumafa taugofie e gafatia e isi. Peitaʻi, e sili ona ola fiafia aiga pe a iai le alofa ma lagona māfana.

Ae oo lava i aiga e masani ona iai le alofa, e ono tupu ai ni tulaga faigatā. Atonu e fai e se tasi o le aiga se faamatalaga po o se gaoioiga e ita ai le isi. E ao faapefea ona tali atu lē o loo ita? O loo faapea mai le Faataoto 15:18: “O le tagata lotoa, na te faatupuina le misa; a o lē faatoʻatoʻa e tuu lelei iā te ia le finauga.”  O le tali agamalu ae lē ma le ita, e faatupu ai le filemu. E faatatau foʻi le fautuaga a lenei faataoto i isi vala o le olaga, e aofia ai galuega a le faapotopotoga ma le talaʻiga.

Pe a ‘Faalauleleiina le Ala’

O le faataoto lea e sosoo ai, ua faamatilatila ai le eseesega o le tagata e lē amanaʻia le poto ma ē ua amanaʻiaina. “O le ala o le paiē, e tusa ma le āi laau tuitui; a o le ala o ē amio saʻo, e faalauleleiina lea.”—Faataoto 15:19.

O le laau tuitui o se laau e fai ma faalavelave ona e maamaʻai ma talatala. E faaata e le tagata paiē i lona mafaufau le faigatā o se mea ma ia faaaogā o se faamolemolega i lona lē faia o lenā mea. Peitaʻi o ē amio saʻo, e lē popole i tulaga faigatā e ono faalavelave iā i latou. Latou te tinoū i a latou galuega ma uaʻi i so o se mea e faia. O lea, latou te ʻalofia ai le tele o faafitauli lavelave pe ana faatalalē. E “faalauleleiina” lo latou ala, pe faasolosolo i luma lo latou tulaga. Latou te amata se galuega ma olioli i le agaʻigaʻi i luma o lenā galuega.

O se faaaʻoaʻoga, o le maua o le poto saʻo o le Afioga a le Atua ma agaʻigaʻi i luma i le taʻumatuaina. E manaʻomia taumafaiga. E faigofie lava i se tasi ona faaaogā le lē lava o aʻoaʻoga, le lē lelei o le faitau, po o le lē manatua lelei o ni mea, e fai ma ana faamolemolega e lē tinoū ai e faia lana ia lava suʻesuʻega i le Tusi Paia. E sili atu ona lelei pe a lē manatu i na mea o ni mea e taofia ai mai le mauaina o le poto. E ui ina gata mai lo tatou iloa, e mafai pea ona faaleleia lo tatou tomai o le faitau ma le malamalama i mea tatou te faitauina, atonu e faaaogā ai se lomifefiloi pe a manaʻomia. O se uiga mautinoa o le a fesoasoani iā i tatou e maua ai le poto ma agaʻigaʻi i luma faaleagaga.

Pe a ‘Fiafia le Tamā’

Na faapea mai le tupu o Isaraelu: “O le atalii poto e faafiafia e ia le tamā; a o le tagata valea, e faalēaogāina e ia lona tinā.” (Faataoto 15:20) E fiafia mātua pe a gaoioi ma le poto a latou fanau. Ioe, e manaʻomia ai  toleniga ma aʻoaʻiga a mātua ina ia maua na iʻuga lelei. (Faataoto 22:6) Ae maʻeu le olioli e maua e mātua i se atalii poto! A o le atalii valea, e lē uma ai le faanoanoa o mātua.

I le faaaogāina o le upu “olioli” i se isi faatatauga, ua faapea mai le tupu poto: “O le valea, o le mea e olioli ai lea i lē ua leai sona mafaufau; a o le tagata faautauta, ua savali o ia ma le amio saʻo.” (Faataoto 15:21) E fiafia lē ua leai se mafaufau e ʻataʻata i mea faavalevalea ma mea faafiafia e lē maua ai se faamalieina po o se fiafiaga moni. Peitaʻi, o le tagata poto na te iloa le valea o le ‘tele o le manaʻo i mea faafiafia a e leai se manaʻo i le Atua.’ (2 Timoteo 3:1, 4) O lona usitaia o taʻiala a le Atua e fesoasoani na te faia ai le mea saʻo ma faasaʻo ai ona ala.

Pe a “Faatumauina”

O le ola e ōgatusa ma taʻiala a le Atua e iai aogā i isi vala o o tatou olaga. Ua faapea mai le Faataoto 15:22: “E faalēaogāina mafaufauga pe a leai se filifiliga; a e faatumauina i le toʻatele o faipule.”

