Le Saʻiliga a le Tagata mo le Ola e Faavavau

NA MOOMOO tagata ia ola e faavavau mai lava i le amataga. Peitaʻi, e leʻi taulau lava na moomooga, auā e leʻi iai se tasi ua ia maua se auala e aveesea ai le oti. Ae talu ai nei i suʻesuʻega a fomaʻi, na latou manatu ai e ono mafai lava ona umi atu le olaga o le tagata. Seʻi manatu i nisi o saʻiliʻiliga faasaienisi ua faia e fomaʻi.

O loo faia ni taumafaiga a fomaʻi e faateleina le taimi lea e faafouina ai sela o le tino. Ua iloa e saienitisi, e mafai ona aveesea sela tuai ma sela ua faasolo ina leaga, ma toe suia atu i sela fou. O le mea moni, e faafouina le tele o vaega o le tino a o faagasolo le olaga o se tasi. Ua manatu ai la fomaʻi, afai e umi atu le faagasologa o le taimi lea, e mafai foʻi la e le tino o le tagata ona toe faafouina ona sela mo se taimi umi, pe oo lava i le faavavau.

E lē fiafia nisi tagata i taumafaiga ua fai e saienitisi e faia se ola fou mai sela o se isi tagata. Ua latou taumafai e faia ni ate, fatugaʻo, ma ni fatu fou mo tagata, mai vaega o le tino o le isi tagata.

Ua iloa e le ʻausuʻesuʻe i faiga faasaienisi ia e fausiaina masini ninii, o le a iai le taimi e faia ai e fomaʻi ni masini ninii ua faapolokalameina i totonu o alātoto, e saʻilia ma faatamaʻia ai sela ia ua aafia i le kanesa ma siama leaga. E talitonu nisi i lenei faiga faasaienisi faatasi ai ma togafitiga o sela, o le a mafai ai ona ola pea le tino o le tagata e faavavau.

Ua tuu e se isi vaega o saienitisi tino o ē ua maliliu i le aisa. O le fuafuaga ina ia tuu ai i latou i inā seʻia iai ni togafitiga fou faafomaʻi, ona mafai lea e fomaʻi ona foʻia faamaʻi, aveesea āuga o le soifuaga matua, ma toe faafoʻisia le ola ma le soifua mālōlōina i ē ua maliliu. Ua taʻua e le American Journal of Geriatric Psychiatry lenei manatu, “o se faiga e taitutusa i aso nei ma le atualalaina o tagata Aikupito anamua.”

O le faaauau pea ona saʻilia e le tagata o le ola e lē mafai ona oti, ua faaalia ai lona lē fiafia i le oti. Pe mafai moni ona maua e tagata le ola e faavavau? O ā fā a le Tusi Paia i lenei mataupu? O le a maua tali i le mataupu o sosoo mai.