O Ē na Faauu Mai se Aʻoga na Aogā i Tagata i le Lalolagi Atoa

I LE silia ma le 98,000 faapotopotoga o Molimau a Ieova i le silia ma le 200 atunuu, ua aʻoaʻoina ai tagata mai tulaga eseese e le Atua. O le tusi autū e faaaogā o le Tusi Paia, ma o le sini o lenei aʻoaʻoga e fesoasoani i tagata ia agaʻigaʻi i luma faaleagaga, i le aʻoaʻo o le finagalo o le Atua ma ia ola e tusa ma lona finagalo. Ua aogā tele i ē e taliaina lenei aʻoaʻoga. E latou te taʻu atu foʻi i isi mea ua latou aʻoaʻoina, lea e tusa ma le faatonuga a Iesu Keriso i le faia o soo.—Mataio 28:19, 20.

E faaopoopo atu i le polokalame tauaʻoaʻoga faifaipea i a latou faapotopotoga, ua faavaeina e Molimau a Ieova ni aʻoga faapitoa. O se tasi o nei aʻoga o le Aʻoga mo Toleniga i le Faiva. Na amata iā Oketopa 1987 i Pittsburgh, Pennsylvania, i le Iunaite Setete o Amerika. O le uluaʻi vasega na aofia ai tagata aʻoga e 24 e tautatala i le gagana Peretania. Na faia ai loa aʻoga talu mai lenā taimi i gagana e 21 i atunuu e 43. E oo mai nei la, ua auai toeaina ma auauna o le faiva nofo fua mai atunuu e silia ma le 90. Pe a māeʻa le aʻoga lea e valu vaiaso le umi, ona tofia lea o le ʻaufaauu i le mea o loo tele ai le manaʻoga, a lē i o latou atunuu ia o isi atunuu. E oo ane i le faaiʻuga o le 2005, e silia i le 22,000 uso Kerisiano ua uma ona auai i le aʻoga. Ua matuā faamanuiaina a latou taumafaiga filigā ma le loto maulalo e faaauiluma manaʻoga o le Malo ma maua ai e isi aogā.—Faataoto 10:22; 1 Peteru 5:5.

 Faia o Fuafuaga Ina ia Auai

Ina ia auai i le Aʻoga mo Toleniga i le Faiva, e ao ona talosaga le toʻatele o le ʻauaʻoʻoga mo ni aso mālōlō mai galuega ia e galulue ai i ni aso o le vaiaso, po o ē foʻi o loo faigaluega i aso uma o le vaiaso. I nisi taimi e tulaʻi mai ai faafitauli. I Hawaii, e toʻalua ni alii Kerisiano na valaaulia e auai i le aʻoga, na la talosaga atu mo se taimi e mālōlō ai mai a la galuega o ni faiaʻoga. I le faatuatua atu iā Ieova, na ave ai la laʻua talosaga e faamatala ai le pogai o le mananaʻo e auai, ma aogā o le a maua mai ai. Na faataga i laʻua uma e mālōlō mai a la galuega.

I le tele o tulaga, na faailoa atu i Molimau ia e talosaga i se taimi e mālōlō ai, o le a lē toe faigaluega pe a toe foʻi mai. Na latou filifili e maua aʻoaʻoga mai le faalapotopotoga a Ieova, e ui ina lē toe maua ai a latou galuega. O nisi e toe maua mulimuli ane ni valaaulia mai o latou pule e toe foʻi atu i galuega ina ua uma le aʻoga. O lea faanaunauga e auai i le aʻoga, e ono faamatala faapea: Ave le talosaga i lou pule, tatalo mo le fesoasoani a Ieova, ma tuu atu iā te ia isi mea uma.—Salamo 37:5.

‘Aʻoaʻoina e Ieova’

E taulaʻi atu le aʻoga lea e valu vaiaso le umi i se suʻesuʻega loloto o le Tusi Paia. E aʻoaʻo ai le ʻauaʻoʻoga i le faamaopoopoina o tagata o Ieova e faia lona finagalo, ma le faaaogāina ma le uigā o le Tusi Paia i la latou talaʻiga, i sauniga a le faapotopotoga, ma i fonotaga.

