Folafolaina o le Tala Lelei i Haiti

O HAITI ma le Dominican Republic e iai uma i le motu o le teropika o Hispaniola, lea e iai le mauga aupito i maualuga o le Karipiane. E silia ma le 8,000 futu [2,400 mita] le maualuluga o tumutumu mauga. I taimi o le tau “mālūlū,” e ono aisā tamaʻi vailepa o loo i vaega maugā.

E ufitia mauga ma vanu i le itu i saute o Haiti i le vaomatua lauusiusi o le teropika. I isi vaega, e tele ina valevalenoa ma lafulafuā mauga ona o le tātuuina i lalo o laau o le vaomatua. E te silafia le matagofie o Haiti pe a e malaga i mātū po o saute. E mafai ona e maimoaina ni vaaiga matuā matagofie i le fesuisuiaʻi o foliga o laufanua ma le sami, pe a e uia isi ona auala vaiti ma piʻoga i luga o mauga. E te vaaia ai fugālaau i so o se ituaiga ma so o se lanu.

O le toʻatele o le 8.3 miliona o tagata i lea atunuu, e tupuga mai i tagata Aferika. E ui o le toʻatele e matitiva, ae e ese lo latou agalelei ma talimālō. Ua silia ma le 60 tausaga o tufa atu ma le olioli e Molimau a Ieova le tala lelei o le Malo o le Atua iā i latou. Sa latou taliaina ma le māfana Molimau a Ieova.—Mataio 24:14.

Talaʻi i se Taulaga Maotua

O se mea na tupu i le uluaʻi asiasiga a se tamaʻitaʻi misionare i se taulaga maotua, o se tulaga ua masani ai. Na ia tusi:

“I se tasi aso iā Mati 2003, na matou talaʻi ai i Casale, o se taulaga laʻitiiti e pe ā ma le ʻafa itula mai Cabaret lea o loo iai lo matou fale misionare, e 20 maila (30 kilomita) le mamao i mātū o Port-au-Prince, le laumua o Haiti. O le taimi mulimuli na talaʻi ai Molimau a Ieova i Casale o le 1999, ma o lo matou naunau na matou ō ai i le 7:00 i le taeao. E toʻaluasefulu lua i matou—e toeitiiti o la matou faapotopotoga atoa—na ō i ni veni se lua. Na matou talatalanoa ma taliē a o uia auala tū pefu, ma oo atu ai i se vanu e tele ai laau maualuluga. E iai se vaitafe i le ogatotonu o le vanu, ma o le taulaga o Casale e i itu uma o le vaitafe.

“O le tala faasolopito o lenei taulaga filemu e oo atu i le amatamataga o vaitausaga o le 1800, ina ua ō mai fitafita Polani i Haiti e fesoasoani i ē sa pologa ina ia tutoʻatasi, ma nonofo ai ma a latou avā Haiti i lenei vanu lafulemu. E eseese uma tagata aulelei na maua mai i nei ulugalii. E ofoofogia le vaai i tagata o lea atunuu e papaʻe, eena, e lanu meamata ma enaena o latou mata, ma le tele lava o isi ituaiga o lanu.

“E lē fiafia le tagata o le fale na ma muamua tuʻituʻi i ai. A o ma agaʻi ese, na savali mai se tamāloa e agaʻi mai iā i maʻua. Sa ia fia iloa pe ma te talitonu e eseese Iesu ma le Atua. O la ma talosaga na ia aumaia ai lana Tusi Paia, ma na faatalitonuina o ia i la matou talanoaga e faapea, o Iesu o le Alo o le Atua ma e na o Ieova o “le Atua moni e toʻatasi.” (Ioane 17:3) E toʻatele tagata na valaaulia i matou i totonu o o latou fale ma talanoa ma i latou. O nisi na fesili mai, ‘O afea la tou te toe  ō mai ai e suʻesuʻe le Tusi Paia ma i matou?’

