“Ua Tele Lava Loʻu Naunau i Lau Tulafono”

O LE Salamo 119, o se pese a lē na tusia e uiga i ona faalogona mo feʻau faagaeeina a le Atua po o lana afioga. Ua pese le faisalamo: “Ua ou teu i loʻu loto lau afioga.” “Ou te fiafia lava aʻu i au tulafono.” “Ua nutimomoia loʻu loto i le manaʻo tele i au faamasinoga i aso uma.” “Ua ou naunau lava i au feʻau.” “Ou te fiafia lava aʻu i au poloaʻiga, ua ou naunau i ai.” “Ua tele lava loʻu naunau i lau tulafono; ou te mafaufau i ai i le aso atoa.”—Salamo 119:11, 16, 20, 40, 47, 97.

Maʻeu le matuā talisapaia e le faisalamo o afioga a le Atua! Po o faapena ou faalogona e uiga i afioga a le Atua o i le Tusi Paia? Po o e manaʻo e ati aʻe lenā uiga talisapaia? Pe afai o lea, e manaʻomia muamua ona e fai ma masani le faitauina o le Tusi Paia i aso taʻitasi pe a mafai. Na fetalai Iesu: “E lē na o mea e ʻai e ola ai le tagata, a o afioga uma e tulei mai i le fofoga o le Atua.” (Mataio 4:4) Lona lua, e manaʻomia ona e mafaufau loloto i mea e te faitauina. O le manatunatu i upu moni e uiga i le Atua, ona uiga, lona finagalo ma ana fuafuaga, o le a atili ai ona e talisapaia le Tusi Paia. (Salamo 143:5) Ae sili ai ona tāua le faatatauina o ana fautuaga i aso uma.—Luka 11:28; Ioane 13:17.

E faapefea ona aogā iā te oe le ati aʻe o se talisapaia o le Tusi Paia? Ua faapea mai le Salamo 119:2: ‘Amuia i latou o ē tausi i tulafono a le Atua.’ O fautuaga o i le Tusi Paia o le a fesoasoani iā te oe e mafai ai ona e onosaʻia ma le taulau ia faafitauli o le olaga. (Salamo 1:1-3) O le a e maua ai le atamai ma le malamalama e ‘ʻalo ese ai ou vae i ala leaga uma lava.’ (Salamo 119:98-101) O le iloaina o le upu moni e uiga i le Atua ma lona finagalo mo le lalolagi, o le a uigā ai lou olaga ma e maua ai se faamoemoe pupula mo le lumanaʻi.—Isaia 45:18; Ioane 17:3; Faaaliga 21:3, 4.

E fiafia tele Molimau a Ieova e fesoasoani i isi ina ia malamalama atili i le Tusi Paia ma ati aʻe ai se talisapaia loloto mo le feʻau o iai. Matou te valaaulia ma le māfana oe e talia se asiasiga.