E Foaʻi Mai e Ieova le ‘Agaga Paia i Ē Ōle Atu iā te Ia’

“O outou e leaga, afai ua iloa e outou ona avatu o mea lelei ma a outou fanau, e lē sili ea ona foaʻiina mai e lo outou Tamā o i le lagi le Agaga Paia i ē ōle atu ai iā te ia?”—LUKA 11:13.

1. O fea le taimi tatou te matuā manaʻomia ai le fesoasoani a le agaga paia?

‘E LĒ mafai ona ou fesagaʻia na o aʻu lenei mea. Seʻi vaganā le fesoasoani a le agaga paia, ona mafai lea ona ou onosaia lenei puapuaga!’ Pe iai ea se taimi ua e faaleo ai na lagona loloto? Ua oo i ai le toʻatele o Kerisiano. Atonu pe ina ua e iloa ane ua e aafia i se gasegase ogaoga. Pe ina ua tatala e le oti le lua faaipoipoga ua leva, ma lē sa pele iā te oe. Pe atonu foʻi ua mou ese atu uiga fiafia sa iai, ae ua ufitia oe e ao pogisa o mafatiaga. O taimi matuitui o le olaga e te ono lagona ai, atonu na pau lava le māfuaaga na mafai ai pea ona e faaauau, auā na foaʻi atu e le agaga paia o Ieova iā te oe le “matuā tele o le mana.”—2 Korinito 4:7-9; Salamo 40:1, 2.

2. (a) O ā luʻi o loo fesagaʻi ma Kerisiano moni? (e) O ā fesili o le a tatou talanoaina i lenei mataupu?

² E tatau ona fesagaʻia e Kerisiano moni le tele o omiga ma teteega mai lenei lalolagi faalēmataʻu. (1 Ioane 5:19) E lē gata i lea, ua osofaʻia foʻi e Satani lava ia, soo o Keriso, auā o loo ia matuā faasagatau atu iā i latou o loo “tausi i poloaʻiga a le Atua, ma ua taofi le mau iā Iesu.” (Faaaliga 12:12, 17) O le ala lea, ua matuā sili ai ona tatou manaʻomia le lagolago mai o le agaga o Ieova i le taimi lenei, na i lo se isi lava taimi ua tuanaʻi. O le ā se mea e mafai ona tatou fai ina ia tele ai pea le fesoasoani a le agaga paia o le Atua e tatou te maua? Ma aiseā ua tatou mautinoa ai, o loo matuā naunau Ieova e foaʻi mai le malosi o loo tatou manaʻomia i taimi o puapuaga? E tatou te maua tali i nei fesili, i ni talafaatusa se lua na faamatala e Iesu.

Ia Tatalo Faatauanau

3, 4. O le ā le talafaatusa na faamatala e Iesu, ma na faapefea ona ia faatatauina i le tatalo?

³ E iai se aso na augani atu ai iā Iesu se tasi o ona soo: “Le Alii e, ia e aʻoaʻo mai iā te i matou i tatalo.” (Luka 11:1) Ina ua tali Iesu, sa ia faamatala i ona soo ni talafaatusa se lua. O le tala muamua, o se tamāloa na tali sana mālō, ae o le tala lona lua, o se tamā o loo faalogologo atu i sona atalii. Seʻi o tatou talanoa taʻitasi i nei talafaatusa.

⁴ Na fetalai Iesu: “O ai so outou e ana le uō, e alu atu iā te ia i le tulua o pō, ma fai atu iā te ia, Solē, seʻi au mai ni areto e tolu gafua, a e taui atu; auā ua sau laʻu uō iā te aʻu i lana malaga, a e leai ni aʻu mea e laulau atu i ai; e tali mai o ia mai totonu o le fale, Aua e te faasoesa mai iā te aʻu; ua uma ona pupuni o le faitotoʻa, ua matou taooto ma laʻu fanau; ou te lē mafai ona tulaʻi e avatu ma oe. Ou te fai atu iā te outou, E ui lava ina lē tulaʻi o ia, ma avatu iā te ia, ona o ia o lana uō, a e tulaʻi, ma avatu mea uma e manaʻo ai o ia, ona o lana faatauanau ane.” Ona faamatala loa lea e Iesu le faatatauga o lenei talafaatusa i le tatalo: “Ou te fai atu foʻi aʻu iā te outou, Ia outou ōle atu, ona foaʻiina mai ai lea iā te outou; ia outou saʻili, ona outou maua ai lea; ia outou tuʻituʻi atu, ona tōina mai ai lea iā te outou. Auā ai sē ōle atu, e maua e ia; o lē saʻili, e iloa e ia; o lē tuʻituʻi, e tōina mai iā te ia.”—Luka 11:5-10.