“I le aoauli, na matou maua ai se nofoaga paolo ma sauni ai mo le taumafataga. Na saunia e ni tuafāfine se toʻalua se ulo iʻa lapoʻa. E ese le manaia o iʻa! A o nofonofo ai pea i inā, aai, ma talatalanoa, na matou talaʻi ai foʻi i tagata na savavali ane i le auala. Ona matou sopoʻia lea o le vaitafe i le isi itu o le taulaga. Na matou fiafia e talanoa ma nei tagata faaleuō na saofafaʻi i lalo o laau e lata ane i o latou fale. E ese le logoleleia o le faalogo atu i leo o tamaiti o loo taaalo, o tinā o loo fai a latou tagamea i le vaitafe, ma olomatutua o loo tuʻi le kofe!

“E leʻi umi ae ta le fā, ma na toe foʻi la matou vaega fiafia i veni ina ia agaʻi atu i Cabaret. Sa matuā faafiafiaina i maʻua ma laʻu tane i la matou uluaʻi asiasiga i Casale, ma ona tagata talimālō ma faaleuō.”

Talu mai le uluaʻi taimi na taunuu ai Molimau misionare i Haiti i le 1945, na faateleina pea le numera o le ʻautalaʻi i lea atunuu, ma ua 14,000 nei ē o loo talaʻi ma faia ni suʻesuʻega faale-Tusi Paia e silia ma le 22,000. Ona o la latou talaʻiga, na iai se aafiaga i olaga o tagata e 59,372 na auai i le Faamanatuga o le maliu o Iesu Keriso iā Mati 2005, ma o loo talaʻia pea le tala lelei o le malo i tagata. Seʻi manatu i ni auala eseese ua aafia ai olaga o tagata i le galuega a Molimau a Ieova.

O ni Ata Matagofie ua Faasalalau ai le Tala Lelei

E fiafia le toʻatele o tagata Haiti i lanu malolosi. E atagia mai i o latou laei, lanu o o latou fale, fugālaau eseese i o latou togālaau, ma a latou galuega taulima. O loo faaaliali i autafa o auala uma o Port-au-Prince, ie tapoleni e valiina i lanu e masani ona maua i Haiti e taʻua o le L’Art Haitien. O tagata e faatauina nei ie e ō mai atunuu eseese o le lalolagi.

O ia lanu malolosi e lē na o ie e vaaia ai. E tele taavale laʻu pasese e taʻua o camionettes po o tap-tap i auala o Port-au-Prince, ia e vali lelei ai ata mai mafaufauga o tagata. O nisi vaaiga masani o nei ata, e mai i le Tusi Paia.

E faafuaseʻi ona e vaaia se ata e masani ai a o e savali i le auala, e pei o le ata o Atamu ma  Eva i Etena. Ioe, o loo valiina i tua o le tioata o le taavale lea na faatoʻā teʻa atu. E masani ona valiina mau po o faaupuga e iai le suafa o Ieova i nei taavale pe faaaofia ai i igoa o kamupani.

Faasoa Atu le Tala Lelei i Aʻoga

Ua maua e talavou Molimau a Haiti ni avanoa lelei e fesoasoani ai i tamaiti aʻoga e aʻoaʻo e uiga i le Tusi Paia. E pei o le lipoti lenei a se tamaʻitaʻi talavou Molimau e 17 tausaga.

“Na sau se tama e ma te vasega faatasi i se tasi aso ma fesili mai po o le ā le uiga o le ‘faitaaga.’ Na ou lē ano iā te ia, ona na ou mafaufau atonu e faamanaia iā te aʻu. Ae ina ua ia fesili la i le isi tama o le vasega, na iʻu ina fia iloa uma e le vasega le tali. I le vaiaso na sosoo ai ina ua uma aʻu suʻesuʻega i le mataupu, na faia saʻu taulimaga i le vasega e faamalamalama ai le pogai e taumafai ai Molimau a Ieova e tausisia le mamā tau amio, faaleagaga, ma le faaletino.

