Aiseā e Fai ai le Mea ua Tonu?

NA FAAPEA mai se tane atamai: “Auā ua iā te aʻu le loto atu, a ou te leʻi iloa ona fai o le mea lelei; auā ou te lē faia o le mea lelei ou te loto i ai, a o le mea leaga ou te lē loto i ai, o le mea lea ou te faia.” Aiseā na faigatā ai i lea tane ona faia le mea lelei e loto i ai? Na ia faamatala mai: “O lenei, ua ou iloa peiseaʻī se tulafono ua iā te aʻu; pe a ou loto atu i le lelei e fai, ua iā te aʻu le leaga. Auā ou te fiafia i le tulafono a le Atua i le tagata i totonu. A ua ou iloa le tulafono ese i oʻu tino, o loo tau le taua i le tulafono a loʻu mafaufau, ua fai foʻi aʻu ma tagata o taua i le tulafono a le agasala o loo i oʻu tino.”—Roma 7:18, 19, 21-23.

O upu ia a Paulo na tusia i le 2,000 tausaga talu ai, e faamatala mai ai māfuaaga e faigatā ai mo tagata lē lelei atoatoa ona faia le mea lelei. O le uaʻi atu i mataupu silisili saʻo, aemaise i tulaga faigatā, e manaʻomia ai le malosi tau amio. E tatau ai ona tatou fesili ifo, O le ā le māfuaaga sili e tatau ai ona ou faia le mea ua tonu?

Seʻi o tatou iloilo po o ā fā a le Tusi Paia e uiga i le lumanaʻi o se tasi e amio saʻo. Ua faapea mai le Salamo e 37:37, 38: “Inā mafaufau ia i lē ua sao lana amio, ma vaavaai i lē ua amiotonu; auā o le iʻuga o lea tagata o le manuia lava lea. A e fano faatasi o ē solitulafono; o le iʻuga o ē amio leaga o le malaia lava lea.” Ua faapea mai le Faataoto 2:21, 22: “Auā o ē amio saʻo, latou te mau i le nuu; ma ē ua sao a latou amio, e faatotoeina ai i latou; a e vavaeeseina o e amio leaga ai le laueleele, e liaʻiina ai foʻi o ē amio pepelo.”

E ui ua aumaia e nei folafolaga ma isi foʻi folafolaga o loo i le Tusi Paia iā i tatou se uunaʻiga e sili ona lelei, e saʻili ai se olaga e faafiafia ai le Atua, ae e lē o taʻu maia ai māfuaaga autū e ala ai ona tatou faia le mea tonu. O le māfuaaga e fesootaʻi atu i se finauga e aafia uma ai tagata taʻitoʻatasi i le lalolagi. O le a talanoaina i le mataupu e sosoo mai po o le ā lea finauga, ma pe faapefea foʻi ona aafia ai i tatou.