O le a Faia e Ieova le Faamasinoga

“Pe lē faia ea e le Atua le faamasinoga mo ē na ia filifilia, o loo alalaga iā te ia i le ao ma le pō?”—LUKA 18:7.

1. O ai ua avea ma puna o faalaeiauga iā te oe, ma aiseā?

I LE lalolagi aoao, o loo auauna faatasi ai Molimau a Ieova ma le toʻatele o o latou uso ma tuafāfine, o ē ua loa tausaga o auauna faamaoni iā Ieova. Pe e te silafia lelei nisi o i latou nei? Atonu ua tau lou mafaufau i se tuafafine ua afu lona soifua, ua tele tausaga talu ona papatiso, ma e seāseā ona misia se sauniga. Pe e te mafaufau foʻi i se uso matua, ua fia sefulu tausaga o faamaoni pea e lagolago malosi i le galuega talaʻi a le faapotopotoga i lea vaiaso ma lea vaiaso. E mautinoa atonu sa mafaufau le toʻatele o nei auauna matutua, ua tatau ona oo mai i lenei taimi ua mavae atu Amaketo. Peitaʻi o lea lava o loo iai lenei lalolagi faimea lē tonu. E ui i lea, e lē o taitai ona faaitiitia ai lo latou faatuatuaina o folafolaga a Ieova. E lē o faavaivaia ai foʻi lo latou maumauaʻi pea e “tumau seʻia oo i le gataaga.” (Mataio 24:13) O le telē o le faatuatua o loo faaalia e nei auauna faamaoni a Ieova, ua avea ma puna o faalaeiauga mo le faapotopotoga atoa.—Salamo 147:11.

2. O le ā le tulaga tatou te faanoanoa ai?

² E ui lava i lea, e iai foʻi taimi tatou te ono mātauina ai ni faalētonu. O nisi o Molimau sa auauna mo le tele o tausaga, ua faasolosolo ina mou atu lo latou faatuatua iā Ieova, ma ua lē toe auai mai i le faapotopotoga Kerisiano. Tatou te faanoanoa pe a fulitua iā Ieova nisi sa tatou auaumea faatasi i taimi ua mavae. Ma o lo tatou faanaunauga sili, o le fesoasoani pea i nei “mamoe ua sē” ina ia toe foʻi mai i le lafu. (Salamo 119:176; Roma 15:1) O nei iʻuga eseese e ono lāgā ai ni fesili. Aiseā ua mafai ai e le toʻatele o isi Molimau ona tumau pea lo latou faatuatua i folafolaga a Ieova, ae ua faamaamulu isi? O le ā se mea e mafai ona tatou faia patino ina ia faamautinoa, o loo mausalī pea lo tatou talitonuga i le lalata mai o “le aso tele o Ieova”? (Sefanaia 1:14) Seʻi tatou talanoa i se talafaatusa o loo faamauina i le Evagelia a Luka.

Se Lapataʻiga mo i Latou e Ola Pea pe a Sau le Atalii o le Tagata

3. O ai e aogā patino i ai le talafaatusa i le fafine ua oti lana tane ma le faamasino, ma aiseā?

³ I le Luka mataupu e 18, o loo iai se talafaatusa a Iesu i se fafine ua oti lana tane ma se faamasino. E tai tutusa ma le talafaatusa i le tamāloa talimālō faatauanau, e pei ona tatou talanoaina i le mataupu ua mavae atu. (Luka 11:5-13) Peitaʻi, i isi uma fuaiupu o le mataupu atoa o le Tusi Paia lea e iai le talafaatusa i le fafine ua oti lana tane ma le faamasino, e iloa ai o loo faatatau patino atu lenei talafaatusa iā i latou e ola i le taimi pe “a sau le Atalii o le tagata” i le mana o le Malo, lea na amata i le 1914.—Luka 18:8. *

