Sa Naunau o Ia i le Tulafono a Ieova

O ALBERT D. SCHROEDER o se sui o le Vaega Pule o Molimau a Ieova. Na muta lona soifuaga i le lalolagi i le Aso Lulu, Mati 8, 2006. E 94 ona tausaga ma e silia i le 73 tausaga na ia faaalu i le auaunaga faataimi atoa.

Na fanau mai le uso o Schroeder i Saginaw, Michigan, i le Iunaite Setete i le 1911. * O le tele o mea na ia iloa mai le Tusi Paia a o laʻitiiti na aʻoaʻoina mai le tinā o lona tinā, o lē na totōina iā te ia le fiafia e faitau le Afioga a Ieova. A o aʻoga i le Iunivesite o Michigan sa ia aʻoga i le gagana Latina ma le faa-Siamani, ma le inisinia tau eletise. Peitaʻi a o faasolo ina loloto lona talisapaia o le Tusi Paia, sa oo ina faamuta ana aʻoaʻoga faaopoopo ae talaʻi faataimi atoa. I le 1932, na avea o ia ma sui o le aiga Peteli i Brooklyn, i Niu Ioka.

I le 1937 ina ua 26 ona tausaga, na tofia ai o ia e vaavaaia le galuega a Molimau a Ieova i Peretania. O lona maelega i le talaʻiga na uunaʻia ai foʻi isi i lenā vaipanoa e talaʻi faataimi atoa. O se tasi o alii talavou sa la aumea faatasi i le Peteli i Lonetona o John E. Barr. Na mulimuli ane la auauna faatasi i le Vaega Pule mo le tele o tausaga.

Na mātauina uma galuega a le uso o Schroeder mo Molimau a Ieova i vaitausaga o le taua. O lea, iā Aokuso 1942, na tipoti ese ai o ia mai Peretania. O Setema na ia toe taunuu ai i Brooklyn, i se malaga mataʻutia i le Vasa Atalani.

O le taimi lenā na iloa ai e auauna a Ieova, le tele o se galuega e manaʻomia ona faia pe a mavae le Taua Lona Lua a le Lalolagi. Na fiafia ma maofa tele le uso o Schroeder, ina ua tofia o ia e faatulaga se polokalame o aʻoaʻoga mo le Aʻoga Faale-Tusi Paia a le Olomatamata o Kiliata. E tele tausaga na avea ai o ia ma faiaʻoga i lea aʻoga, i le toleniina o le ʻaumisionare. E mautinoa e tele mea lelei e manatua e i latou na auai i ana vasega o le Kiliata ma le Aʻoga o le Faiva o le Malo. Na ia fiafia e totō i loto o ana tagata aʻoga le alofa mo tulafono a Ieova ma le tāua o le iloa lelei o Ia.

O le 1956 na faaipoipo ai le uso o Schroeder iā Charlotte Bowin. I le 1958, na fanau ai le la tama tama o Judah Ben. Na avea le uso o Schroeder o se tane ma se tamā lelei. O le 1974 na ia amata auauna ai i le Vaega Pule, ma na talisapaia tele ona tomai. O ia o se tagata agalelei ma lotomaulalo ae sili i lea, sa ia manaʻo e faasilisilia le suafa silisili o le Atua. Tatou te mautinoa ua maua e le uso o Schroeder lona taui faalelagi o se Kerisiano faauuina, o lē sa ‘naunau moni lava i le tulafono a Ieova.’—Salamo 1:2.

[Faamatalaga pito i lalo]