Ua Faamalosia le Loto Tele e le Alofa

“Ua lē foaʻiina mai e le Atua iā te i tatou le agaga e mataʻu ai, a o le agaga e faamalosi ai, ma alofa ai, ma pulea ai o tatou loto.”—2 TIMOTEO 1:7.

1, 2. (a) O le ā se mea e uunaʻia e le alofa se tagata e faia? (e) Aiseā na mataʻina ai le loto tele o Iesu?

SA MĀULU i le sami loloto se ulugalii e leʻi leva lava ona faaipoipo e lata ane i se aai i le talafatai i sasaʻe o Ausetalia. A o toetoe lava manu aʻe i luga, ae alu atu i le atoa se malie paʻepaʻe lapoʻa agaʻi i le fafine. Na faia e le tamāloa se gaoioiga toa o le tulei ese o lana avā, ae tuu ia e ʻai e le malie. Na faapea mai le fafine i le sauniga o le maliu a lana tane: “Na ia foaʻiina mai lona ola mo aʻu.”

² Ioe, o le alofa e mafai ona uunaʻia ai tagata e faaalia se loto tele uiga ese. Na taʻua e Iesu lava ia: “E lē sili lava le alofa o se tasi i lenei alofa, ia tuuina atu e se tasi lona ola mo ana uō.” (Ioane 15:13) A o leʻi atoa le 24 itula talu ona fetalai Iesu i na upu, ae ia foaʻi atu lona soifua mo tagata uma. (Mataio 20:28) E lē gata i lenā, e leʻi foaʻi faafuaseʻi e Iesu lona soifua ona o se gaoioiga fia toa. Sa ia muaʻi silafia o le a tauemua ma faileagaina, faasala ma le lē tonu o ia, ma oo ina fasiotia i se laau faaoosala. Sa ia sauniunia foʻi ona soo i mea ia o le a tutupu, i lona faapea atu: “Faauta, a tatou ō aʻe nei i Ierusalema, e tuuina ai le Atalii o le tagata i le ʻau ositaulaga sili, ma le ʻau tusiupu; latou te faasala iā te ia, ia oti, latou te tuuina atu foʻi o ia i nuu ese, e faatauemu i latou iā te ia, e feanu foʻi iā te ia, e sasa foʻi iā te ia, ma fasioti iā te ia.”—Mareko 10:33, 34.

3. O le ā na saosaolaumea i le loto tele o Iesu?

³ O le ā na saosaolaumea i le loto tele mataʻina o Iesu? E telē se vaega na faia e le faatuatua ma le mataʻu i le Atua. (Eperu 5:7; 12:2) Ae sili ona tāua atu i lenā, na māfua ona o lona alofa, e lē gata i le Atua ae faapea foʻi i tagata. (1 Ioane 3:16) Pe afai tatou te ati aʻe lenei ituaiga alofa, faatasi ai ma le faatuatua ma le mataʻu i le Atua, o le a faapena foʻi ona tatou lototetele e pei o Keriso. (Efeso 5:2) E faapefea ona tatou ati aʻe lenei ituaiga alofa? E manaʻomia ona tatou iloa le mea e Puna mai ai.

E “Mai le Atua le Alofa”

4. Aiseā e faapea ai, o Ieova o le Puna o le alofa?

⁴ O Ieova o le alofa lava ia ma o le Puna o le alofa. Na tusi le aposetolo o Paulo: “Le ʻau pele e, ia tatou fealofani; auā mai le Atua le alofa; o i latou uma foʻi o ē alolofa ua fanau mai i latou mai le Atua, ua iloa foʻi e i latou le Atua. O sē lē alofa ua lē iloa e ia le Atua; auā o le Atua, o le alofa lava ia.” (1 Ioane 4:7, 8) O lea la, o le alofa e pei o le alofa o le Atua, e faatoʻā mafai ona maua e se tagata pe afai e faalatalata atu iā Ieova, e ala i le aʻoaʻoina ma faatatauina le poto saʻo, ona o lona usitai mai le loto.—Filipi 1:9; Iakopo 4:8; 1 Ioane 5:3.

