Tamāloa ma le Fafine—Ua Maʻoti o La Tofiga Mamalu

NA MUAMUA fai e Ieova Atamu, ona faia ai lea o Eva. A o leʻi faia Eva, na maua e Atamu le poto masani e ola ai. Sa iai ni faatonuga na avatu e Ieova iā te ia i le taimi lea. (Kenese 2:15-20) Sa faaaogā e le Atua Atamu e na te taʻu atu na faatonuga i lana avā. Ua talafeagai la ona taulamua ia i mea uma e aofia i le tapuaʻiga.

O loo iai se faatulagaga talitutusa i le faapotopotoga Kerisiano, ma e tatou te maua mai ai aogā pe a iloiloina. Na tusi le aposetolo o Paulo: “Auā ou te lē tuuina atu i se fafine ia . . . pule i le tane, a ia nofo faalologo lava. Auā ua muamua ona faia o Atamu, a e mulimuli Eva.” (1 Timoteo 2:12, 13) E lē faapea o le a na o le faalologo lava pe lē mafai ona tautala le fafine i se sauniga a le faapotopotoga Kerisiano. O le uiga o lea faaupuga e lē tatau ona finau ma se tamāloa, ma taʻu faatauvaa ai le tulaga ua tofia i ai se tane, po o le taumafai e aʻoaʻo le faapotopotoga. Ua avatu i tamāloloa le vaaia ma le aʻoaʻoina o le faapotopotoga, a o le sao telē o fafine i sauniga faa-Kerisiano, o le auai lea i vala eseese.

Ina ia taʻu mai iā i tatou tofiga maʻoti o tamāloloa ma fafine i le faatulagaga a le Atua, na tusi mai Paulo: “E lē mai le fafine le tane, a o le fafine, mai le tane ia . . . A e ui i lea, i le mafutaga a le Alii, e lē ola toʻatasi le tane po o le fafine [e lē mafai ona tutoʻatasi le tasi mai le isi]; auā pei ona maua mai le fafine i le tane, e faapea foʻi ona fanau mai le tane i le fafine. A o mea uma lava mai le Atua ia.”—1 Korinito 11:8-12.

O Faaeaga Matagofie o Fafine

I le Tulafono na avatu e le Atua iā Isaraelu, e tele faaeaga sa maua e fafine, ma le saʻolotoga e faia ai a latou fuafuaga. O se faataʻitaʻiga, o loo taʻua i le Faataoto 31:10-31 “le avā amio lelei” o lē faatau ie aupito lelei ma fai ai ni ofu mo lona aiga. O loo faapea mai atili, ‘ua fai e ia ofu lino, ma faatau atu’! (Fuaiupu 13, 21-24) O lenei fafine lelei e “tusa o ia ma vaa o le faatauʻoa,” e na te filifilia lelei ana mea e ʻai, e tusa pe mamao se nuu e tatau ona aumai ai. (Fuaiupu 14) “Ua manatunatu o ia i se fanua, ona maua ai lea e ia,” ma “ua ia fai ai le tovine.” (Fuaiupu 16) Talu ai e “lelei lana tau,” e na te mauaina ai le tele o tupe mai ana galuega. (Fuaiupu 18) E lē gata e “vaavaai o ia i amioga a lona aiga,” ae naunau foʻi lenei avā galue malosi ma mataʻu iā Ieova, e fesoasoani i isi. (Fuaiupu 20, 27) E lētioa viiviia o ia!—Fuaiupu 31.

