Fesoasoani i Isi ia Usitaia Aʻoaʻoga a le Tusi Paia

“Peitaʻi o le mea na i le eleele lelei, o i latou ia [o] ē ua faalogo i le upu, ma tausi i ai i le loto ua faamaoni ma le lelei, ona fua mai ai lea ma le onosai.”—LUKA 8:15.

1, 2. (a) O le ā le fuafuaga na saunia ai le tusi, O ā Aʻoaʻoga Moni a le Tusi Paia? (e) Ua faapefea ona faamanuia Ieova i ni tausaga e leʻi leva tele atu, i taumafaiga a ana auauna ina ia faia isi tagata ma soo?

“E MATUĀ manaia lava le tusi. E fiafia lava i ai aʻu tagata aʻoga. Ou te fiafia foʻi i ai. Ua faafaigofie e lenei tusi le amataina o suʻesuʻega faale-Tusi Paia ma tagata, i le uluaʻi taimi lava e te feiloaʻi atu i ai.” O se faamatalaga lenā a se paeonia sauatoa a Molimau a Ieova, e uiga i le tusi O ā Aʻoaʻoga Moni a le Tusi Paia? * O le tusi foʻi lea na fai mai ai le faamatalaga a se uso ua loa lona soifua, ma o loo ia folafola atu pea le Malo: “I le 50 tausaga lea na malosi ai laʻu galue i le galuega talaʻi, sa ou maua ai se faaeaga e fesoasoani atu i tagata e toʻatele, ina ia latou iloa Ieova. Peitaʻi o laʻu tala moni lava, e matuā mataʻina ese lava le tusi lenei. E ese le manino o ni vaaiga masani o loo faamatalaina ai, aemaise foʻi le mananaia o ata.” Po o ou lagona na i le tusi o Aʻoaʻoga a le Tusi Paia? O le fuafuaga o lenei tusi ia fesoasoani iā te oe e faataunuu le poloaʻiga a Iesu: “O lenei, ia outou ō atu e fai nuu uma lava ma soo, . . . ia outou aʻoaʻo atu iā te i latou ia tausi i mea uma ua ou fai atu ai iā te outou.”—Mataio 28:19, 20.

² E mautinoa le olioli o le finagalo o Ieova, a o silasila mai i le 6.6 miliona o ana Molimau, o loo fiafia e anaana i le faatonuga a Iesu, ina ia saʻilia isi e fai ma soo. (Faataoto 27:11) O loo manino mai le faamanuia a Ieova i a latou taumafaiga. Mo se faaaʻoaʻoga, a o faagasolo le tausaga faaleauaunaga o le 2005, na talaʻia ai le tala lelei i atunuu e 235, ma se faatatauga o suʻesuʻega faale-Tusi Paia na faia, e silia ma le 6,061,500. O le iʻuga, e toʻatele na ‘faalogo i le afioga a le Atua ma latou talia, e lē o le upu a tagata, ae o le upu a le Atua, e moni lava lea.’ (1 Tesalonia 2:13) I tausaga e lua ua mavae atu, e silia ma le ʻafa miliona nisi soo fou ua filifili e usitaia tapulaa a Ieova, ma tuuina atu o latou ola i le Atua.

3. O ā fesili e faatatau i le faaaogāina o le tusi o Aʻoaʻoga a le Tusi Paia o le a talanoaina?

³ Pe na e olioli talu ai nei i le suʻesuʻeina o le Tusi Paia ma se tasi? I le lalolagi aoao e iai lava tagata e lelei ma faamaoni o latou loto, e fiafia e faalogo i le afioga a le Atua, ona latou “fua mai ai lea ma le onosai.” (Luka 8:11-15) Seʻi tatou talanoa i le auala e faaaogā ai le tusi o Aʻoaʻoga a le Tusi Paia i le galuega o le faia o isi ma soo. O le a tatou talanoaina fesili nei e tolu: (1) E faapefea ona e amata se suʻesuʻega faale-Tusi Paia? (2) O ā metotia tau aʻoaʻo atu e sili ona aogā? (3) E faapefea ona e fesoasoani i se tagata, ina ia  lē gata e avea o se tagata aʻoga, ae o se faiaʻoga foʻi o le Tusi Paia?

