Tumau Mausalī pe a Fouvale se Tamaitiiti

NA TAUMAFAI se tinā Kerisiano o le a tatou faaigoaina iā Lisa, e tausia aʻe lana tama tama ina ia alofa iā Ieova le Atua. Ae ui i lea, ina ua pe tusa o le 18 o ona tausaga, na fouvale ai lana tama ma tuua le aiga. Na faapea mai Lisa: “O se tigā lea e aupito sili ona matuitui ua ou oo i ai. Na tumu aʻu i lagona faanoanoa e pei ua ʻolegiaina aʻu, le loto nutimomoia, ma le ita ona o le lē taulau. Na lofitūina oʻu manatu i na o itu leaga lava.”

Atonu na faapena foʻi ona e taumafai e tausia aʻe lau fanau ina ia alolofa ma auauna i le Atua—ae vaai atu i se tasi po o nisi o i latou, ua fulitua iā Ieova. E faapefea ona e taulimaina na faanoanoaga matuitui? O le ā o le a fesoasoani iā te oe e tumau mausalī ai i lau auaunaga iā Ieova?

Ina ua Fouvale Atalii o Ieova

Muamua lava, ia e iloa o loo silafia lelei e Ieova ou faalogona. E tatou te faitau i le Isaia 49:15 e faapea: “E galo ea i le fafine lana tama ua susu, na te lē alofa i le tama a lona lava manava? ai lava e galo iā te i latou, a e lē galo lava oe iā te aʻu.” Ioe, e iā Ieova lagona masani o loo i tamā ma tinā. Seʻi manatu la i ona lagona fiafia na iai ina ua vivii ma auauna atu ona atalii agelu uma iā te ia. Ina ua ia taliina le fesili a Iopu “mai le afā,” na toe taʻua e Ieova taimi na latou fiafia faatasi ai ma lona aiga agaga autasi i le faapea mai: “O ifea sa e i ai ina o oʻu faavaeina le lalolagi? . . . ina o pepese faatasi fetu o le taeao, ma alalaga fiafia atalii uma o le Atua.”—Iopu 38:1, 4, 7.

Na iai se taimi na silasila mai ai le Atua moni i sona atalii agelu e lelei atoatoa ua fouvale iā te ia ma avea ma Satani, o lona uiga o “Lē Tetee.” Na silasila mai foʻi Ieova i lona uluaʻi atalii faaletagata, o Atamu, ma lana avā lelei atoatoa o Eva ua auai atu i le fouvalega. (Kenese 3:1-6; Faaaliga 12:9) Mulimuli ane, na faapena foʻi isi atalii agelu ona ‘tuua e i latou le mea sa latou nonofo ai’ ma fouvale atu i le Atua.—Iuta 6.

E lē o taʻua mai iā i tatou i le Tusi Paia lagona o Ieova, ina ua mulimuli atu nisi o ona atalii lelei atoatoa i lenā ala fouvale. E ui i lea, ua taʻua manino i le Tusi Paia: “Ua silafia e Ieova ua leaga tele lava tagata i le lalolagi, o manatu uma ua mafaufau ifo ai i o latou loto ua na ona leaga ia i aso uma lava. Ua salamō foʻi Ieova ina ua faia e ia tagata i le lalolagi,  ma ua tigā ai lona finagalo.” (Kenese 6:5, 6) O le fouvale o tagata filifilia o Ieova, o Isaraelu, na ia lagona ai foʻi o loo “faalili” ma “faaʻonoʻono” iā te ia.—Salamo 78:40, 41.

E mautinoa o loo tigā alofa Ieova mo mātua, o loo mafatia i tigā ma faanoanoaga e māfua mai i amioga a fanau fouvale. Ua ia aumai i lana Afioga le Tusi Paia ni fautuaga lelei ma faalaeiʻauga, e fesoasoani i nai na mātua e taulimaina ai tulaga ua oo i ai. Ua timaʻi le Atua iā i latou ina ia lafo atu mea e popole ai iā te ia, ia faamaulalo i latou, ma ia tetee atu iā Satani le Tiapolo. Seʻi o tatou vaai i le auala e fesoasoani ai iā te oe le usitaʻia o lenei fautuaga, ina ia e tumau mausalī ai pe a fouvale sou alo.

Tuu Atu iā Ieova Ou Popolega

Ua silafia e Ieova e matuā popole lava mātua pe a iloa ua oo le la fanau i se tulaga e faamanuʻalia ai po o le faamanuʻalia foʻi e isi. Ua faailoa mai e le aposetolo o Peteru se auala e foʻia ai lenei tulaga ma isi foʻi popolega. Na ia tusi e faapea: “Ia tuuina atu iā [Ieova] mea uma tou te popole ai, auā o loo manatu mai o ia iā te outou.” (1 Peteru 5:7) Aiseā ua faapitoa ai ona tāua lenei talosaga ma le faamautinoaga mo mātua o se tamaitiiti fouvale?

A o laʻitiiti lau tama, sa e mataalia e puipuia o ia i mea e lamatia ai, ma atonu na ia talia lau tausiga alofa na fai. Ae peitaʻi, a o tuputupu aʻe, ua oo ina faaitiitia lou pulea o ia, ae e lē o faaitiitia ai lou naunau e puipuia o ia i mea e lamatia ai. O le mea moni, atonu o lenā ua faateteleina.