4. O le ā na talanoaina muamua e Iesu a o leʻi taʻua le talafaatusa o i le Luka mataupu e 18?

⁴ A o leʻi faia e Iesu le talafaatusa, sa ia taʻua le oo ina iloa e le lalolagi uma o le faamaoniga o lona faatasi mai i le mana o le Malo, ‘e pei o le emo o le uila’ lea o loo sau “mai le tasi  itu lagi, e malamalama atu i le tasi itu lagi.” (Luka 17:24; 21:10, 29-33) E ui i lea, o le toʻatele lava o tagata o loo ola “i ona pō o le iʻuga” o le a lē uaʻi atu ma amanaʻia lenā faamaoniga manino. (Tanielu 12:4) Aiseā? O le pogai lava e tasi lea foʻi na lē amanaʻia ai e tagata i aso o Noa ma Lota lapataʻiga a Ieova. I tuā i na taimi, sa mua ona pisi tagata ‘e aai, feinu, faatau mai, faatau atu, totō mea, ma fai o latou fale, seʻia oo lava i le aso na fano ai i latou uma.’ (Luka 17:26-29) Na maʻimau o latou ola ona sa alu uma o latou taimi i na gaoioiga masani, ae ua lē uaʻi atu ai i le faia o le finagalo o le Atua. (Mataio 24:39) E faapena tagata i aso nei, ua mua ona pupū o latou mafaufau i meafai o aso taʻitasi, ae galo ai iā i latou le lalata mai o le iʻuga o lenei lalolagi faalēmataʻu.—Luka 17:30.

5. (a) O ai sa faasino saʻo atu i ai le lapataʻiga a Iesu, ma aiseā? (e) O le ā ua māfua ai ona mou ese le faatuatua o nisi?

⁵ Sa mamafa i le finagalo o Iesu ona soo, ina neʻi maileia i latou i le lalolagi a Satani, ma oo ai ina toe “foʻi” i mea na muaʻi lafoaʻia. (Luka 17:22, 31) Ma ua tupu le mea lenā i nisi Kerisiano. Ua leva tausaga o latou moomoo atu mo le aso o le a faamuta ai e Ieova lenei lalolagi amioleaga. Peitaʻi ina ua lē oo mai Amaketo i le taimi sa latou faatalitalia, ona lē fiafia ai lea. Ua mou atu lo latou mautinoa lea sa iai i le lata mai o le aso o le faamasinoga a Ieova. Ua lē toe aasa i le faiva ma ua faasolosolo mālie lava ona matuā aafia i le faatinoga o mea masani o le olaga, ma tau lē maua ai se taimi mo mea faaleagaga. (Luka 8:11, 13, 14) Mulimuli ane, ua latou toe foʻi lava e fai mea na latou muaʻi lafoaʻia. Pagā se faanoanoa!

Le Manaʻoga ia “Tatalo Soo”

6-8. (a) Faamatala mai le talafaatusa i le fafine ua oti lana tane ma le faamasino. (e) O le ā le faatatauga o lenei talafaatusa na taʻua e Iesu?

⁶ O le ā e mafai ona fai ina ia faamautinoa e lē o vaivai lo tatou mautinoa i le faataunuuga o folafolaga a Ieova? (Eperu 3:14) O le fesili lenā na faatulaʻi e Iesu ina ua faatoʻā uma lava ona ia lapataʻia le ʻausoo, ia aua neʻi toe foʻi atu i le lalolagi amioleaga a Satani.

⁷ O loo taʻua e Luka faapea “ua fetalai atu foʻi [e Iesu] le faataoto iā te i latou, ina ia tatalo soo e tatau ai, a e aua le faavaivai.” Na fetalai Iesu: “Sa i le tasi aai le faamasino, ua lē mataʻu i le Atua, e lē āva foʻi i tagata; sa i lea aai foʻi le tasi fafine ua oti lana tane, ua alu atu iā te ia, ua faapea atu, Ia e faamasino atu i lē ua i ai aʻu mea. O nai aso e leʻi mafai ai o ia; a e mulimuli ane ua faapea ifo o ia i lona loto, E ui lava ina ou lē mataʻu i le Atua, ma aʻu lē āva i tagata, a e peitaʻi ona o le faasoesa mai iā te aʻu o le fafine nei ua oti lana tane, ou te faamasino [ai] i ana mea, ina neʻi faatigā mai iā te aʻu i lona sau soo.”

⁸ Ina ua uma lana faamatalaga, ona taʻua lea o le faatatauga: “Ia outou faalogo mai i le upu a le faamasino amiolētonu. Pe lē faia ea e le Atua le faamasinoga mo ē na ia filifilia, o loo alalaga iā te ia i le ao ma le pō? Pe faatuai  ea o ia iā te i latou? Ou te fai atu iā te outou, e vave ona faamasino e ia o a latou mea. Peitaʻi, a sau le Atalii o le tagata, pe maua ea e ia le faatuatua i le lalolagi?”—Luka 18:1-8.