Le Auala E te Amata ai se Suʻesuʻega Faale-Tusi Paia

4. Aiseā e ono faatalatū ai nisi e suʻesuʻeina le Tusi Paia, ae faapefea ona e fesoasoani i ai ina ia foʻia lenā faatalatū?

⁴ Afai ua faatonuina oe ia tasi lava lau oso e te oso ai i le isi itu o se vaitafe telē, atonu o le a e lē usitaia lenā faatonuga. Ae afai o loo iai i totonu o le vaitafe ni maa tetelē e mafai ona e laa atu ma tū teisi ai a o leʻi toe faaauau, e mautinoa la o le a e taumafai e laasia le isi itu o le vaitafe. E faapena foʻi i le tulaga o se tagata e pisi tele lana faasologa. Atonu o le a faatalatū e suʻesuʻeina le Tusi Paia. E ono mafaufau faapea, o le a tele le taimi ma taumafaiga e alu ai. E faapefea ona e fesoasoani iā te ia e foʻia lona faatalatū? E mafai ona faasolosolo pea ona lua talatalanoa faapuupuu ae ia aogā. I na talanoaga e te ono faaaogā le tusi o Aʻoaʻoga a le Tusi Paia e tataʻi atu ai le tagata i se suʻesuʻega e pei ona masani ai. Afai e lelei au sauniuniga, o le a avea taimi taʻitasi e te asiasi atu ai i le tagata, e pei o lea ua laalaa faasolosolo atu ai o ia, seʻia oo ina faia se lā faauōga ma Ieova.

5. Aiseā e manaʻomia ai ona e faitauina le tusi o Aʻoaʻoga a le Tusi Paia?

⁵ Peitaʻi a o leʻi avatu lau fesoasoani ina ia aogā lenei tusi i se isi tagata, e manaʻomia ona e muaʻi faamasani lelei oe i le tusi. Po ua māeʻa ona e faitauina le tusi atoa? Na ō se ulugalii i se la faiga mālōlōga ma ave se tusi e faitau ai a o mālōlō i le matafaga. Na agaʻi atu iā i laʻua se māfine o loo faatau ana oloa, ma ia mātauina le ulutala O ā Aʻoaʻoga Moni a le Tusi Paia? Na ia faapea atu i le ulugalii, o le fesili tonu lea na ia tatalo ai i le Atua mo se tali, i na o ni nai itula lava ua mavae atu. Sa tuu atu e le ulugalii le tusi i le māfine. Po ua e faatulaga ese se taimi e faitau ai lenei tusi, atonu po ua e toe faitauina faalua, a o faatalitali mo se feiloaʻiga ma se tasi, po o taimi foʻi o mālōlōga i galuega po o aʻoga? (Efeso 5:15, 16) O lou faia faapea o le a atili ai ona e masani lelei i lenei fesoasoani faale-Tusi Paia, ma tele ai foʻi ni avanoa e te ono talanoa atu ai i isi e uiga i mataupu o i le tusi.

6, 7. E faapefea ona amata suʻesuʻega faale-Tusi Paia i le tusi o Aʻoaʻoga a le Tusi Paia?

⁶ A o e ofo atu le tusi i le galuega talaʻi, ia faaaogā ata, o mau, ma fesili o i le itulau e 4, 5, ma le 6. Atonu e te amata se talanoaga i lou fesili atu, “Pe a fua atu i faafitauli uma o loo fesagaʻi ma tagata i aso nei, o le ā sou taofi, o fea tatou te maua i ai ni taʻiala e maufaatuatuaina?” Ia faalogologo lelei i le tali mai a le tagata, ona faitau loa lea o le 2 Timoteo 3:16, 17, ma faapea atu, o loo iai i le Tusi Paia se vaifofō moni lava mo faafitauli o tagata. Ona faasino lea o le tagata o le aiga, i le itulau e 4 ma le 5, ma fesili i ai: “O fea o mea nei o loo faaata mai i lenei itulau, o loo sili ona e mafatia ai?” Pe a faasino mai se ata, ona e tuu atu lea o le tusi na te taofi maia, a o e faitauina i ai le mau o loo iai faatasi ma le ata. Ona sosoo lea ma lou faitauina o le itulau e 6, ma e toe fesili i ai, “I fesili e ono o loo i le pito i lalo o lenei itulau, o lē fea fesili e te fia manaʻo  e tali?” Pe a ia fili maia se fesili, ona faasino loa lea i ai o le mataupu o loo tali ai lenā fesili. Ona tuu lea i ai o le tusi, ma fai ni lua fuafuaga maʻoti e te toe asiasi atu e talanoaina lenā fesili.

