“Le Uluaʻi Toe Tū”—O Loo Faagasolo Nei!

“E muamua foʻi ona toe tutū mai o ē ua oti o iā Keriso.”—1 TESALONIA 4:16.

1, 2. (a) O le ā le faamoemoe o iai mo ē ua maliliu? (e) O le ā le faavae o lou talitonuga i le toe tū? (Tagaʻi i le faaopoopoga i lalo.)

“O Ē UA ola, ua latou iloa e oti i latou.” Ua moni lenā manatu talu ona agasala Atamu ma Eva. A o faagasolo taimi, e iloa uma lava e i latou ua fananau mai, e iai lava le taimi o le a maliliu ai. Ona tau mānatu ai lea o le toʻatele: ‘O le ā le isi mea e sosoo ai? O le ā le tulaga o le tagata ua oti?’ Ua tali mai le Tusi Paia: “O ē ua oti, latou te lē iloa se mea.”—Failauga 9:5.

² Pe iai ea la se faamoemoe mo i latou ua maliliu? Ioe. E ao ona iai, pe afai e tatau ona faataunuu le uluaʻi fuafuaga a le Atua mo tagata. I le gasologa mai o le tele o tausaga, o loo  faaalia pea e auauna faamaoni a le Atua, lo latou faatuatua i le folafolaga a Ieova e uiga i se Fanau. O le Fanau lea na te faaumatiaina Satani ma toe faaleleia mea na ia faaleagaina. (Kenese 3:15) E toʻatele i latou ua maliliu. Ina ia latou vāai i le faataunuuga o lenā folafolaga ma isi foʻi folafolaga a Ieova, e tatau la ona toe faatutūina aʻe i latou mai le oti. (Eperu 11:13) Pe mafai ona tupu se mea faapena? E mafai. Fai mai Paulo: “O le a toe tutū mai ē ua amiotonu atoa ma ē ua amiolētonu.” (Galuega 24:15) Na toe faaola e Paulo se tama e igoa iā Eutiko, na paʻū mai le faamalama o le fogāfale lona tolu o se fale, ma na “sii aʻe foʻi o ia ua oti.” O le toe tū mulimuli lenei, mai toe tū e iva o loo faamauina i le Tusi Paia.—Galuega 20:7-12. *

3. O le ā se faamāfanafanaga patino mo oe mai fetalaiga a Iesu o loo faamauina i le Ioane 5:28, 29, ma aiseā?

³ O toe tū na e iva ua avea ma faavae o le faatuatuaina o upu a Paulo. Ua atili ai ona tatou talitonuina le faamautinoaga a Iesu e faapea: “E oo mai le aso e faalogo ai i [le leo o Iesu] o i latou uma ua i tuugamau, ma latou ō mai ai.” (Ioane 5:28, 29) Maʻeu ni upu faamāfanafana! E maʻeu foʻi se faamāfanafanaga mo le faitau miliona, o ē ua maliliu nisi e pele iā i latou!

4, 5. O ā ituaiga eseese o toe tū o loo taʻua i le Tusi Paia, ma o lē fea toe tū o le a talanoaina i lenei mataupu?

⁴ O le toʻatele o i latou e toe faatutūina, o le a toe foʻi mai i se lalolagi filemu e pulea e le Malo o le Atua. (Salamo 37:10, 11, 29; Isaia 11:6-9; 35:5, 6; 65:21-23) Peitaʻi e iai isi toe tutū e tatau ona tutupu a o leʻi faatino lenā toe tū. Muamua, sa tatau ona toe faatūina aʻe Iesu Keriso ina ia momoli atu le tāua o lana taulaga i le Atua mo i tatou. Na maliu Iesu ma toe faatūina aʻe i le 33 T.A.

⁵ Ona sosoo lea ma sui faauuina o “le Isaraelu o le Atua,” lea e tatau ona aufaatasi atu i latou i le Alii o Iesu Keriso i le mamalu faalelagi, o inā o le a latou ‘faatasi ai pea lava ma  le Alii.’ (Kalatia 6:16; 1 Tesalonia 4:17) E taʻua lenā mea o “le uluaʻi toe tū.” (Faaaliga 20:6) Pe a māeʻa lenā toe tū, ona oo loa lea i le taimi mo le toe faatutūina mai i le lalolagi o le faitau miliona, o ē ua iai le faamoemoe e ola e faavavau i le Parataiso. O lea la, pe tatou te faamoemoe e ola i le lagi pe i le lalolagi, ae tatou te naunau uma lava e fia iloa “le uluaʻi toe tū.” O le ā lenā ituaiga o toe tū? O afea e tupu ai?

