Tutupu Lauolaola i se Motu Matagofie

E MATUĀ faagaeetia tagata asiasi i Taiwan i laufanua lauolaola lanu meamata o loo ufitia ai le motu. O faatoʻaga araisa mananaia lanu meamata, ua suia i le lanu auro i le taimi o le seleselega. E ufitia tafatafa o mauga i vaomatua lauusiusi. I se faaeseesega ma taulaga tumutumu, e matuā faafouina lava i le lanulauʻava o laufanua ma mauga. O le mea lenā na uunaʻia ai le palagi na muamua vaai i le motu, e filifili le igoa Ilha Formosa, po o le “Motu Matagofie.”

Ioe, o Taiwan o se motu e matagofie ma laʻitiiti, e na o le 240 maila [390 kilomita] le umi, ma pe tusa e 100 maila [160 kilomita] le lautele i lona vaega aupito lautele. E ufitia e mauga maualuluga le tele o vaega o le motu. E maualuga atu Yü Shan (Mauga o Morrison) e 13,113 futu i le mauga o Iapani o Fuji, po o le mauga o Cook i Niu Sila. O loo siʻomia mauga ogatotonu i laufanua vaapiapi laugatasi e oo atu i le sami, ma e tumu i tagata pisi o Taiwan lea ua silia nei i le 22 miliona.

Se Isi Ituaiga o Lauolaola

Ae e iai se isi ituaiga lauolaola lea ua aliali mai i Taiwan—o le lauolaola faaleagaga. Ua iloa lenei i le maelega o talavou ma ē matutua, i le taimi lava e latou te iloa ai le Atua moni o Ieova. O se mea e faagaeetia moni ai le vaaia o le faatupulaʻia o le aofaʻi, o ē o loo galulue maelega e fesoasoani i isi e aʻoaʻo e uiga iā Ieova ma lona finagalo.

O le tuputupu aʻe o le galuega ua manaʻomia ai ni suiga. Iā Tesema 1990, na faatau ai se fanua mo le faatelēina o le ofisa o le lālā o Molimau a Ieova. Na laʻitiiti tele le uluaʻi ofisa sa i Taipei mo le vaavaaia o galuega a tagata talaʻi o le Malo e 1,777 i Taiwan i lenā taimi. Ina ua uma ni nai tausaga o galuega  fitā a ē tauofo mai isi atunuu, ma tagata tauofo mai le motu lava lea, ia e eseese uma le matutua, na māeʻa ai loa le ofisa fou i Hsinwu mo le faaaogāina iā Aokuso 1994. O le taimi lenā e 2,515 ē na faia ni sao i le talaʻia o le tala lelei o le Afioga a le Atua, le Tusi Paia. I le taimi nei lea ua silia i le sefulu tausaga ua mavae, ua sili atu i le faaluaina lenei fuainumera, ua silia ma le 5,500 le ʻautalaʻi ua iai, ma pe tusa o le kuata o lenā fuainumera o loo faia ni sao i le galuega talaʻi faataimi atoa. E mātauina faapitoa tama ma teine talavou o ē ua pei o le “sau” o le taeao e faafouina ai.—Salamo 110:3.

Lauolaola Faaleagaga o Talavou

E laiti le tele o tagata talaʻi maelega o le tala lelei. O nisi o tamaiti e aʻooga i le tulagalua. O se faaaʻoaʻoga, i se taulaga i mātū o Taiwan, na valaaulia ai se ulugalii mo le uluaʻi taimi e auai i le Aʻoga o le Faiva Faatiokarate, lea e aʻoaʻo ai Molimau a Ieova i le aʻoaʻoina o isi i upu moni o le Tusi Paia. Na maofa le ulugalii ina ua vaaia le tamaitiiti, o Weijun, o faitau ma le tomai le Tusi Paia mai le pulelaa e sili atu i lo le mea e mafaia e le toʻatele o tagata matutua. Na matuā faagaeetia foʻi i laʻua i isi sauniga na la auai ai, auā e oo foʻi i tamaiti e ō i aʻoga faataʻitaʻi, na faia ni tali lelei. Na talanoa lenei ulugalii i amioga lelei a le fanau laiti i le Maota na fai ai sauniga.