5, 6. O le ā na fesoasoani i uluaʻi soo o Iesu ina ia ati aʻe le alofa e pei o Keriso?

⁵ I lana tatalo mulimuli faatasi ma ona aposetolo faamaoni e toʻa sefulutasi, na faaalia ai e Iesu le sootaga o le iloa o le Atua ma le tutupu aʻe i le alofa, i lona faapea atu: “Ua ou faailoa  atu foʻi lou suafa iā te i latou, o le a ou faailoa atu ai foʻi; ina ia i totonu iā te i latou le alofa ua e alofa mai ai iā te au, o aʻu foʻi i totonu iā te i latou.” (Ioane 17:26) Na fesoasoani Iesu i ona soo e ati aʻe le ituaiga alofa lea sa i le va o laʻua ma lona Tamā. Na ia faailoa iā i latou e ala i upu ma faaaʻoaʻoga, le uiga o le suafa o le Atua—O ona uiga matagofie. O le mea lea na fetalai ai Iesu: “O lē ua vaai mai iā te aʻu, ua vaai o ia i le Tamā.”—Ioane 14:9, 10; 17:8.

⁶ O le alofa pei o lea na iā Keriso, o se fua o le agaga paia o le Atua. (Kalatia 5:22) Ina ua maua e uluaʻi Kerisiano i le Penetekoso 33 T.A., le agaga paia lea na folafolaina mai, e lē gata ina latou manatua ai le tele o mea na aʻoaʻoina e Iesu, ae na latou atili malamalama ai i le uiga o le Tusi Paia. O lenei malamalama lelei i le Tusi Paia na faamalosia ai lo latou alofa i le Atua. (Ioane 14:26; 15:26) O le ā le iʻuga? E ui ina lamatia o latou ola, ae na latou talaʻia pea le tala lelei ma le loto tele ma le maelega.—Galuega 5:28, 29.

Faaalia o le Loto Tele ma le Alofa

7. O ā mea na onosaʻia e Paulo ma Panapa i le la malaga faamisionare?

⁷ Na tusi le aposetolo o Paulo: “Ua lē foaʻiina mai e le Atua iā te i tatou le agaga e mataʻu ai, a o le agaga e faamalosi ai, ma alofa ai, ma pulea ai o tatou loto.” (2 Timoteo 1:7) Sa talanoa Paulo mai mea na tutupu iā te ia. Seʻi manatu i mea na la feagai ai ma Panapa i le la malaga faamisionare. Sa la talaʻi i le tele o aai, e aofia ai Anetioka, Ikonio, ma Lusa. E iai ni tagata mai na aai taʻitasi na avea ma tagata talitonu, peitaʻi o isi na matuā tetee ane. (Galuega 13:2, 14, 45, 50; 14:1, 5) A o iai i Lusa, na fetogia Paulo i maa e tagata na feita, ma latou manatu ua oti o ia. Peitaʻi ina “ua vagavagai o ia e le ʻau soo, ona tū lea o ia i luga, ua alu i le aai; o le taeao foʻi ua la ō atu ai ma Panapa i Teipe.”—Galuega 14:6, 19, 20.

8. Na faapefea ona faaalia i le lototetele o Paulo ma Panapa, lo la alofa loloto mo tagata?

⁸ Pe na avea le lamatia o le ola o Paulo ma mea na la faavaivai ai ma Panapa, ma taofi ai le la talaʻi atu? E leai! Ina ua toʻatele ē na avea ma soo i Teipe, “ona la toe foʻi lea i Lusa, ma Ikonio, ma Anetioka.” Aiseā? Ina ia faalaeiau ē fou e tutumau malosi i le faatuatua. Na faapea mai Paulo ma Panapa: “O puapuaga e tele e tatau ona tatou sao atu ai i le malo o le Atua.” E manino la, na māfua ona la lototetele ona o lo la alofa loloto mo “mamoe” a Keriso. (Galuega 14:21-23; Ioane 21:15-17) Ina ua uma ona tofia toeaina i faapotopotoga fou taʻitasi, sa tatalo Paulo ma Panapa “ona la tuuina atu lea o i latou i le Alii ua latou faatuatua i ai.”