“Se ā Foʻi le Uiga o le Tino”?

6, 7. (a) O le ā e tatau ona tupu a o leʻi ō atu Kerisiano faauuina i le lagi? (e) O le ā le ituaiga o tino o le a latou toe tutū aʻe ai?

⁶ I le uluaʻi tusi a Paulo i Kerisiano i Korinito, na ia lāgā ai se fesili e faatatau i le uluaʻi toe tū: “Pe faapefea ona toe tutū mai o ē ua oti? Se ā foʻi le uiga o le tino latou te ō mai ai?” Ona ia tali lea o le fesili: “O le mea e lūlūina e oe e lē ola lea pe afai e lē pala. . . . A e avane i ai le tino e le Atua, [e] pei ona finagalo i ai o ia . . . e ese le matagofie o le faalelagi, ese lo le faalelalolagi.”—1 Korinito 15:35-40.

⁷ E faaalia i upu a Paulo, e tatau i Kerisiano ua faauuina i le agaga paia ona maliliu a o leʻi mauaina lo latou taui faalelagi. Pe a maliliu, ona toe foʻi lea o o latou tino i le efuefu. (Kenese 3:19) I le taimi atofaina a le Atua, e toe faatutū aʻe ai i latou i se ituaiga o tino e talafeagai mo le olaga i le lagi. (1 Ioane 3:2) E foaʻi atu foʻi e le Atua iā i latou le ola e lē mafai ona oti. E lē o se mea na fananau mai ma i latou. Ua faapea mai Paulo: “Ia ofu foʻi lenei tino oti i le tino lē oti lava.” O le ola e lē mafai ona oti, o se meaalofa mai le Atua, e “ofu” pe maua e i latou o le a iai i le uluaʻi toe tū.—1 Korinito 15:50, 53; Kenese 2:7; 2 Korinito 5:1, 2, 8.

8. E faapefea ona tatou iloa e lē o filifilia maia e le Atua le 144,000 mai tagata o lotu eseese?

⁸ E na o le 144,000 e mauaina le uluaʻi toe tū. Na amata ona filifilia e Ieova i latou i le Penetekoso 33 T.A., ina ua faatoʻā uma ona ia toe faatūina aʻe Iesu. O i latou uma na “ua tusia [“le suafa o Iesu ma,” NW] le suafa o lona Tamā i o latou muaulu.” (Faaaliga 14:1, 3) O lea la, e lē o filifilia i latou mai ni lotu eseese se tele. O i latou uma lava o soo o Keriso, ma o se faaeaga iā i latou le tauaveina o le suafa o le Tamā, o Ieova lea. I le taimi o lo latou toe tū, e tuuina atu ai iā i latou se tofiga e galulue ai i le lagi. O se fiafiaga sili lea iā i latou, le auauna atu i le Atua i se tulaga tuusaʻo faapea.

Po o Faagasolo i le Taimi Nei?

9. Ua fesoasoani faapefea le Faaaliga 12:7 ma le 17:14 ina ia fuafua lelei le taimi na amata ai le uluaʻi toe tū?

⁹ O afea e tupu ai le uluaʻi toe tū? E iai faamaoniga malolosi e talitonu ai, o loo faagasolo i le taimi nei. Mo se faaaʻoaʻoga, seʻi faatusatusa mataupu e lua o le Faaaliga. Muamua, seʻi tagaʻi i le Faaaliga mataupu e 12. O inā o loo taʻua ai lē ua nofoia nei le nofoālii, o Iesu Keriso lea, faatasi ma ana agelu paia, o loo faasagatau atu iā Satani ma ana temoni. (Faaaliga 12:7-9) E pei lava ona faaalia soo e lenei mekasini, na amata lenā taua i le 1914. * Ae mātau mai, e leai ma se soo faauuina o Keriso o taʻua, na iai faatasi ma Iesu i lenā taua i le lagi. Tagaʻi nei loa i le mataupu e 17 o le Faaaliga. Fai mai pe a mavae ona faaumatia “Papelonia le aai tele,” o le a manumalo le Tamaʻi Mamoe i nuu uma. Ona toe faapea mai lea: “O ē ua iā te ia foʻi ua valaauina i latou, ma filifilia, ma faamaoni.” (Faaaliga 17:5, 14) O i latou ‘ua valaauina, ma filifilia, ma faamaoni’ e tatau ona uma ona toe faatutūina aʻe pe afai e tatau ona iai faatasi ma Iesu i le faatoʻilaloina faaiʻu o le lalolagi a Satani. E talafeagai la pe a faapea atu, o ē faauuina e maliliu a o leʻi oo mai Amaketo, e toe faatutūina aʻe i latou i se taimi mai le va o le 1914 ma Amaketo.

