O Loo Ola le Afioga a Ieova

Manatu Tāua Mai le Vaega Lona Lima o le Tusi o Salamo

E ONO faapea mai lē mauʻoa: “Ia avea o matou atalii pei o laau totō, ua tupu tele a o tauleleʻa i latou; o matou afafine ia pei o tulimanu ua togitogiina e pei o se maota. Ia tutumu o matou fale saito . . . ia tutupu a matou mamoe ia afe . . . Amuia le nuu o loo faapena i latou.” Peitaʻi ua faapea mai le faisalamo: “Amuia le nuu e fai Ieova mo latou Atua.” (Salamo 144:12-15) O i latou e tapuaʻi iā Ieova e tatau ona fiafia ona o Ieova o le Atua fiafia. (1 Timoteo 1:11) Ua faamaonia lenei mea moni i le tuufaatasiga mulimuli o pese mai le Atua, e aofia ai Salamo 107-150.

Ua faamatilatila foʻi i le Tusi Lona Lima o Salamo uiga sili ona matagofie o Ieova, o lona alofa, faamaoni, ma lona agalelei. O lo tatou malamalama atili iā Ieova, tatou te alolofa ma matataʻu ai iā te ia ma maua ai le fiafia. Maʻeu se feʻau tautele o loo maua i le Tusi Lona Lima o le Salamo!—Eperu 4:12.

FIAFIA ONA O LE ALOFA O IEOVA

(Salamo 107:1–119:176)

A o toe foʻi tagata Iutaia na faaaunuua i Papelonia, na pepese: “Ia vivii atu i latou iā Ieova ona o lona alofa, ma ona vavega na fai i le fanau a tagata.” (Salamo 107:8, 15, 21, 31) Na vivii Tavita i le Atua: “O lou faamaoni foʻi ua oo i ao.” (Salamo 108:4) I le pese e sosoo ai na ia tatalo: “Ieova e, loʻu Atua, ia e fesoasoani mai iā te aʻu; ia e faaola mai iā te aʻu e tusa ma lou alofa.” (Salamo 109:18, 19, 26) O le Salamo e 110 o se valoaga i le pulega a le Mesia. Ua faapea mai le Salamo 111:10: “O le mataʻu iā Ieova, o le amataga lea o le poto.” Ua faapea mai le salamo e sosoo ai: “Amuia le tagata o lē mataʻu iā Ieova.”—Salamo 112:1.

O le Salamo 113-118 ua faaigoaina o Salamo a Aleli ona o loo taʻu soo ai le “Aleluia” po o le “Vivii atu iā Ioa.” E tusa ai ma le Mishnah po o tusitusiga o aganuu faa-Iutaia sa tuugutu, na usuina nei pese i le Paseka ma tausamiga faaletausaga a tagata Iutaia. O le tusi sili ona umī o salamo ma le Tusi Paia, o le Salamo 119, ua faasilisilia ai le feʻau a Ieova.

Taliina o Fesili Faale-Tusi Paia:

109:23—O le ā na uiga i ai upu a Tavita: “Ua ou mavae atu pei o le ata ua lafoia”? Na talanoa faafatusolo Tavita i lona iloa ua lata lona maliu.—Salamo 102:11.

110:1, 2—O ā mea na faia e Iesu Keriso, le “Alii” o Tavita, a o nofo i le itu taumatau o le Atua? Ina ua faatūina Iesu, sa ia afio atu i le lagi ma faatalitali i le itu taumatau o le Atua seʻia oo i le 1914, na avea ai ma Tupu. O le taimi lenā na pule ai Iesu i ona soo faauuina ma taʻitaʻia la latou talaʻiga ma le faia o soo, ma sauniuni i latou e nofotupu ma ia i lona Malo.—Mataio 24:14; 28:18-20; Luka 22:28-30.

110:4—O le ā ua ‘tautō i ai Ieova ma le lē salamō’? O lenei tautoga o le feagaiga a Ieova na faia ma Iesu Keriso e avea ai ma Tupu ma Ositaulaga Sili.—Luka 22:29.