Na tusi se tagata faauu loto faafetai i se uso e leʻi auai i le aʻoga e faapea: “Talitonu mai, o le a e oo i se aʻoga e sili ona manaia i aʻoga uma na e auai ai. E matuā uigā lava le mau lea o loo taʻua ai le ‘aʻoaʻoina e Ieova.’ O le aʻoga atoa, o le suia ma le faaleleia atili o le loto ma uiga, ina ia ōgatusa ma faaaʻoaʻoga a Keriso Iesu. O le a e maua se aʻoga e sili ona lelei i lou olaga.”—Isaia 54:13.

Faievagelia, Leoleo Mamoe, ma Faiaʻoga

E 117 atunuu o loo galulue ai ē ua faauu mai le Aʻoga mo Toleniga i le Faiva. E aofia ai motu o le Atalani, Karipiane, ma le Pasefika, ma le tele o atunuu o loo iai ofisa o lālā o Molimau a Ieova. Ua lipotia mai e lālā, ua faaatagia atu e le ʻauaʻoʻoga aʻoaʻoga lelei ua latou maua, i la latou galuega faaevagelia, leoleoina o mamoe, ma le aʻoaʻo atu. O a latou aʻoaʻoga ua fesoasoani iā i latou e faaaogā ai ma le uigā le Tusi Paia i le faiva i le fanua. (2 Timoteo 2:15) Pe a tali fesili a lē ona le fale, e tele taimi e latou te faasino atu ai i faamaumauga o loo i le tusi, Reasoning From the Scriptures * ma aʻoaʻo isi tagata talaʻi o le Malo e faia faapea. E iai aafiaga o le maelega o le ʻaufaauu, ma e faamalosia ai faapotopotoga i a latou galuega.

Ua maua e toeaina o le faapotopotoga le faaeaga e “leoleo i le lafu mamoe,” e fesoasoani i le tausia o manaʻoga faaleagaga o isi. (1 Peteru 5:2, 3) Na taʻua e se toeaina e tusa ai o le faatulagaga: “Ua matou loto faafetai ona ua auina mai e le ofisa o le lālā uso ua aʻoaʻoina lelei, e fesoasoani i le tauaveina o le avega o le leoleoina o le lafu a le Atua.” Na faapena foʻi ona mātauina e se lālā i Atunuu i Asia: “E ese le alolofa o ē na faauu mai le aʻoga. E latou te galulue mamafa ma ua faaaloalogia ai i latou e le faapotopotoga. Ua iloga ma ua matuā faatāuaina lo latou loto maulalo, māfana, ma le naunau moni. Ua latou lotomalilie e tuua mea uma, ma fiafia e siitia atu i faapotopotoga o loo manaʻomia ai ni leoleo mamoe.” (Filipi 2:4) Ua faamalosia e nei tane o latou uso talitonu ma ua tatau i ai le faamālō.—1 Korinito 16:18.

E lē gata i lea, e fesoasoani faiaʻoga o le Aʻoga mo Toleniga i le Faiva i le ʻauaʻoʻoga, e faaleleia atili lo latou tomai o ni failauga i le lautele. O le faatatauina o manatu ma  fautuaga ua latou maua, ua toʻatele ai le ʻaufaauu e lē umi ae faaaogā i polokalame o fonotaga matagaluega ma tauaofiaga itumalo. Na mātauina e se ovasia itumalo e faapea, e faia e ē ua faauu mai le aʻoga ni “lauga e sili ona lelei ma faatatau le mataupu e ala i le fefulifulisaʻi.”—1 Timoteo 4:13.

Na matuā faaleleia le tulaga i le aʻoaʻo atu i sauniga a le faapotopotoga i se atunuu i Aferika, ina ua mavae le faia ai i inā o le Aʻoga mo Toleniga i le Faiva, ma tofia atu ē ua faauu mai le aʻoga i le oganuu. Ua fesoasoani toeaina na auina mai le aʻoga i le galuega faaevagelia, leoleoina o mamoe, ma le aʻoaʻo atu, lea ua ati aʻe ai faaleagaga faapotopotoga.—Efeso 4:8, 11, 12.