Aiseā ua taulaʻi ai nei talavou laiti i aʻoaʻoga a le Tusi Paia, i lenei atunuu e tele ai tagata lotu Puta ma Tao? Ona ua faatatauina e o latou mātua Kerisiano taʻiala o le Tusi Paia, ma ati aʻe se olaga fiafia faaleaiga e faavae i se faiā ma Ieova. Ona sa taumafai mātua o Weijun ia avea le suʻesuʻega faale-Tusi Paia a le aiga ma le talaʻiga o ni mea e olioli ai, ua avea le uso matua ma le tuafafine o lenei tamaitiiti o ni Molimau papatiso. Ina ua fesiligia talu ai nei Weijun ina ia faia se sao i le talaʻiga, na taʻua e lona tinā ua uma ona ia tufa ni mekasini e sili atu, i lo mekasini tuufaatasi na tufa e le isi vaega o le aiga i lenā masina. E fiafia o ia e talanoa i le upu moni, fai ni tali i sauniga, ma talanoa i isi i mea ua ia aʻoaʻoina.

A o Faasolo Ina Latou Matutua

E faapefea lo latou tulaga a o faasolo ina matutua? E alolofa pea le toʻatele iā Ieova ma naunau i le faiva. O se faaaʻoaʻoga, o Huiping o se tamaʻitaʻi aʻoga. Na taʻua e lona faiʻaoga i se tasi aso, e iai ni tagata o se lotu e lē taliaina le toto, ae na te lē iloa po o ai. Ina ua tuua le vasega, na faamatala loa e lenei talavou Kerisiano i lona faiaʻoga, o tagata ia o Molimau a Ieova, ma le pogai o lo latou faia faapea.

Na faaali e se faiaʻoga se ata vitiō i faamaʻi pipisi ona o feusuaʻiga. Na taʻua i le ata le 1 Korinito 6:9, ae sa taʻua e le faiaʻoga e lē o taʻusala i le Tusi Paia le tauatane. Na toe faaali foʻi e Huiping i le faiaʻoga le silafaga a le Atua i le tauatane.

Ina ua saunia e Shuxia lea e vasega ma Huiping se lipoti i faiga sauā i le aiga, na ave i ai e Huiping le Ala Mai! o Aperila-Iuni, 2002 lea e faaulutalaina, “Fesoasoani mo Fafine ua Fasia Faamoʻamoʻa” ma taʻu i ai, o loo tele ni faamatalaga e faavae mai le Tusi Paia o i le lomiga e uiga i lea mataupu. Mulimuli ane, na avea Shuxia ma se tagata talaʻi e leʻi papatiso. Ua faia nei sona sao faatasi ma Huiping i le talaʻia o le tala lelei i isi.

Ua iloa e le toʻatele o Kerisiano o loo i le aʻoga, e faigatā tele pe a iloa oe o se tasi e ola e tusa ai o taʻiala o le Tusi Paia. O le tulaga moni lenei i nuu laiti maotua. Na tauivi Zhihao ma omiga mai uō ona o lona talitonuga ma le talaʻiga. Ua ia taʻua: “Sa ou matuā lotovaivai lea na ou fefe ai e feiloaʻi atu i tamaiti matou te vasega, a o auai i le talaʻiga. O nisi taimi pe tusa e toʻasefulu i latou e ula mai iā  te aʻu!” I se tasi aso, na tofia ai e le faiaʻoga Zhihao e fai se lauga e uiga i lana lotu i le vasega. “Sa ou mafaufau e amata laʻu lauga i le Kenese 1, ona talanoa lea i fesili e pei: O ai na faia le lalolagi ma mea uma o loo iai? Na faapefea ona iai le tagata? A o oʻu faitauina le Tusi Paia, na amata taliē mai nisi iā te aʻu, ma faapea mai ou te talitonu i mea faataulāitu. Ae na ou faaauau pea ma faaiʻu laʻu lauga. Ina ua māʻea, sa maua le avanoa ou te talanoa ai i ni tamaiti o laʻu vasega i la tatou galuega ma talitonuga. I le taimi la lenei pe a latou vaaia aʻu i le talaʻiga, ua lē toe taliē mai!”

