Pe Mafai Ona Aʻoaʻoina se Faamasino?

NA TATAU ona tulaʻi i luma o le faamasinoga Sladjana, o se Molimau a Ieova i Croatia, ona o ni mataupu tau tupe. Na fetaui tonu le taimi na oo ai i luma o se faamasino, ae na tuai atu le isi tagata la te faamasino. Na naunau Sladjana e talaʻi, o lea a o faatalitali tagata, sa ia maua le loto tele e talanoa ai i le faamasino.

Na ia fesili atu: “Lau afioga e, pe e te silafia ua toeitiiti ona leai lea o ni faamasino ma ni faamasinoga e fai i le lalolagi?” Ioe, sa ia faasino atu i faamasino ia tatou te masani ai i aso nei.

O le mea e ofo ai, e na o le tilotilo lava o le faamasino iā te ia e aunoa ma se upu. O le taimi lea na amata ai loa le faamasinoga. Ina ua maeʻa ma ua tulaʻi Sladjana e saini se pepa, na punou ane le faamasino ma fesili musumusu atu iā te ia: “Pe e mautinoa e saʻo le mea na e taʻu mai iā te aʻu, o le a toeitiiti ona leai lea o ni faamasino ma ni faamasinoga e fai i le lalolagi?”

Na tali Sladjana: “Ioe, lau afioga. Ua ou matuā mautinoa lelei!”

Na fesili le faamasino: “E iai ni faamaoniga o lau faamatalaga?”

Na tali Sladjana: “O loo maua i le Tusi Paia.”

Na taʻua e le faamasino e fia faitau i nei faamaoniga, ae e leai sana Tusi Paia. Na ofo i ai e Sladjana o le a ia aumaia sana Tusi Paia. Na asia e ni Molimau le faamasino, ave i ai se Tusi Paia, ma faalaeiau e fai sana suʻesuʻega faale-Tusi Paia i vaiaso taʻitasi. Na talia e le faamasino ma e leʻi leva ae avea ma Molimau a Ieova.

Ua faapea mai le valoaga i le Salamo 2:10: “O lenei, outou tupu e, ia outou atamamai; ia aʻoaʻoina foʻi outou faamasino o le lalolagi.” Maʻeu le faamāfanafanaloto pe a talia ma le loto maulalo e nei tagata le taʻitaʻiga alofa a Ieova!

[Ata i le itulau 32]

Sladjana ma le faamasino