Faaleleia Atili le Vaavaaia o Faapotopotoga

O loo iai se manaʻoga mo nisi toeaina ma auauna o le faiva i le tele o atunuu. E leai se toeaina i nisi faapotopotoga, ae semanū le auina atu ai o sē na faauu mai le Aʻoga mo Toleniga i le Faiva. E auina atu ai loa le toʻatele o ē ua faauu e galulue i le mea o loo iai na manaʻoga.

Ua lipotia mai e ni lālā, o nei tane ua “iloa lelei faatulagaga a le faalapotopotoga,” “manatu mamafa i o latou tiute tauave,” “fesoasoani i isi ia malamalama ma faaaloalo i le faalapotopotoga a Ieova,” ma “saosaolaumea i le ati aʻe o le māfana ma le faaleagaga o a latou faapotopotoga.” Talu ai ona ua usiusitai le ʻaufaauu o le aʻoga i mea o loo i le Afioga a le Atua, ma e lē faalagolago i lo latou lava atamai pe faafiapoto foʻi. (Faataoto 3:5-7) Ua avea nei tane ma meaalofa faaleagaga i faapotopotoga ua tofia i ai i latou.

Galulue i Oganuu Mamao Ese

Ua fesoasoani nisi o tagata faauu na tofia o ni paeonia faapito i vaega e tū mamao ese, ina ia avea o ni faapotopotoga. Ua taʻua e se toeaina i se oganuu maotua i Kuatemala lona talisapaia o la latou fesoasoani: “Mo le 20 tausaga na ou popole ai po o le a faapefea ona tausia lenei oganuu telē. E masani ona ou tatalo e uiga i le mataupu. Ua aʻoaʻoina lelei uso mai le Aʻoga mo Toleniga i le Faiva i le tautala, faapea foʻi ma mataupu tau i le faalapotopotoga, ma ua ou faafetai ai ona o lea ua maua e lenei oganuu le uaʻi atu ma le alofa.”

Ua aʻoaʻoina le ʻaufaauu ina ia uigā i oganuu ia e ao ona faimalaga mamao ai i mauga maualuluga, ina ia oo atu i tamaʻi nuu o loo tūtū solo ai. E vave ona latou faavae ma faamaopoopo ai ni vaega i na oganuu maotua, e tusa pe lē mafai e isi tagata talaʻi ona faia faapea. O se faaaʻoaʻoga, na talosagaina e se toeaina i Niger le fesoasoani a tagata faauu, ona sa ia manatu e mafai ona latou faia se galuega e sili ona lelei i le oganuu o loo ia nofo ai. E ono faigofie mo alii e leʻi faaipoipo ona galulue o ni paeonia faapito ma ni ovasia matagaluega, aemaise lava i oganuu e mamao ese. I le pei o le aposetolo o Paulo, e ao ona latou fesagaʻia tulaga ‘leaga i vaitafe, leaga i ē fao mea, leaga i le vao,’ faafitauli a le tagata lava ia, faapena foʻi ma popolega i faapotopotoga o loo latou galulue ai.—2 Korinito 11:26-28.

Aogā i Talavou

Ua faalaeiauina e le Tusi Paia talavou ina ia manatua Lē na Faia i latou. (Failauga 12:1) Ua avea le ʻaufaauu maelega mai le Aʻoga mo Toleniga i le Faiva o ni faaaʻoaʻoga lelei i talavou Kerisiano. Ina ua taunuu tagata faauu se toʻalua i se faapotopotoga i le Iunaite Setete, na faaluaina le aofaʻi o le taimi na talaʻi ai le ʻauuso. Na faateleina foʻi paeonia sauatoa po o tagata talaʻi faataimi atoa o le Malo mai le 2 i le 11. E faapena foʻi mea na tutupu i le tele o faapotopotoga.

Ua faalaeiau foʻi e le ʻaufaauu alii talavou ina ia mafaufau e auai i le Aʻoga mo Toleniga i le Faiva. Ua uunaʻia ai isi e lē o ni auauna o  le faiva e aapa atu mo lenā faaeaga. Ua taʻua e le lālā a Holani le ʻaufaauu o le Aʻoga mo Toleniga i le Faiva, o ni “faaaʻoaʻoga lelei mo alii talavou o loo manatunatu po o ā mea e fai i o latou olaga.”