Ua faaauau Zhihao: “Ona e Molimau oʻu mātua, e matou te talanoaina ai le mau o le aso i taeao uma. E matou te suʻesuʻeina foʻi le Tusi Paia ma auai e lē aunoa i sauniga. O le pogai lenā ua mafai ai ona ou fesagaʻia so o se tasi e taufaifai mai iā te aʻu, pe a ou taumafai e tufa atu upu moni o le Tusi Paia e faafouina ai i isi.”

O Tingmei, e aʻoga i le aʻoga matātā eseese a teine. Sa iai se taimi na valaaulia ai o ia e ō ma isi teineiti o lana aʻoga i se tafaoga, faatasi ma tama mai le aʻoga matātā eseese a tama. Sa ia iloa le lamatiaga o amioga tatau i ia faatasiga, ma filifili loa e lē alu. E tele taimi e valaaulia ai o ia, e ui na ia taʻu i teineiti ni mataupu mananaia mai le tusi, Fesili ua Fesili Mai ai Talavou—Tali e Aogā. * Na tauemu teineiti iā te ia ma faapea atu o amioga la faaanamua. Ae na manino mai le poto o le mulimuli i taʻiala o le Tusi Paia, ina ua maʻito se teineitiiti ma faia se faapaʻūtama. Ua faapea mai Tingmei: “O le faia o le mea na faatonu ai aʻu e Ieova, ua aumaia ai se loto fuatiaifo mamā. O le iʻuga, ua ou maua le olioli ma se faalogona o le matuā faamalieina.”

Foʻia Toʻatugā i le Tuputupu Aʻe

O se tasi o uō mamae a Tingmei o Ruiwen. A o laʻitiiti, sa manatu Ruiwen o le alu i sauniga faa-Kerisiano ma le auai i le talaʻiga, o se mea e fiu ai. Ae o le vaaia o le eseesega o le alofa faamaoni o ē o loo i lana faapotopotoga ma faauōga faatagāfai a ana uō i le vasega, na ia mautinoa ai e ao ona ia faia ni suiga i lona olaga. Na amata loa ona talaʻi Ruiwen i ana uō i le vasega, ma e leʻi pine ae ia manino lelei ai i nisi mea e ao ona ia faia. Na amata ona ia galue o se paeonia lagolago,  ma talaʻi mo le silia i le 50 itula i le masina. Ona amata lea ona ia paeonia sauatoa, ma talaʻi mo le silia i le 70 itula i le masina. Ua faapea mai Ruiwen: “E faigatā ona faamatala oʻu lagona faafetai iā Ieova. Sa lē taitai ona ia lafoaʻia aʻu. E ui na ou faia mea na lē fiafia ai lona finagalo, ae na ia alofa pea iā te aʻu. Na faaali mai foʻi e loʻu tinā ma isi i le faapotopotoga le alofa lava lea e tasi. Ona o lea ua ou faia nei ni suʻesuʻega faale-Tusi Paia se lima, ua ou lagona ai ua ou auai i se galuega e sili ona faamalieina ai.”

I se tasi o aʻoga maualuga, na tofia ai ni tamaiti Molimau se toʻalua e fai ma sui o le aʻoga i se tauvaga siva faaleaganuu. Ina ua la iloa e uiga i lea tauvaga, na la manatu ai o le a faaleagaina o la lotofuatiaifo faa-Kerisiano pe a faia sa la vaega. Ina ua taumafai e faamatala o la manatu ma talosaga pe mafai ona lē ō, e leʻi taliaina le talosaga. Na i lo lea na taʻu atu e faiaʻoga, talu ai o lea sa tofia i laʻua, e tatau la ona ō. I le lē mananaʻo e lolo atu, na faafesootaʻi ai e nei talavou Molimau le ofisa o aʻoga i le Initineti, ma lafo ai se tusi e faamatala ai lo la faafitauli. E ui la te leʻi maua se tali, ae e leʻi pine ae maua e le aʻoga le faatonuga e aua le faamalosia so o se tasi e auai i ia tauvaga. Maʻeu le fiafia o nei talavou e iloa, o aʻoaʻoga a le Tusi Paia na la maua, e lē gata na taaʻina ai o la lotofuatiaifo, ae na avatu ai foʻi le malosi e fai ai le mea ua tonu!