“Ia E Faamasino Atu i Lē ua i ai Aʻu Mea”

9. O le ā le manatu autū ua manino mai i le talafaatusa i le fafine ua oti lana tane ma le faamasino?

⁹ E matuā manino le manatu autū o lenei talafaatusa, lea e taʻua e tagata uma e toʻalua i le talafaatusa, ma na taʻua foʻi e Iesu. Na ʻaiʻoi atu le fafine: “Ia e faamasino atu i lē ua i ai aʻu mea.” Na faapea mai le faamasino: “Ou te faamasino i ana mea.” Na fesili Iesu: “Pe lē faia ea e le Atua le faamasinoga?” Ona ia toe tali lea, e faatatau iā Ieova: “E vave ona faamasino e ia o a latou mea.” (Luka 18:3, 5, 7, 8) O afea tonu lava o le a ‘faia ai e le Atua le faamasinoga’?

10. (a) O anafea na faatino ai le faamasinoga i le uluaʻi senituri? (e) O afea ma e faapefea ona faatino le faamasinoga mo auauna a le Atua i aso nei?

¹⁰ I le uluaʻi senituri, na taunuu ai “aso e faasalaina ai” (po o “aso o le tauimasui,” Kingdom Interlinear) i le 70 T.A. ina ua faaumatia Ierusalema ma lona malumalu. (Luka 21:22) Mo tagata o le Atua i aso nei, o le a faataunuuina le faamasinoga i “le aso tele o Ieova.” (Sefanaia 1:14; Mataio 24:21) O le taimi lenā o le a ‘taui atu ai e Ieova le puapuaga i ē o faapuapuagaina’ ana auauna e pei ona “taui ma sui [Iesu Keriso] i ē ua lē iloa le Atua, ma ua lē anaana i le tala lelei a lo tatou Alii o Iesu Keriso.”—2 Tesalonia 1:6-8; Roma 12:19.

11. I le ā le itu o le a “vave” ai le oo mai o le faamasinoga?

¹¹ Ae o le ā so tatou malamalamaga i le faamautinoaga a Iesu faapea, o le a “vave” ona faia e Ieova le faamasinoga? Ua taʻua e le Afioga a le Atua, “e ui lava ina tuai mai [Ieova],” ae o le a vave ona ia faaoo mai le faamasinoga pe a oo i lana taimi talafeagai. (Luka 18:7, 8; 2 Peteru 3:9, 10) Ina ua oo mai le Lolo i aso o Noa, sa faaumatia ē amioleaga e aunoa ma le faatuai. E faapena foʻi i aso o Lota ina ua paʻū ifo le afi mai le lagi, sa susunuina uma ē amioleaga. Na fetalai Iesu: “E faapea lava i le aso e faaalia mai ai le Atalii o le tagata.” (Luka 17:27-30) O le a toe taia foʻi tagata amioleaga i le “fano faafuaseʻi.” (1 Tesalonia 5:2, 3) E mafai ona tatou mautinoa atoatoa, e leai lava se isi mea e toe seua le fuafuaga a Ieova, pe a oo i lana taimi e faamasinoina ai le lalolagi a Satani.

‘O le a Ia Faia le Faamasinoga’

12, 13. (a) Ua faapefea i le talafaatusa a Iesu i le fafine ua oti lana tane ma le faamasino ona aʻoaʻo mai ai se lesona? (e) Aiseā tatou te mautinoa ai, o le a faafofoga mai Ieova i a tatou tatalo ma faia le faamasinoga tonu?

¹² E iai ma isi mea moni tāua o loo faamatilatila mai e le talafaatusa i le fafine ua oti lana tane ma le faamasino. Ina ua faia e Iesu le faatatauga o lenā talafaatusa, na ia fetalai: “Ia outou faalogo mai i le upu a le faamasino amiolētonu. Pe lē faia ea e le Atua le faamasinoga mo ē na ia filifilia?” E lē faapea ua faatusatusa atu e Iesu Ieova i le faamasino, e peiseaʻī o le auala foʻi lenā o le a feagai ai le Atua ma ona tagata tapuaʻi. Na i lo lea, sa aʻoaʻo e Iesu i ona soo se lesona e uiga iā Ieova, e ala i lona faamatilatila mai o le eseesega i le va o lenā faamasino ma le Atua. O ā nisi o vala e eseese ai?

¹³ Sa “amiolētonu” le faamasino lea e taʻua i le talafaatusa a Iesu, ae “o le Atua, o le faamasino amiotonu o ia.” (Salamo 7:11; 33:5) E matuā leai lava se naunau ane o le faamasino i le fafine ua oti lana tane, peitaʻi o Ieova, e naunau mai o ia i tagata taʻitoʻatasi. (2 Nofoaiga a Tupu 6:29, 30) Sa faatalatū le faamasino e fesoasoani i le fafine, ae lē faapena Ieova. E nofo faatalitali Ieova e fesoasoani mai iā i latou o loo auauna atu iā te Ia. (Isaia 30:18, 19) O le ā le lesona? Afai sa faalogo le faamasino amiolētonu i ʻaiʻoiga a le fafine ma faamasinoina i latou na iai ana mea, e mautinoa la le faafofoga mai o Ieova i tatalo a ana auauna, ma faia le faamasinoga tonu mo i latou.—Faataoto 15:29.

