E Mafai Ona E Sao Mai se Matagi Malosi

I NEI aso faigatā, e toʻatele o loo tauivi e tau onosaia le tele o mala mataʻutia e pei o ni matagi malolosi. Peitaʻi mo Kerisiano, ua mafai ona latou onosaia na mala ona o lo latou alofa i le Atua, ma le faamaoni i ana taʻiala. E faapefea? E maua le tali i se talafaatusa na faamatala e Iesu Keriso. Na ia faatusaina ona soo usiusitai i se “tagata poto, ua na faia lona fale i luga o le papa.” Na fetalai Iesu: “Ona to mai lea o uaga, ua oo mai foʻi tafega, ua agi mai foʻi o matagi, ua pesi mai i lea fale, a e leʻi paʻū lava ia; auā ua faavaeina i luga o le papa.”—Mataio 7:24, 25.

Seʻi mātau foʻi, e ui o se tagata poto lea na taʻua i le talafaatusa, ae na fesagaʻi foʻi o ia ma mala, sa faatusa i uaga, o tafega, ma matagi malolosi. O lona uiga, e leʻi faapea mai Iesu e lē taitai oo ni faigatā i ona soo, ae na ona fiafia i se olaga filemu ma le toʻafimālie. (Salamo 34:19; Iakopo 4:13-15) O lona uiga, e tatau foʻi i auauna faamaoni a le Atua ona nofosauni e onosaia ma taulimaina ma le manuia na faafitauli ma toʻatugā o loo pepesi mai e pei ni matagi malolosi.

Na amata le talafaatusa a Iesu i le faapea mai: “Ai sē faalogo i aʻu upu nei, ma faia e ia, ou te faatusaina o ia i le tagata poto, ua na faia lona fale i luga o le papa.” E mautinoa sa talanoa Iesu i le fafau aʻe pe ati aʻe olaga faa-Kerisiano, ae lē o ni faugāfale moni. O ē utagia fetalaiga a Keriso, e iā i latou le faautautaga poto ma faaaogā o latou mafaufau. E faavae o latou faanaunauga ma gaoioiga i le papa mausalī o aʻoaʻoga a Keriso, e ala i le faatino o mea ua aʻoaʻoina ai i latou. Seʻi mātau mai, e lē o maua lenei papa faafaatusa i luga o se mafola. Sa tatau i le tamāloa o loo taʻua i le talafaatusa ona ʻeli “maulalo” ina ia tau i ai. (Luka 6:48) E taumafai malosi foʻi faapena soo o Iesu e ati aʻe uiga anagatā, na e atili ai ona latou māfana i le Atua.—Mataio 5:5-7; 6:33.

O le ā e tupu pe a oo mai toʻatugā pei ni matagi malolosi, ma tofotofoina ai le mausalī o le faavae faa-Kerisiano o soo o Iesu? O lo latou lotomalie e usiusitai i aʻoaʻoga a Keriso ma o latou uiga faa-Kerisiano, e mautinoa o puna na o lo latou malosi i taimi faigatā, aemaise pe a gāpā le matagi tele iā Amaketo lea o loo faaloloʻi mai. (Mataio 5:10-12; Faaaliga 16:15, 16) E mautinoa lava, e toʻatele ua sao mai puapuaga pei ni matagi malolosi, talu ai lo latou usitaia o aʻoaʻoga a Keriso. E mafai foʻi ona e sao mai ai.—1 Peteru 2:21-23.