10, 11. (a) O ai toeaina e toʻa 24, ma o le ā ua faailoa e se tasi o i latou iā Ioane? (e) O le ā sa tatou faaiʻuga mai lenei mea?

¹⁰ Pe mafai ona tatou taʻua tonu lava le taimi na amata ai le uluaʻi toe tū? E manaia le taʻiala lenā e taʻua i le Faaaliga 7:9-15, lea e  faamatala ai e le aposetolo o Ioane lona vaaia o “le motu o tagata e toʻatele, . . . e lē ma faitaulia e se tasi.” O le iloaina o lenā motu o tagata e toʻatele na faaali ane iā Ioane e se tasi o toeaina e toʻa 24. Ma o nei toeaina o loo fai ma sui o le 144,000, o suli faatasi ma Keriso i lo latou mamalu faalelagi. * (Luka 22:28-30; Faaaliga 4:4) Sa faamoemoe foʻi Ioane i le lagi; ae talu ai sa soifua pea o ia o se tagata i le lalolagi i le taimi na talanoa atu ai se toeaina iā te ia, o lona uiga i lea vaaiga, o loo fai Ioane ma sui o ē faauuina o soifua pea i le lalolagi, e leʻi oo ina maua lo latou taui faalelagi.

¹¹ O le ā la sa tatou faaiʻuga mai lea mea moni faapea, o se tasi o toeaina e 24 na ia faamatalaina le motu o tagata e toʻatele iā Ioane? E foliga mai o i latou nei ua faatutūina aʻe o le vasega o toeaina e 24, atonu o loo latou faaooina mai upu moni a le Atua i aso nei. O le ā se tāua o lenā mea? Auā foʻi o le tausaga e 1935 na faaalia ai i auauna faauuina a le Atua i le lalolagi, le motu o tagata e toʻatele. Afai la sa faaaogā se tasi mai toeaina e 24 e faailoa maia lenā upu moni tāua, o lona uiga sa tatau ona faatūina aʻe o ia i le lagi, a tuai lava o le 1935. E faaalia mai ai, na amata le uluaʻi toe tū i se vaimea i le va o le 1914 ma le 1935. Faamata e mafai ona matuā faapatino lelei le manatu?

12. Seʻi faamatala pe aiseā e ono manatu ai i le tau e totogo ai mea i le 1918 atonu o le taimi lea na amata ai le uluaʻi toe tū.

¹² I le taimi lenei, atonu e aogā pe a manatu i se isi mea e tai tutusa i ai, o loo taʻua foʻi i le Tusi Paia. I le tau e afu ai mea i le 29 T.A., na faauuina ai Iesu Keriso ina ia avea mulimuli ane ma Tupu o le Malo o le Atua. I le tolu ma le ʻafa tausaga mulimuli ane, i le tau e totogo ai mea i le 33 T.A., sa toe faatūina aʻe o ia o se agaga malosi. Faamata la e mafai ona faapea atu, talu ai na nofoia e Iesu le nofoālii i le tau e afu ai mea i le 1914, na amata foʻi la ona toe tutū aʻe ona soo faauuina i le tolu ma le ʻafa tausaga mulimuli ane, i le tau e totogo ai mea i le 1918? E manaia foʻi si na mafaufauga ma e ono tupu lenā mea. E ui e lē mafai ona faamautinoa tuusaʻo mai lenei manatu i le Tusi Paia, ae o lea lava e ōgatusa ma isi mau o loo faaalia ai, sa tatau ona amata le uluaʻi toe tū, a o leʻi leva lava talu ona amata le faatasi mai o Keriso.

13. Ua faapefea ona faailoa mai e le 1 Tesalonia 4:15-17, na amata le uluaʻi toe tū i le amatamataga lava o le faatasi mai o Keriso?

