Fesili Mai le ʻAufaitau

O le ā le faamaufaailogaina lea e taʻua i le Faaaliga 7:3?

Ua taʻua i le Faaaliga 7:1-3 e faapea: “[Na] aʻu iloa ai lea o agelu e toʻafā o tutū mai i itu e fā o le lalolagi, o taofi i matagi e fā o le lalolagi, ina ia lē agi atu le matagi i le fanua, po o le sami, po o se laau e tasi. Ua aʻu iloa foʻi le tasi agelu ua ui aʻe i le mea e alu aʻe ai le lā, ua iā te ia le faamaufaailoga a le Atua soifua; ua alaga ia ma le leo tele i agelu e toʻafā na tuuina atu iā i latou ia faaleaga i le fanua ma le sami, ua faapea atu, ‘Aua tou te faaleaga i le fanua, po o le sami, po o laau, seʻia matou faamaufaailogaina auauna a lo tatou Atua i o latou muaulu.’”

Pe a oo ina faamatuu mai “matagi e fā,” ona gāpā loa lea o “le puapuaga tele,” le faaumatiaga o lotu sesē ma isi uma vaega o lenei lalolagi amioleaga. (Faaaliga 7:14) “O auauna a le Atua,” o uso faauuina na o Keriso o loo soifua pea i le lalolagi. (1 Peteru 2:9, 16) Ua faaalia mai la i lenei valoaga, e māeʻa ona faamaufaailogaina uso o Keriso, a o leʻi gāpā le puapuaga tele. Peitaʻi ua faaalia e isi mau o le Tusi Paia e faapea, e iai se uluaʻi faamaufaailogaina mo le ʻaufaauuina. O lea la, e iai taimi tatou te taʻua ai le uluaʻi faamaufaailogaina ma le faamaufaailogaina faaiʻu. O le ā le eseesega o nei faamaufaailogaina e lua?

Seʻi o tatou manatu i le uiga o le upu “faamaufaailogaina.” I aso anamua, o le faamaufaailoga, o se mea na faaaogā e oomi ai se faailoga i luga o se tusitusiga. E mafai foʻi ona faasino atu lea upu i le faailoga lea ua oomi. O se mea masani i na aso le faapipii o se faailoga i se tusitusiga po o isi lava mea, ina ia faamaonia ai le moni o lenā mea po o lē foʻi e ana.—1 Tupu 21:8; Iopu 14:17.

Sa faatusatusa e Paulo le agaga paia i se faamaufaailoga ina ua ia faapea mai: “O lē faatumauina foʻi i matou faatasi ma outou iā Keriso, ma na faauuina i tatou, o le Atua lea; o lē ua faamaufaailogaina  mai i tatou, ma ua foaʻiina mai le faamaoni o le Agaga i o tatou loto.” (2 Korinito 1:21, 22) O lona uiga, ua faauuina e Ieova nei Kerisiano i lona agaga paia, e faailoa ai ua avea i latou mo ia.

Peitaʻi, e lua vaega o le faamaufaailogaina o ē faauuina. E ese le uluaʻi faamaufaailogaina, mai le faamaufaailogaina faaiʻu (1) i le fuafuaga ma (2) i le taimi. O le uluaʻi faamaufaailogaina, e faasino atu i le taimi e filifilia ai se sui fou e faaopoopo i le aofaʻi o Kerisiano faauuina. O le faamaufaailogaina faaiʻu, e faasino atu i le taimi e faamautinoa ai ua matuā faaalia atoatoa e lenei sui filifilia ua faamaufaailogaina, lona faamaoni. I lenā loa taimi, lea e fai ai le faamaufaailogaina faaiʻu, o le a tumau ai loa ona faamaufaailogaina ‘le muaulu’ o se tasi ua faauuina, e mātaulia atoatoa ai o ia o se “auauna a lo tatou Atua,” ua tofotofoina ma faamaonia le faatuatua. O le vaega faaiʻu lenei o le faamaufaailogaina, o loo faasino atu i ai le Faaaliga mataupu e 7.—Faaaliga 7:3.