9. O le ā le auala na tali atu ai toeaina mai Efeso i le alofa o Paulo mo i latou?

⁹ O Paulo o se tagata e alofa ma loto tele, lea na alofagia ai o ia e le toʻatele o uluaʻi Kerisiano. Seʻi toe manatu i le mea na tupu i se fono na faia e Paulo ma toeaina mai Efeso, le mea sa nofo ai mo le tolu tausaga ma feagai ai ma teteega e tele. (Galuega 20:17-31) Ina ua uma ona ia faalaeiau i latou e tausia le lafu mamoe a le Atua ua tofia ai, ona tootuli lea o Paulo ma tatalo faatasi ma i latou uma. Ona oo lea ina “fetagisi tele i latou uma lava, ma fusi iā Paulo, ma faafeasogi iā te ia. Ua sili lava lo latou tigā i lea upu ua ia fai atu ai, latou te lē toe iloa ona mata.” Maʻeu le alolofa o nei uso iā Paulo! Ina ua oo i le taimi e ō ese ai Paulo ma lana ʻaumalaga, sa tatau ona faamalosia ona ‘teteʻa ma i latou’ ona sa matuaʻi lē faigofie i le ʻautoeaina ona tuu atu i latou e ō.—Galuega 20:36–21:1.

10. Ua faapefea e Molimau a Ieova i aso nei ona faaalia le loto tele ma le alofa o le tasi i le isi?

¹⁰ I aso nei, ua matuā alofagia ovasia femalagaaʻi, toeaina o faapotopotoga, ma le toʻatele o isi, ona o le lototetele ua latou faaalia mo mamoe a Ieova. Mo se faaaʻoaʻoga, i atunuu ua aafia i fetauaʻiga i le va o tagatānuu po o atunuu foʻi o loo faasā ai le talaʻiga, ua asia pea e ovasia femalagaaʻi ma a latou avā faapotopotoga, e ui ina lamatia ai o latou soifua ma lo latou ola saʻoloto. I se tulaga talitutusa, ua toʻatele Molimau a Ieova ua mafatia i taʻitaʻi feita o malo ma o latou sui, ona e latou te lē faalataina isi o latou uso Molimau, pe faailoaina mea e maua mai ai  a latou taumafa faaleagaga. E faitau afe isi ua sauāina, faataugā, ma fasiotia ona o le lē taofia o le talaʻiga o le tala lelei po o le lē tuua o le faatasitasi ma isi tagata talitonu i sauniga faa-Kerisiano. (Galuega 5:28, 29; Eperu 10:24, 25) Seʻi o tatou faataʻitaʻi i le faatuatua ma le alofa o nei uso ma tuafāfine lototetele!—1 Tesalonia 1:6.

Ia Aua Neʻi Maalili le Alofa

11. O ā auala ua tau ai Satani i se taua faaleagaga faasaga i auauna a Ieova, ma o ā mea e manaʻomia ona latou faia?

¹¹ Ina ua lafoina mai Satani i le lalolagi, sa ia maumauaʻi e taulaʻi lona lotoa tele i auauna a Ieova ona latou te “tausi i poloaʻiga a le Atua, ma ua taofi le mau iā Iesu.” (Faaaliga 12:9, 17) O se tasi o auala e faaaogā e le Tiapolo o sauāga. Peitaʻi, o le tele o taimi e lē taulau ai lenei mea, ona e atili vavalalata ai tagata o le Atua i noataga o le alofa faa-Kerisiano, ma uunaʻia ai le toʻatele ina ia sili atu ona maelega. O se isi auala e faaaogā e Satani, o faatosinaga e taulaʻi i faanaunauga agasala o tagata. O le teena o lenei mailei e manaʻomia ai se isi ituaiga loto tele. O lenei taua o loo tau i totonu o i tatou lava, ma e tau faasaga i o tatou lava tuʻinanauga sesē, o loo i o tatou loto “faaʻoleʻole” ma ua “matuā leaga lava.”—Ieremia 17:9; Iakopo 1:14, 15.

