Pe Mafai Moni Ona Tatou Iloa le Atua?

“O le ola [e] faavavau foʻi lenei, ia latou iloa . . . le atua moni e toʻatasi.”—Ioane 17:3.

NA FAAILOA mai e le aposetolo o Paulo: “Aue! le loloto o le tamaoaiga o le poto atoa ma le silafaga a le Atua.” Na ia toe faapea mai atili: “E lē masuʻesuʻeina ana faamasinoga; e lē mafai foʻi ona iloa ona ala.” (Roma 11:33) Po o lona uiga ea la o nei upu, e lē mafai ona maua e tagata le poto ma le silafaga a le Atua, lea e lē mafai ai ona iloa o ia ma ana fuafuaga?

E manatu nisi tagata lotu e lē mafai ona iloa le Atua. Ua taʻua i le Encyclopedia of Religion lenei ituaiga manatu: “E tapulaa mea e mafai ai ona iloa le Atua. . . . E lē mafai ona faasuafaina pe faamatalaina le Atua. So o se igoa po o se faamatalaga, e tapulaa uma lava, ma e sili atu le Atua . . . i na mea uma. . . . E lē o ia o se taulaʻiga o le poto, auā e sili atu o ia i le poto.” *

E tusa ai ma le mekasini o le Newsweek, e toʻatele tagata o atunuu e lē to’a’aga i lotu ua mātele i “se ituaiga manatu fou faalotu” e faapea, “e na o le tasi lava le mea moni, o le mea saʻo lava, e leai se mea moni.”

Peitaʻi, e lē o maua e le toʻatele tali o a latou fesili e uiga i le faamoemoe o le olaga. Ua latou mātauina faafitauli faavaivailoto o le mativa, faamaʻi, ma faiga sauā. Ua latou manatu ai, o le lē mautinoa o le olaga o se mea e matuā lotovaivai ai lava. Atonu latou te naunau e fia iloa tali, ae pe a lē maua, latou te ono manatu e leai lava ni tali o na fesili. O lea la, e toʻatele tagata ua ō ese mai lotu aloaʻia, ma ua saʻili e faalatalata atu i le Atua i a latou lava auala, pe a latou talitonu e iai moni se Atua.

Le Manatu o le Tusi Paia

O ē e manatu e lelei le Tusi Paia ma lotomalilie e talia Iesu o le Fofoga fetalai a le Atua, o le a naunau e fia iloa po o le ā le manatu o le Tusi Paia. Atonu o e manatua na fetalai Iesu e uiga i ni ala se lua faapea e ‘va tele le faitotoʻa, e lautele foʻi le ala e tau atu i le malaia,’ ma e “lauitiiti foʻi le ala e tau atu i  le ola.” Na ia faamatala pe faapefea ona mātaulia i latou e savavali ai i na ala, i le faapea mai: “Tou te iloa ai i latou i o latou fua.” O ā ituaiga fua? E ala i mea latou te faia, ae lē o mea latou te fai mai ai e pei ona faamanino e Iesu: “E lē sao atu i le malo o le lagi i latou uma o ē fai mai iā te aʻu, Le Alii e, le Alii e; na o lē na te faia le finagalo o loʻu Tamā o i le lagi.” E lē lava le tau ina talitonu i le Atua. E tatau ona tatou faia lona finagalo. O le mea moni, e ao ona tatou maua muamua le poto saʻo po o le ā le finagalo o le Atua.—Mataio 7:13-23.

Na faaali manino e Iesu, e mafai ona maua e tagata le poto e uiga i le Atua. Na ia fetalai: “O le ola [e] faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.” (Ioane 17:3) E manino mai, e mafai ona tatou maua le poto ma le silafaga lea e faailoa mai e le Atua, pe a tatou matuā saʻili i ai. Ae ui i lea, o le ola e faavavau o le meaalofa lea a le Atua i ē faia faapea, o lona uiga la, e tāua tele lenei saʻiliga.

[Faamatalaga pito i lalo]

[Ata i le itulau 4]

Na fetalai Iesu o se ala e lauitiiti e tau atu i le ola