14. Aiseā e lē tatau ai ona mou ese atu lo tatou talitonu i le oo mai o le aso o le faamasinoga a le Atua?

 ¹⁴ O lea la, o se matuā sesē matuiā pe afai e mou ese le faatuatua o nisi i le oo mai o le aso o le faamasinoga a le Atua. Aiseā? O le toe mou ese o lo latou talitonu i le latalata mai o “le aso tele o Ieova,” o lona uiga ua latou masalosalo pe mafai ona faatuatuaina Ieova e faataunuu ana folafolaga. Peitaʻi e leai ma se tasi e mafai ona ia fesiligia ma le tonu le faamaoni o le Atua. (Iopu 9:12) O le fesili tāua lenei, Po o le a tatou taʻitoʻatasi ma tumau i le faamaoni? Ma o le mataupu tonu lenā na lāgā e Iesu i le iʻuga o lana talafaatusa i le fafine ua oti lana tane ma le faamasino.

‘Po o le a Ia Maua ea Lenei Faatuatua i le Lalolagi?’

15. (a) O le ā le fesili na lāgā e Iesu, ma aiseā? (e) O le ā e tatau ona tatou fesili ifo ai?

¹⁵ E mālie le fesili na lāgā e Iesu: “A sau le Atalii o le tagata, pe maua ea e ia le faatuatua i le lalolagi?” (Luka 18:8) E leʻi talanoa Iesu i le uiga masani o le upu faatuatua, ae sa ia faasino atu i se ituaiga patino o faatuatua, e pei o le faatuatua lea sa iai i le fafine ua oti lana tane. E leʻi taliina e Iesu lana fesili. Sa na ona ia lāgā, ina ia mafaufau ai ona soo po o faapeʻī mai lo latou faatuatua. Pe sa faasolosolo ea ina vaivai, ma ono lamatia ai i le toe foʻi e fai mea sa latou muaʻi lafoaʻia? Pe sa iā i latou le ituaiga o faatuatua lea sa faaalia mai e le fafine ua oti lana tane? I aso foʻi nei, e tatau ai ona tatou fesili ifo, ‘O le ā le ituaiga o faatuatua lea e ono maua mai e le Atalii o le tagata iā te aʻu?’

16. O le ā le ituaiga o faatuatua sa iai i le fafine ua oti lana tane?

¹⁶ Ina ia tatou aofia iā i latou o le a mauaina le faamasinoga tonu a Ieova, e manaʻomia ona tatou mulimuli i le faaaʻoaʻoga a le fafine ua oti lana tane. O le ā le ituaiga o faatuatua sa iā te ia? Sa faaalia lona faatuatua i le maumauaʻi pea e “alu atu [i le faamasino], ua faapea atu, Ia e faamasino atu i lē ua i ai aʻu mea.” Sa maumauaʻi lenā fafine ina ia faia e se tagata amiolētonu se faamasinoga tonu mo ia. E tatau foʻi la i auauna a le Atua i aso nei, ona latou mautinoa o le a faia e Ieova se faamasinoga tonu mo i latou, e tusa lava pe umi o faatali le faatinoga o lenā faamasinoga. E faaalia foʻi lo latou mautinoa i folafolaga a le Atua, i lo latou maumauaʻi pea e tatalo, ma ‘alalaga atu iā Ieova i le ao ma le pō.’ (Luka 18:7) Afai e lē toe tatalo se Kerisiano mo le faatinoina o le faamasinoga tonu, e taʻu atu ai sa leai sona talitonuga o le a gaoioi mai Ieova mo se lelei o ana auauna.

17. O ā māfuaaga e tatau ai lava ona tatou finafinau i le tatalo, ma faatuatua pea i le oo moni mai o le aso o le faamasinoga a Ieova?