12. E faapefea ona faaaogā i taumafaiga a Satani “le agaga o lenei lalolagi,” e faavaivai ai lo tatou alofa i le Atua?

¹² O se isi auupega malosi a Satani o “le agaga o lenei lalolagi,” o taaʻiga malolosi po o uunaʻiga lea o loo tetee i le agaga paia o le Atua. (1 Korinito 2:12) E faaauiluma e le agaga o le lalolagi le matapeʻapeʻa ma le pupū i mea faitino—“le tuʻinanau o mata.” (1 Ioane 2:16; 1 Timoteo 6:9, 10) E ui e lē o ni mea leaga mea faitino ma tupe, ae afai e sili aʻe lo tatou fiafia i mea na, i lo le Atua, o lona uiga la ua manumalo Satani. O le pule po o le taaʻiga malosi a le agaga o le lalolagi, e ala mai i mea e tuʻinanau i ai le tino augavale. E lē gata ina pei o ni mailei taufaasesē, ae e matuā ogaoga le malosi o ana taaʻiga, ma e pei o le ʻea e mānavaina, o loo faapena ona iai i mea uma lava lenei agaga. Ia aua lava neʻi faatagaina le agaga o le lalolagi e faaleagaina lou loto!—Efeso 2:2, 3; Faataoto 4:23.

13. E ono mafai faapefea ona tofotofoina lo tatou tulaga mamā tau amio?

¹³ Ina ia teena le agaga leaga o le lalolagi, e manaʻomia le loto tele ina ia tausisia lo tatou tulaga mamā tau amio. O se faaaʻoaʻoga, e manaʻomia le loto tele ina ia alu ese ai mai se fale tifaga, pe tapē le komepiuta po o le televise pe a faaali mai ni ata lē lelei pe matagā. E manaʻomia foʻi le loto tele ina ia teena ai omiga mai tupulaga, ma vavae ese mai aumea leaga. E faapena foʻi ona manaʻomia le loto tele i le faatāuaina o tulafono ma taʻiala a le Atua e ui i tauemuga mai aumea i le aʻoga, galuega, o  tuaoi, po o tauaiga.—1 Korinito 15:33; 1 Ioane 5:19.

14. O le ā e ao ona tatou faia, pe afai ua afāina i tatou i le agaga o le lalolagi?

¹⁴ Maʻeu la le tāua o le faamalosia o lo tatou alofa mo le Atua, ma o tatou uso ma tuafāfine Kerisiano! Ia faaavanoa sou taimi e iloilo totoʻa ai ou sini ma lou olaga, pe lē o iai se vala o lou olaga ua afāina ai oe i le agaga o le lalolagi. Pe afai o afāina oe, e tusa lava pe laʻitiiti, ia tatalo iā Ieova mo le loto tele ina ia liaʻi ese ai ma tumau ai faapena. E faafofoga mai lava Ieova i na talosaga faamaoni. (Salamo 51:17) E lē gata i lenā, e sili atu ona malosi Lona agaga i lo le agaga o le lalolagi.—1 Ioane 4:4.

Fesagaʻia ma le Loto Tele Ou Faigatā

15, 16. E faapefea ona fesoasoani le alofa pei o lea na iā Keriso iā i tatou e fesagaʻia faigatā? Aumai se faaaʻoaʻoga.