⁷ E na o le lima lava minute e te faia ai lenā taulimaga. Ae i lenā lima minute, e mafai ona e iloa ai atugaluga o le tagata o le aiga. E mafai ai foʻi ona e faitau atu ma faamalamalama i ai ni mau se lua, ma faataatia ai le faavae mo se isi toe asiasiga. E ui e puupuu le lua talanoaga, ae atonu o se talanoaga ua sili ona faalaeiau ma faamatalaloto i le tagata o le aiga. O le iʻuga, e tusa po o se tagata e pisi lana faasologa, ae mautinoa o le a fiafia e faaalu ni nai minute e te lua talanoa ai, ma e fesoasoani iā te ia e agaʻigaʻi atili i “le ala e tau atu i le ola.” (Mataio 7:14) Ma a o tuputupu pea lona fiafia, ua tatau loa ona faaumiumi teisi atu le lua suʻesuʻega. E mafai ona e talosaga atu e te lua ō i totonu o le fale po o se isi mea e te lua saofafaʻi lelei ai, ma faaumiumi ai le suʻesuʻega.

Metotia Tau Aʻoaʻo Atu e Sili Ona Aogā

8, 9. (a) E faapefea ona e tapenaina lau tagata aʻoga o le Tusi Paia, ina ia mafai ona ia teena toʻatugā na te ono fesagaʻia? (e) O fea e maua mai ai mea e lē mū i le afi, na e manaʻomia mo le faamalosia o le faatuatua?

⁸ E amata loa ona usitai se tasi i aʻoaʻoga a le Tusi Paia, atonu foʻi o le a amata ai ona ia fesagaʻia ni toʻatugā e ono tutaʻia ai lona agaʻigaʻi i luma. Na faapea mai Paulo: “O i latou uma foʻi o ē loto ina nonofo ma le amio Atua iā Keriso Iesu, e sauāina i latou.” (2 Timoteo 3:12) Sa faatusa e Paulo nei tofotofoga e pei o se afi e ono mū ma faatamaʻia ai ni meafaufale e anagofie, ae lē āfaina ai mea e pei o le auro, siliva, ma nisi maa tāua. (1 Korinito 3:10-13; 1 Peteru 1:6, 7) Ina ia maua e lau tagata aʻoga o le Tusi Paia, uiga e manumalo mai ai i ni tofotofoga na te fesagaʻia, e manaʻomia ona e fesoasoani iā te ia a o taumafai e ati aʻe lona faatuatua i mea e lē mafai ona mū i le afi.

⁹ O loo faatusa e le faisalamo “afioga a Ieova” i se “ario ua faateʻa ese ai le eleele i le umu, e faafitu ona faamamāina.” (Salamo 12:6) O loo iai i le Tusi Paia mea tāua uma lava e mafai ona faaaogā e faamalosi ai le faatuatua. (Salamo 19:7-11; Faataoto 2:1-6) Ma o loo faasino mai e le tusi o Aʻoaʻoga a le Tusi Paia le auala e te taulau ai i le faaaogāina o mau.

