Pe a Fulitua iā Ieova Sē Pele iā te Oe

O MAREKO ma Luisa o ni Molimau a Ieova. * Sa la tausia ma le alofa le la fanau i ala o Ieova, e pei ona timaʻia ai mātua Kerisiano uma e le Tusi Paia. (Faataoto 22:6; 2 Timoteo 3:15) Ae pagā lea, ina ua matutua tamaiti, e iai nisi o i latou sa lē mananaʻo e auauna pea iā Ieova. Na faapea mai Luisa: “Pagā le momomo o loʻu loto pe a ou mafaufau i laʻu fanau lea ua lē toe auauna iā Ieova. E lē mavae se aso ma oʻu lagona mafatia, aemaise pe a talanoa isi mātua e uiga i a latou fanau. Ou te faalogoina e pei a puni laʻu mānava, ma ou te taumafai malosi e taofiofi oʻu loimata.”

Ioe, e ogaoga tigā e oo i se aiga pe a filifili se tasi o i latou e fulitua iā Ieova, ma lē toe fia iai i le olaga sa aʻoaʻo aʻe ai i le Afioga a le Atua. Fai mai Ailini, o lē na fulitua lona uso matua iā Ieova: “E matuā pele iā te aʻu si oʻu uso, ma o le a ou faia so o se mea ou te mafai ina ia toe foʻi mai o ia iā Ieova!” Na fulitua se tuagane o Maria iā Ieova ma ola i se olaga lē mamā. Fai mai Maria: “Sa faigatā tele lenei mea iā te aʻu, auā o si oʻu tuagane lenei e ese le māfana o le ma faiā. O taimi e sili ona ou misia ai o ia, o a matou faatasitasiga faaleaiga.”

Aiseā e Faigatā Ai?

Aiseā e matuā mafatia ai se aiga Kerisiano pe a alu ese mai iā Ieova se tasi o le fanau, po o se isi foʻi e pele iā i latou, e peiseaʻī ua oti faaleagaga? Auā ua latou iloa, e na o ē tumau faamaoni iā Ieova, o le a ola e faavavau i se lalolagi parataiso, e pei ona folafola mai e le Tusi Paia. (Salamo 37:29; 2 Peteru 3:13; Faaaliga 21:3-5) Ma latou te tulimataʻia lenā taimi e ola fiafia ai mātua, o fanau, ma isi uma e pele iā i latou. Pagā la le tigā o le vaai atu ua fulitua iā Ieova se tasi e pele iā i latou, auā o le a misia ai e lenā tagata nei faamanuiaga! E oo foʻi i le taimi nei, ua iloa e Kerisiano le faamanuiaina o o latou olaga ona o tulafono ma taʻiala a Ieova o loo aʻoaʻoina ai i latou. O le pogai lenā e momomo ai o latou loto, pe a  vaai atu i ē pele, ua ola i ni olaga e selesele ai āuga tigā.—Isaia 48:17, 18; Kalatia 6:7, 8.

Mo i latou e leʻi tofo i lenei mea, atonu e faigatā ona latou malamalama i le ogaoga o āuga e oo i ai. Ae o le mea moni e toetoe o vala uma o le olaga e afaina ai. Ua faapea mai Luisa: “O se mea faigatā tele iā te aʻu loʻu nofo i totonu o sauniga ma vaavaai atu i isi mātua o loo taliē fiafia ma talatalanoa ma a latou fanau. Po o le ā lava se faatasiga fiafia, ae ou te faanoanoa ona e lē o iai uma tagata sa ou manaʻo e iai.” E manatua e se tasi toeaina Kerisiano tausaga e fā a o lē toe iai sa latou aufaatasiga faaleagaga ma lona afafinefai, o le tama teine a lona toʻalua. Fai mai a ia: “E ui i ni ‘taimi fiafia’ sa tatau ona iai, ae faanoanoa lava lo maʻua aiga. Pe a ou ave se meaalofa i laʻu avā pe ma te ō foʻi i se nofoaga manaia e tafafao ai, e tele ina tagi si oʻu toʻalua, ona o le lē mafai ona matou fiafia faatasi ma le ma tama i na taimi.”

O le ā sou manatu, po ua soona faamamafa ea e na Kerisiano nei tulaga? Ailoga! Pe a tuu i se isi itu, o loo atagia mai iā i latou uiga o Ieova o lē na faia le tagata i lona faatusa. (Kenese 1:26, 27) O le ā le uiga o lenā manatu? O ā faalogona o Ieova ina ua fouvale tagata Isaraelu iā te ia? I le Salamo 78:38-41, o loo iai upu nei, sa “faalili” ma “faaʻonoʻono” iā Ieova; lona uiga sa matuā tigā le finagalo o Ieova. E ui i lea, sa onosai o ia ae lapataʻi ma aʻoaʻia i latou, ma faamagalo pea i ai i taimi  uma e salamō ai. Ua manino mai la, e māfana lagona alofa o Ieova i ana foafoaga, ‘le galuega a ona aao,’ ma e lē faataalise ona ia lafoaʻia i latou. (Iopu 14:15; Iona 4:10, 11) Na ia tuu foʻi i tagata le tomai faalemafaufau latou te maua ai na lagona alofa faamaoni, aemaise lava i faiā a tagata o le aiga. E lē o se mea fou la le faavauvau o tagata pe a motusia le mafutaga faaleagaga ma se tauaiga e pele iā i latou.

