Se Mataupu e Aafia ai Oe

PE E i ai sau uō po o sou tauaiga e māfana le lua mafutaga? E faapefea pe a faitio mai se tasi e pau le māfuaaga e tumau ai lenā mafutaga ona o lou manatu mo lou lava lelei? Pe e lē tigā ai ea ou faalogona pe ita ai foʻi? O le tuuaʻiga tonu lenā na faia e Satani le Tiapolo iā i latou uma e iai se faiā vavalalata ma Ieova le Atua.

Seʻi toe manatu i le mea na tupu ina ua taulau taumafaiga a Satani i le uluaʻi ulugalii o Atamu ma Eva, e solia le tulafono a le Atua ma auai atu i lana fouvalega faasaga i le Atua. Pe e uiga atu le mea na tupu, e pau le māfuaaga e tumau ai le usiusitai o tagata iā Ieova pe afai e mo lo latou lava lelei? (Kenese 3:1-6) Ina ua mavae le tusa o le 2,500 tausaga talu ona fouvale Atamu, na toe lāgā e Satani le finauga lava lea e tasi—i le taimi la lea, e faasaga atu i se tane e igoa iā Iopu. Talu ai o le tuuaʻiga a le Tiapolo na fai i lea taimi e faamatilatila mai ai se finauga o loo aofia ai, o lea, seʻi o tatou iloilo la lenā tala mai le Tusi Paia.

“Ou te Lē Faateʻaina Lava Laʻu Amio Saʻo”

O Iopu “o le tagata ua sao lana amio ma le amiotonu, o lē ua mataʻu i le Atua, ma ʻaloʻalo ese i mea leaga.” Ae peitaʻi ua taumafai Satani e taʻuleagaina le amio saʻo a Iopu. Na ia fesili atu iā Ieova: “Ua mataʻu fua ea Iopu i le Atua?” Na tauleagaina e Satani le Atua ma Iopu e faapea, e ala ona faamaoni Iopu ona o loo puipuia ma faamanuia Ieova iā te ia. Na faatū atu e Satani le luʻi e faapea: “Ia e aapa atu lou aao, ma e tago atu i ana mea uma, pe na te lē faifai ai ea iā te oe i ou lava luma?”—Iopu 1:8-11.

Ina ia talia ia tuuaʻiga, na faataga e Ieova Satani e tofotofoina Iopu. I taumafaiga a le Tiapolo e faaliliu ese Iopu mai le auauna atu i le Atua, na ia faasolosolo ona faaoo ni mala i lea tane faamaoni. Na faaleagaina uma e Satani lafumanu a Iopu a lē o le gaoia, o le faaumatia, ma fasiotia ana auauna ma lana fanau. (Iopu 1:12-19) Pe na taulau Satani? E leai! E ui e leʻi iloa e Iopu o le Tiapolo na faapogaia ona mafatiaga, ae na ia faapea mai: “Na foaʻiina mai e Ieova, ua aveeseina foʻi e Ieova; ia faamanuina le suafa o Ieova.”—Iopu 1:21.

Mulimuli ane, na tulaʻi Satani i luma o Ieova ma faapea atu: “Ua taofi mau pea foʻi e ia lana amiotonu, sa e faaosoina aʻu iā te ia, ia ou faaoo fua le malaia iā te ia.” (Iopu 2:1-3) O le finauga tāua, o le faamaoni o Iopu—o se uiga e manaʻomia ai le lē maluelue o le faamaoni i le Atua ma pipii mau atu i le amiotonu. Ioe, na manumalo Iopu i le finauga o le faamaoni. Ae peitaʻi e leʻi fiu ai Satani.