10. E faapefea ona e fesoasoani i le tagata aʻoga ia uaʻi lona mafaufau i le Tusi Paia?

¹⁰ A o faagasolo le suʻesuʻega, taumafai ia faauaʻi le mafaufau o le tagata aʻoga i mau o loo iai i mataupu taʻitasi o loo talanoaina. Faaaogā fesili ina ia mafai ona malamalama ai le tagata aʻoga i mau autū, ma iloa pe faapefea ona faatatau patino iā te ia. Faaeteete neʻi e taʻu patino i le tagata le mea e tatau ona ia faia. Ia e faataʻitaʻi i le faaaʻoaʻoga a Iesu. Ina ua fesiligia Iesu e se aʻoaʻo tulafono, na ia tali atu i ai: “O le ā ea ua tusia i le tulafono? O le ā lau faitau?” Sa sii mai e le tamāloa upu o le Tusi Paia, ona fesoasoani lea i ai o Iesu e faasino iā te ia le auala e na te faatatauina ai le manatu autū iā te ia lava. Na faaaogā foʻi e Iesu se talafaatusa, ina ia iloa e le tamāloa pe tatau faapefea ona aogā iā te ia le aʻoaʻoga o loo i le talafaatusa. (Luka 10:25-37) E anoanoaʻi talafaatusa faigofie o loo iai i le tusi o Aʻoaʻoga a le Tusi Paia. E mafai ona e faaaogā e fesoasoani ai i se tagata aʻoga i le auala na te faatatauina ai taʻiala a le Tusi Paia i lona olaga.

11. O le ā le telē o se mataupu e te lua talanoaina i suʻesuʻega taʻitasi?

¹¹ E faigofie faaupuga na faaaogā e Iesu e faamatala ai ni manatu lavelave. E faapena foʻi lenei tusi, o loo faaaogā ai se gagana e faigofie ma tuusaʻo, e faamalamalama ai le Afioga a le Atua. (Mataio 7:28, 29) Seʻi o tatou faaaogā lenā faaaʻoaʻoga lelei. Ia momoli atu le feʻau i se auala e faigofie, e manino, ma e saʻo lelei. Aua le faatopelauina le mataupu. Ia fua le aofaʻi o palakalafa lua te talanoaina i suʻesuʻega taʻitasi, i le tulaga ma le tomai o le tagata aʻoga. Sa silafia e Iesu le malosi e gata mai ai tomai o ona soo. O lea sa lē soona tele ai ni mataupu na te faamatala iā i latou i le taimi e tasi, ae sa auauaʻi atu e tusa o mea na latou manaʻomia mai lea taimi i lea taimi.—Ioane 16:12.

12. E faapefea ona faaaogā le faaopoopoga?

¹² O loo iai i le vaega i tua o le tusi o Aʻoaʻoga a le Tusi Paia se faaopoopoga e iai ni mataupu  e 14. E tatau iā te oe o le faiaʻoga, ona e fuafuaina se auala e sili ona lelei e faaaogā ai le faaopoopoga, ae fua i manaʻoga o lau tagata aʻoga. Mo se faaaʻoaʻoga, afai e iai se mataupu ua faafaigatā i le tagata aʻoga ona malamalama i ai, pe na te fesiligia foʻi nisi o mataupu patino ona o ona talitonuga sa iai muamua, atonu e lava ma totoe pe a faasino o ia i se vaega talafeagai o le faaopoopoga, ona tuu lea i ai e faitau lava e ia. Peitaʻi o nisi taimi, atonu o le manaʻoga o loo i lau tagata aʻoga e ono talafeagai ai ona lua talanoaina faatasi le mataupu. O loo iai i le faaopoopoga mataupu talafeagai faale-Tusi Paia, e pei o le “Pe e Iai so Tatou Agaga e Lē Mafai Ona Oti?” ma “Le Auala e Iloa ai ‘Papelonia le Aai Tele.’” Atonu e te manaʻo e talanoaina nei mataupu ma lau tagata aʻoga. E leai ni fesili o saunia atu mo le talanoaina o mataupu o le faaopoopoga. E manaʻomia la ona e faamasani lelei i faamatalaga uma o iai, ina ia mafai ona e fafau aʻe ni fesili uigā mo mataupu.