 113:3—Ua faapefea ona viia le suafa o Ieova, “e afua mai i le mea e alu aʻe ai le lā, e oo atu i le mea e goto ai”? E lē na o le tapuaʻi o ni tagata i le Atua i aso uma e aofia ai. O le oso aʻe o le lā mai le itu i sasaʻe e oo i le mea e goto ai i le itu i sisifo, e sulugia e ave o le lā le lalolagi aoao. Ua tatau foʻi ona viia Ieova i le lalolagi aoao, ae lē mafai e aunoa ma ni taumafaiga a le toʻatele. Ua iā i tatou o ni Molimau a Ieova se faaeaga faapitoa o le viiaina o le Atua ma faia se sao maelega i le faalauiloaina o le Malo.

116:15—E faapefea ona “silisili i le manatu o Ieova le oti o ona tagata amio Atua”? E silisili pe matuā pele iā Ieova ona tagata, ma e telē se aafiaga pe afai e maliliu uma o se vaega toʻatele. Pe ana faataga e Ieova lenā mea e tupu, o le a peiseaʻī ai e malolosi atu ona fili iā te ia. Aemaise, o le a leai ai nisi i le lalolagi e faavae aʻi le lalolagi fou.

119:71—O le ā le itu e lelei ai le mafatia i puapuaga? O tulaga faigatā tatou te aʻoaʻoina ai le faalagolago atoatoa iā Ieova, le tatalo faatauanau, ma le filigā i le suʻesuʻeina o le Tusi Paia ma le faatatauina. O le auala tatou te tali atu ai i na faigatā o le a mafai ai ona iloa ni vaivaiga e manaʻomia ona faaleleia. Pe afai tatou te faatagaina sauāga e faaleleia atili ai i tatou, o le a tatou lē feita la pe a mafatia.

119:96—O le ā e uiga i ai le “iʻuga o mea uma ua atoatoa ona lelei”? O loo talanoa le faisalamo e uiga i le atoatoa ona lelei e fua i le mafaufau o le tagata. Atonu na manatu o ia i le gata mai o le malamalamaga o le tagata i le lelei atoatoa. I se faaeseesega, e leai se mea e gata mai ai le poloaʻiga a le Atua, e aogā i vala uma o le olaga.

119:164—Aiseā e iloga ai le vivii i le Atua ‘e taʻi faafitu i le aso’? E masani ona faaata e le numera fitu le atoatoa. O lea la, o loo taʻua e le faisalamo ua tatau iā Ieova le viiga uma.

Lesona mo i Tatou:

107:27-31. O le a faaumatia le poto o le lalolagi pe a oo mai Amaketo. (Faaaliga 16:14, 16) E lē mafai ona faasaoina ai se isi mai le faaumatiaga. Na o i latou e faamoemoe iā Ieova mo le faaolataga o le a ola e ‘vivii atu iā te ia ona o lona alofa.’

109:30, 31; 110:5. E masani ona lē puipuia e le talipupuni le lima taumatau o se fitafita e tauave ai le pelu, na o lona itu tauagavale. I se tulaga faafaatusa, o loo iai Ieova “i le lima taumatau” o ana auauna e tau mo i latou. Na te puipui ma fesoasoani iā i latou, o se māfuaaga lelei lea e “matuā vivii atu” ai iā te ia!

113:4-9. E matuā maualuga Ieova, ma e manaʻomia ai ona faamaulalo o ia “e silasila mai i le lagi.” Peitaʻi e alofa mutimutivale o ia i lē ua vaivai, lē ua mativa, ma le fafine pa. E faamaulalo le Alii Pule Silisili Ese o Ieova ma e finagalo foʻi ia faapena ona tagata tapuaʻi.—Iakopo 4:6.

114:3-7. O le iloa o mea lelei na faia e Ieova mo ona tagata i le Sami Ulaula, le vaitafe o Ioritana, ma i le mauga o Sinai e ao ona matuā aafia ai i tatou. E tatau i tagata, o loo faaata mai e le “eleele” ona matuā maofa ma mataʻu pe “gatete” i se tulaga faafaatusa ona o le Alii.

119:97-101. O le mauaina o le poto ma le malamalama mai le Afioga a le Atua e puipuia ai i tatou mai lamatiaga faaleagaga.

