‘Ma te Lē Mafaia Ona Lē Tautala e Uiga iā Iesu’
Ia Anaana i le Atua na i lo Tagata
‘Ma te Lē Mafaia Ona Lē Tautala e Uiga iā Iesu’
O LE tausaga e 33 T.A., i totonu o le potu fono mataʻina o le faamasinoga a Iutaia i Ierusalema. O le a amata le faamasinoga o soo e toʻa 12 o Iesu, e faia e le ʻau Saniterini. Aiseā? Ona o la latou talaʻiga e uiga iā Iesu. O le faalua ai lea ona tulaʻi Peteru ma Ioane i luma o le faamasinoga, ae o le uluaʻi taimi mo isi aposetolo.
O loo toe faailoa atu e le ositaulaga sili i aposetolo e 12 le faatonuga na poloaʻia ai muamua i latou e le fono. Ina ua faatonuina e aua neʻi toe aʻoaʻo atu e uiga iā Iesu, sa tali Peteru ma Ioane: “Pe tonu i luma o le Atua, ona ma faalogo iā te outou, a e ma te lē faalogo i le Atua, inā filifili ia outou. Auā ma te lē mafaia ona lē tautala i mea ua ma vaai i ai ma faalogo i ai.” Sa tatalo soo o Iesu mo le lototele, ona latou folafola atu pea lea o le tala lelei.—Galuega 4:18-31.
Na iloa e le faitaulaga sili e leʻi aogā ana faamataʻu na fai muamua, ona toe faapea atu lea i le faamasinoga lona lua lenei: “Pe na matou lē matuā fai atu ea iā te outou ia soia le toe aʻoaʻo i lenā igoa? Faauta foʻi, ua outou faatumu i Ierusalema i la outou aʻoaʻoga, ma outou fia faaoo mai i luga iā i matou le toto o lenā tagata.”—Galuega 5:28.
Sa Leʻi Maluelue Ai
Na lototetele le ʻauaposetolo. Na tali atu Peteru ma isi aposetolo ua faapea atu: “E tusa ona sili o lo matou anaana i le Atua i lo matou anaana i tagata.” (Galuega 5:29) Pe a aumai poloaʻiga a tagata ae feteenaʻi ma poloaʻiga a le Atua, e tatau la ona tatou anaana i le Atua na i lo tagata. *
O loo faamautūina i upu a aposetolo lo latou faamaoni i le Atua, ma na matuā maofa ai le ʻau Saniterini. Ai pe ana fesiligia nei taʻitaʻi Iutaia po o ai e usiusitai i ai, e tatau lava ona latou tali mai: “Ia usiusitai i le Atua.” Auā po ua latou lē talitonu ea, o le Atua o le Alii Pule Silisili Ese aoao?
Na tulaʻi Peteru e fai ma sui o isi aposetolo, ma ia taʻua ai e faatatau i la latou faiva, e latou te anaana i le Atua na i lo le anaana i tagata. O inei o loo ia faalēaogāina ai le tuuaʻiga faapea sa leʻi usiusitai le ʻauaposetolo. O la foʻi sa iloa lelei e le ʻau Saniterini mai isi mea na tutupu muamua, e iai taimi na matuā manino ai le tatau ona usiusitai i le Atua na i lo tagata. E toʻalua ni fafine faatosaga i Aikupito sa sili iā i laʻua le matataʻu i le Atua na i lo le fefefe iā Farao. Ona la faasaoina ai lea o tama tane sa fananau mai i fafine Eperu. (Esoto 1:15-17) Sa usitai le tupu o Esekia iā Ieova, ae leʻi usitai le tupu o Sanerivi ina ua faamalosia e siilima ane. (2 Tupu 19:14-37) O mau i le Tusi Paia Eperu, lea e masani lelei ai le ʻau Saniterini, o loo faamamafa ai le faatalitalia e Ieova o ona tagata e anaana atu iā te ia.—1 Samuelu 15:22, 23.
E Tauia le Usitai
E faafetaia ona sa iai se sui o le fono na tāua iā te ia nei upu, “e tusa ona sili o lo matou anaana i le Atua i lo matou anaana i tagata.” O ia lea o Kamalielu, o se faamasino sa matuā iloga i le ʻau Saniterini, ma na augani atu i le fono ina ia uaʻi mai i lana fautuaga. Na ia taʻua ni mea sa tutupu muamua ma faapea atu, o se mea lē atamai pe a latou faalavelave i le galuega a le ʻauaposetolo. Na faaiʻu ana upu: “Faamamao ia ma nei tagata, ma ia tuu pea iā te i latou; . . . ina neʻi iloa ua outou fai taua i le Atua lava.”—Galuega 5:34-39.
O upu atamai nei a Kamalielu na malilie ai le fono e toe faasaʻoloto le ʻauaposetolo. Sa sasaina i latou ae sa leʻi faavaivai ai. Na i lo lea, ua faapea mai le tala: “Ua lē mapu foʻi i latou i aso uma ona aʻoaʻo atu, ma talaʻi atu i le malumalu, ma lea fale ma lea fale le tala lelei o Iesu le Keriso.”—Galuega 5:42.
Sa faamanuiaina le ʻauaposetolo ona o le talitonu maumauaʻi, e silisili ese le pule a le Atua. O le talitonuga foʻi lenā o Kerisiano moni i aso nei. O loo taulaʻi atu pea iā Ieova, o ia lo latou Pule Silisili Ese. Afai la e faatonuina i latou e fai se mea e feteenaʻi ma faatonuga a le Atua, ona tali atu lea e pei ona sa tali le ʻauaposetolo: “E tusa ona sili o lo matou anaana i le Atua i lo matou anaana i tagata.”
[Faamatalaga pito i lalo]
^ pala. 7 Tagaʻi i le 2006 Calendar of Jehovah’s Witnesses, Setema/Oketopa.
[Pusa/Ata i le itulau 9]
PE SA E TAU MĀNATU?
Pe na faapefea ona iloa e le tusitala o le Tusi Paia o Luka, upu a Kamalielu sa fai i se fono a le ʻau Saniterini? Atonu na musuia Luka e le agaga paia. Atonu foʻi na taʻu ane i ai e Paulo (o se tasi sa aʻoga muamua iā Kamalielu). Pe na talanoa foʻi Luka ma se sui o lenā fono maualuga, o lē sa lagolagoina manatu o le ʻauaposetolo.