“Ona o se Tama e Iva Ona Tausaga”

O TAIMI uma e asiasi atu ai Molimau a Ieova i le fale o Wiesława i Polani i saute, sa ia faafetaia ma le faaaloalo i latou ma teena se talanoaga. O se tasi aso, na asiasi ane ai Samuelu e iva ona tausaga ma lona tinā. I le taimi la lea, na filifili ai Wiesława e faalogo i le la feʻau ma ia talia se mekasini e uiga i le parataiso i le lalolagi.

Ona sa lata i le taimi o le Faamanatuga o le maliu o Iesu Keriso, na manaʻo ai Samuelu e valaaulia Wiesława i lenā sauniga faapitoa. O lea na toe asiasi atu ai o ia ma lona tinā ma se tusi valaaulia. Ina ua vaai Wiesława o loo laʻei lelei Samuelu, na ia fai atu i ai ma le faaaloalo pe mafai ona faatali seʻi alu e fai ni ona ofu lelei. Ina ua toe foʻi ane, sa ia faalogologo atu iā Samuelu, talia le valaaulia ma fesili atu: “Ou te alu atu na o aʻu pe ma te ō atu ma laʻu tane?” Na ia toe faapea atu lea: “E tusa pe lē alu atu laʻu tane, ou te alu atu pea, ona o oe Samuelu.” Na fiafia tele Samuelu ina ua vaai mai o auai atu Wiesława.

Na nonofo faatasi Wiesława ma Samuelu a o faia le lauga o le Faamanatuga ma ia faasino atu i le fafine mau na talanoaina. Na matuā maofa tele ai Wiesława. Sa ia fiafia i le Faamanatuga ona o le faigofie o le auala na faamatala ai manatu loloto. Na faalaeiauina foʻi o ia ona o le faafeiloaʻi māfana ma le agalelei o tagata o le faapotopotoga iā te ia. Talu mai lenā taimi, ua faaalia pea le talisapaia e Wiesława o mea faaleagaga ma ua aufaatasi e lē aunoa ma Molimau a Ieova. Na ia faapea mai talu ai nei: “Ou te matamuli lava ona o loʻu lē faalogo iā te outou pe a ō mai i loʻu fale. Ma o le mea moni lava, na māfua ona ou faalogo ona o se tama e iva ona tausaga, o Samuelu.”

E pei o Samuelu i Polani, e tele talavou Molimau a Ieova o loo vivii iā Ieova e ala i le tautala atu ma a latou amioga lelei. Afai o oe o se talavou, e mafai foʻi ona e fesoasoani i ē loto faamaoni latou te talisapaia mea faaleagaga.