119:105. Ua avea le Afioga a le Atua o le sulu i o tatou vae auā e fesoasoani iā i tatou e faafetaiaʻia faafitauli i le taimi nei. O loo faamalamalama ai foʻi o tatou ala ona ua valoia ai fuafuaga a le Atua mo le lumanaʻi.

FIAFIA E UI I FAIGATĀ

(Salamo 120:1-145:21)

E faapefea ona tatou fesagaʻia tulaga faigatā ma sao ai? Ua tali manino e le Salamo 120-134 lenei fesili. Tatou te sao mai faigatā  ma olioli pea pe a faamoemoe iā Ieova mo le fesoasoani. O nei salamo ua faaigoaina o Pese o le Ō Aʻe, atonu sa usuina a o faimalaga atu Isaraelu i Ierusalema mo tausamiga faaletausaga.

Ua faamatala e le Salamo 135 ma le 136 Ieova o Lē Faia so o se mea e fiafia ai, e matuā eseese ai ma isi atua e leai ni ola. O le Salamo 136 o pesega fetaliaʻi, e tali vaega mulimuli o fuaiupu mulimuli i fuaiupu muamua. Ua faamatala e le salamo e sosoo ai le faanoanoa o tagata Iutaia sa i Papelonia auā na mananaʻo e tapuaʻi iā Ieova i Siona. O Tavita e ana Salamo 138-145. Na ia manaʻo ‘e vivii atu iā Ieova ma lona loto atoa.’ Aiseā? Na ia faapea: “Auā na faia aʻu e ala ai ona mataʻutia ma ofo tele ai.” (Salamo 138:1; 139:14) O salamo e lima e sosoo ai, na tatalo Tavita mo le puipuiga mai tagata leaga, aʻoaʻiga amiotonu, le laveaʻiga mai ē sauā, ma taʻiala tau amio. Na te faamatilatilaina le fiafia o tagata o Ieova. (Salamo 144:15) Ina ua uma ona faamatala e Tavita le silisili ese ma le lelei o le Atua na ia taʻutino mai: “O vii o Ieova e taʻu atu e loʻu gutu; e faafetaia e tagata uma o lona suafa paia, e faavavau faavavau lava.” —Salamo 145:21.

Taliina o Fesili Faale-Tusi Paia:

122:3—Na faapefea ona avea Ierusalema ma aai “ua fesootaʻi faatasi”? E pei ona masani ai i aai o aso anamua, sa fau vavalalata fale. Sa laiti ma maopoopo aai ma faigofie ona puipuia pe a osofaʻia. Ona o le felataʻi o fale, sa mafai ai ona faalagolago le isi aiga i le isi aiga mo le fesoasoani ma le puipuiga. Ua faaata mai e lenei mea le autasi faaleagaga o ituaiga e 12 o Isaraelu pe a faatasitasi mo tapuaʻiga.

123:2—O le ā le manatu autū o le faataʻitaʻiga i mata o auauna? E lua māfuaaga e vaavaai pe faamoemoe ai le auauna i lona matai: ina ia iloa le manaʻoga o le matai ma ia maua e ia le puipuiga ma mea manaʻomia o le olaga. I se tulaga talitutusa, tatou te vaavaai iā Ieova ina ia iloa lona finagalo ma ia maua lona finagalo malie.

131:1-3—Na faapefea ona ‘fifilemu ma faalologo Tavita faapei o le tama ua teʻa ma le susu o lona tinā’? E pei lava o le tamaitiiti ua teʻa ma le susu ona lagona le toʻafilemu i lima o lona tinā, sa faapena foʻi ona fifilemu Tavita pei o le “tama ua teʻa ma le susu o lona tinā.” E faapefea? E ala i le lē loto faamaualuga ma le lē faasiasia o ona mata, ma i le lē saʻilia o mea silisili mo ia. Na i lo le tuliloa o tulaga maualuga, na masani ona iloa e Tavita ona vaivaiga ma faaalia lona loto maulalo. O se mea atamai lo tatou faataʻitaʻi i na uiga, aemaise lava pe afai o aapa atu mo tofiga i le faapotopotoga.

Lesona mo i Tatou:

120:1, 2, 6, 7. O tala taufaaleaga ma faamatalaga tutui e mafai ona matuā mafatia ai isi. O le pulea lelei o o tatou laulaufaiva o se tasi lea o auala e iloa ai o loo tatou lagolagoina le “filemu.”