Na tusi atu Paulo i Kerisiano faauuina e tusa ai o le taimi o le uluaʻi faamaufaailogaina e faapea: “E iai foʻi outou iā te ia, ina ua outou faalogologo i le upu o le mea moni, o le tala lelei lea o lo outou faaolataga, ua outou faatuatua iā te ia, ona faamaufaailogaina ai lea o outou e le Agaga Paia, o lē na folafolaina mai.” (Efeso 1:13, 14) E tele faamaumauga a le Tusi Paia o loo taʻua ai, sa faamaufaailogaina Kerisiano o le uluaʻi senituri, i le taimi lava na latou faalogo ai i le tala lelei ma talitonu iā Keriso. (Galuega 8:15-17; 10:44) O lenā faamaufaailogaina na faaalia ai le fiafia o le finagalo o le Atua iā i latou. Peitaʻi e leʻi faapea na faamautinoa ai i inā le fiafia atoatoa o le finagalo o le Atua iā i latou. Aiseā?

Na taʻua e Paulo, ‘sa faamaufaailogaina Kerisiano faauuina, seʻia oo i le aso e faaolaina ai.’ (Efeso 4:30) O inei e faaalia ai, e masani ona tele tausaga e mavae atu talu ona uma lenā uluaʻi faamaufaailogaina. E manaʻomia ona tumau pea le faatuatua o ē faauuina, mai le aso na faamaufaailogaina ai i le agaga paia, seʻia oo i le “aso e faaolaina ai,” pe tuua ai o latou tino faaletino—o lona uiga, seʻia oo ina maliliu. (Roma 8:23; Filipi 1:23; 2 Peteru 1:10) O le mea lea, ina ua oo lava Paulo i le faaiʻuga o lona soifuaga, na faatoʻā mafai loa ona ia faapea mai: “Ua iʻu iā te aʻu le tausinioga, ua ou taofi i le faatuatua. O lenei, ua teuina mo aʻu le pale o le amiotonu.” (2 Timoteo 4:6-8) Na fetalai atu foʻi Iesu i se faapotopotoga o Kerisiano faauuina: “Ia e faamaoni seʻia oo i le oti, ona ou avatu ai lea iā te oe o le pale o le ola.”—Faaaliga 2:10; 17:14.

O le upu “pale” ua atili faamautinoa ai, e iai se vaitaimi e va ai le uluaʻi faamaufaailogaina ma le faamaufaailogaina faaiʻu. Aiseā? I aso anamua, o se tū masani le tuu atu o se pale i le ulu o se tagata tamoʻe na mua i se tuuga. Ina ia maua lenā pale, e tele atu nisi mea e tatau ona faia e lenā tagata na i lo le tau ina auai atu i le tausinioga. Sa tatau ona ia tamoʻe seʻia tau atu lava i le tini. I se tulaga tutusa, seʻiloga lava ua tutumau ma le faamaoni Kerisiano faauuina seʻia oo i le iʻuga o lo latou soifuaga—mai le uluaʻi faamaufaailogaina seʻia oo i le faamaufaailogaina faaiʻu—ona faatoʻā faapaleina ai lea o i latou i le ola e lē mafai ona oti, i le lagi.—Mataio 10:22; Iakopo 1:12.

Mo le vaega totoe o Kerisiano faauuina, o ē ua uma ona uluaʻi faamaufaailogaina, o afea o le a faamaufaailogaina faaiʻu ai i latou? So o se tasi o loo soifua pea i le lalolagi, o le a faamaufaailogaina “i o latou muaulu” a o leʻi gāpā le puapuaga tele. Pe a oo ina faamatuu mai matagi e fā o le puapuaga tele, ae ua māeʻa lenā ona faamaufaailogaina faaiʻu i latou uma o le Isaraelu faaleagaga, e ui lava o le a iai pea nisi o i latou i o latou tino faaletino, ma e leʻi oo ina faamāeʻa lelei lo latou soifuaga i le lalolagi.