Fesili Mai le ʻAufaitau

Pe a mavae le tofotofoga mulimuli i le iʻuga o le afe tausaga, pe mafai ona toe agasala ma oti le tagata?

E lua ni mau o loo maua i le tusi o Faaaliga e fesoasoani iā i tatou e tali ai lenei fesili: “Ua lafoina foʻi le oti ma seoli i le lepa afi; o le oti faalua lea, o le lepa afi lea.” (Faaaliga 20:14) “E sōloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga; auā ua mavae atu mea muamua.”—Faaaliga 21:4.

Mātau le taimi o loo talanoaina i nei. O le lafoina o le “oti ma seoli” i le lepa afi e faataunuu pe a uma ona faamasinoina i latou o ē sao atu iā Amaketo, o ē toe faatutūina aʻe, ma nisi o le a fananau mai pe a mavae Amaketo, “i mea ua tusia i tusi,” po o mea maʻoti e finagalo i ai Ieova mo tagata a o faagasolo le afe tausaga. (Faaaliga 20:12, 13) Na faamauina e le aposetolo o Ioane se isi faaaliga, i le mataupu e 21 o le Faaaliga, lea o le a faataunuu a o faagasolo le pulega o le afe tausaga a Iesu Keriso. Peitaʻi, o le a faataunuu atoatoa lenā faaaliga, i le iʻuga o le Aso Faamasino po o le afe tausaga. O le taimi lenā faatoʻā mau ai Ieova ma tagata uma i se tulaga e sili ona atoatoa e aunoa ma se puluvaga e manaʻomia ai, auā ua uma ona toe faafoʻi atu e Iesu le Malo i lona Tamā. O le a feagai Ieova ma lona “nuu” i se tulaga faaleagaga po o se auala e tumau ma tuusaʻo. O le a faataunuu i se tulaga e sili atu ona atoatoa le uiga o le faaupuga, “e leai foʻi se toe oti” pe a ausia e tagata le tulaga o le lelei atoatoa lea e maua ona ua faasafua mai aogā atoatoa o le taulaga togiola a Keriso.—Faaaliga 21:3, 4.

O lea la, o le oti o loo taʻua i mau o loo sii mai i luga o loo faasino i le oti tuufaasolo mai iā Atamu, lea o le a faalēaogāina e le togiola a Keriso. (Roma 5:12-21) Pe a soloia le oti lea na tuufaasolo mai i le uluaʻi tagata, o le a pei ai lava tagata uma o Atamu i le taimi na foafoaina ai o ia. Sa lelei atoatoa Atamu, ae leʻi faapea ai na lē mafai ona oti. Na fetalai atu Ieova iā Atamu ia aua neʻi ʻai i “le laau e iloa ai le lelei ma le leaga” ma faapea atu: “o le aso e te ʻai ai e te oti ai lava.” (Kenese 2:17) O le oti la lenā ona o le agasala ma le loto iai. Pe a uma le tofotofoga mulimuli i le iʻuga o le Pulega a Keriso mo le Afe o Tausaga, o le a mafai pea ona fai e tagata a latou lava filifiliga. (Faaaliga 20:7-10) O le a iai pea la latou filifiliga saʻoloto po o le a faaauau pea ona auauna iā Ieova pe leai. E lē mafai la ona faapea atu o le a leai se tagata o le a toe fulitua i le Atua, pei ona faia e Atamu.

O le ā o le a tupu i le tagata e filifili e fouvale i le taimi ua uma le tofotofoga mulimuli, ae o lea ua lē toe iai le oti ma seoli? O le taimi lenā, ua lē toe iai le oti tuufaasolo mai iā Atamu. Ua lē toe iai foʻi seoli po o le tuugamau lea e iai le faamoemoe o le toetū. Peitaʻi, e mafai ona faaumatia e Ieova so o se isi e fouvale e ala i le lafoina i le lepa afi, e aunoa ma se faamoemoe o le toetū. O le oti lenā, e pei o le oti lea na oo iā Atamu ma Eva, ae lē o le oti lea na tuufaasolo mai iā Atamu.

Peitaʻi, e leai se māfuaaga o le a tatou faatalitalia ai lenā mea e tupu. O i latou e sao i le tofotofoga mulimuli, e iai se mea tāua lava e tasi e eseese ai mai iā Atamu ma Eva. Ona ua uma ona tofotofoina atoatoa i latou. E mafai ona tatou mautinoa i le māeʻaeʻa lelei o le tofotofoga mulimuli auā e silafia lelei e Ieova le tagata atoa i totonu ma fafo. E mautinoa foʻi o le tofotofoga mulimuli o le a aveesea ai so o se isi lava e ono faaaogā sesē lana filifiliga saʻoloto. O lea la, e ui e ono mafai e i latou o ē sao mai le tofotofoga mulimuli ona fouvale faasaga i le Atua ma faaumatia ai, ae e ono lē tupu lenā mea.

[Ata i le itulau 31]

Pe a uma le tofotofoga mulimuli, i le ā le uiga o le a tutusa ai tagata ma Atamu?