Galulue i Faapotopotoga e Ese Gagana

I le tele o atunuu, ua agaʻigaʻi i luma taumafaiga e talaʻi le tala lelei i tagata i a latou lava gagana. E masani ona aʻoaʻo e le ʻaufaauu o le Aʻoga mo Toleniga i le Faiva isi gagana, ma galulue i oganuu ia e toʻatele ai ē e malaga atu e nonofo ai. O se faaaʻoaʻoga i Peleseuma, o loo manaʻomia nisi tagata talaʻi o le Malo i oganuu ia o loo iai ē e tautatala i le gagana Alapania, Peresia, ma Rusia.

Ua maua e faapotopotoga ma vaega e ese gagana i le Iunaite Setete, Italia, Mekisikō, Peretania, ma Siamani aogā mai ovasia femalagaaʻi, toeaina, ma auauna o le faiva na faauu mai le Aʻoga mo Toleniga i le Faiva. Ua lipotia mai e le lālā i Korea, “e silia i le 200 le ʻaufaauu ua faia ni sao iloga e fesoasoani i faapotopotoga ma vaega e ese gagana.”

Galulue ma le Lotomaulalo i Isi Vala o le Auaunaga

E faaopoopo atu i le galulue i vaega ma faapotopotoga e ese gagana, ua galulue ē na faauu mai le Aʻoga, o ni toeaina, auauna o le faiva, ma ovasia femalagaaʻi. Ua talia e nisi tofiga i isi atunuu, atonu po o ni manaʻoga faanatinati i le Matagaluega o Auaunaga i se lālā. O ē e iai tomai i faugāfale, atonu e faia ni sao i le polokalame o le fauina o Maota mo Sauniga.

O le faateleina o faapotopotoga ma matagaluega i le lalolagi, o le tele foʻi lenā o le manaʻomia pea o ni ovasia femalagaaʻi. Ina ia fesoasoani i lenei manaʻoga, e faia se aʻoga e sefulu vaiaso mo le galuega femalagaaʻi mo le ʻaufaauu ua filifilia mai le Aʻoga mo Toleniga i le Faiva, ona galulue lea o ni ovasia suitulaga po o ni ovasia o matagaluega. Pe tusa e 1,300 le ʻaufaauu ua galulue o ni ovasia femalagaaʻi i atunuu e 97. I se atunuu i Aferika, o le 55 pasene o ovasia femalagaaʻi, ua faauu mai le Aʻoga mo Toleniga i le Faiva. I se isi atunuu i Aferika, e 70 pasene.

I Ausetalia, Atunuu i Asia, Europa, ma le Iunaite Setete, e faitau selau le ʻaufaauu ua auina atu e faataunuu ni manaʻoga faapitoa i isi atunuu. Ua oo atu ai aogā o le aʻoga i le lalolagi atoa.

Ua saunia e Ieova e ala i lona Alo o Iesu ni faievagelia, leoleo mamoe, faiaʻoga, ma isi e faaauiluma manaʻoga o le Malo i nei aso e gata ai. Po o iai ni faamoemoega mo nisi faatelega i tagata o le Atua? Ioe! Ua iai se manaʻoga o loo faatupulaʻia pea mo ni uso ua tuuina atu e naunau mo ni tiute tauave e sili atu. (Isaia 60:22; 1 Timoteo 3:1, 13) Ua ofoina atu e le Aʻoga mo Toleniga i le Faiva i toeaina, ma auauna o le faiva se avanoa e lava tā oso ai e faalautele atu la latou faiva, ma maua ai aogā e tele mo i latou ma isi i le lalolagi atoa.

[Faamatalaga pito i lalo]

[Ata i le itulau 10]

Ua faaauiluma e le Aʻoga mo Toleniga i le Faiva manaʻoga o le Malo i le lalolagi atoa

[Ata i le itulau 13]

Pe e te faamoemoe e auai i le Aʻoga mo Toleniga i le Faiva ma maua ai e isi aogā?