‘Ia Anaana i le Atua i lo Tagata’

Molimau Māeʻaeʻa Atu ma le “Loto Tele”

NA MATUĀ sauni se motu sauā o tagata e fasi ia oti se auauna usiusitai a le Atua. Na fetaui lelei le taimi na aveese ai e fitafita Roma lenei tamāloa mai ē na osofaʻia o ia, ma taofi iā te ia. O le amataga lea o mea na tutupu i le faasologa o le lima tausaga. O le iʻuga, e toʻatele tagata taualoa o le malo o Roma na faalogo e faatatau iā Iesu Keriso.

O lē na mafatia o le aposetolo o Paulo. Na faailoa mai e Iesu i le 34 T.A., o le a molimau Paulo (Saulo) i Lona igoa i luma o “tupu.” (Galuega 9:15) E oo atu lava i le 56 T.A. e leʻi taunuu lava lea folafolaga. A o taufaaiʻuiʻu le malaga faamisionare lona tolu a Paulo, ua toeitiiti lava foʻi ona suia lea o tulaga o mea mo ia.

Osofaʻi ae Lē Fefe Ai

Na faaauau le malaga a Paulo agaʻi atu i Ierusalema, ma “e ala i le agaga paia,” na lapataʻia o ia e ni Kerisiano e faapea, o le a oo ni sauāga ogaoga iā te ia i lenā aai. Na loto tele Paulo ma fai atu: “Ua ou sauni lava aʻu e lē gata ina fusifusia, a ia ou oti lava i Ierusalema, ona o le suafa o le Alii o Iesu.” (Galuega 21:4-14) E leʻi umi ona taunuu atu Paulo i le malumalu i Ierusalema, ae uunaʻia loa e tagata Iutaia mai Asia e masani i le taulau manuia o lana galuega, ni tagata e fasiotia o ia. Na vave ona oo mai fitafita Roma e laveaʻi iā te ia. (Galuega 21:27-32) O lenā laveaʻiina na maua ai e Paulo se avanoa mataʻina e folafola atu ai le upu moni e faatatau i le Keriso, i ni tagata e feita i lana feʻau ma i latou i tulaga maualuluga.

Talaʻi i Tagata e Faigatā Ona Talaʻi i Ai

Na aveese atu Paulo i se nofoaga saogalemu i le olo ua taʻua o le Olo o Antonia. * Mai luga o ia faasitepu, na ia avatu ai se molimau maumauaʻi i tagata lotu. (Galuega 21:33–22:21) Ae peitaʻi, ina ua ia taʻua lona faataunuuina o le faatonuga e talaʻi i tagata o Nuu ese, na toe mapuna aʻe ai foʻi uiga sauā o tagata. Na faatonu e le taʻitaʻiʻau o Lusia ia suʻesuʻeina Paulo i lalo o sauāga, pe aiseā ua molia ai o ia e tagata Iutaia. Sa lē oo sauāga iā Paulo, ina ua ia fai atu o ia o le tagatānuu o Roma. I le aso na sosoo ai, na aveina ai e Lusia ia Paulo i le Saniterini ina ia iloa ai le māfuaaga ua molia ai o ia e tagata Iutaia.—Galuega 22:22-30.

Na iai se isi avanoa lelei na molimau atu ai Paulo i tagata Iutaia ina ua tū i luma o le faamasinoga sili. Na taʻu atu e Paulo ma le lē fefe lona talitonuga e faatatau i le toe tū. (Galuega 23:1-8) Na mananaʻo pea tagata Iutaia e fasioti Paulo, ma na aveina ai loa o ia i le nofoaga o fitafita. I le pō na sosoo ai, na ia maua ai se faalaeiauga mai le Alii: “Inā faalototele ia oe; auā e pei ona e molitino i mea iā te aʻu i Ierusalema, e tusa foʻi ona faapea ona e molimau i Roma.”—Galuega 23:9-11.