5. O le ā ua aʻoaʻoina ai i tatou mai le talafaatusa i le tamāloa faatauanau, e tusa o o tatou uiga pe a tatalo?

⁵ Ua taʻu mai e lenei talafaatusa manino lo  tatou uiga e tatau ona iai pe a tatou tatalo. Seʻi mātau na taʻua e Iesu, na iʻu ina maua e le tamāloa mea sa ia manaʻomia, “ona o lana faatauanau.” (Luka 11:8) O le upu “faatauanau” lea e taʻua i lenei talafaatusa, e faaliliu mai le upu Eleni o lona faauigaga o le “lē māsiasi.” E masani lava e lē lelei se uiga e faasino i ai le upu, lē māsiasi. Peitaʻi, afai e faaalia le lē māsiasi po o le faatauanau ona o se māfuaaga talafeagai, ona avea ai lea o se uiga lelei. O le tulaga lenā sa iai le tagata na talimālō. E leʻi māsiasi o ia e talosaga faatauanau atu pea mo le mea o loo ia manaʻomia. O lea ua faatulaʻi mai e Iesu lenei tagata talimālō e fai ma faaaʻoaʻoga iā i tatou. O lona uiga, e tatau foʻi ona faapena le faatauanau o a tatou tatalo. E finagalo Ieova ina ia tatou ‘ōle atu pea, saʻili atu pea, tuʻituʻi atu pea.’ Ona tali mai ai lea o ia, i lona ‘foaʻi mai o le agaga paia iā i latou o loo ōle atu iā te ia.’

6. I taimi o Iesu, sa faapeʻī manatu o tagata i le aganuu o le faaalia o le talimālō?

⁶ Ua taʻu mai e Iesu e tatau ona tatou tatalo faatauanau. Ua ia taʻu mai foʻi le māfuaaga e tatau ai ona tatou faia faapea. Ina ia manino lenā lesona, e tatau ona iloa pe sa faapeʻī manatu o ē na faalogologo i lenā talafaatusa, e uiga i le aganuu o le faaalia o le talimālō. E tele fuaitau i le Tusi Paia e taʻu mai ai, i aso anamua, sa faatāua e tagata le aganuu o le tausi lelei o malo e asiasi mai, aemaise pe afai o ni auauna a le Atua. (Kenese 18:2-5; Eperu 13:2) O se mea matagā po o se taʻuvalea pe a lē faaalia e se tasi le talimālō. (Luka 7:36-38, 44-46) Pe a fua i lenā vaaiga, seʻi tatou toe tilofaʻia la le tala a Iesu.

7. Aiseā na lē māsiasi ai le tamāloa talimālō o le talafaatusa a Iesu, e fafagu i lana uō?

⁷ Ua tuneva le pō, ae taunuu ane loa le malo a le tamāloa. Ua iloa e le tamāloa e matuā tatau lava ona ia saunia se meataumafa mo lana malo, peitaʻi ‘e lē o iai ni ana mea e laulau atu i ai.’ I lona la mafaufau, o se mea faafuaseʻi ua tulaʻi mai, ma e tatau ona alu e saʻili mai ni areto, e tusa lava po o le ā le faigatā. Ona agaʻi atu loa lea i lana uō, ma ua lē lagona lava sona māsiasi ae fafagu iā te ia. Ua faapea atu: “Solē, seʻi au mai ni areto e tolu gafua, a e taui atu.” Ua ia faatauanau atu pea, seʻia oo lava ina maua le mea o loo ia manaʻomia. Ma ina ua ia maua ni areto, o inā loa na faatoʻā mafai ai ona avea o ia o se talimālō lelei.