¹⁵ O isi luʻi e fesagaʻia e auauna a Ieova, o āuga o le lē lelei atoatoa ma le soifua matua. E masani ona iʻu ai i faamaʻi, lē atoatoa le malosi o le tino, mafatiaga o faalogona, ma le tele o isi faafitauli. (Roma 8:22) O le alofa pei o lea na iā Keriso, o le a fesoasoani ia tatou fesagaʻia nei faigatā. Seʻi manatu i le faaaʻoaʻoga a Namangolwa, o lē na tausia aʻe i se aiga Kerisiano i Zambia. Ina ua lua ona tausaga, sa lē toe atoatoa le malosi o lona tino. Na ia faapea mai: “Na lagona loʻu mā, ma na ou popole neʻi oʻu faateʻia tagata i oʻu foliga. Peitaʻi, na fesoasoani uso faaleagaga iā te aʻu ina ia saʻo laʻu vaai. O le iʻuga, na ou manumalo mai oʻu uiga mā ma popole i isi, ma na oo ina ou papatiso.”

¹⁶ E ui ina alu Namangolwa i se nofoa faataavalevale, ae o nisi taimi e manaʻomia ai ona tolotolo i ona lima ma tuli pe a oo i auala oneonea ma pefu. Ae e auai i le faiva o se paeonia lagolago, a itiiti mai e lua masina i tausaga taʻitasi. Na iai se tasi tagata o se aiga na matuā tagi ina ua talaʻi i ai Namangolwa. Aiseā? Ona na matuā pāʻia o ia i le faatuatua ma le loto tele o lo tatou tuafafine. O se faamaoniga lea o le ʻoa o faamanuiaga a Ieova, ma e lima suʻesuʻega faale-Tusi Paia a Namangolwa ua uma ona papatiso, o le toʻatasi o i latou o loo galue o se toeaina i le faapotopotoga. Na faapea mai Namangolwa: “E lagona lava le matuā tigā o oʻu vae, ae lē taofia ai aʻu ona o na tigā.” O lenei tuafafine, ua na o se toʻatasi mai le toʻatele o Molimau i le lalolagi aoao, e vaivai le tino ae malosi tele le loto i le faiva, ona o lo  latou alolofa i le Atua ma tuaoi. Maʻeu le matagofie o i latou na i fofoga o Ieova!—Hakai 2:7.

17, 18. O le ā ua fesoasoani i le toʻatele e onosaʻia maʻi ma isi tulaga faigatā? Aumai ni faaaʻoaʻoga i lo outou lava vaipanoa.

¹⁷ O maʻi faaumiumi e mafai foʻi ona faavaivaia ai pe mafatia ai faalogona. Na faapea mai se tasi toeaina: “I la matou suʻesuʻega tautusi, e iai se tuafafine o loo mafatia i le maʻi suka faapea ma faalētonu o fatugaʻo, o le isi tuafafine e aafia i le kanesa, ma e toʻalua foʻi ni tuafāfine e mafatia i tugā o le gugu. E iai nisi taimi latou te lotomafatia ai. Peitaʻi, latou te lē taitai ona misia sauniga seʻi vaganā ua matuā maʻi tigāina pe faataotolia i le falemaʻi. E latou te auai e lē aunoa i le talaʻiga. Ua faamanatu mai ai iā te aʻu Paulo, lea na faapea mai: “Pe a ou vaivai, ona ou malosi ai lea.” Ou te matuā talisapaia lo latou alofa, ma lo latou lototetele. Atonu o o latou tulaga ua manino ai la latou vaaiga i le olaga, ma taulaʻi ai i mea e sili ona tāua.”—2 Korinito 12:10

¹⁸ Pe afai o e tauivi ma toʻatugā o le tino, maʻi, po o se isi lava faafitauli, “ia tatalo e lē aunoa” mo le fesoasoani ina ia aua neʻi faavaivaia ai oe. (1 Tesalonia 5:14, 17) O le mea moni, o le a iai taimi e lelei pe faalēlelei ai mea, ae ia taulaʻi pea i mea e faalaeiau ai, i mea faaleagaga, aemaise lava lo tatou faamoemoe tāua o le Malo. Na faapea mai se tasi tuafafine: “O le galuega talaʻi e pei o se vaifofō iā te aʻu.” O le tufa atu o le tala lelei i isi, na fesoasoani i lenei tuafafine ina ia tausisia ai pea se vaaiga mautinoa o le olaga.