O tulafono a Ieova na ala atu iā Mose na maua ai e fafine le avanoa e agaʻi ai i luma faaleagaga. O se faataʻitaʻiga, i le Iosua e 8:35, tatou te faitau ai e faapea: “Ua leai se upu o upu uma na poloaʻi mai ai Mose, e leʻi faitaulia e Iosua i luma o le faapotopotoga uma  o Isaraelu, ma fafine, ma tama iti, ma tagata ese na feoaʻi ma i latou.” Na taʻua i le Tusi Paia e faatatau i le ositaulaga o Esera: “Ona au mai ai lea e [ia] le tulafono i luma o le faapotopotoga o tane atoa ma fafine, ma i latou uma o ē atamamai i faalogo, i le aso muamua i le masina e fitu. Ona ia faitau ai lea i le malae o i luma o le faitotoʻa o le vai, e afua i le malama aʻe o le taeao ua oo i le aoauli, i luma o tane ma fafine, ma ē atamamai; ua uaʻi mai foʻi taliga o le nuu uma i le tusi o le tulafono.” (Neemia 8:2, 3) Sa maua e fafine aogā mai le faitauina o le tulafono e pei ona taʻua i inei, ma sa latou faamanatuina foʻi tausamiga e tusa ma le tapuaʻiga. (Teuteronome 12:12, 18; 16:11, 14) A o le mea e sili ona tāua i le vaitaimi o Isaraelu, sa mafai ona iai se faiā a fafine ma Ieova le Atua, ma mafai ona tatalo se fafine lava ia iā Ieova.—1 Samuelu 1:10.

I le uluaʻi senituri T.A., sa iai i fafine o ē matataʻu i le Atua le faaeaga e talaʻi e faatatau iā Iesu. (Luka 8:1-3) Na liligi e se fafine se uu i le ao ma aao [vae] o Iesu a o iai i se taumafataga i Petania. (Mataio 26:6-13; Ioane 12:1-7) Sa aofia ai fafine iā i latou na faaali i ai Iesu ina ua toe tū mai. (Mataio 28:1-10; Ioane 20:1-18) Ina ua mavae le afio aʻe o Iesu i le lagi, e 120 se vaega na faapotopoto faatasi na aofia ai ni “fafine, ma Maria le tinā o Iesu.” (Galuega 1:3-15) O le toʻatele o nei fafine e mautinoa sa i le afeafe aupitoaluga i Ierusalema i le aso o le Penetekoso 33 T.A., ina ua auina mai le agaga paia ma faavavega ai ona tautatala soo o Iesu i gagana eseese.—Galuega 2:1-12.

Na iai tane ma fafine i ē na molimauina le faataunuuga o le Ioelu 2:28, 29, e pei ona sii mai e Peteru i le aso o le Penetekoso: “E iʻu ina ou [Ieova] liligi ifo ai loʻu Agaga i luga o tagata uma lava; ona perofeta mai lea o outou atalii ma o outou afafine . . . O ia aso foʻi ou te liligi ifo ai loʻu Agaga i luga o aʻu auauna tane, ma aʻu auauna fafine, latou te perofeta mai ai.” (Galuega 2:13-18) Mo se taimi ina ua mavae le Penetekoso 33 T.A., na maua e fafine Kerisiano meaalofa o le agaga. Na latou tautatala i gagana ese ma perofeta ane, e lē i le uiga faapea na latou valoia ni mea i le lumanaʻi, ae sa latou taʻu atu upu moni a le Tusi Paia.

I le tusi a Paulo i Kerisiano i Roma na ia taʻua ma le agalelei “lo tatou tuafafine o  Fipe.” Na ia faasino atu foʻi iā Tufaina ma Tufosa, “o fafine na galulue i la le Alii.” (Roma 16:1, 2, 12) E ui e leʻi iai ni tulaga faaovasia na tofia ai nei fafine i le faapotopotoga Kerisiano, ae na latou maua faatasi ma isi fafine le faaeaga o le tofiaina e le Atua e pule faatasi ma lona Alo, o Iesu Keriso, i le Malo i le lagi.—Roma 8:16, 17; Kalatia 3:28, 29.