E Matuā Manaʻomia le Agaga Paia

8. Aiseā o le a tatou mananaʻo ai e tatalo faatauanau atu mo le agaga paia?

⁸ O le ā se pogai ua taʻua i lenei talafaatusa, e māfua ai ona tatou tatalo faatauanau? Sa ōle faatauanau pea le tamāloa mo ni areto, auā na ia iloa e matuā talafeagai ona ia maua ni areto, ina ia faatino ai lona tiute o se talimālō. (Isaia 58:5-7) Afai e leai ni ana areto, o le a lē taulau o ia i lona tiute o se talimālō lelei. E faapena se faatusatusaga mai iā i tatou. Ua tatou iloa lelei, e matuā talafeagai ona tatou maua le agaga o le Atua, ina ia faatino ai la tatou faiva o ni Kerisiano moni. O le ala lea tatou te tatalo ai pea i le Atua, ina ia ōle atu mo lenā agaga. (Sakaria 4:6)  Afai e lē iā i tatou lenā agaga, o le a tatou lē taulau. (Mataio 26:41) Po o e māua mai le lesona tāua lea tatou te maua mai lenei talafaatusa? Afai e iā i tatou le vaaiga e matuā manaʻomia lava ona tatou maua le agaga o le Atua, e mautinoa foʻi o le a tatou ōle faatauanau atu i ai.

9, 10. (a) Seʻi faataʻitaʻi mai le pogai e manaʻomia ai ona tatou ōle faatauanau i le Atua mo lona agaga. (e) O le ā le fesili e tatau ona tatou fesili ifo ai, ma aiseā?

⁹ E manaia pe a faatulaga mai lenei lesona i se ata faaonapōnei. Seʻi faapea ua maʻi faafuaseʻi se isi o lou aiga i le tuneva o le pō. Faamata e te fafagua se fomaʻi i lenā taimi mo sana fesoasoani? E te lē faia pe afai ua na o sina tigā laʻitiiti. Peitaʻi, afai ua oso faafuaseʻi lona fatu, e mautinoa lava e te lē mā e saʻili atu i se fomaʻi. Aiseā? Auā o lea ua faafuaseʻi ona e fesagaʻi ma se tulaga mataʻutia. Ua e silafia lelei le matuā talafeagai ona maua o se fesoasoani faapitoa. O lou lē saʻilia o se fesoasoani, e ono iʻu ai ina maliu le maʻi. E faapena foʻi le tulaga o Kerisiano moni. Ua latou fesagaʻi ma se tulaga mataʻutia o loo faaauau pea. Aemaise ua fealualuaʻi Satani e pei “o se leona tagi,” o loo taumafai e ʻaina i tatou. (1 Peteru 5:8) Ina ia tumau la lo tatou malolosi faaleagaga, e matuā talafeagai ona tatou maua le fesoasoani mai le agaga o le Atua. O le lē ōle atu mo se fesoasoani a le Atua e matuā ogaoga ni āuga e iʻu i ai. O lea la, e tatau ona tatou ōle faatauanau i le Atua mo lona agaga paia. (Efeso 3:14-16) Ua na o lenā le auala e mafai ai ona faatumauina le malosi, lea tatou te manaʻomia ina ia ‘tumau ai seʻia oo i le gataaga.’—Mataio 10:22; 24:13.

¹⁰ E tāua tele la mo i tatou ona fesili ifo i nisi taimi, ‘Po o faatauanau ea aʻu tatalo?’ Seʻi manatua, afai tatou te ioe atoatoa e tatou te manaʻomia le fesoasoani a le Atua, o le a atili ai foʻi ona faatauanau a tatou tatalo mo lona agaga paia.

Aiseā Tatou te Tatalo ai ma le Mautinoa?