Na sosoo ai ma le faia e Satani o se tuuaʻiga faalauaʻitele lea e aafia ai tagata uma. Na ia faapea atu iā Ieova: “O le paʻu e sui aʻi le paʻu; o mea uma foʻi ua i ai i le tagata, e avatua e ia  e sui aʻi lona ola. A e peitaʻi ia e aapa atu lou aao, ma e tago atu i ona ivi ma ona aano, pe na te lē faifai ai ea iā te oe i ou lava luma?” (Iopu 2:4, 5) I le faaaogāina o le upu “tagata” na i lo le igoa o Iopu, ua fesiligia ai e le Tiapolo le faamaoni o tagata uma. O lea, na ia faamautinoa mai e faapea: ‘O le a faia e le tagata so o se mea e faasaoina ai lona ola. Tuu mai se avanoa, ona mafai lea ona ou faaliliueseina so o se tasi mai le Atua.’ Po o le a leai ea ni tagata o le a tumau i le faamaoni i le Atua i mea uma ma i taimi uma?

Na faataga e Ieova le Tiapolo e faaoo se maʻi papala leaga iā Iopu. Sa mafatia tele Iopu ma ia tatalo ai e faamuta lona ola. (Iopu 2:7; 14:13) Ae na ia faapea mai: “Seʻia oo lava i loʻu oti ou te lē faateʻaina lava laʻu amio saʻo.” (Iopu 27:5) Na faia e Iopu nei upu ona o lona alofa i le Atua, ma e lē mafai ona toe suia. Sa faamaonia e Iopu o ia o se tagata e faamaoni. Ua taʻua i le Tusi Paia: “Ua sili foʻi ona faamanuia e Ieova o le gataaga o Iopu i lona amataga.” (Iopu 42:10-17) Pe na iai nisi e pei o Iopu? O le ā se mea na faailoa mai a o tuanaʻi atu taimi?

Le Auala ua Taliina ai le Luʻi

I le mataupu e 11 o le tusi o Eperu, o loo lisiina ai e le aposetolo o Paulo igoa o tane ma fafine faamaoni a o lumanaʻi le vaitaimi o Kerisiano, e aofia ai Noa, Aperaamo, Sara ma Mose. Na faailoa mai e le aposetolo: “Auā e saasaa le aso e tala atu ai [i isi].” (Eperu 11:32) E toʻatele nei auauna faamaoni a le Atua, lea na faasino i ai Paulo “o ē matamata mai e faapea ona toʻatele,” e faatusatusa atu i se ao telē lea e ufitia ai le lagi. (Eperu 12:1) Ioe i le faasologa mai o senituri, ua faatinoina e le anoanoaʻi o tagata la latou filifiliga saʻoloto, ma filifili e faamaoni atu iā Ieova le Atua.—Iosua 24:15.

O le Alo o le Atua lava ia o Iesu Keriso, o le tali aupito sili lea ona mataʻina i le luʻi a Satani e faapea, e mafai ona ia faaliliueseina tagata mai iā Ieova. E oo lava i tigā matuitui o le laau faaoosala e leʻi aveesea ai lona faamaoni. I le taimi a o leʻi tō le manava a Iesu, na ia alaga atu: “Loʻu Tamā e, ou te tuuina atu loʻu nei agaga i ou aao!”—Luka 23:46.

Na faailoa mai e le faagasologa o taimi, e lē mafai e le Tiapolo ona faaliliueseina tagata uma mai le auaunaga i le Atua moni. Ua toʻatele tagata ua latou iloa Ieova ma ‘alolofa iā te ia ma o latou loto atoa, ma o latou agaga atoa, ma o latou manatu atoa.’ (Mataio 22:37) O lo latou faamaoni lē maluelue iā Ieova, na faamaonia ai le sesē o Satani i le finauga i le faamaoni o tagata. E mafai foʻi ona e faamaonia le sesē o le Tiapolo, pe a avea oe o se alii po o se tamaʻitaʻi faamaoni.

O le ā se Mea e Tatau Ona E Faia?

