Faatonutonuina o Folauga i le Vasaloloa

I LE Atu Malesala, e 1,200 le aofaʻi o motu tetele ma motu laiti, e tusa na o ni nai futu [6 mita] le maualuga i luga aʻe o le fogātai. E lē mamao ona folau ese atu ae lē iloa mai loa lenei motu. Peitaʻi, sa mafai pea e tagata folau anamua o Malesala ona faatonutonu a latou paopao, pe a folau mai se tamaʻi motu agaʻi i se isi tamaʻi motu po o totonu o le 650,000 kilomita faatafafā o le Vasa Pasefika. Na faapefea ona latou faia? E ala i lo latou faaaogā o se auala faigofie ma aogā, o ni “faafanua” e faaigoaina o siata laau.

O le poto masani na mātauina ai e tagata folau o le Atu Malesala, e iai le faagasologa patino o galu pe afai o loo latalata ane se motu, e oo atu lava i le 20 maila [30 kilomita] le mamao. Sa tele ituaiga o faagasologa o galu sa manaʻomia ona aʻoaʻoina, ma sa fesoasoani faafanua e fai i laau e manatua ai na mea. Sa faapeʻī na faafanua laau? E pei ona e tagaʻi ai i le ata, sa isiisi ma nonoa faalalava aʻa o le paogo po o le lapalapa o le launiu, e faailoga ai le faagasologa o galu. Sa faapipii i ai ma ni tamaʻi atigi figota e faailoga ai le mamao o tulaga o motu taʻitasi.

E tele tausaga, na faaaogā faalilolilo ai faafanua laau. Sa iai tagata patino na faailoa i ai le faaaogāina. Sa faapefea ona aʻoaʻoina e se tagata folau fou le faaaogāina o le faafanua laau? E ala i le faaaʻoaʻo ma faataʻitaʻi. Sa masani ona aʻoaʻo e se tagata folau ua iai le tomai, le tagata folau fou, pe ave foʻi i ni folauga agaʻi i motu lata ane. A o faasolosolo ina mātau e le tagata fou faagasologa o galu, sa atili ai ona tomai i le faaaogāina o lana faafanua laau. Ma oo ina faatonutonu ai e ia lava ana folauga i le vasa.

I se auala talitutusa, ua mafai ona avea le Afioga a le Atua o se taʻiala i o tatou olaga. I le taimi muamua, atonu e fesoasoani se isi iā i tatou ina ia maua le malamalamaga faavae o le Tusi Paia. A o faaauau ona tatou suʻesuʻeina le Tusi Paia ma faatatauina ana taʻiala, tatou te mautinoa atili ai i mea o loo aumaia ai. Na faatonuina le taʻitaʻi Isaraelu o Iosua, e faitau pea i le Afioga a le Atua ‘ina ia anaana ai e fai e tusa ma mea uma ua tusia i ai.’ Ona fetalai lea o le Atua iā Iosua: “Ona manuia ai lea iā te oe o lou ala, ona e manuia ai lea.” (Iosua 1:8) Ioe, e mafai ona faasino e le Tusi Paia i tatou i se ala mautinoa ma taulau manuia.

[Faamatalaga i Ata i le itulau 32]

© Greg Vaughn