11. Na faapefea ona faatatau atu e Iesu le talafaatusa i se tamā ma sona atalii, i le tatalo?

¹¹ I le talafaatusa a Iesu i le tagata talimālō faatauanau, o loo faamatilatila mai ai le uiga o le tagata o loo tatalo, le tagata talitonu. O le talafaatusa o loo sosoo ai ua faamatilatila mai ai le uiga o lē o loo faafofogaina mai tatalo, o Ieova le Atua. Na fesili Iesu: “O ai se tamā iā te outou e avatu ea e ia i lona atalii se maa, pe a ōle mai se areto? Pe a ōle mai se iʻa, e avatu ea iā te ia se gata a e lē o se iʻa? Pe a ōle mai se fuāmoa, e avatu ea iā te ia se akarava?” Ona taʻu mai lea e Iesu le faatatauga: “O lenei; o outou e leaga, afai ua iloa e outou ona avatu o mea lelei ma a outou fanau, e lē sili ea ona foaʻiina mai e lo outou Tamā o i le lagi le Agaga Paia i ē ōle atu ai iā te ia?”—Luka 11:11-13.

12. E faapefea i le talafaatusa i se tamā o loo talia le ōlega a sona atalii, ona faamatilatila ai le nofosauni o Ieova e talia a tatou tatalo?

¹² O le faaaʻoaʻoga lenei i le tali atu a se tamā i lona atalii, ua faaalia ai e Iesu faalogona o Ieova iā i latou o loo saʻili atu iā te ia i le tatalo. (Luka 10:22) Muamua, seʻi mātau le eseesega o talafaatusa e lua. E lē pei Ieova o le tamāloa i le uluaʻi talafaatusa, lea na tau faatalatū e talia le ōlega mo se fesoasoani. Na i lo lea, ua pei o ia o le matua alofa e naunau e tali mai i le talosaga a lona atalii. (Salamo 50:15) Ua toe faailoa foʻi  e Iesu le uiga naunau mai o Ieova iā i tatou, e ala i lona talanoa mai e faatatau i se tamā faaletagata ma le tamā faalelagi. Ua fetalai o ia, afai e mafai e se tamā faaletagata, e ui i sona “leaga” mai le agasala tuufaasolo, ona avatu se meaalofa lelei mo lona atalii, ua sili ai la ona tatou faatalitalia lo tatou Tamā alofa i le lagi, e na te foaʻi mai lona agaga paia i lona aiga o loo tapuaʻi atu iā te ia.—Iakopo 1:17.

13. O le ā ua tatou mautinoa pe a tatou tatalo atu iā Ieova?

¹³ O le ā le lesona mo i tatou? Ua mautinoa afai tatou te ōle atu i le Tamā i le lagi mo lona agaga paia, e matuā fiafia lava o ia e talia la tatou talosaga. (1 Ioane 5:14) Pe faafia lava ona tatou tatalo ma ōle atu iā Ieova, e lē taitai ona faapea mai o ia: “Aua e te faasoesa mai iā te aʻu; ua uma ona pupuni o le faitotoʻa.” (Luka 11:7) Na i lo lea, na fetalai Iesu: “Ia outou ōle atu, ona foaʻiina mai lea ia te outou; ia outou saʻili, ona outou maua ai lea; ia outou tuʻituʻi atu, ona tōina mai ai lea iā te outou.” (Luka 11:9, 10) Ma le mautinoa lava, ‘o le a faafofoga mai Ieova iā i tatou i le aso tatou te valaau atu ai.’—Salamo 20:9; 145:18.

14. (a) O le ā le lagona sesē o nisi tagata pe a fesagaʻi ma puapuaga? (e) Pe a fesagaʻi ma puapuaga, aiseā tatou te tatalo atu ai ma le mautinoa iā Ieova?