Maʻeu se faaeaga ua maua e fafine amioatua i aso nei! Ua faapea mai le Salamo e 68:11: “Na tulei mai le afioga a le Alii; e tele ʻau [o fafine] o ē na talaʻiina [le tala lelei].” E tatau ona faamālō i fafine faapea, mo lo latou tomai e aʻoaʻo atu ai i suʻesuʻega faale-Tusi Paia, ua oo ai ina toʻatele isi ua taliaina aʻoaʻoga moni e fiafia i ai le Atua. E faamālō foʻi i fafine Kerisiano ua faaipoipo, o ē o loo fesoasoani i a latou fanau ina ia avea ma tagata talitonu, ma lagolagosua i a latou tane o ē tele tiute tauave i le faapotopotoga. (Faataoto 31:10-12, 28) O fafine nofo fua e iai foʻi lo latou tulaga mamalu i le faatulagaga a le Atua, faapea foʻi tamāloloa Kerisiano ua faatonuina ina ia “apoapoaʻi atu i . . . loomatutua, peiseaʻī o tinā; o fafine muli foʻi, peiseaʻī o tuafāfine ia, ma le amio mamā lava.”—1 Timoteo 5:1, 2.

O Tofiga Eseese o le Tane

E iai tofiga mai le Atua o se tane Kerisiano ma e faatalitalia e na te faataunuuina. Ua faapea mai Paulo: “Ou te loto ina ia outou iloa, o le ulu o tane taʻitoʻatasi o Keriso lea, o le ulu o le avā o le tane lea, a o le ulu o Keriso o le Atua lea.” (1 Korinito 11:3) E iai foʻi le ulu o le tane—o Keriso. E tali atu la le tane iā Keriso aemaise lava i le Atua. Ma e faatalitalia e le Atua le tane e faatinoina lona tulaga ulu ma le alofa. (Efeso 5:25) O le finagalo lenā o le Atua talu mai lava ona iai tagata i le lalolagi.

Ua faailoa mai e le Tusi Paia na avatu e le Atua i tamāloloa tofiga e ōgatusa ma lona tulaga ulu. E pei o se faaaʻoaʻoga, na faatonu e Ieova le tane o Noa e fau le vaa mo le faasaoina o ola i le taimi o le lolo. (Kenese 6:9–7:24) Na folafola atu i le tane o Aperaamo e ala mai i lana fanau, o le a manuia ai aiga uma ma atunuu o le lalolagi. O Iesu Keriso o le vaega autū o lenā fanau. (Kenese 12:3; 22:18; Kalatia 3:8-16) Na tofia e le Atua le tane o Mose e taʻitaʻi ese atu tagata Isaraelu mai Aikupito. (Esoto 3:9, 10, 12, 18) Na avatu e Ieova iā Mose tulafono tusitusia lea e taʻua o le feagaiga o le tulafono po o le tulafono a Mose. (Esoto 24:1-18) O tane uma na tusiaina le Tusi Paia.

I le avea o Iesu ma Ulu o le faapotopotoga Kerisiano, na ia “foaʻiina foʻi mea alofa i tagata.” (Efeso 1:22; 4:7-13) Sa faasino atu Paulo i tane ina ua lisi mai agavaa mo ovasia. (1 Timoteo 3:1-7; Tito 1:5-9) O faapotopotoga la a Molimau a Ieova e vaavaaia e ovasia o ni tane, po o toeaina, ma tane ua tofia e avea ma auauna o le faiva. (Filipi 1:1, 2; 1 Timoteo 3:8-10, 12) E na o tane e galulue o ni leoleo mamoe i le faapotopotoga Kerisiano. (1 Peteru 5:1-4) Ae e pei ona taʻua, o loo iai ni tiute tauave mataʻina mo fafine mai le Atua.

Fiafia i a Latou Matafaioi

E maua e tane faapea foʻi ma avā le fiafia pe a faataunuuina o latou tiute tauave mai le Atua. O faaipoipoga fiafia e maua pe a mulimuli tane ma avā i le faaaʻoaʻoga a Keriso ma lana faapotopotoga. Na faapea mai Paulo: “O outou tane, ia outou alolofa atu i a outou lava avā, faapei o Keriso foʻi ona alofa mai i le ekalesia, ma foaʻiina mai o ia e ia e fai mona sui . . . Ia taʻitasi outou ma alofa i lana lava avā faapei o ia lava iā te ia.” (Efeso 5:25-33) E tatau la i tane ona faatino lo latou tulaga ulu, i se auala alofa ae lē o le manatu faapito. E lē o faia aʻe le faapotopotoga a Keriso i ni tagata lelei atoatoa. Ae e alofa pea Iesu iā i latou. I se auala faapena, e tatau ai i se tane Kerisiano ona alofa ma tausia lana avā.