E finagalo le Atua “ia faaolaina o tagata uma lava, ma ia oo ina iloa lelei le upu moni.” (1 Timoteo 2:4) E faapefea ona e faia faapea? Ia faatulaga se taimi e suʻesuʻe ai le Tusi Paia, ma ‘ia iloa le Atua moni e toʻatasi ma lē na ia auina mai, o Iesu Keriso.’—Ioane 17:3.

Na luʻi e Satani le faamaoni o le tagata e ala i le fesiligia o māfuaaga e auauna ai i le Atua. Afai ua uunaʻia oe ona o le poto, e tatau la ona pāʻia lou loto. Ina ia pāʻia lou loto, e manaʻomia ona fai ni au taumafaiga e sili atu na i lo le tau ina suʻe o ni faamatalaga mai le Tusi Paia. Ia faataʻitaʻi ona ati aʻe le mafaufau loloto i mea ua e aʻoaʻoina. (Salamo 143:5) Pe a faitau le Tusi Paia po o lomiga faale-Tusi Paia, ia faamautinoa e iai se taimi e mafaufau ai i fesili e pei o fesili nei: ‘O le ā ua ou aʻoaʻoina mai i lenei mea e uiga iā Ieova? O ā uiga o le Atua o loo faamatala mai ai? O ā vala o loʻu olaga e tatau ona ou faatatauina ai nei uiga? O ā mea e fiafia ma lē fiafia ai Ieova? E faapefea i lea mea ona aafia ai oʻu faalogona e uiga i le Atua?’ O le faia faapea, o le a faatumu ai lou loto i le alofa ma le talisapaia o le Atua.

O le faamaoni i le Atua e lē patino atu na o le itu i talitonuga faalotu. (1 Tupu 9:4) O le tausisia pea o lou faamaoni iā Ieova, e manaʻomia ai le mamā tau amio i vala uma o le  olaga. Ae peitaʻi, o le tausisia o le faamaoni e lē taofia oe i so o se mea. O Ieova o “le Atua manuia” po o le fiafia, ma e finagalo ia e fiafia i le olaga. (1 Timoteo 1:11) Seʻi manatu i ni amioga e tatau ona ʻalofia ina ia tumau ai le mamā tau amio, ma maua ai se olaga fiafia ma le finagalo malie o le Atua.

ʻAlofia Amioga Leaga Faaleituaiga

Ua faataatia e Ieova faatulagaga mo faaipoipoga i le Tusi Paia, lea e faapea: “O le mea lea e tuua ai e le tane lona tamā ma lona tinā, a e faatasi ma lana avā; ona avea ai lea o i laʻua ma tino e tasi.” (Kenese 2:21-24) Talu ai ua avea ē ua faaipoipo ma “tino e tasi,” e la te faamamaluina la le faatulagaga a le Atua i le faaipoipoga, pe afai e gata mai feusuaʻiga i le va na o i laʻua lava. Na faapea mai le aposetolo o Paulo: “Ia faamamaluina le faaipoipoga e tagata uma, o le moega foʻi o le ulugalii ia leai sona leaga; auā e faamasinoina e le Atua o ē faitaaga ma ē mulilulua.” (Eperu 13:4) O le faaupuga “moega,” e faatatau atu i feusuaʻiga i le va o le tane ma le avā ua uma ona faaipoipoina faaletulafono. Ae afai e faia e se isi o i laʻua se feusuaʻiga i fafo atu o le liʻo o le faaipoipoga, ua mulilua la ma o le a faasala o ia e le Atua.—Malaki 3:5.

Ae faapefea feusuaʻiga e fai a o leʻi faaipoipo? E lē ōgatusa lenā ma tapulaa tau amio ua faatulaga e Ieova. Ua taʻua i le Tusi Paia: “O le finagalo foʻi lenei o le Atua, . . . ia faamamao outou ma le faitaaga.” (1 Tesalonia 4:3) O le tauatane, mataifale, feusuaʻi o tagata ma manu, o agasala foʻi ia e faasaga i le Atua. (Levitiko 18:6, 23; Roma 1:26, 27) O so o se tasi e fia maua le finagalo malie o le Atua ma se olaga e fiafia moni, e tatau ona taumamao mai faiga amio leaga.

