Fesili Mai le ʻAufaitau

Aiseā ua faapea mai ai le New World Translation i le Teuteronome 31:2, na “lē toe faatagaina [Mose] ona alu atu ma toe sau” o se taʻitaʻi o Isaraelu, ae o loo faaalia i isi faaliliuga faapea, sa ia lē toe mafai ona faia faapea?

E ui ina mafai ona faaliliu i uiga uma na e lua le upu Eperu o loo fesiligia, ae o le faaaogāina i isi faaliliuga faa-Peretania o le Tusi Paia e foliga o loo taʻu mai ai, ina ua lata i le iʻuga o lona soifuaga, sa vaivai Mose, ma lē mafai ai e lona tino ona faaauau ona tiute tauave o se taʻitaʻi o le nuu. Mo se faaaʻoaʻoga, ua sii mai e le New English Bible upu a Mose o loo faapea mai: “O aʻu o le tagata ua selau luasefulu nei oʻu tausaga, ma ua lē toe mafai ona ou fealuaʻi solo pe a ou manaʻo ai.” I le Tusi Paia foʻi faa-Samoa o loo iai le fuaitau lenei: “O oʻu tausaga ua selau ma le luafulu ia i le aso nei; ou te lē toe lavā ona ou alu atu ma toe sau.” E tai faapena foʻi le New American Bible e faapea: “Ua ou . . . lē toe mafai ona fealualuaʻi solo.”

I le Teuteronome 34:7 o loo taʻua ai, e ui ua loa le soifua o Mose, ae e leʻi vaivai o ia. O loo faapea mai: “Ua oti foʻi Mose ina ua selau ma le lua sefulu ona tausaga; e leʻi puaoa ona mata, e leʻi mavae foʻi lona malosi.” O lona uiga, sa mafai lava i le malosi o Mose ona taʻitaʻia le nuu, peitaʻi sa lē o le finagalo lea o Ieova na te faaauauina lea tofiga. E faamaonia lenā manatu ina ua toe faapea atili mai Mose: “Ua fetalai mai foʻi Ieova iā te aʻu, E te lē sopoʻia atu lenei Ioritana.” E foliga mai, sa toe fetalai e Ieova lana faatonuga lea na faia muamua a o iai i Meripa.—Numera 20:9-12.

Sa umi ma mataʻina se olaga na soifua ai Mose, lea e vaevaeina i vaitaimi e tolu. E 40 tausaga na ola aʻe ai Mose i Aikupito, o inā sa ‘aʻoaʻoina ai o ia i le poto uma o Aikupito’ ma sa “malosi i ana upu ma ana mea na faia.” (Galuega 7:20-22) O le isi 40 tausaga, sa nofo ai i Mitiana. O inā sa aʻoaʻoina ai o ia i tapulaa a Ieova, ina ia avea o se tagata faaleagaga na manaʻomia mo le taʻitaʻia o le nuu o Ieova. Ma le 40 tausaga mulimuli, lea sa ia taʻitaʻia ai ma faatonutonuina le fanauga a Isaraelu. Peitaʻi, ua sui nei le filifiliga a Ieova, o le a faaaogā Iosua, ae lē o Mose, e taʻitaʻia atu le nuu e sopoʻia le vaitafe o Ioritana seʻia oo atu i le Nuu Folafolaina.—Teuteronome 31:3.

O lea la, o loo maua e le New World Translation le uiga moni o le Teuteronome 31:2. E leʻi toe faaauau ona avea Mose ma taʻitaʻi o Isaraelu, e lē ona o se faalētonu i le malosi o lona tino, peitaʻi e leʻi toe faatagaina o ia e Ieova e faatino lenā tofiga.