Tapuaʻiga e Aogā mo Oe

NA TAʻUTINO le faisalamo o Asafo: “Ou te faalatalata atu i le Atua ou te lelei ai.” Na ia mafaufau e lelei le faaaʻoaʻo i ē na manatu māmā i le Atua ina ia saʻilia ai se olaga sologa lelei. Ae na mafaufau Asafo i itu e lelei ai le faalatalata i le Atua, ma filifili loa e aogā lea mo ia. (Salamo 73:2, 3, 12, 28) Pe e aogā iā te oe le tapuaʻiga moni i aso nei? E faapefea ona aogā iā te oe?

O le tapuaʻi i le Atua moni, e fesoasoani iā te oe e faia ai se mea e sili atu na i lo se olaga manatu faapito. E lē taitai maua le fiafia e i latou e saʻilia o latou lava manaʻoga, ona o le auala na faia ai i tatou e le “Atua e ona le alofa.” (2 Korinito 13:11) Na aʻoaʻo e Iesu se upu moni faavae i le natura o tagata, i lona fetalai: “E sili le manuia [fiafia] o lē na te foaʻi atu, i lo lē na te talia mai.” (Galuega 20:35) O le pogai lenā o lo tatou olioli e faia mea mo a tatou uō ma aiga. Ae e maua le fiafiaga sili i le faia o mea mo le Atua. E sili atu ona talafeagai lo tatou alolofa iā te ia na i lo se isi lava tagata. Ua iloa e le faitau miliona o tagata mai atunuu uma, o le tapuaʻi i le Atua i le faia o le mea ua ia finagalo ai, e matuā faamalieina ai.—1 Ioane 5:3.

Ia Iai se Fuafuaga o le Olaga

E aogā foʻi le tapuaʻiga moni mo oe auā e avatu ai se faamoemoe o le olaga. Pe na e mātauina le masani ona fesootaʻi atu o le fiafia i le faalogona faapea ua e ausia se mea aogā? O le tele o tagata e iai o latou sini i le olaga, a lē fesootaʻi atu i o latou aiga, o uō, pisinisi, po o le fiafiaga. Ona o tulaga lē mautonu o le olaga, ua masani ai ona latou lē maua le fiafia i nei mea. (Failauga 9:11) Ae e fesoasoani le tapuaʻiga moni iā te oe e maua ai se faamoemoe e sili atu, lea e faamalieina ai pea e ui e faanoanoa i isi vala o le olaga.

E aofia i le tapuaʻiga moni le iloa o Ieova ma auauna faamaoni iā te ia. Ua matuā faalatalata atu ē o loo i le tapuaʻiga moni i le Atua. (Failauga 12:13; Ioane 4:23; Iakopo 4:8) Atonu e faigatā ona e mafaufau e mafai ona e iloa lelei le Atua ma avea ma au uō. Ae o le manatunatu i tala o ana feutagaʻiga ma tagata, ma mafaufau i mea na ia faia, o le a e malamalama lelei ai i vala eseese o ona uiga. (Roma 1:20) E lē gata i lea, o le faitauina o le Afioga a le Atua, e te malamalama ai i le pogai ua tatou iai i nei, le pogai e lē o taofia ai e le Atua mafatiaga, lona faamutaina o mafatiaga, atonu ma le mea sili, o le faia o sau vaega uigā i le fuafuaga a le Atua. (Isaia 43:10; 1 Korinito 3:9) O le ituaiga malamalama lea e avatu ai iā te oe se uunaʻiga fou mo le olaga!

Ia Avea ma se Tasi e Sili Atu Ona Lelei

E aogā le tapuaʻiga moni auā e fesoasoani ia avea ai oe ma sē e sili atu ona lelei. A o e faia le tapuaʻiga moni, o le a e ati aʻe ni uiga e taʻitaʻia i ni faiā e sili atu ona fiafia ai ma isi. Ua e aʻoaʻoina mai le Atua ma lona Alo e uiga i amioga faamaoni, tautala ma le agalelei, ma ia ola maufaatuatuaina. (Efeso 4:20–5:5) Pe a e iloa lelei le Atua ma alofa iā te ia, o le a uunaʻia ai oe e faaaʻoaʻo iā te ia. Ua taʻua i le Tusi Paia: “Ia faaaʻoaʻo outou i le Atua, faapei o le fanau pele.”—Efeso 5:1, 2.

Pe lē o se mea e fiafia ai le siʻomia e tagata e faaaʻoaʻo i le alofa o le Atua? E fiafia lava, o le tapuaʻi i le Atua moni e lē o se mea e fai toʻatasi e se tagata. O le a e fesootaʻi atu ai i isi e fiafia i le mea saʻo ma le mea lelei. E mautinoa  e te ono lē fiafia i le manatu faapea e tatau ona faamaopoopo lelei se lotu. Ae e pei ona tatou iloa mai le mataupu ua mavae, o le faafitauli i le tele o isi lotu e lē faapea ona ua faamaopoopo, ae ona e lē o maopoopo i le auala saʻo ma i ni fuafuaga saʻo. Ua sini le tele o lotu maopoopo e ausia ni fuafuaga e lē faa-Kerisiano. Ua faamaopoopo e Ieova ona tagata mo se fuafuaga tāua. Ua taʻua i le Tusi Paia: “O le Atua, e lē o le Atua ia o le faasoesa [lē maopoopo], a o le filemu.” (1 Korinito 14:33) I le pei o le faitau miliona o isi, o le a e iloa o le aufaatasi ma se vaega o ni Kerisiano ua faamaopoopoina lelei, e iai se aafiaga lelei i ou manatu.

Le Faamoemoe mo le Lumanaʻi

Ua faaalia i le Tusi Paia, o loo faamaopoopoina e le Atua ni tagata tapuaʻi faamaoni ina ia latou faasaoolaina atu i le iʻuga o lenei lalolagi, ma fai mo latou tofi se lalolagi fou lea o le a “mau ai lē amiotonu.” (2 Peteru 3:13; Faaaliga 7:9-17) O le tapuaʻiga la e lelei mo oe, e saunia ai le faamoemoe lea e maua ai le fiafia. Ua faamautinoa e nisi ni mea latou te faatalitalia mo le lumanaʻi i le tulaga mautū o faigāmalo, o faamoemoega i pisinisi, po o le lelei o le soifua mālōlōina ma le litaea mai galuega e faamalieina ai. Ae e itiiti nisi o nei mea e maua ai se faavae mausalī mo le tepa taulaʻi atu i se lumanaʻi fiafia. I le isi itu, na tusi Paulo: “Tatou te faamoemoe i le Atua soifua.”—1 Timoteo 4:10.

O le a e maua tagata tapuaʻi moni pe a fai ni au saʻiliʻiliga loloto. I aso nei i lenei lalolagi fevaevaeaʻi, o le alofa ma le autasi ua manino ai le eseesega i Molimau a Ieova. E latou te ō mai i le toetoe o atunuu ma talaaga uma; ae ua autasia i latou i le alofa o le tasi i le isi ma le alofa mo Ieova. (Ioane 13:35) Ua latou valaaulia oe ina ia tofo i mea na oo iā i latou. Na tusi Asafo: “Ou te faalatalata atu i le Atua ou te lelei ai.”—Salamo 73:28.

[Ata i le itulau 7]

E mafai ona avea oe ma uō a le Atua