Ae faapefea amioga e faagaee ai feusuaʻiga a o leʻi faaipoipo? O lea tulaga e lē fiafia i ai Ieova. (Kalatia 5:19) E tatau foʻi ona faamamā le mafaufau mai manatunatuga lē mamā. Na fetalai Iesu: “A ou te fai atu aʻu iā te outou, ai sē vaai atu i le fafine ina ia manaʻo i ai, ua uma ona mulilua ma ia i lona loto.” (Mataio 5:28) O ia upu e faatatau atu foʻi i le matamata i ata mataga faaleituaiga i nusipepa, vitiō, po o le Initineti; faitau i tusi o loo faamatala ai feusuaʻiga; ma le faalogologo i pese e faagaee ai e fai mea leaga. O le ʻalofia o ia mea, e faafiafiaina ai le Atua ma iai ni aafiaga lelei i le olaga o se tasi.

Ae faapefea le faatafai? O le faatafai o lona uiga, o “gaoioiga o le alofa e faaosofia ai lagona mo feusuaʻiga.” E feteenaʻi ma mataupu silisili o le Tusi Paia ma o se faailoga foʻi o le lē faaaloalo mo Ieova, pe a faailoa atu e se tane po o se avā faaipoipo nei uiga i se tasi i fafo atu o le liʻo o le la faaipoipoga. (Efeso 5:28-33) E lē atamai mo ē e nofo fua le faailoa atu o ni faanaunauga alofa i se isi faapea, tau lava o se mea e mālie! Ae faapefea pe afai ua amata ona matuiā le faatafai na i lo le mea sa mafaufau ai? Ia mafaufau i tigā o faalogona o le a oo i ai. O le mea moni, e tugā foʻi le faatafai auā e oo atu ai i le mulilua po o le faitaaga. I le isi itu, o le faaalia o uiga mamā i le isi itupā, e faateleina ai le faaaloalogia o le tagata lava ia.—1 Timoteo 5:1, 2.

Faafiafiaina le Atua i Isi Vala o le Olaga

E maua le ʻava malosi i le tele o atunuu. Pe e sesē le inuina o le ʻava malosi? E lē faasā e le Tusi Paia le inuina o le uaina, pia, po o isi ituaiga ʻava malosi i se auala pulea ina ia fiafia ai. (Salamo 104:15; 1 Timoteo 5:23) Ae peitaʻi, e sesē i le silafaga a le Atua le inu tele ma le onā. (1 Korinito 5:11-13) E mautinoa e te lē manaʻo e soona inu tele e aafia ai lou soifua mālōlōina ma fevaevaeaʻi ai lou aiga.—Faataoto 23:20, 21, 29-35.

O Ieova o le “Atua faamaoni.” (Salamo 31:5) Ua taʻua i le Tusi Paia: “E lē mafai ona pepelo . . . le Atua.” (Eperu 6:18) Afai e te fia maua le finagalo malie o le Atua, o le a e ʻalofia la le pepelo. (Faataoto 6:16-19; Kolose 3:9, 10) Ua lapataʻia e le Tusi Paia Kerisiano:  “Ia tautalatala faamaoni taʻitasi ma lē la te tuaoi.”—Efeso 4:25.

O loo iai foʻi taaloga faitupe. E ui e lauiloa i le toʻatele o tagata, ae o taaloga faitupe o se isi lea ituaiga o matapeʻapeʻa, talu ai o se taumafaiga lea e maua ai tupe faaopoopo i le gau o isi tagata. E lē fiafia le finagalo o Ieova iā i latou e “matapeʻapeʻa i le mauaina ma le lē faamaoni o ni mea.” (1 Timoteo 3:8, NW) Pe a e manaʻo la e faafiafia Ieova, o le a e lē toe auai atu i so o se ituaiga taaloga faitupe, e aofia ai loto, bingo, ma petipetiga i tuuga solofanua. I le faia faapea, o le a tele ai ni tupe e totoe mo mea e manaʻomia e lou aiga.

