Pe E te Manatua?

Pe na e fiafia e faitau lomiga talu ai nei o Le Olomatamata? Ia, seʻi vaai pe mafai ona e taliina fesili o loo mulimuli mai:

• O le a faapefea e Iesu ona ʻlaveaʻi lē mativa,’ e pei ona valoia mai i le Salamo 72:12?

I le taimi o lana pulega, o le a iai le faamasinotonu mo tagata uma, e leai ni faiga piʻopiʻo. E masani ona māfua le mativa ona o faigātaua, peitaʻi o le a aumaia e Keriso le filemu atoatoa. Na te faaalia le alofa mo tagata, ma o le a ia autasia i latou uma, ma o le a ia faamautinoa o le a lava taumafa mo tagata. (Salamo 72:4-16)—5/1, itulau 7.

• E faapefea e i tatou o Kerisiano ona faatino la tatou “saʻoloto e tautala ai”? (1 Timoteo 3:13, NW; Filemoni 8; Eperu 4:16)

Tatou te faia faapea e ala i le talaʻi ma le loto tele, aʻoaʻo atu ma avatu fautuaga uigā i le taimi e manaʻomia ai, ma le sasaa atu i le Atua o mea o i o tatou loto e ala i le tatalo, ma ia mautinoa o le a ia faafofogaina ma tali mai.—5/15, itulau 14-16.

• I lalo o le Tulafono, aiseā na manatu ai i le tulaga masani o le alu ese o le sua o le tane, ma le maʻi masina (seʻi tulou) o le fafine, o se mea e “leaga” pe lē mamā ai se tagata?

O tulafono e faatatau i tulaga lē mamā, e pei o le alu ese o le sua o le tane, le maʻi masina o le fafine, ma le fanau mai o se pepe sa faaauiluma ai le mālōlōina lelei o totoga fanautama, ma faamamafa ai le paia o le toto, ma faaalia ai le manaʻomia o se togiola mo agasala.—6/1, itulau 31.

• Pe afai e manaʻo se tasi e fiafia, aiseā e aogā ai lona suʻesuʻe i le tusi o Salamo?

Na silafia e tusitala o Salamo, e maua le fiafia pe a iai se faiā lelei a se tasi ma le Atua. (Salamo 112:1) Na latou faapea mai, e lē mafai e faiā faaletagata, meafaitino, po o mea ua faataunuuina ma le manuia, ona aumaia le fiafia lea e maua i le avea ma “nuu e fai Ieova mo latou Atua.” (Salamo 144:15)—6/15, itulau 12.

• O le ā le faiā faapitoa na osia e Ieova ma le nuu o Isaraelu anamua?

I le 1513 T.L.M., na osia ai e Ieova se faiā fou ma Isaraelu, o se feagaiga. (Esoto 19:5, 6; 24:7) Ma o lea na fananau mai le fanauga a Isaraelu o se nuu filifilia ua tuuina atu iā te ia. Peitaʻi, sa tatau pea i tagata taʻitoʻatasi ona fai lana lava filifiliga e auauna ai i le Atua.—7/1, itulau 21-22.

• Aiseā e ao ai ona tatou faia mea uma lava “ma le lē muimui”? (Filipi 2:14)

O le tele o faaaʻoaʻoga faale-Tusi Paia ua faaalia ai le telē o le aafiaga leaga o le muimui i tagata o le Atua. E tatau ai la ona tatou matuā mafaufau loloto i aafiaga leaga e ono toe oo foʻi i ai i aso nei. O tagata lē lelei atoatoa e iai le uiga o le faitio, e tatau ai la ona tatou mataala ina ia teena so o se faailoilo e iloa ai ua tau oo mai lea agaga ma ʻalofia.—7/15, itulau 16-17.

• E faapefea ona tatou iloa o le poto o loo faamatalaina i le Faataoto 8:22-31 e lē o le poto faalemafaufau?

O le poto e pei ona taʻua i le mau o i luga, na faia pe na foafoaina e avea ma amataga o le ala o Ieova. Ua leva ona iai le Atua ma iai lona atamai po o le poto e pei ona taʻua i le mau; e leʻi foafoaina. O le poto o loo faamatala i le Faataoto 8:22-31 na iai faatasi ma le Atua, o se “tufuga,” o lea la o loo faasino i le foafoaga agaga lea na avea o Iesu, ma o ia foʻi na galulue vavalalata ma le Atua i le foafoaina o mea. (Kolose 1:17; Faaaliga 3:14)—8/1, itulau 31.