Ioe, o le motusia o le mafutaga faaleagaga ma sē pele, o se tasi o puapuaga ua sili ona ogaoga mo ē o loo faamaoni pea i le tapuaʻiga moni. (Galuega 14:22) Na fetalai Iesu, o le taliaina o lana feʻau o le a fevaevaeaʻi ai nisi aiga. (Mataio 10:34-38) E lē faapea o le feʻau a le Tusi Paia e pogai ai ona fevaevaeaʻi aiga. Peitaʻi o tagata o le aiga e lē talitonu pe lē faatuatua i lea feʻau, latou te faatupu fevaevaeaʻiga e ala i le tetee mai ma lafoaʻi le ala faa-Kerisiano. Ae tatou te faafetaia Ieova, auā na te lē o lafoaʻia ana auauna faamaoni, ae ua saunia mai ni auala e onosaia ai puapuaga o loo latou fetaiaʻi. Afai la o loo e faanoanoa ona o sē pele iā te oe ua fulitua iā Ieova, o ā ni taʻiala a le Tusi Paia e mafai ona e onosaia ai lenā faavauvau, ma tau maua ai pea sou fiafia?

E Faapefea Ona Onosaia?

“Ia outou ati aʻe iā te outou . . . , ia outou faatumau iā te outou i le alofa o le Atua.” (Iuta 20, 21) E fuafua lava i lou tulaga, ae atonu e leai se mea e te mafaia i lenei taimi e fesoasoani ai i se tasi o le aiga ua lē o toe auauna iā Ieova. Peitaʻi e mafai ma e tatau ona e taumafai ia e malosi pea faaleagaga, faapea foʻi i isi tagata o lou aiga o loo tumau. E toʻatolu le fanau tama a Veronika, ma e toʻalua na lē toe fia auauna iā Ieova. Fai mai Veronika: “Sa fautuaina ma le agalelei i maʻua ma laʻu tane, afai e tumau lo ma malolosi faaleagaga, o le a ma iai i se tulaga lelei e talia ai le ma fanau pe a toe foʻi mai. O le ā na semanū e oo i le uii faamaumauʻoa pe ana musu lona tamā e talia o ia ina ua toe foʻi mai?”

Taumafai e faapisi lou mafaufau i meafai mo le tapuaʻiga moni ina ia tumau ai lou malosi faaleagaga. E pei o le pipii i lau faasologa mo suʻesuʻega loloto i le Tusi Paia ma auai i sauniga faa-Kerisiano. Pe a talafeagai, ia e nofosauni e fesoasoani i isi tagata o le faapotopotoga. Atonu e faigatā i le uluaʻi taimi. Fai mai Veronika: “O oʻu lagona sa iai muamua, ua ou lē toe fia mafuta i se tagata. Ae na maumauaʻi lava si aʻu tane ina ia fai pea la ma faasologa faaleagaga. Sa ia faamautinoa e ma te ō i sauniga. Ina ua oo i le taimi o se tauaofiaga, sa ou taumafai malosi e maua loʻu lototele e feiloaʻi atu ai i tagata. Ae o mataupu o le tauaofiaga na atili ai ona ma vavalalata atu iā Ieova. Sa sili foʻi ona faalaeiau lenā tauaofiaga i si a ma tama lea sa tumau i le upu moni.”

Na iloa e Maria lea na taʻua muamua, le aogā o le pisi i le faiva i le fanua, ma i le taimi nei e toʻafā ni tagata o loo ia faia a latou suʻesuʻega faale-Tusi Paia. E faapena foʻi le tala a Lola: “Ou te tagi pea i aso taʻitasi, ae ou te faafetaia Ieova, ona e ui ou te lē o maua le fiafia lea e fiafia ai nisi mātua i le tausia aʻe o a latou fanau, ae ua ou maua le feʻau silisili a le Tusi Paia, o loo aogā i aiga i nei aso e gata ai.” Ina ua matutua le fanau a Keni ma Elenoa ma lē  toe fia tapuaʻi iā Ieova, sa la fuafua loa e ō atu i se vaipanoa na manaʻomia ai ni tagata talaʻi, ma auauna ai faataimi atoa. O lenā gaoioiga na saʻo ai pea o la mafaufau i mea, ma lē lofitūina ai i le faanoanoa.