O le uiga o le filifiliga i le mau, o talanoaga faalilolilo ae tuusaʻo i le va o ni tagata. O le upu Eperu o loo faaliliuina i le “filifiliga” o loo faaliliuina i le “faapotopotoga” i le Salamo 89:7. Ua faaalia ai le vavalalata o fesootaʻiga. E lē faasino la i talanoaga faatagāfai, ae o le fefaaaliaʻi o manatu ma faalogona moni. Pe a fesootaʻi ma le saʻoloto tane ma avā faapea ma mātua ma fanau i le auala lenei, o le a iā i latou le filemu ma le autasi. Ae a leai ni talanoaga faapea e iʻu ina fiu ai ma tupu ni faafitauli i le aiga.

Pe a tatou faia ni filifiliga tāua, o se mea atamai le utagia o le fautuaga: “E faatumauina i le toʻatele o faipule.” Mo se faaaʻoaʻoga, pe a filifilia ni togafitiga faafomaʻi, pe lē o se mea atamai le saʻilia o nisi manatu faafomaʻi mai fomaʻi eseese, aemaise lava pe afai o aafia ai ni tulaga matuiā?

E lē tatau ona manatu māmā i le aogā o le tele o faipule po o faufautua i le taulimaina o mataupu faaleagaga. Pe a talanoa faatasi toeaina ma faaaogā uma o latou tomai tuufaatasi, “e faatumauina” pe taulau ai se mea. E lē gata i lea, e lē tatau ona faatalatū i latou e leʻi leva ona tofia o ni ovasia, e fesili atu i toeaina ua matutua ma leva ona iai le tomai, aemaise pe afai e faigatā le mataupu o loo taulimaina.

Pe a Iai le ‘Fiafia i le Tali’

O ā iʻuga lelei e maua i le tautala ma le poto? Na faapea le tupu o Isaraelu: “O loo i ai le fiafia i le tagata i le tali atu a lona gutu; ma le upu i ona aso ua tatau i ai, e lelei naʻuā lea.” (Faataoto 15:23) Pe tatou te lē fiafia ea pe a maua ni iʻuga lelei ona o le utagia o se tali po o se fautuaga saʻo? Ina ia aogā sa  tatou fautuaga e avatu, e lua mea e manaʻomia.

Muamua, e manaʻomia ona faavae le fautuaga i le Tusi Paia. (Salamo 119:105; 2 Timoteo 3:16, 17) Ma e manaʻomia ona avatu i le taimi saʻo. O fautuaga lelei e avatu i le taimi sesē e mafai ona faaleagaina ai. Mo se faaaʻoaʻoga, o le avatu o se fautuaga i se isi a o leʻi muaʻi faalogo i lona faafitauli, e lē o se gaoioiga poto ma e lē fesoasoani foʻi. E tāua ona tatou “faataalise ona faalogologo, ia faagesegese ona tautala atu.”—Iakopo 1:19.

“O le Ala o le Ola, o Loo i Luga”

Ua faapea mai le Faataoto 15:24: “O le ala o le ola, o loo i luga lea i lē ua poto; ina ia ʻalo ese ai o ia i seoli i lalō.” O le tagata e gaoioi ma le poto, o loo i le ala e taʻitaʻi ese ai mai Seoli, le tuugamau o tagata. Na te ʻalofia faiga e leaga ai e pei o le feusuaʻi ma so o se tagata, faaaogā o fualaau faasāina, ma le onā—ma ʻalofia ai le maliu ae leʻi taitai le soifua. O lona ala e taʻitaʻia ai i le ola.

Ae mātau le tuufaafeagai o le ala o i latou e leai se poto: “E liaʻiina e Ieova le fale o ē faamaualuga; a e faatumauina e ia le tuaoi o le fafine ua oti lana tane. E inosia e Ieova mafaufauga o lē ua leaga; a e sao ona lelei o upu matagofie. O lē ua matapeʻapeʻa i le oloa, e faatigāina e ia lona lava aiga; a o lē ʻinoʻino i mea alofa [faiga faatogafalea], e ola o ia.”—Faataoto 15:25-27.

Ina ia ʻalofia se tulaga e masani ona tatou lape ai, na faapea mai le tupu o Isaraelu: “E manatunatu le loto o lē amiotonu, ina ia fai se tali; a o gutu o ē amio leaga, e luai mai ai mea leaga.” (Faataoto 15:28) Maʻeu le tāua o le fautuaga a lenei faataoto! O faamatalaga valea e faia ma le lē mafaufau e lē taitai ona iʻu i se lelei. Pe a tatou iloiloina vala eseese e patino i se mataupu, ma tulaga ma faalogona o isi, atonu o le a tatou lē faia ai se faamatalaga tatou te ono salamō mulimuli ane ai.