“E tele fesili a tamaiti na fai ma sa latou talia tali mai le Tusi Paia na ou avatu i ai. E oo foʻi i le pule aʻoga o lē sa musu muamua, sa tele ni ana fesili sa fai, ma sa ia faatulaga ai foʻi se taimi ou te talanoa ai i isi vasega. Na ou faaali i ai le tusi, Fesili ua Fesili Mai ai Talavou—Tali e Aogā, * ma na fiafia i ai le toʻatele. Na ou tufaina tusi e 45 i tamaiti aʻoga i le aso na sosoo ai. Na vave uma ona faitau e le toʻatele a latou tusi, ma o loo suʻesuʻe nei e nisi le Tusi Paia ma Molimau e nonofo lata ane iā i latou. Ua auai nei i sauniga uma se tamaitiiti aʻoga e nofo i loʻu vaipanoa.”

Faaaogāina le Gagana Creole

E mataʻina ma felanulanuaʻi tagata ma laufanua, e faapena foʻi le gagana Haiti Creole, lea e tuufaatasi ai le faa-Falani ma le kalama Aferika i Sisifo. O le gagana autū lea a Haiti ma o le gagana foʻi lea e pāʻia ai o latou loto. O le gagana foʻi lea e matele ina faaaogā e Molimau a Ieova e talaʻi ai, ma o loo fuafua e lomia nisi lomiga faale-Tusi Paia i le gagana Haiti Creole.

Na faaliliuina le polosiua, Olioli i Le Ola i Le Lalolagi e Faavavau i le 1987 i le gagana Haiti Creole, ma mulimuli ane le polosiua O le ā e Manaomia e le Atua Mai ia i Tatou? Na fesoasoani tele nei lomiga i tagata aʻoga fou o le Tusi Paia na mananaʻo e maua le malamalamaga autū i le Afioga a le Atua. Na lomia foʻi Le Olomatamata i le Haiti Creole iā Setema 1, 2002. O loo faaaogā pea lomiga faa-Falani, ae e toʻatele e fia faitau i lomiga i la latou lava gagana.

Avatu le Tala Lelei i Ē o i le Falepuipui

E leʻi leva atu nei ona amata avatu e Molimau a Ieova le tala lelei i alii ma tamaʻitaʻi o loo i le falepuipui o le atunuu. E fiafia Molimau e avatu le faamāfanafanaga i ē o mafatia i lenei tulaga sili ona faanoanoa. Na lipotia mai e se uso Kerisiano:

“Na aumaia pagota i totonu o se potu telē e matou te feiloaʻi ai i le taimi o la matou uluaʻi asiasiga i se falepuipui. Na matou mafaufau pe faapeī la latou tali mai. Ina ua matou faailoa i ai na matou ō atu e fesoasoani ia latou malamalama i le Tusi Paia, na talia lelei i matou e le toʻa 50. Na matou faaali polosiua Creole o le Apply Yourself to Reading and Writing ma le Olioli i Le Ola i Le Lalolagi e Faavavau!, ma amata ai ni suʻesuʻega faale-Tusi Paia e 26 ma i latou. E toʻasefulu i latou na auai e lē iloa faitau, ae sa latou fiafia ina ua matou faasino i ai le faaaogāina o ata i polosiua e fesoasoani e malamalama ai i upu.”

 Ina ua toe foʻi atu Molimau, na faapea mai se isi tamāloa: “Na ou faitau ma toe faitau le polosiua. Na ou mafaufau pea i mea o loo taʻua ai, ma na ou tepa taulaʻi lava i le isi a outou asiasiga.” Na faapea mai se tane na falepuipui i le gaoi e manaʻo e suia lona olaga, ma na ia talosaga mai pe e mafai ona auina atu se tasi e suʻesuʻe le Tusi Paia ma lana avā. Na faia foʻi e se tane e toʻalua lana fanau na falepuipui lea lava talosaga, ina ia suʻesuʻe lana avā ma iloa ai le eseesega o talitonuga moni ma talitonuga pepelo. Na taʻua e se faifeʻau o le lotu Porotesano na molia i le gaoia o se vaega tupe tele a le ʻaulotu, o lea ua ia maua le upu moni ma pe a magalo, o le a fesoasoani i lana ʻaulotu e avea ma Molimau a Ieova.