Ia tumau pea lou faamoemoe. O le alofa “e faamoemoe i mea uma.” (1 Korinito 13:7, LT ) Fai mai Keni: “Ina ua fulitua le ma fanau i le upu moni, sa ou faatusaina e peiseaʻī ua feoti. Peitaʻi ina ua maliu loʻu tuafafine, o inā na suia ai oʻu manatu. Ou te faafetai e leʻi feoti moni i le itu faaletino laʻu fanau, ma o loo tuu mai pea e Ieova le avanoa e toe foʻi atu ai iā te ia.” O le mea moni, e toʻatele nisi sa muaʻi fulitua i le upu moni ae ua toe foʻi mai.—Luka 15:11-24.

Aua le tuuaʻia fua oe. O nisi mātua ua toe faasolo mafaufauga i tua ona faanoanoa lea faapea, sa leʻi lelei ona fai le la tiute tauave. Ae o loo taʻua le manatu saʻo i le Esekielu 18:20 e faapea, e tuuaʻia e Ieova le tagata na faia le agasala ona o le sesē o lana filifiliga, ae lē tuuaʻia ona mātua. E lelei pe a mātau, e ui ina tele manatu i le tusi o Faataoto e faatatau i le tiute o mātua e tausi aʻe a latou fanau i le ala tonu, ae o loo sili atu ai ona tele fautuaga i le fanau ina ia faalogo ma usitai i o latou mātua. Ioe, o le tiute tauave a fanau le talia o aʻoaʻoga faale-Tusi Paia o loo aumai e o latou mātua lē lelei atoatoa. E mautinoa sa e fai le mea sili na e mafaia i lenā taimi. Ae tusa pe e te manatu sa sesē nisi mea na e faia ma ua tatau ai ona tuuaʻia oe, ae lē faapea ai o au mea sesē ua fulitua ai mai le upu moni sē pele iā te oe. E matuā leai sou fesoasoani pe a na o lou nofo ma faapea ifo, “ana iloa lava” o fai lea mea ma lea mea. E aogā mea tutupu e toe fuataʻiina ai le loto ma lē toe faia na sesē, ae tatalo iā Ieova mo se faamagaloga. (Salamo 103:8-14; Isaia 55:7) Ona faagalo lea o mea ua tuanaʻi, ae tulimataʻi le lumanaʻi.

Ia e faapalepale i isi. Atonu e lē faigofie i isi ona latou iloa se auala e faamāfanafana pe faamalosiau mai ai iā te oe, aemaise pe afai e leʻi tofo muamua i latou i tigā ua e tofo i ai. O le isi mea, e tofu lava le tagata ma lana auala e faamāfanafana ma faalaeiau ai. Lona uiga, afai e fai e se tasi se tala e te ita ai, taumafai e faatatau le fautuaga a Paulo o i le Kolose 3:13: “Ia fefaapalepaleaʻi, ma ia fefaamagaloaʻi outou, pe afai ua agaleagaina se tasi e se tasi.”

Ia amanaʻia le faatulagaga a Ieova mo aʻoaʻiga. Afai e aʻoaʻia sou tauaiga, ia manatua o se vala lenei o le faatulagaga a Ieova, ma ua fuafua mo se lelei o tagata uma, e aofia ai ma lou tauaiga ua agasala. (Eperu 12:11) O lea la, seʻi tuu ese ia le faanaunauga fia suʻesuʻe masei i le ʻautoeaina o ē na faia le faaiʻuga e aʻoaʻia ai lou tauaiga. Ia manatua, pe a faia mea i le auala a Ieova, e na o iʻuga lelei e maua ai. Ae afai e tetee i faatulagaga a Ieova, e na o mafatiaga e iʻu i ai.

Ina ua uma ona laveaʻia Isaraelu mai Aikupito, sa masani ona auauna Mose o se faamasino. (Esoto 18:13-16) Talu ai afai e lelei le faaiʻuga mo le isi tagata e mautinoa o le a lē lelei pe lē fiafia ai le isi, lona uiga sa iai foʻi nisi na lē fiafia i faaiʻuga a Mose. Atonu o le māfuaaga foʻi lenā o nisi fouvalega i le taʻitaʻiga a Mose, ona o le suʻesuʻe masei o isi i ana faaiʻuga. Peitaʻi o Mose lea sa faaaogā e Ieova e taʻitaʻia Ona tagata. Ma ina ua aliaʻe fouvalega, sa leʻi faasala e Ieova Mose, ae o le ʻaufouvale ma o latou aiga na lagolago i a latou fouvalega. (Numera 16:31-35) O le lesona mo i tatou, ia taumafai e faaaloalo ma lagolagosua i faaiʻuga a i latou o loo iai le pule i totonu o le faalapotopotoga a Ieova i aso nei.