O le ā la le aogā o le mataʻu i le Atua ma le talia o ana aʻoaʻiga? O loo tali le tupu poto o Solomona: “E mamao Ieova i ē amio leaga; a e faafofoga mai o ia i le tatalo a ē amiotonu.” (Faataoto 15:29) E lē latalata le Atua i ē amioleaga. O loo faapea mai le Tusi Paia: “O lē ua liliu ese ona taliga a e lē faalogologo i le  tulafono, e inosia lana lava tatalo.” (Faataoto 28:9) O i latou e matataʻu i le Atua ma tauivi e fai le mea tonu i lana silafaga, e saʻoloto e faalatalata atu iā te ia ma le mautinoa o le a ia faafofoga mai.

O le Mea e “Fiafia ai le Loto”

Na fai e Solomona se faatusatusaga faatupu manatu, e faapea: “O le malamalama o mata e fiafia ai le loto; o le tala lelei e lololo ai ivi.” (Faataoto 15:30) E “lololo” ivi pe a tumu i gaʻo. E malosi ai le tino atoa ma fiafia ai le loto. E iloa le fiafia o le loto i le olaola o mata po o le tiotio o foliga. E māfua nei mea uma ona o se tala e lelei pe fiafia ai.

Pe lē o se faalaeiauga moni iā i tatou le faalogo i lipoti o le faatelega o le tapuaʻiga a Ieova i le lalolagi aoao? O le iloa o mea uma o loo tutupu i le galuega talaʻi o le Malo ma le faia o isi ma soo, e faamalosia ai i tatou e faia se sao tele i le faiva. (Mataio 24:14; 28:19, 20) O tala i mea tutupu iā i latou ua fai Ieova mo latou Atua ma auai i le tapuaʻiga moni, e faatumulia ai o tatou loto i le olioli. O se ‘tala lelei mai nuu mamao’ e iai sona aafiaga malosi, e tāua la ona saʻo ma faamaoni a tatou lipoti o le faiva.—Faataoto 25:25.

“E Muamua Foʻi le Faamaulalo i le Viia”

Na faamamafa mai e le tupu poto le tāua o le talia o aʻoaʻiga e auala eseese mai, i lona faapea mai: “O le taliga ua faalogo i le aʻoaʻiga e ola ai, e mau lea faatasi ma ē popoto. O lē na te teena mea e aʻoaʻoina, e faalēaogāina e ia lona lava ola; a o lē faalogo i le aʻoaʻiga, e maua e ia le poto.” (Faataoto 15:31, 32) O aʻoaʻiga e pāʻia ai le loto o se tagata ma faasaʻo ai, ma maua ai le utaga poto. E lētioa a faapea mai, “ua fusifusia le valea i le loto o le tama; a e faateʻaeseina ai iā te ia i le sasa e aʻoaʻi aʻi”! (Faataoto 22:15) O lē faalogo i aʻoaʻiga, e lelei ai uunaʻiga o le loto. Ae i le isi itu, o le lē talia o aʻoaʻiga o le lē talia lea o le ala e iʻu i le ola.

O le mea moni, o le talia ma le lotomaulalo o aʻoaʻiga a le poto e aogā. O le faia faapea e taʻitaʻia ai e lē gata i le faamalieina, agaʻigaʻi i luma, olioli, ma le lagona ua faataunuuina se mea, ae iʻu ai foʻi i le viiga ma le ola. O loo faaiʻu faapea le Faataoto 15:33: “O le mataʻu iā Ieova, o le aʻoaʻoina lea e poto ai; e muamua foʻi le faamaulalo i le viia.”

[Faamatalaga pito i lalo]

[Ata i le itulau 17]

O se ʻauaiga e iai se siʻomaga alofa e sili lea na i lo le anoanoaʻi o mea taumafa

[Ata i le itulau 18]

E tusa pe gata mai mea tatou te mafaia, ae o se uiga mautinoa o le a fesoasoani iā i tatou e maua ai le poto

[Ata i le itulau 19]

O talanoaga faalilolilo, o le fefaaaliaʻi o manatu ma faalogona moni

[Ata i le itulau 20]

E te silafia pe faapefea ona avea se ‘tala lelei ma mea e lololo ai ivi’?