120:3, 4. Pe afai o tatou fesagaʻi ma se tasi e ‘laulaufaiva faaʻoleʻole,’ e faamāfanafanaina i tatou i le  iloa o le a faasaʻoina e Ieova i lana taimi atofaina. O le a iai le taimi e pagatia ai tagata taufaaleaga i lima o le “tagata malosi.” O le a lavea i latou i le faamasinoga aasa a Ieova lea ua faaataina mai e “malala ola o le ratami.”

127:1, 2. E ao ona tatou vaai atu iā Ieova mo taʻitaʻiga i mea uma tatou te faia.

133:1-3. O le autasi o tagata o Ieova, e toʻafilemu, e lelei ma faafouina ai. E lē tatau ona tatou faaleagaina e ala i le vaavaai masei, faamisa pe faitio.

137:1, 5, 6. O tagata tapuaʻi o Ieova na faaaunuua sa pipii lava o latou loto iā Siona, lea sa faaataina le faalapotopotoga a Ieova. Ae faapefea i tatou? Po o tatou pipii faamaoni i le faalapotopotoga a Ieova i aso nei?

138:2. E ‘faasilisilia e Ieova lana afioga i lona suafa uma.’ O mea uma ua ia folafolaina i lona suafa na te faataunuuina i se tulaga e sili mamao na i lo mea tatou te faatalitalia. E matagofie faamoemoe o i le lumanaʻi mo i tatou.

139:1-6, 15, 16. E silafia e Ieova o tatou gaoioiga ma manatu, e oo lava i a tatou upu a o leʻi talanoa atu. Na te silafia lelei i tatou mai le taimi o afuafua. E matuā silisili le silafiaina e le Atua o i tatou. Maʻeu le faamāfanafanaina o i tatou i le iloa, o loo silafia e Ieova ni tulaga faigatā o loo tatou fetaiaʻi ma e malamalama foʻi i aafiaga iā i tatou!

139:7-12. E leai se nofoaga tatou te ono i ai e lē mafai ai ona faamalosi mai le Atua iā i tatou.

139:17, 18. Po o tatou fiafia i le poto e uiga iā Ieova? (Faataoto 2:10) Pe afai o se mea e fiafia ai, o le a lē taitai la ona gata lo tatou olioli. O manatunatuga o Ieova “ua sili ia ona tele i le oneone.” O le a tele mea e aʻoaʻoina e uiga iā te ia.

139:23, 24. E tatau ona tatou mananaʻo e suʻesuʻe i tatou e Ieova po o iai se “ala e tigā ai,” po o ni mafaufauga lē talafeagai, tuʻinanauga, ma ni faanaunauga e manaʻomia ona ia fesoasoani e aveesea.

143:4-7. E faapefea ona tatou onosaʻia ni faigatā mataʻutia? O loo taʻua e le faisalamo le ki: Manatunatu i mea ua faia e Ieova, mafaufau i ana galuega, ma tatalo iā te ia mo le fesoasoani.

“Ia Outou Vivii Atu iā Ioa”

O tuufaatasiga o tusi e fā o salamo na muamua atu, e faaiʻu lava i le viiaina o Ieova. (Salamo 41:13; 72:19, 20; 89:52; 106:48) E faapena foʻi le vaega lona lima. Ua faapea mai le Salamo 150:6: “Ia vivii atu iā Ioa o mea uma lava e mānava. Ia outou vivii atu iā Ioa.” O le a faataunuuina moni lava i le lalolagi fou a le Atua.

A o tatou faatalitali ma le naunautaʻi mo lenā taimi fiafia, ua tatau ona tatou viia le Atua moni ma lona suafa. Pe a manatu i lo tatou fiafia ona o le iloaina o Ieova ma le lelei o la tatou faiā ma ia, pe lē uunaʻia ai ea i tatou e vivii atu iā te ia ma le loto faafetai?

[Ata i le itulau 15]

E matuā ofoofogia vavega a Ieova

[Ata i le itulau 16]

O manatunatuga o Ieova “ua sili ia ona tele i le oneone”