Se Tane na Faatāuaina le Ola ma Tagata

O DANIEL SYDLIK, o se sui ua loa tausaga o iai i le Vaega Pule o Molimau a Ieova, na maliu o ia i le Aso Lua o Aperila 18, 2006. E maliu ua 87 ona tausaga ma na auauna o se sui o le aiga Peteli i Brooklyn, New York, mo le toetoe 60 tausaga.

O le uso o Dan e pei ona valaau ai e ana uō mamae, na alu atu i Peteli i le 1946. A o leʻi alu i Peteli, na ia galue o se paeonia faapito i Kalifonia, ma sa falepuipui i se taimi a o faagasolo le Taua Lona II a le Lalolagi ona o lona solitū faa-Kerisiano. O mea na oo iā te ia i lenā taimi o loo faamatala lelei i le talaaga o lona soifuaga i le Watchtower o Iuni 1, 1985, i le ulutala e faa-Samoaina faapea, “Maʻeu le Tautele o Lau Faauōga, le Atua e!”

Na lauiloa le uso o Sydlik i ona uiga agamalu ma e faigofie ona talanoa i ai. Pe a ia taʻitaʻia le mau o le taeao mo le aiga Peteli, e masani ona atagia ona uiga mautinoa ma le fiafia i le ola i ana upu tomua: “E ese le lelei o le ola, e auauna ai i le Atua moni o Lē o loo soifua pea.” I le avea o se failauga i le lautele, e na te faalaeiau isi o loo faia lauga i mataupu e pei o le “E Fiafia le Nuu e Fai Ieova mo Latou Atua,” “Ia Faaatagia Atu le Olioli o Ieova,” “Ia Faaolaola Pea le Agaga o le Atua,” ma “O Loo Lumanaʻi Pea le Mea Silisili Ona Lelei.”

I le 1970, na faaipoipo ai le uso o Sydlik iā Marina Hodson mai Egelani, lea na ia faamatalaina o se “avā mafaufau, mai iā Ieova.” Sa la auauna faatasi iā Ieova mo le silia ma le 35 tausaga.

I tausaga sa iai le uso o Sydlik i Peteli, sa ia galue i matagaluega eseese e aofia ai le vaega lomitusi ma le Matagaluega Tau Tusitusiga. Na ia galue foʻi i le ala leo o le WBBR. Ae iā Novema 1974, sa tofia ai o ia i le Vaega Pule ma galue ai i Komiti o le ʻAufaigaluega ma Tusitusiga.

I le silia ma le 30 tausaga, na galue ai le uso o Sydlik i le Komiti o le ʻAufaigaluega, na iloa o ia i lona alofa mo tagata. E na te faalaeiau isi i lona leo pāū, ma faauaʻi atu tagata i le faaeaga sili ua tatou maua o le auauna iā Ieova. E masani ona ia faamamafa faapea e lē faalagolago le fiafia moni i nisi vala, ae o la tatou faiā ma Ieova ma o tatou uiga agaʻi i le olaga.

E ui ua matuā misia le uso o Sydlik e le aiga Peteli, ae o ana faaaʻoaʻoga o se tasi e faatāuaina moni le ola ma tagata, o le a manatua pea. E tatou te mautinoa o loo iai faatasi o ia ma ē o loo taʻua i le Faaaliga 14:13: “Amuia ē ua oti, o ē ua oti o i le Alii e amata i nei ona pō. ‘O lea lava,’ ua fetalai mai ai le Agaga, ‘inā ia latou mālōlō i a latou galuega tigā; auā foʻi o a latou galuega foʻi e mulimuli iā te i latou.’”