¹³ Mo se faaaʻoaʻoga, na tusi mai Paulo: “O i tatou o ē ola ma totoe seʻia afio mai le Alii [e lē i le iʻuga o lona faatasi mai], tatou te lē muamua i ē o momoe. Auā e afio ifo mai le lagi le Alii lava, ma le alaga, ma le leo o le agelu sili, ma le pu a le Atua. E muamua foʻi ona toe tutū mai o ē ua oti o iā Keriso; ona faafuaseʻi lea ona aveina aʻe o i tatou o ē ola ma totoe, faatasi ma i latou i ao, ina ia fetaiaʻi ma le alii i le va nimonimo; ona tatou faatasi pea lava lea ma le Alii.” (1 Tesalonia 4:15-17) O lea la, o Kerisiano faauuina na maliliu a o leʻi amata le faatasi mai o Keriso, sa muamua ona faatutūina i latou i le ola faalelagi na i lo ē na soifua pea a o faagasolo le faatasi mai o Keriso. O lona uiga, sa tatau ona amata le uluaʻi toe tū i le amatamataga lava o le faatasi mai o Keriso, ma faaauau ai pea a o faagasolo lona faatasi mai. (1 Korinito 15:23) Na i lo le faatutūina aʻe uma lava o i latou i le taimi e tasi, o lenei uluaʻi toe tū e faagasolo mo se vaitaimi.

“Ua Foaʻiina Atu iā te i Latou Taʻitoʻatasi Ofu Sisina”

14. (a) O anafea na faataunuu ai vaaiga o loo faamauina i le Faaaliga mataupu e 6? (e) O le ā ua faaatagia mai i le Faaaliga 6:9?

¹⁴ Seʻi manatu foʻi i le faamaoniga lea o loo taʻua i le Faaaliga mataupu e 6. O loo vaaia le tiʻetiʻe atu o Iesu o se Tupu manumalo. (Faaaliga 6:2) E mataʻutia le tetele o faiga taua o loo aafia ai malo. (Faaaliga 6:4) Ua faateleina oge. (Faaaliga 6:5, 6) E ogaoga mala eseese ua faatamaʻia ai soifua o tagata. (Faaaliga 6:8) O nei  mea tutupu na valoia mai, o tulaga moni na o loo iai nei le lalolagi talu mai le 1914. E iai ma se isi mea o loo tupu. Ua faauaʻi atu i tatou i se fata e osi ai taulaga. I lalo ifo o le fata faitaulaga o loo iai “agaga o ē na fasiotia ona o le afioga a le Atua, ma le mau na latou taofi mau ai.” (Faaaliga 6:9) Talu ai ‘o loo i le toto le ola o le tino,’ ua faaatagia moni la e mea o i lalo o le fata faitaulaga, le toto o auauna faamaoni a Iesu, o ē na fasiotia ona o lo latou loto tetele ma le maelega e molimau atu.—Levitiko 17:11.

15, 16. Faamatala pe aiseā ua faasino atu ai upu o le Faaaliga 6:10, 11 i le uluaʻi toe tū.

¹⁵ E pei o le toto o Apelu le tagata amiotonu, ua faapena foʻi i toto o nei Kerisiano faamaturoina ona alalaga mai mo se faamasinoga tonu. (Kenese 4:10) “Ua latou alalaga foʻi ma le leo tele, ua faapea atu, ‘Le Alii e, le paia ma le faamaoni, e te lē faamasino ea ma taui i lo matou toto i ē nonofo i le lalolagi seʻia afea?’” O le ā e sosoo mai ai? “Ua foaʻiina atu iā te i latou taʻitoʻatasi ofu sisina; ua fai atu foʻi iā te i latou ia latou faatalitali lemū seʻia toe itiiti, seʻia atoatoa mai ai o latou uso a auauna atoa ma o latou uso, o le a fasiotia pei o i latou lava.”—Faaaliga 6:10, 11.

¹⁶ Pe na tufa atu ea nei ofu sisina i ni toto ua lepa, i lalo ifo o se fata faitaulaga? E leai! Sa foaʻiina atu ofu i tagata o ē na peiseaʻī ua faamaligiina o latou toto i luga o le fata faitaulaga. Sa faataulagaina o latou ola ona o le suafa o Iesu, ae o lea ua toe faatutū aʻe nei o ni agaga. E faapefea ona tatou iloa lenā mea? Muamua atu i le tusi o Faaaliga, ua tatou faitau ai: “O lē manumalo, e faaofuina o ia i ofu sisina; ou te lē soloiesea foʻi lona igoa i le tusi o le ola.” Manatua foʻi toeaina e 24, sa “oofu i ofu sisina; ua i o latou ulu foʻi o pale auro.” (Faaaliga 3:5; 4:4) Ina ua amata la ona faatamaʻia le lalolagi e taua, o oge ma faamaʻi, na sosoo ai loa ma le faatutūina aʻe i le olaga faalelagi, o sui o le 144,000 o ē na maliliu, lea sa faaatagia mai e le toto i lalo ifo o le fata faitaulaga. Ma sa oofu i latou nei i ofu sisina faafaatusa.