E oo foʻi i ē e lē atoatoa le malosi, ua fiafia e tufa atu lo latou faamoemoe mai le Tusi Paia i isi. Na pē le tino o Minyu mai le taimi na fanau mai ai. Ona e lē mafai ona ia faaaogā ona lima, e na te suʻe itulau o le Tusi Paia i lona laulaufaiva ma maua ai mau ia e manaʻo e faitau. Pe a faia ana lauga i le Aʻoga o le Faiva Faatiokarate i le Maota e fai ai sauniga, e nofo o ia i se nofoa maulalo ae e uu e lana fesoasoani le mea faaleotele leo. Maʻeu le faafiafia loto o le vaaia o taumafaiga a Minyu i le saunia o nei lauga!

Ina ua manaʻo Minyu e avea o se tagata talaʻi o le Malo, na aʻoaʻo e nisi tuafāfine o le faapotopotoga le molimau atu i le telefoni ina ia fesoasoani ai iā te ia. E na te oomi fuainumera i lona laulaufaiva, a o fesoasoani tuafāfine e fai faamaumauga o tagata o loo ia talanoa i ai . Na ia olioli tele i le galuega lea na oo ai ina avea ma paeonia lagolago, e talanoa i isi i le Malo o le Atua i le 50 i le 60 itula i masina taʻitasi i le telefoni. Na ia maua nisi na talia lomiga faale-Tusi Paia ma faataga o ia e toe vili atu. O loo ia faia nei ni suʻesuʻega faale-Tusi Paia se tolu ma ni tagata na ia fesootaʻi ai i lenei ituaiga auala.

Ioe, e pei o le sau e faafouina ai, ua lotomalilie ma maelega tama ma teine talavou i faapotopotoga o Molimau a Ieova e 78 i Taiwan, e tufa atu le tala lelei o le Malo e maua ai le ola i le faitau miliona ua tumutumu i lenei motu. Ua na o se vaega itiiti lenei o le faataunuuga i le lalolagi atoa o le valoaga a le Tusi Paia: “E fai taulaga ma le loto ou tagata i le aso o lou malosi i au mea paia e matagofie mai le manava o le vave ao; e iā te oe le sau o lou tauleʻaleʻa.” (Salamo 110:3) Maʻeu le avea o nei talavou laiti ma puna o faamalosiauga i ē matutua, a o latou galulue faatasi, ae o le sili o na mea, o i latou o se puna o le olioli i lo latou Tama i le lagi, o Ieova!—Faataoto 27:11.

[Faamatalaga pito i lalo]

[Pusa/Ata i le itulau 10]

E MANAʻOMIA NISI MAOTA MO SAUNIGA

O le faatupulaʻia o tagata talaʻi i Taiwan, ua avea ai o se luʻi faigatā le manaʻoga mo nisi Maota mo Sauniga. Aiseā? Ona e toetoe lava leai se fanua talafeagai mo le fausiaina o nei Maota, seʻi vagana ai isi nuu maotua. E lē gata i lea, e taugatā tele le tau ma e faigatā foʻi tulafono a le malo. I taulaga ma aai tetele, na pau le mea e mafai ona fai, o le faatau o se fale po o se fogafale lea e fai ai ofisa ma avea ma Maota mo Sauniga. Peitaʻi, o le tele o ofisa e maulalo le faalo, tele tupe e totogi mo le tausia lelei, faatapulaa le ulufale, ia po o isi mea e lē lelei ai ona faaaogā o ni Maota e fai ai sauniga.

Peitaʻi i tausaga e leʻi leva atu, na mafai ai e Molimau a Ieova i Taiwan ona faia ni o latou Maota fou mo Sauniga. O loo faaauau pea ona saʻilia e Molimau ni fanua fou, a o latou lotomalilie e totogi uma tupe faaalu, faapena foʻi ma le ati aʻe o tomai e manaʻomia mo faugafale.