¹⁴ O le talafaatusa foʻi i le tamā alofa ua toe faamaʻoti mai ai le sili ona atoatoa o le lelei o Ieova, na i lo le lelei o se matua faaletagata. O lona uiga, pe a tatou fesagaʻi ma ni puapuaga, e lē tatau lava ona iai se lagona faapea, atonu ua māfua nei mea ona ua lē fiafia mai le Atua iā i tatou. O lagona na e manaʻo Satani lo tatou fili, ina ia iā i tatou. (Iopu 4:1, 7, 8; Ioane 8:44) O le mea lenā e taʻu, ua toe fasia lava le tagata i ona manatu; ma e leai se faavae faale-Tusi Paia o na mafaufauga. E lē faaosoosoina i tatou e Ieova i ni “mea leaga.” (Iakopo 1:13) E na te lē aumaia iā i tatou se tofotofoga e pei o se gata pe faapei o se akarava. E foaʻiina mai e lo tatou Tamā i le lagi “mea lelei i ē ōle atu ai iā te ia.” (Mataio 7:11; Luka 11:13) Pe a faateleina lo tatou malamalama i le lelei o Ieova ma lona naunau e fesoasoani mai, o le a atili ai foʻi ona tatou mananaʻo e tatalo atu iā te ia ma le mautinoa. Ma o le a mafai ai foʻi ona faaleo atu o tatou lagona e pei o la le faisalamo ina ua tusi: “A e peitaʻi ua faafofogaina mai aʻu e le Atua; ua ia liliu mai i le leo o laʻu tatalo.”—Salamo 10:17; 66:19.

Le Auala e Fesoasoani ai le Agaga Paia iā i Tatou

15. (a) O le ā le folafolaga na faia e Iesu e faatatau i le agaga paia? (e) O le ā se tasi o auala ua fesoasoani mai ai le agaga paia iā i tatou?

¹⁵ A o toe o se aga oo i lona maliu, na toe faamautinoa ai foʻi e Iesu le lesona lea na ia taʻua i ana talafaatusa. A o taʻua le agaga paia, na ia fetalai atu i ona aposetolo: “Ou te fai atu foʻi i le Tamā, ona foaʻi mai ai lea e ia iā te outou le tasi Fesoasoani, ina ia tumau pea o ia iā te outou e faavavau.” (Ioane 14:16) O lona uiga sa folafola e Iesu, o le a faatasi mai lenā  fesoasoani po o le agaga paia i ona soo i taimi o i luma, e aofia ai ma o tatou aso. O le ā se vala mataʻina ua tatou mauaina ai lenā lagolagosua i aso nei? Ua fesoasoani mai le agaga paia ina ia mafai ona tatou onosaia pe tumau ai i le tele o puapuaga. E faapefea? Na fetaiaʻi moni lava le aposetolo o Paulo ma tofotofoga. Ua talafeagai ai la lona faamatalaina i lana tusi atu i Kerisiano i Korinito, le auala na fesoasoani ai le agaga o le Atua iā te ia. Seʻi o tatou tilofaʻia puupuu mea na ia tusi atu ai.

16. Ua faapefea ona tali tutusa lo tatou tulaga ma le tulaga o le aposetolo o Paulo?

¹⁶ Muamua, na taʻu saʻo atu e Paulo i ona uso talitonu e faapea, sa tauivi o ia ma se “mea matuitui i le tino,” o se tasi o puapuaga. Ona ia faapea atu lea: “Na ou ʻaiʻoi faatolu atu i le Alii [o Ieova] ona o lea mea, ina ia alu ese iā te aʻu.” (2 Korinito 12:7, 8) E ui sa augani atu Paulo i le Atua ina ia aveese le mea matuitui mai iā te ia, ae sa tumau pea. Atonu e te fesagaʻia foʻi se mea faapena i aso nei. Ma atonu o le a pei oe o Paulo, e te tatalo faatauanau atu ma lou mautinoa, ma ōle atu iā Ieova ina ia aveese ma oe lenā puapuaga. Peitaʻi e ui i au ʻaiʻoiga faifai pea, ae o loo fesagaʻi pea oe ma le faafitauli. Po o lona uiga ea la, sa lē tali mai Ieova i au tatalo, ma e lē o fesoasoani mai lona agaga iā te oe? E leai lava! (Salamo 10:1, 17) Seʻi mātau le isi faamatalaga a le aposetolo.

