Matatiʻa na Ausia i le Faaliliuina o le Tusi Paia i Gagana a Aferika

UA LOA ona silafia e tagata faitau o le Tusi Paia mai Europa ma Amerika i Mātū le manaʻoga, ia mafai ona faitau e tagata Aferika le Afioga a le Atua i a latou lava gagana. Ina ia ausia lenei sini matagofie, e toʻatele ni tane na ō atu i Aferika ina ia aʻoaʻoina gagana a Aferika. Na taumafai isi ina ia avea nisi o gagana tautala a Aferika e fai ma gagana tusitusi, ma faia ni lomifefiloi. Ina ua uma lena, ona amata loa lea ona faaliliu le Tusi Paia i le tele o gagana eseese a Aferika. E leʻi faigofie lenā galuega. Na faamatala e le The Cambridge History of the Bible e faapea: “E ono tele ni tausaga e saʻiliʻili ai se tagata faaliliu, faatoʻā maua se faaupuga saʻo o se manatu faa-Kerisiano e aupito sili ona faigofie.”

I le 1857 na muamua ai maua e tagata Tswana se Tusi Paia atoa, lea na faaliliuina i se tasi o gagana Aferika sa leʻi avea muamua ma gagana tusitusia. * Na lomia ma faapipii faatasia i ni vaega, ae lē o se tusi se tasi. A o faagasolo taimi, na oo ina faaliliuina le Tusi Paia i isi gagana a Aferika. O le tele o nei uluaʻi faaliliuga i le gagana Aferika sa iai le suafa o le Atua o Ieova, i le Vaega faa-Eperu o le Tusi Paia, po o le “Lomiga Tuai,” ma le Vaega faa-Eleni o le Tusi Paia, po o le “Lomiga Fou.” E ui i lea, o le toe teuteuga atili o le Tusi Paia faapea ma faaliliuga fou na faia e tagata, sa lē faaaloalo i le suafa paia o Lē na faapogaia le tusiaina o le Tusi Paia, o Ieova. Na latou mulimuli i le aganuu faanuupō faa-Iutaia, o le suia o le suafa o le Atua i ni taʻu, e pei o le Atua po o le Alii. O lea na tulaʻi mai ai se manaʻoga mo ē e alolofa i le Atua i Aferika, ina ia faia se faaliliuga o le Tusi Paia e toe faafoʻisia ai lona suafa.

Talu mai vaitausaga o le 1980 na taumafai malosi ai le Vaega Pule o Molimau a Ieova, e faaliliuina le New World Translation of the Holy Scriptures i nisi o gagana autū a Aferika. O le iʻuga, ua mafai nei e le toʻatele o tagata i Aferika e fiafia i le Tusi Paia, ona faitau le New World Translation i la latou lava gagana. O le taimi nei, ua maua le New World Translation, a lē o le Tusi Paia atoa, po o se vaega o le Tusi Paia, i gagana e 17 o loo tāutala ai tagata Aferika lava latou.

Ua fiafia nei tagata Aferika ona ua iai se faaliliuga o loo faaaogāina le suafa mamalu  o le Atua, o Ieova. O se faataʻitaʻiga, ina ua tulaʻi Iesu i le sunako i Nasareta, na ia folafola atu lona tofiga i le faitauina o se vaega o le tusi taai a Isaia, lea e taʻua ai le suafa o lona Tamā. (Isaia 61:1, 2) E tusa ai ma le Evagelia a Luka e pei ona faaliliuina i le New World Translation, na faitauina e Iesu faapea: “Ua i oʻu luga le agaga o Ieova, auā ua faauuina aʻu e ia e folafola le tala lelei i ē matitiva, ua ia auina atu aʻu e talaʻi le saʻolotoga i ē ua noanoatia, ma ia toe pupula mata o ē tauaso ma ia faasaʻolotoina ē ua nutimomoia, ia talaʻi le tausaga e talileleia mai ai e Ieova.”—Luka 4:18, 19.

O le isi matatiʻa mataʻina i le faaliliuina o le Tusi Paia i gagana a Aferika na ausia iā Aokuso o le 2005. I le masina lenā, e silia i le 76,000 kopi o le New World Translation i gagana e tāutala ai tagata i Aferika, na lomia ma faapipii faatasi i le lālā i Aferika i Saute o Molimau a Ieova. E aofia ai i lenā numera Tusi Paia e 30,000 i le gagana Shona. Na tatalaina lenā Tusi Paia i Tauaofiaga a Molimau a Ieova o le “Usiusitai i le Atua” na faia i Zimbabwe.

I lenā masina iloga o Aokuso 2005, na matuā olioli ai i latou na asiasi atu i le lālā i Aferika i Saute, ina ua latou matamata i le faiga o le New World Translation i isi gagana a Aferika. Na faapea le faamatalaga a Nhlanhla, o se uso o le aiga Peteli o loo galue i le vaega e faapipii faatasi ai lomiga: “Sa ou matuā fiafia lava ma lē manofo i le iai o se faaeaga e fesoasoani i le faia o le New World Translation i le gagana Shona ma isi gagana a Aferika.” O le mea moni, ua ia faaleoina mai lagona o le aiga Peteli atoa i Aferika i Saute.

O le a vave atu nei ona oo atu Tusi Paia fou i tagata Aferika ma e taugofie foʻi, i lo le taimi na faia ai i isi atunuu ma lafo mai ai. Ae e sili atu ona tāua, ua mauaina nei e tagata Aferika se faaliliuga e saʻo lelei, o loo faaaogā ai le suafa paia o Lē na faapogaia le tusiaina o le Tusi Paia, o Ieova le Atua.

[Faamatalaga pito i lalo]

[Ata i le itulau 12]

Le suafa o le Atua i se Tusi Paia Tswana na lomia i le 1840

[Faamatalaga i Ata]

Harold Strange Library of African Studies

[Ata i le itulau 13]

Tagata asiasi mai Swaziland o loo matamata i Tusi Paia fou o loo faia i le lālā i Aferika i Saute