Fesili Mai le ʻAufaitau

O le ā le uiga o le faapea mai, sa maua e le failauga na o “le tane e toʻatasi o i le toʻaafe” ae leʻi maua “se fafine o i le toʻatele”?—Failauga 7:28.

Ina ia malamalama lelei i nei upu sa faagaeeina, e ao ona tatou malamalama muamua i le silafaga a le Atua i fafine. O loo taʻua e le Tusi Paia, Ruta le avā a le tama a Naomi lea ua oti lana tane, o se “fafine amio lelei.” (Ruta 3:11) E tusa ai o le Faataoto 31:10, o se avā lelei “e silisili lona tau i penina.” O le ā la le uiga o upu a le tupu Isaraelu o Solomona ina ua ia faapea mai: “Ua ou maua se tane faamaoni i le toʻaafe, ae ou te leʻi maua lava se fafine faamaoni”?—Moffatt.

Ua faaalia i le manatu atoa o le mataupu, atonu sa telē lava se faalētonu o tulaga tau amio a fafine i aso o Solomona. (Failauga 7:26) Atonu e telē lava se aafiaga na faapogaia mai e fafine ese na tapuaʻi iā Paala. E oo lava i le tupu o Solomona, na paʻū atu i faaosoosoga a ana avā e toʻatele mai nuu ese. Ua taʻua i le Tusi Paia: “Sa iā te ia ana avā o alo o alii e toʻafitu galau, ma ana palake e tolu galau; na faaliliueseina lava lona loto e ana avā” ina ia tapuaʻi i atua sesē. (1 Tupu 11:1-4) Sa lē lelei foʻi amioga a tane—na seāseā maua se tane amiotonu se toʻatasi, e toetoe lava leai se isi na maua. Ona faapea mai lea o Solomona: “Na o lenei lava mea ua ou iloa, na faia e le Atua le tagata [tane] e amiotonu, a o i latou ua saʻiliʻili i latou i togafiti e tele.” (Failauga 7:29) O lenei manatu na faasino i tagata—le fanau a tagata, ae e lē o faasino patino atu i tane. O lea la, e ao ona manatu i upu o loo i le Failauga 7:28, o se faamatalaga e uiga i le tulaga lautele o amioga a tagata i aso o Solomona.

Peitaʻi, e iai se isi uiga e ono faasino foʻi i ai lenei fuaiupu. Atonu e faavaloaga foʻi, auā e leai lava se fafine na lelei atoatoa ona usiusitai atu iā Ieova. Ae e iai le tane e toʻatasi, o Iesu Keriso lea.—Roma 5:15-17.

[Ata i le itulau 31]

“Le tane e toʻatasi o i le toʻaafe”