17. Na faapefea ona tali mai Ieova i tatalo a Paulo?

¹⁷ Na tali mai Ieova i tatalo a Paulo, i le fetalai mai iā te ia: “O loʻu nei alofa tunoa e lava lea e fesoasoani iā te oe; auā o le vaivai e faaatoaina ai loʻu mana.” Na faapea mai Paulo: “O lea ua tele ai lava loʻu fiafia i le mitamita i mea ua ou vaivai ai, ina ia tumau i oʻu luga le mana o Keriso.” (2 Korinito 12:9; Salamo 147:5) O lea la ua iloa e Paulo, sa faamalumalu i ona luga e pei o se faleʻie le puipuiga a le Atua e ala mai iā Keriso. I aso nei, e faapena foʻi le auala o loo tali mai ai Ieova i a tatou tatalo. O loo ia faamalumalu mai lana puipuiga i luga o ana auauna.

18. Aiseā e mafai ai ona tatou onosaia puapuaga?

¹⁸ O le mea moni, e lē avea le iai o se faleʻie ma itu e taofia ai le totō ifo o timuga po o le agi mai o matagi. Peitaʻi o le faleʻie e maua ai se puipuiga mai na mea. E faapena foʻi le faleʻie faafaatusa po o le puipuiga ua saunia e “le mana o Keriso.” E lē faapea o le a taofia ai le oo mai o puapuaga ma faigatā iā i tatou. Peitaʻi, o le a avea o se puipuiga faaleagaga mo i tatou, e teena ai mea leaga o lenei lalolagi, ma osofaʻiga a lē o pulea, o Satani lea. (Faaaliga 7:9, 15, 16) E tusa lava la po o e tauivi ma se puapuaga e lē o ‘alu ese ma oe,’ ae ia e mautinoa o loo silafia mai e Ieova lou mafatiaga, ma e tali mai o ia i lau “alaga atu.” (Isaia 30:19; 2 Korinito 1:3, 4) Na tusi mai Paulo: “Ua faamaoni le Atua, o lē na te lē tuuina atu outou i le faaosoosoga e sili i se mea ua outou lavātia, a e sauni foʻi faatasi ma le faaosoosoga se mea e sao ai, ina ia outou lavā oono.”—1 Korinito 10:13; Filipi 4:6, 7.

19. O le ā ua e filifili nei e fai, ma aiseā?

¹⁹ Ua faamatalaina “aso e gata ai” o lenei lalolagi faalēmataʻu e faapea, o “aso faigatā.” (2 Timoteo 3:1) Peitaʻi e mafai lava e auauna a le Atua ona latou faafetaiaʻia nei aso faigatā. Aiseā? Ona o le lagolagosua ma le puipuiga a le agaga paia o le Atua, lea e nofosauni Ieova e foaʻi tele mai iā i latou o ē ōle faatauanau atu ai ma le mautinoa. O lea la, seʻi o tatou filifili nei e tatalo atu pea lava pea mo le fesoasoani a le agaga paia i aso taʻitasi.—Salamo 34:6; 1 Ioane 5:14, 15.

E Faapefea Ona E Tali?

• O le ā e manaʻomia ona tatou faia ina ia maua ai le agaga paia o le Atua?

• Aiseā tatou te mautinoa ai, o le a tali mai Ieova i a tatou tatalo mo lona agaga paia?

• E faapefea ona fesoasoani le agaga paia iā i tatou ina ia onosaia puapuaga?

[Fesili mo le Suʻesuʻega]

[Ata i le itulau 21]

O le ā se lesona tatou te maua mai le talafaatusa a Iesu i le tagata talimālō lea sa ōle faatauanau mo se fesoasoani?

[Ata i le itulau 22]

Pe e te tatalo atu faatauanau mo le agaga paia o le Atua?

[Ata i le itulau 23]

O le ā tatou te aʻoaʻoina e uiga iā Ieova, mai le talafaatusa i se tamā alofa?