O le Alofa e Toe Foʻi ai Lē Fai Mea Sesē iā Ieova

19, 20. (a) O le ā se mea e fesoasoani i ē ua faia le agasala, ina ia lototetele ai e toe foʻi iā Ieova? (e) O le ā o le a talanoaina i le mataupu o sosoo mai?

¹⁹ O le toʻatele o ē ua oo ina vaivai faaleagaga po ua oo ina faia le agasala, e lē faigofie ona latou toe foʻi iā Ieova. Peitaʻi o le a maua le loto tele e manaʻomia, pe afai e salamō moni ma toe faaolaola lo latou alofa mo le Atua. Seʻi manatu iā Mario, * o lē nofo i le Iunaite Setete. Sa tuua e Mario le faapotopotoga Kerisiano, ma na pulea o ia e le ʻava malosi ma fualaau faasāina, ma ina ua mavae le 20 tausaga, sa oo ina faafalepuipui. Na ia faapea mai: “Sa ou nofo ma mafaufau loloto i loʻu lumanaʻi, ma amata ona toe faitau le Tusi Paia. Ina ua mavae sina taimi, na oo ina ou talisapaia uiga o Ieova, aemaise lava lona alofa mutimutivale lea sa ou tatalo i ai i le tele o taimi. Ina ua faasaʻolotoina aʻu mai le falepuipui, na ou ʻalo ese i aʻu aumea tuai, auai i sauniga faa-Kerisiano, ma oo ai ina toe faaaʻe aʻu. I le taimi nei, ua ou selesele i āuga o aʻu gaoioiga i le itu i le tino, ae o le mea e sili ai ua iai soʻu faamoemoe matagofie. E lē lava aʻu upu e faafetaia ai Ieova ona o lona alofa mutimutivale ma lana faamagaloga.”—Salamo 103:9-13; 130:3, 4; Kalatia 6:7, 8.

²⁰ E mautinoa, o i latou i tulaga e pei o Mario, e manaʻomia ona latou galulue mamafa ina ia toe foʻi iā Ieova. Ae o le toe faaolaola o lo latou alofa, e ala i le suʻesuʻe o le Tusi Paia, tatalo, ma le mafaufau loloto, o le a latou maua ai le loto tele ma faia ai le mea tonu. Na faamalosia foʻi Mario i le faamoemoe o le Malo. Ioe, faatasi ai ma le alofa, faatuatua, ma le mataʻu i le Atua, o le iai o se faamoemoe e mafai ona avea ma uunaʻiga malosi e faaleleia ai o tatou olaga. I le mataupu o sosoo mai, o le a tatou tilofaʻia ai lenei meaalofa tāua faaleagaga.

[Faamatalaga pito i lalo]

Pe Mafai Ona E Tali?

• Na faapefea ona saosaolaumea le alofa i le loto tele mataʻina o Iesu?

• Na faapefea ona fesoasoani le alofa o Paulo ma Panapa mo le ʻauuso, e faaalia ai lo la lototetele mataʻina?

• O ā auala e faaaogā e Satani e faavaivaia ai le alofa faa-Kerisiano?

• O ā ituaiga faigatā e mafai ona tatou lototetele e onosaʻia ona o le alofa mo Ieova?

[Fesili mo le Suʻesuʻega]

[Ata i le itulau 23]

O le alofa o Paulo mo tagata na ia loto tele ai e fesagaʻi ma faigatā

[Ata i le itulau 24]

E manaʻomia le loto tele ina ia tausisia ai tapulaa a le Atua

[Ata i le itulau 24]

Namangolwa Sututu