 E tusa ai o lea manatu, e manatua e Delores le faigatā ona tau faasaʻo o lana vaai ina ua aʻoaʻia lana tama teine i totonu o le faapotopotoga. Fai mai o ia: “O le mea na fesoasoani iā te aʻu, o loʻu faitau pea lava pea i mataupu o talanoaina ai le talafeagai o faatulagaga a Ieova. Na fai faapitoa saʻu api e tusitusi ai manatu tāua na ou maua mai lauga ma lomiga, ma sa mafai ai ona ou onosai ma faaauau pea laʻu auaunaga iā Ieova.” O inei e taʻitaʻia atu ai i le isi fesoasoani tāua mo le onosaia o lenei luʻi.

Ia faaleo atu ou faalogona. Atonu foʻi e aogā lou talanoa atu i sau uō e te maufaatuatuaina, o lē o loo malamalama i ou faalogona. Afai e te faia faapea, ia fili au uō e te iloa e atili ai ona tumau le saʻo o lau vaai i mataupu. Ae o le a silisili ona lelei pe a ‘momoli atu lou loto’ iā Ieova e ala i le tatalo. * (Salamo 62:7, 8) Aiseā? Auā e ati atoatoa lana silafaga i le ooooga o ou faalogona. Mo se faaaʻoaʻoga, e te ono manatu faapea, aiseā ua amo ai fua e oe nei lagona tigā, ae lē o oe lea ua fulitua iā Ieova. O lea, ia sasaa uma ou lagona iā Ieova i le tatalo, ma ole atu mo lana fesoasoani ina ia faaitiitia ai lou tigā i le tulaga ua tulaʻi mai.—Salamo 37:5.

A o mavae atu taimi, e mautinoa o le a faasolo ina lelei lou puleaina o ou faalogona. Ae i le taimi nei, faaauau pea au taumafaiga e faafiafia lou Tamā o i le lagi, ma aua lava neʻi e manatu o loo fai vavale au taumafaiga. (Kalatia 6:9) Manatua, pe ana fai tatou te fulitua iā Ieova, o le a lē foʻia ai o tatou faafitauli. Peitaʻi, o le faamaoni atu pea iā te ia, tatou te maua ai lana fesoasoani a o fesagaʻi ma tofotofoga. O lea ia mautinoa, e silasila mai Ieova i tulaga uma o loo e fesagaʻia, ma o le a ia foaʻi mai pea le malosi e te manaʻomia i le taimi tatau.—2 Korinito 4:7; Filipi 4:13; Eperu 4:16.

[Faamatalaga pito i lalo]

[Pusa i le itulau 19]

Ina ia Onosaia

◆ “Ia outou ati aʻe iā te outou . . . , ia outou faatumau iā te outou i le alofa o le Atua.”—Iuta 20, 21.

◆ Ia tumau pea lou faamoemoe. —1 Korinito 13:7.

◆ Aua le tuuaʻia fua oe.—Esekielu 18:20.

◆ Ia e faapalepale i isi.—Kolose 3:13.

◆ Ia amanaʻia le faatulagaga a Ieova mo aʻoaʻiga.—Eperu 12:11.

◆ Ia faaleo atu ou faalogona. —Salamo 62:7, 8.

[Pusa/Ata i le itulau 21]

Po ua E Fulitua iā Ieova?

Po o le ā lava le pogai ua e fulitua ai, ae ia e manatua, ua iai nei se lamatiaga i le lua faiā ma Ieova, faapea ou faamoemoega mo le lumanaʻi e faavavau. Atonu o iai sou faanaunauga e toe foʻi mai iā Ieova. Po o e tauivi malosi i ai, po o lenā lava e te faatuutuu seʻi iai se “taimi talafeagai”? Manatua, ua i faitotoʻa Amaketo. O lenei foʻi lalolagi o loo tatou ola ai ua matuā puupuu lava ma lē mautonu. E lē mafai ona e iloa pe oo atu lava taeao o e soifua pea. (Salamo 102:3; Iakopo 4:13, 14) Na faapea mai se tamāloa o lē ua aafia i se gasegase tugā: “Maʻeu le toʻafilemu o ota faalogona i le iloa, o lenei ua ou maʻi ae o loo oʻu auauna faataimi atoa iā Ieova, e aunoa ma ni agasala matuiā o natia. O oʻu lagona fiafia na i le taimi nei.” Ae pagā se faanoanoa pe ana maʻi ane ae o lea lava e mafaufau, “E iai se aso o le a ou toe foʻi ai iā Ieova!” Pe afai ua e fulitua iā Ieova, o le taimi lenei e sili ona lelei e te toe foʻi mai ai.

[Ata i le itulau 18]

O le faapisi o lou mafaufau i meafai mo le tapuaʻiga moni, e tumau ai lou malosi faaleagaga