13. O le ā le aogā o le tatalo i le faamalosia o le faatuatua?

¹³ Ua faapea mai le Salamo 127:1: “Afai e lē atiina aʻe e Ieova le fale, e galulue fua i latou o ē atiina aʻe.” E tatau lava la ona e tatalo iā Ieova mo lana fesoasoani, a o e sauniuni e faafoe se suʻesuʻega faale-Tusi Paia. E tatau ona atagia atu i le auala e te tatalo ai i le amataga ma le faaiʻuga o le suʻesuʻega, le māfana o le lua faiā ma Ieova. Faalaeiau lau tagata aʻoga ina ia tatalo iā Ieova e foaʻi mai le poto na te malamalama ai i Lana Afioga, ma le loto tele e faatatauina ai fautuaga o iai. (Iakopo 1:5) O lona faia faapea, o le a loto tele ai e tutumau a o fesagaʻi ma puapuaga, ma malosi atili ai lona faatuatua.

Fesoasoani i Tagata Aʻoga ia Avea ma Faiaʻoga

14. O le ā le agaʻigaʻi i luma e manaʻomia ona faia e tagata aʻoga o le Tusi Paia?

¹⁴ Ina ia usitaia e a tatou tagata aʻoga “mea uma” na poloaʻia ai e Iesu ona soo, e manaʻomia ona latou agaʻigaʻi i luma mai le avea o ni tagata aʻoga, i le avea o ni faiaʻoga o le Afioga a le Atua. (Mataio 28:19, 20; Galuega 1:6-8) E faapefea ona e fesoasoani i se tagata aʻoga ina ia faia lenā agaʻigaʻi i luma faaleagaga?

15. Aiseā e te faalaeiauina ai lau tagata aʻoga ina ia auai i sauniga faa-Kerisiano?

¹⁵ Mai lava i le lua uluaʻi suʻesuʻega, valaaulia o ia e lua te ō i sauniga a le faapotopotoga. Faamatala i ai, o sauniga o inā o loo aʻoaʻoina ai oe e avea o se faiaʻoga o le Afioga a le Atua. Atonu mo ni vaiaso, ia faaaogā ni nai minute pe a māeʻa lua suʻesuʻega, e faamatala ai le polokalame o aʻoaʻoga faaleagaga o loo e maua mai sauniga eseese ma fonotaga. Ia e talanoa i se uiga aasa ma le mautinoa, i aogā o loo e maua mai na faatasiga. (Eperu 10:24, 25) O le taimi lava e amata ai ona auai e lē aunoa le tagata aʻoga i sauniga, e foliga mai la o le a avea o ia ma faiaʻoga o le Afioga a le Atua.

16, 17. O ā nisi o sini e mafai ona faataatitia ma ausia e se tagata aʻoga?

¹⁶ Fesoasoani i le tagata aʻoga ia faataatitia ni sini e mafai ona ia ausia. Mo se faaaʻoaʻoga, taʻu i ai e mafai ona ia faasoa atu mea ua ia aʻoaʻoina i sana uō po o se tauaiga. Talanoa i ai, e lelei pe a fai sona sini e faitauina le Tusi Paia atoa. Afai e te fesoasoani iā te ia e faataatia ma tausisia se faasologa faifai pea o le faitauina o le Tusi Paia, o le a umi ona aogā iā te ia lenā masaniga pe a uma ona papatiso. E mafai foʻi ona e fai i ai pe lē manaʻo e fai mona sini le manatuaina o se mau  e tusa pe na o le tasi, lea e tali ai se fesili autū mai mataupu taʻitasi o le tusi o Aʻoaʻoga a le Tusi Paia. O inā o le a avea ai o ia ma sē “faigaluega e leai se mea e mā ai, na te talaʻitonuina le upu moni.”—2 Timoteo 2:15.

¹⁷ ʻAlofia le tau ina aʻoaʻo o le tagata aʻoga e tauloto mai pe toe faaupu mai mau. Na i lo lea, faalaeiau o ia e faamatala lelei le faatatauga o ni mau i se mataupu o loo talanoaina, a o ia avatu se tali iā i latou o loo fesili i le uiga o lona faatuatua. E manaia pe a fai ni lua faataʻitaʻiga pupuu. Atonu o oe o sona tauaiga po o se uō i le galuega, o loo e fesili atu iā te ia e faamatala mai ona talitonuga. A o tali mai le tagata aʻoga, ia faailoa iā te ia le auala e tali mai ai “ma le loto agamalu ma le faaaloalo loloto.”—1 Peteru 3:15.