17. O le ā le uiga o le tatau iā i latou ua maua ofu sisina ona “faatalitali”?

¹⁷ E tatau ona “faatalitali” i latou nei faatoʻā toe tutū aʻe. E tatau ona onosai e faatalitali i le aso o le tauimasui a le Atua. O o latou “uso a auauna,” o Kerisiano faauuina o loo soifua pea i le lalolagi, e tatau ona faamaonia lo latou faamaoni a o fesagaʻi ma puapuaga. Pe a oo mai le aso o le faamasinoga a le Atua, ona muta loa lea o le “faatalitali.” (Faaaliga 7:3) I lenā taimi, o le a aufaatasi atu ai i latou nei ua toe tutū i le Alii o Iesu Keriso, ina ia aumai le faaumatiaga i ē amioleaga, e aofia ai ma i  latou na faamaligiina le toto o Kerisiano o ē lē sala.—2 Tesalonia 1:7-10.

Lona Uiga mo i Tatou

18, 19. (a) O ā māfuaaga e te faapea mai ai o loo faagasolo nei le uluaʻi toe tū? (e) O ā ni ou lagona ina ua e malamalama nei i le uluaʻi toe tū?

¹⁸ E lē o faailoa mai e le Afioga a le Atua se aso patino e amata ai le uluaʻi toe tū, ae o loo faaalia mai e tupu i totonu o se vaitaimi, a o faagasolo le faatasi mai o Keriso. O i latou e muamua faatutūina aʻe, o Kerisiano faauuina na maliliu a o leʻi amata le faatasi mai o Keriso. A o faagasolo le faatasi mai o Keriso, o Kerisiano faauuina e iʻu ma le faamaoni o latou olaga i le lalolagi, e suia i latou e pei “o le emo o le mata,” ina ia avea ma foafoaga agaga malolosi. (1 Korinito 15:52) Po o le a maua uma e le ʻaufaauuina lo latou taui faalelagi a o leʻi gāpā le taua o Amaketo? E tatou te lē iloa lenā mea. Peitaʻi ua tatou iloa, i le taimi atofaina a le Atua, o le a tutū i le Mauga o Siona faalelagi i latou uma o le 144,000.

¹⁹ Ua tatou iloa foʻi, o le toʻatele o le 144,000 ua aufaatasi nei ma Keriso. E na o sina vaega toʻaitiiti lea o loo totoe pea i le lalolagi. O se faamaoniga malosi lea e iloa ai, ua televave lava le oo mai o le faamasinoga a le Atua. Ua toe o se aga faaumatia le lalolagi atoa a Satani. O le a lafoina Satani i le to e lē gata. Ona amata loa lea o le toe tū lautele. Ma e ala i le taulaga togiola a Iesu, o le a mafai ai e tagata faamaoni, ona toe tutū aʻe i se olaga lelei atoatoa, e pei o lea na melea e Atamu. Ua faataunuuina ma le matagofie le valoaga a Ieova, o loo faamauina i le Kenese 3:15! Maʻeu se faaeaga o le ola ai i nei taimi!

[Faamatalaga pito i lalo]

Pe Mafai Ona E Faamatala?

E faapefea i mau o loo mulimuli mai, ona fesoasoani iā i tatou e iloa ai le taimi o “le uluaʻi toe tū”?

• Faaaliga 12:7; 17:14

• Faaaliga 7:13, 14

• 1 Korinito 15:23; 1 Tesalonia 4:15-17

• Faaaliga 6:2, 9-11

[Fesili mo le Suʻesuʻega]

[Ata i le itulau 26]

O ā toe tū e muamua faagasolo a o leʻi toe faatutūina aʻe tagata lautele ua maliliu?

[Ata i le itulau 29]

O le ā le uiga o le foaʻiina atu o se ofu sisina i nisi patino o ē na maliliu?