¹⁷ O tulaga patino o lenā fafine e taʻu mai ai, e iai foʻi nisi māfuaaga e tatau ai lava ona tatou finafinau i le tatalo. Seʻi manatu i nisi o tulaga e eseese ai o ia ma i tatou. Sa alu pea lava pea le fafine i le faamasino, e ui lava e leʻi iai se tasi na faalaeiau iā te ia e faia faapea. Peitaʻi mo i tatou, ua tatou maua le Afioga a le Atua o loo aumaia ai le tele o faalaeiauga ina ia “finafinau i le tatalo.” (Roma 12:12) E leʻi mautinoa e le fafine pe mata e talia lana talosaga, peitaʻi ua uma ona faamautinoa mai e Ieova iā i tatou, o le a ia faataunuu lava lana faamasinoga. Na fetalai Ieova e ala mai i lana perofeta: “E ui lava ina tuai mai, a ia faatalitali pea i ai; auā e oo mai lava, e lē faatuai mai.”  (Sapakuka 2:3; Salamo 97:10) E leʻi iai se isi tagata e fesoasoani i le fafine e augani mo ia ina ia tau faamalosi atili ai lana talosaga. Peitaʻi, ua iā i tatou le fesoasoani sili, o Iesu, “o loo i le itu taumatau foʻi o le Atua, o loo fautua foʻi o ia mo i tatou.” (Roma 8:34; Eperu 7:25) O lea la, afai sa ʻaiʻoi atu pea lenei fafine i le faamasino mo le faia o se faamasinoga tonu, e ui lava e leʻi faigofie lona tulaga sa iai, maʻeu la le tatau ona tatou faatuatua i le oo moni mai o le aso o le faamasinoga a Ieova!

18. O le a faapefea ona faamalosia e le tatalo lo tatou faatuatua ma maua ai se faamasinoga tonu?

¹⁸ O le talafaatusa i le fafine ua oti lana tane ua tatou iloa ai nei, e telē lava se sootaga i le va o le tatalo ma le faatuatua. Ma o lo tatou maumauaʻi e tatalo e mafai ai ona tatou manumalo mai ni taaʻiga e ono faavaivaia ai lo tatou faatuatua. E lē faapea a tau lava ina faaaliali atu i luma o isi le faiga o tatalo, ona tumau ai lea o le faatuatua. (Mataio 6:7, 8) Afai e ala ona tatou tatalo auā ua tatou iloa e faalagolago atoatoa lo tatou ola i le Atua, o lona uiga la, o tatalo e atili ai ona tatou vavalalata i le Atua, ma faamalosia ai lo tatou faatuatua. Talu ai e manaʻomia le faatuatua mo le faaolataga, e lētioa la manatu Iesu e talafeagai ona faalaeiauina ona soo ina ia ‘tatalo soo, ae aua le faavaivai’! (Luka 18:1; 2 Tesalonia 3:13) O le mea moni, e lē faalagolago le oo mai o “le aso tele o Ieova” i a tatou tatalo. E oo mai lava e tusa pe tatou te tatalo i ai pe leai. Peitaʻi, o le faamasinoina taʻitoʻatasi o i tatou ma lo tatou aulia pe lē aulia foʻi le taua a le Atua, e faalagolago moni lava i le ituaiga o olaga faatuatua o tatou ola ai, faatasi ai ma a tatou tatalo.

19. E faamaonia faapefea lo tatou matuā talitonu o le a ‘faia e le Atua le faamasinoga’?

¹⁹ Manatua, na fesili Iesu: “A sau le Atalii o le tagata, pe maua ea e ia le faatuatua i le lalolagi?” O le ā le tali i lana fesili? O se fiafiaga le iloa ua mafai ona tatou tali atu ioe i lenā fesili, ona o tatalo, le onosai ma le finafinau o le faitau miliona o auauna faamaoni a Ieova i le lalolagi i aso nei. O se faamaoniga o le iā i latou o lenei faatuatua. E ui lava i faiga lē tonu o loo taia ai i tatou e le lalolagi a Satani i aso nei, ae ua tatou matuā talitonu, o le a ‘faia e le Atua le faamasinoga mo ē ua ia filifilia.’

[Faamatalaga pito i lalo]

Pe E te Manatua?

• Aiseā ua mou ese ai le faatuatua o nisi Kerisiano?

• Aiseā e mafai ai ona mausalī lo tatou faatuatua i le oo mai o le aso o le faamasinoga a Ieova?

• O ā māfuaaga e tatau ai ona tatou finafinau i le tatalo?

• E faapefea i le finafinau i le tatalo ona puipuia ai i tatou mai le mou ese o lo tatou faatuatua?

[Fesili mo le Suʻesuʻega]

[Ata i le itulau 26]

O le ā ua faamatilatila mai e le talafaatusa i le fafine ua oti lana tane ma le faamasino?

[Ata i le itulau 29]

E faitau miliona tagata i aso nei ua matuā talitonu o le a ‘faia e le Atua le faamasinoga’