Sa iai se taupulepulega e fasioti Paulo a o faananā ona faatopetope atu o ia i Kaisareia, le laumua o le pulega a Roma i Iutaia. (Galuega 23:12-24) I Kaisareia, na iai foʻi ni avanoa lē au maua e molimau atu ai Paulo i “tupu.” Na muamua ona faasino atu e le aposetolo i le kovana o Filiki, e leai ni faamaoniga tusitusia e lagolagoina ai le molia o ia. Mulimuli ane, na talaʻi atu Paulo iā te ia ma lana avā o Tusila e faatatau iā Iesu, le pulea o le tagata lava ia, amiotonu ma le faamasinoga i le taimi o i luma. Ae peitaʻi sa tuua Paulo i le falepuipui mo le lua tausaga, ona sa faatalitali Filiki i se tupe e totogi atu e Paulo, ae peitaʻi e leʻi avatua e Paulo se tupe.—Galuega 23:33–24:27.

 Ina ua suia le tulaga o Feso e Filiki, ona toe suia lea e tagata Iutaia a latou taumafaiga ina ia tuuaʻia ma fasiotia Paulo. Na toe faia le faamasinoga i Kaisareia, ma puipuia ai le avatu o le faamasinoga i Ierusalema. Na faapea mai Paulo: “O loo tū nei aʻu i luma o le nofoa faamasino o Kaisara . . . Ou te valaau iā Kaisara.” (Galuega 25:1-11, 20, 21) Ina ua uma ni nai aso, ua uma foʻi ona avatu e le aposetolo lana faamatalaga e faatatau i lona tulaga i luma o le tupu o Herota o Akeripa II, na fai atu le tupu: “O se mea itiiti ona e faaliliuina lea o aʻu e fai ma Kerisiano.” (Galuega 26:1-28, LT) E tusa o le 58 T.A., na auina atu ai Paulo i Roma. I le avea o se pagota i inā mo le isi lua tausaga, na faaauau ona saʻilia e le aposetolo faautauta auala e talaʻi atu ai e faatatau iā Keriso. (Galuega 28:16-31) E foliga mai na tulaʻi Paulo i luma o le emeperoa o Nero, ma faalauiloa ai lona lē nofo sala, ma iʻu ina toe faia lana galuega faamisionare o se tagata saʻoloto. E leai ni faamaumauga o se isi aposetolo e ese mai iā Paulo, na maua se avanoa e talaʻi atu ai le tala lelei i tagata taualoa.

E pei ona taʻua i luga, na ōgatusa le olaga o Paulo ma faatulagaga mataʻina na faaalia i luma o le fono a Iutaia e ona uso Kerisiano: ‘E sili ona matou anaana i le Atua nai lo tagata.’ (Galuega 5:29) Maʻeu le mataʻina o le faataʻitaʻiga ua ia faataatia mo i tatou! E ui i taumafaiga faifai pea a tagata e taofia o ia, ae na matuā usiusitai le aposetolo i le faatonuga e avatu se molimau māeʻaeʻa. O le iʻuga o lona usiusitai lē maluelue i le Atua, na faataunuu e Paulo lana galuega o se “ipu ua filifilia” e talaʻi atu le suafa o Iesu i “nuu ese, ma tupu, ma le fanauga a Isaraelu.”—Galuega 9:15.

[Faamatalaga pito i lalo]

[Pusa/Ata i le itulau 9]

PE NA NAUNAU PAULO E PUIPUIA TAU O IA LAVA?

Na faapea mai le tusitala o Ben Witherington III e faatatau i lea fesili: “E tusa ai ma le manatu o Paulo . . . e lē tāua iā te ia le puipuia o ia lava, ae ia molimau atu i le Tusi Paia i tagata taualoa, i tagata Iutaia ma Nuu Ese. . . . O le mea moni o le Tusi Paia loo faamasinoina.”