O le gaoi, lea e ave ai se mea e lē o oe e ana, o le isi lea ituaiga o matapeʻapeʻa. Ua faapea mai le Tusi Paia: “Aua e te gaoi.” (Esoto 20:15) E sesē le faatau mai ma le iloa o ni mea gaoi, ma le ave o mea e aunoa ma le faanoi. Ua faapea mai le Tusi Paia: “O lē gaoi aua neʻi toe gaoi, a e lelei ina faamalosi o ia i galuega a ona lima i mea aogā, ia maua e ia se mea e avatu i ē ua matitiva.” (Efeso 4:28) Na i lo le gaoi o le taimi a le pule o le galuega, o ē e alolofa iā Ieova e faamaoni i a latou galuega i aso taʻitasi. E latou te mananaʻo e ‘loto e amio lelei i mea uma lava.’ (Eperu 13:18) O se lotofuatiaifo lelei e fesoasoani i le filemu o le mafaufau o se tasi.

O le ā le silafaga a le Atua i se tasi e ita leaga? Ua lapataʻi mai le Tusi Paia: “Aua neʻi fefaauōaʻi ma le tagata itagofie; aua foʻi lua te ō ma le tagata lotoa.” (Faataoto 22:24) O le lē pulea o le ita e oo ai i gaoioiga sauā. (Kenese 4:5-8) Ua faapea mai le Tusi Paia i le taui ma sui: “Aua le taui atu le leaga i le leaga i se tasi; ia sauniuni mea e tusa i luma o tagata uma lava. Afai e mafaia iā te outou, ia outou nofo lelei ma tagata uma lava. Le ʻau pele e, aua le taui atu ma sui, a ia outou tuu atu i le toʻasā; auā ua tusia, Ua faapea mai le Alii, O iā te aʻu le taui ma sui, ou te taui atu.’” (Roma 12:17-19) Pe a tatou mulimuli i fautuaga ia, o le a filemu o tatou olaga—ma faateleina lo tatou fiafia.

E Mafai Ona E Taulau

Pe e mafai ona e taulau i le tausisia o lou faamaoni i le Atua e ui i omiga e fai le lē faamaoni? Ioe, e mafai ona e taulau. Ia e iloaina e finagalo le Atua e te taulau i le faamaonia o le sesē o Satani i le finauga o le faamaoni, ona ua faapea mai Lana Afioga: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.”—Faataoto 27:11.

E mafai ona e tatalo atu iā Ieova e faamalosia oe e fai le mea ua tonu i lana silafaga. (Filipi 4:6, 7, 13) O lea, ia faia ni au taumafaiga maumauaʻi e faateleina lou iloa o le Tusi Paia. O le talisapaia o le mafaufau loloto i mea ua e aʻoaʻoina mai le Tusi Paia, o le a fesoasoani e faalolotoina ai lou alofa mo le Atua ma uunaʻia ai oe e faafiafia o ia. Ua faapea mai le 1 Ioane 5:3: “Auā o lenei lava le alofa i le Atua, ia tatou tausi i ana poloaʻiga; e lē mamafa foʻi ana poloaʻiga.” E fiafia Molimau a Ieova i lou vaipanoa e fesoasoani iā te oe i le suʻesuʻeina o le Tusi Paia. E valaaulia oe e faafesootaʻi i latou i lou vaipanoa, pe tusi foʻi i ē na lolomia lenei mekasini.

[Ata i le itulau 4]

Na faamaoni Iopu i tofotofoga

[Ata i le itulau 7]

O le faateleina o lou iloa i le Tusi Paia e faamalosia ai lau faaiʻuga e fai le mea ua tonu