E tatau i se avā Kerisiano ona “ava o ia i  lana tane.” (Efeso 5:33) I lea tulaga e mafai ona vaai atu le avā i le faapotopotoga o se faataʻitaʻiga. Ua faapea mai le Efeso 5:21-24: “Ia usiusitai le tasi i le tasi ma le mataʻu iā Keriso. O outou fafine, ia outou usiusitai i a outou lava tane, faapei ona usiusitai i le Alii. Auā o le tane o le ulu ia o le avā, pei o Keriso foʻi o le ulu ia o le ekalesia, o ia foʻi o le Faaola o le tino. O lenei, faapei ona usiusitai o le ekalesia iā Keriso, ia faapea foʻi fafine i a latou lava tane i mea uma lava.” E ui e iai taimi e faigatā ai i le avā ona usitai i lana tane, ae ia usiusitai pea “ona [e] tatau [lea] i le Alii.” (Kolose 3:18) O le a faigofie ona usitai le avā i lana tane pe a ia manatua o le finagalo lea o le Alii o Iesu Keriso.

E tusa pe e lē o se uso talitonu lana tane, ae o le avā Kerisiano e tatau lava ona usitai i le tulaga ulu o lana tane. Ua faapea mai le aposetolo o Paulo: “Outou fafine, ia usiusitai i a outou lava tane, afai foʻi e lē faalogo nisi i le upu, ia maua i latou i le amio lelei a avā, a e leai se upu, pe a latou vaai ane i a outou amio mamā ma le faaaloalo. (1 Peteru 3:1, 2) Na maua e Sara o lē na faaaloalo i lana tane o Aperaamo, le faaeaga e fanaua Isaako ma avea ai ma tupuaga o Iesu Keriso. (Eperu 11:11, 12; 1 Peteru 3:5, 6) O avā e amioaʻi e pei o Sara e mautinoa o le a tauia e le Atua.

O le a maua e tamāloloa ma fafine le filemu ma le autasi pe a faataunuuina o latou tofiga mai le Atua. E iʻu ai i le fiafia ma le faamalieina. Ae sili ai, o le usitaia o taʻiala a le Tusi Paia e maua ai e tane ma avā le mamalu ma se tulaga faaeaina i le faatulagaga a le Atua.

[Pusa i le itulau 7]

O La Manatu i o La Tofiga Mai le Atua

Na faapea mai Susana: “E faatino e laʻu tane lona tulaga ulu i se auala alofa. E masani ona ma talanoa i tonu o mea e fai, ma pe a fai lana faaiʻuga i mea e fai ma mea e lē faia, ou te mautinoa o lana faaiʻuga e mo le lelei o le ma aiga. E ese loʻu fiafia i le faatulagaga a Ieova mo avā Kerisiano, ma ua faamalosia ai le ma faaipoipoga. E māfana le ma ulugalii, e ma te galulue faatasi lava e ausia o ma sini faaleagaga.”

Na faapea mai se fafine e igoa iā Mindy: “O le tofiga ua aumai e Ieova i ana auauna fafine o se faamautinoaga lea o lona alofa mo i matou. Ou te lagona o le avatu o le mamalu, le faaaloalo, ma le lagolagosua i laʻu tane i ona tiute i le faapotopotoga, o le auala lea ou te faaali atu ai iā Ieova loʻu talisapaia o lenei faatulagaga.”

[Ata i le itulau 5]

Ina ia ōgatusa ma tulaga o tane o ulu o aiga, na avatu ai e le Atua iā Noa, Aperaamo, ma Mose ni tofiga eseese

[Ata i le itulau 7]

E toʻatele le ʻau o fafine o loo talaʻiina le tala lelei