18. Afai ua agavaa se tagata aʻoga e avea ma tagata talaʻi e leʻi papatisoina, o ā isi fesoasoani e mafai ona e avatua i ai?

¹⁸ E oo mai le taimi o le a agavaa ai le tagata aʻoga e auai i le galuega talaʻi. Ia faamamafa atu le tāua o le faaeaga ua ia maua e auai ai i lenei galuega. (2 Korinito 4:1, 7) Afai ua ioeina e toeaina le agavaa o le tagata aʻoga e avea ma tagata talaʻi e leʻi papatisoina, ia e fesoasoani loa e sauniuni sana taulimaga faigofie, ma lua paga faatasi i le galuega talaʻi. Faaauau pea ona lua galulue faatasi i isi vala eseese o le faiva i le fanua, ma faasino i ai le auala e sauniuni ai mo le faia lelei o ni toe asiga. Afai e lelei lau faaaʻoaʻoga, o le a faapena foʻi ona iai se aafiaga lelei i lau tagata aʻoga.—Luka 6:40.

‘Ia Faaolaina Oe ma Ē Faalogologo iā te Oe’

19, 20. O le ā lo tatou sini e tatau ona iai, ma aiseā?

¹⁹ E tele galuega fitā e fai ina ia mafai e se tagata ona “iloa lelei le upu moni.” (1 Timoteo 2:4) Ae po o ā lava mea e olioli ai i lenei olaga, e lē taitai ona faatusalia i le fiafiaga o le fesoasoani i se tasi ina ia usitaia aʻoaʻoga a le Tusi Paia. (1 Tesalonia 2:19, 20) O lo tatou faaeaga sili lenā, le avea o i tatou o se ʻaufaigaluega faatasi ma le Atua i lenei galuega tau aʻoaʻoga i le lalolagi aoao.—1 Korinito 3:9.

²⁰ Ua toe nei o se aga ona faaaogā lea e Ieova, Iesu Keriso ma le ʻau agelu, e faaoo maia le taui ma sui i “ē ua lē iloa le Atua, ma ua lē anaana i le tala lelei a lo tatou Alii o Iesu.” (2 Tesalonia 1:6-8) Ua matuā lamatia ola o tagata i le taimi nei. Pe mafai ona fai mou sini, le faia o se suʻesuʻega faale-Tusi Paia ma se tasi i le tusi O ā Aʻoaʻoga Moni a le Tusi Paia? O le faia o sou sao i lenei galuega, o lou avanoa lenā e te ‘faaolaina ai oe ma ē ua faalogologo iā te oe.’ (1 Timoteo 4:16) O le taimi sili lenei ua matuā manaʻomia ai ona tatou fesoasoani atu i isi, ina ia latou anaana pe usitaia aʻoaʻoga a le Tusi Paia.

[Faamatalaga pito i lalo]

O le ā na E Aʻoaʻoina?

• O le ā le fuafuaga na saunia ai le tusi o Aʻoaʻoga a le Tusi Paia?

• E faapefea ona e amata ni suʻesuʻega faale-Tusi Paia e faaaogā ai le tusi o Aʻoaʻoga a le Tusi Paia?

• O ā metotia tau aʻoaʻo atu e sili ona aogā?

• E faapefea ona e fesoasoani i se tagata aʻoga ina ia avea ma faiaʻoga o le Afioga a le Atua?

[Fesili mo le Suʻesuʻega]

[Ata i le itulau 26]

Po o e faaaogā lelei lenei tusi?

[Ata i le itulau 27]

O se talanoaga puupuu e ono naunau ai le tagata e fia iloa le poto mai le Tusi Paia

[Ata i le itulau 29]

E faapefea ona e tataʻi manatu o le tagata aʻoga i le Tusi Paia?

[Ata i le itulau 30]

Fesoasoani i le tagata aʻoga e agaʻigaʻi i luma faaleagaga