Ia Aʻoaʻo Lau Fanau e Fai ni Tali

E MANATUA e Perla mai Mekisikō le taimi a o itiiti, sa fesoasoani lona tinā e sauni ni ana tali pupuu mo le Suʻesuʻega o le Olomatamata. Ua iai nei le tama tama a Perla e lima tausaga le matua. E faapefea ona ia fesoasoani iā te ia? “E ao ona ou sauniuni muamua. Pe a ou faia faapea, ou te vaai i se palakalafa e malamalama i ai laʻu tama, lea e mafai ona ia faamatala i ana lava upu. Ona ma uaʻi lea i lenā palakalafa lea e na te taʻua ‘⁠o laʻu palakalafa.’ Ou te fai iā te ia e faamatala mai le palakalafa e faaaogā ai faaaʻoaʻoga i aso nei o loo ia malamalama i ai. Ona ma faataʻitaʻi lea o le tali i le tele o taimi. E ma te faaaogā se mea e pei lona telē o se maikorofoni, ina ia iloa ai le auala e uu ai pe a fai lana tali. Ua ou fiafia lava auā e lē misi se sauniga e aunoa ma le faia o sana tali, pe sii foʻi lona lima. O le tele o taimi e alu ai i le fai suʻesuʻega a o leʻi amata le sauniga, ma taʻu i ai le palakalafa lea e manaʻo e tali ai.”

O Jens o se toeaina Kerisiano e auai i le vaega faa-Hinitū, e toʻalua ona atalii, e lua ma le fā tausaga. Pe a sauniuni ma lana avā ma le fanau mo mataupu o le sauniga, e latou te faaaogā se faiga na aʻoaʻo e Jens mai ona mātua. Ua ia taʻua: “E ma te filifili po o fea vaega o le mataupu e malamalama i ai tamaiti. Ona ma taumafai lea e avatu iā i laʻua se aotelega o le mataupu po o manatu tāua, a uma ona fai atu lea o ni fesili lea e ma te mananaʻo iā i laʻua e tali ai i le sauniga. O isi taimi e ma te maofa ai i tali la te faia i se auala lava e masani ai. O le auala e tali mai ai, e faaalia ai mea ua la malamalama i ai. O le iʻuga, o a la tali o se viiga moni iā Ieova ma o se faailoaga o lo la faatuatua.”