O se tasi pagota na leiloa lana polosiua o le Manaomia i le gagana Creole, na ia kopiina le polosiua atoa a lē la te potu faatasi ma aʻo faatauloto. Na taʻu atu e se pagota tamaʻitaʻi mea na ia aʻoaʻoina i ē latou te potu faatasi e toʻaiva, ma suʻesuʻe ma i latou. Na uma ona suʻesuʻe e se tama pagota le polosiua, ma ua oo atu lana suʻesuʻega i le tusi o le Poto, ma amata ona talaʻi atu i isi pagota. E leʻi umi ae ia faia ni suʻesuʻega faale-Tusi Paia ma nisi e toʻafā.

Sa masani ona suʻesuʻe e Mercony * le Tusi Paia ma e iai ona tauaiga e Molimau a Ieova. Na ia faalaeiau isi pagota e faitau lomiga faale-Tusi Paia na avatu e ona tauaiga iā te ia. Na ia taʻua: “Pe a oʻu avatu lomiga i pagota, latou te taʻua aʻu o le Molimau a Ieova. Ou te fai iai e lē o aʻu o se Molimau ona ou te iloa le ituaiga o tagata e taʻu o le Molimau a Ieova. Ua ou manatu mamafa e suʻesuʻe i le taimi nei ma papatiso. Ou te lē falepuipui pe ana ou mulimuli i ala o oʻu uso a o oʻu laʻitiiti.”

Na taʻu atu e se pagota na maua ana lomiga mai iā Mercony, i Molimau na asiasi atu iā te ia: “A o tou leʻi ō mai i le Aso Gafua ua teʻa, sa ou matuā mafatia lava ma na ou manaʻo e pule i loʻu ola. Ae ina ua uma ona ou faitau i mekasini, sa ou tatalo i le Atua e faamagalo mai mea leaga sa ou faia, ma aumai se tasi e faasino mai le ala saʻo. Na matuā faafiafiaina aʻu ina ua tou ō mai i le aso na sosoo ai ma ofo mai e suʻesuʻe le Tusi Paia ma pagota! Ou te manaʻo ia outou aʻoaʻoina aʻu e auauna iā Ieova.”

Avatu e le Ala Mai! le Tala Lelei i Tagata

O loo talanoaina i le Ala Mai! o Novema 8, 2000 i le faa-Peretania, le galuega faatausimaʻi. Na maua e se fafine ni lomiga e 2,000, ma tufaina atu i teine tausimaʻi na auai i se semina i Port-au-Prince. Na tele ina tufa atu i leoleo i Port-au-Prince le Ala Mai! o Iulai 8, 2002, o loo iai mataupu e uiga i leoleo ma a latou galuega. Sa latou talia ma le fiafia lenei mekasini, e oo lava i le taimi nei, e taofi e nisi leoleo Molimau i le auala ma talosaga i ai mo nisi kopi o lea mekasini.

Talu ai nei sa faatautaia e se tamaʻitaʻi e galue i le Faalapotopotoga o le Soifua Mālōlōina i le Lalolagi, se polokalame e aʻoaʻo ai tagata i le faafitauli o le AIDS. Na valaaulia o ia i le ofisa o Molimau a Ieova, lea sa faaali atu ai faamatalaga mai le Ala Mai! e faatatau i lea mataupu. Na ia maofa e vaai i mataupu e faavae mai le Tusi Paia, i auala sili e puipuia ai mai le AIDS, ma le auala e fesoasoani ai i ē ua aafia e fesagaʻia lo latou tulaga. Sa ia faapea mai o loo taʻimua le Ala Mai! i le saunia o faamatalaga i lea mataupu.

Ioe, e tele auala o loo faasalalauina ai e Molimau a Ieova le tala lelei o le Malo i Haiti, e pei lava ona faia i isi atunuu e 234 i le lalolagi. E toʻatele o loo tali mai i lenei feʻau o le faamoemoe, ma o loo fesoasoani i ai e ʻalofia le mafaufau i faafitauli o le taimi nei, ae taulaʻi atu i se lalolagi fou, lea o le a olioli ai tagata uma o loo tapuaʻi i le Atua moni o Ieova i le olaga lelei atoatoa.—Faaaliga 21:4

[Faamatalaga pito i lalo]

[Faamatalaga i Ata i le itulau 9]

Vaaiga i tua: ©Adalberto Rios Szalay/photodisc/age fotostock