Tamāloa ma le Fafine Fesoasoani le Tasi i le Isi

O SE faanaunauga masani lava i se tamāloa ma se fafine, le mananaʻo ia faatasia i laʻua. O lenei faanaunauga na amata mai e le Atua. Na silasila mai Ieova e lē lelei mo le uluaʻi tamāloa, o Atamu, ona tuua toʻatasi ai pea. O lea na faia ai e le Atua se “fesoasoani [mo le tamāloa] e tatau ma ia.”

Na faamoegaseina e Ieova Atamu, ona ia toina lea o se tasi o ona ivi asoaso ma “o le ivi asoaso foʻi . . . ua na fai aʻi le fafine, ona ia aumaia lea o ia iā Atamu.” Sa matuā fiafia Atamu ina ua vaai atu i lenei tagata lalelei na faia e Ieova ma faapea atu: “O le ivi lava lenei o oʻu ivi, ma le aano o oʻu aano.” Sa matuā alofagia le fafine lelei atoatoa o Eva, ona o ona uiga agavaivai. Sa tatau foʻi ona avatu le faaaloalo iā Atamu ona o ia o se tamāloa lelei atoatoa ma lona fuaitino malosi. Na fuafuaina i laʻua e fesoasoani le tasi i le isi. Ua faapea mai le Tusi Paia: “O le mea lea e tuua ai e le tane lona tamā ma lona tinā, a e faatasi ma lana avā; ona avea ai lea o i laʻua ma tino e tasi.”—Kenese 2:18-24.

Ae i aso nei, ua malepelepe aiga, ma o le mafutaga a le tamāloa ma le fafine, ua tele ina tauaʻimisa po o ua pulea foʻi e le manatu faapito. O uiga faatavā i lo la va o se tasi o vala ua faapogaia ai feeseeseaʻiga. O nei mea uma e feteenaʻi ma le fuafuaga na faia ai e le Atua le tamāloa ma le fafine. Na fuafuaina le tamāloa na te faataunuu se tofiga matagofie i le lalolagi. Sa tuu atu i le fafine se tofiga tutasi ma le tāua, e fesoasoani i lana tane. Sa tatau ona la galulue felagolagomaʻi. I le amataga mai o olaga o tagata, na taumafai ma le faamaoni tamāloloa ma fafine amioatua, e faataunuu o latou tofiga na tuuina mai e Ieova, ma sa maua ai lo latou fiafia ma le faamalieina. O ā ia tofiga, ma e faapefea ona tatou faataunuuina?

[Ata i le itulau 3]

Na fuafuaina le tamāloa ma le fafine la te faataunuuina o la tofiga mamalu i le faatulagaga a le Atua