Afu le Soifuaga ae Lē Taofia ai le Auaunaga

PE A faasolo atu i le soifua matua, e iai ona faafitauli, e toʻatele e oo ina lē atoatoa le malosi ma faaesea mai isi tagata. Ae lē o le tulaga lenā na oo iā Fernand Rivarol, o lē na maliu i le 95 o ona tausaga i Geneva, i Switzerland. Sa nofo toʻatasi o ia ina ua maliu lana avā, ma faaipoipo lona afafine. E ui ina faataotolia o ia i le fale i le tele o taimi, ae leʻi faanoanoa i le tuua toʻatasi o ia. Sa masani ona ia nofonofo i se laulau i le potu mālōlō o lona fale, ma faaaogā le telefoni e talanoa ai i tagata i ni mataupu faaleagaga.

I le faagasologa o lona olaga mataʻina, sa iai se taimi na taofia moni ai Fernand. Aiseā? O le taimi lava na avea ai Fernand ma lana avā o ni Molimau maelega a Ieova i le 1939, na pa ai le Taua Lona Lua a le Lalolagi i Europa. Na maumauaʻi Fernand i lana filifiliga e faavae i le Tusi Paia o le lē faia o se mea e afaina ai se tasi. O le mea lenā na vāea ai mai lana galuega ae faasala i nisi taimi i le falepuipui—a tuufaatasi e lima ma le ʻafa tausaga le umi—o le taimi atoa lenā na valavala ai ma lana avā ma lona afafine laʻitiiti.

Pe a toe tepa i na taimi, na faapea mai Fernand: “I le toʻatele o tagata, na foliga sa ou tuua se galuega mautū ma pagatia ai loʻu aiga. Na ʻinoʻino tagata iā te aʻu ma sa pei aʻu o se tagata solitulafono iā i latou. Ae ui i lea, pe a ou manatu i na taimi faigatā, e sili atu ona ou manatua le lagolago ma le fesoasoani a Ieova iā i matou. E ui ina tele tausaga ua mavae talu lenā taimi, ae o loo tumau pea loʻu faatuatua iā Ieova e pei ona iai i lenā taimi.”

O le faatuatua lea na uunaʻia ai Fernand e faamatala atu lona faamoemoe faale-Tusi Paia i isi i luga o le telefoni. Pe afai e faaalia le fiafia o se tasi na talanoa i ai, na te lafoina ni lomiga faale-Tusi Paia i lenā tagata. Mulimuli ane, na te toe viliina lenā tagata e fesili i ai pe na fiafia i le lomiga na lafo atu. I nisi taimi e tusi atu ai ni tagata iā te ia e faaalia lo latou loto talisapaia, ma o se mea na ia fiafia tele ai.

Atonu e faafesootaʻi atu oe e se tasi pei o Fernand i lou vaipanoa. Aiseā e lē faaalu ai sou taimi e faalogologo i mea o le a ia talanoa atu ai, ina ia iloa ai ona talitonuga? E fiafia lava Molimau a Ieova e faamatala atu o latou talitonuga iā te oe.