O le iʻuga, a fouvale lau tama ma pagatia faaleagaga, po o ona faalogona, po ua faamanuʻalia lona tino, atonu e te tuuaʻia oe. O lagona na o Lisa e pei ona taʻua i le amataga. Ua ia faapea mai: “I aso taʻitasi, ou te puapuagatia ai i lagona o loʻu lē taulau, ou te mafaufau pea i mea na tutupu i taimi ua teʻa seʻi iloa ai po o le ā laʻu mea sesē na fai.” O taimi tonu lava na e naunau ai Ieova e ‘tuuina atu iā te ia mea uma e te popole ai.’ Afai e te faia faapea, o le a ia fesoasoani iā te oe. Na faapea mai le faisalamo: “Ia e tuuina atu iā Ieova o mea e te popole vale ai; o ia lava na te tausia oe; na te lē tuuna e faavavau lē amiotonu ia faagaeetia.” (Salamo 55:22) Na lagona e Lisa lenā faamāfanafanaga. Na ia faamatala e faapea: “Sa  ou talanoa iā Ieova i oʻu lagona uma o loo iai. Sa ou sasaa atu oʻu faalogona iā te ia, ma maʻeu se toʻafilemu na oo iā te aʻu.”

Ona o tulaga lē lelei atoatoa o se matua, atonu na iai ni ou sesē a o tausia aʻe lau tama. Ae aiseā e te saga mafaufau ai fua i na sesē? E mautinoa e lē faapena Ieova, ona na pese le faisalamo e faapea: “Ioa e, afai e te mātaulia le amio leaga, le Alii e, o ai sē na te mafaia ona tulaʻi?” (Salamo 130:3) E tusa foʻi pe ana faapea o oe o se matua e matuā lelei lava e leai se mea na e faalētonu ai, ae e ono fouvale lava lau tama. O lea ia taʻu atu iā Ieova ou lagona i le tatalo, ona ia fesoasoani lea iā te oe e taulimaina ma le manuia ou faalogona. Ae peitaʻi, ina ia e tumau mausalī e auauna iā Ieova ma ʻalofia le aafia iā Satani, e tatau ona fai ni au taumafaiga atili.

Ia E Faamaulalo

Na tusi Peteru e faapea: “Ia faamaulalo . . . outou i lalo o le aao malosi o le Atua, ina ia faamaualugaina outou e ia i ona pō e tatau ai.” (1 Peteru 5:6) Aiseā e manaʻomia ai le faamaulalo pe a fouvale lau tama? E lē gata e te lagona le faanoanoa ma le tigā, ae e te ono lagonaina foʻi le māsiasi ona o se tamaitiiti fouvale. Atonu o loo e popole ona o se mea ua faia e lau tama ua taʻuleagaina ai lou aiga, aemaise lava pe afai o le a faateʻaina mai le faapotopotoga Kerisiano. O lagona o le faalumaina ma le māsiasi, e ono faaopoopo atu i le faalotovaivaia o oe e auai i sauniga.

Ina ia taulimaina na tulaga, e manaʻomia ona e faaalia le atamai. Ua lapataʻi mai le Faataoto 18:1 e faapea: “O lē ua vavae ese, ua saʻili o ia i lona manaʻo; e finau o ia i le poto uma lava.” O le auai pea i sauniga e ui i lou faanoanoa o loo iai, o le a mafai ona e mauaina ai ni faatonuga aogā ma ni faalaeiauga. Na taʻutino e Lisa faapea: “I le taimi muamua sa ou leʻi manaʻo e talanoa i se tasi. Ae na ou toe mafaufau pea i le tāua o laʻu faasologa faaleagaga o loo iai. E lē gata i lea, afai o le a ou nofo i le fale, e pau lava le mea ou te mafaufau i ai o oʻu faafitauli. Na fesoasoani sauniga iā te aʻu e taulaʻi atu ai i mea e ati aʻe ai faaleagaga. E ese loʻu loto faafetai ona ou te leʻi faaesea aʻu ma lē maua ai le lagolagosua alofa a uso ma tuafāfine.”—Eperu 10:24, 25.

Ia aua foʻi neʻi galo, o tagata taʻitoʻatasi o le aiga e ao ona “taʻitasi ma ave i lana lava avega” o se Kerisiano. (Kalatia 6:5) E faatalitalia e Ieova mātua ia alolofa ma pulea lelei a latou fanau. E faatalitalia foʻi e Ieova fanau, e usiusitaʻi ma āva i o latou mātua. Afai e fai e mātua le mea sili la te mafaia e tausia aʻe ai le la fanau i “aʻoaʻiga ma apoapoaʻiga a le Alii,” o le a taʻuleleia i laʻua i le silafaga a le Atua. (Efeso 6:1-4) Afai e fouvale le tamaitiiti i aʻoaʻiga alofa a mātua, o le a taʻuleagaina la le tamaitiiti. Ua taʻua i le Faataoto e 20:11 e faapea: “E mafai ona iloa o le tama i lana amio; pe sao ona lelei ma le tonu o lana mea e fai.” O le fouvale a Satani e mautinoa e leʻi taʻuleagaina ai le tulaga o Ieova e i latou o loo malamalama lelei i le mea moni na tupu.

Ia E Tetee Atu i le Tiapolo

Na lapataʻi mai Peteru: “Ia outou faautauta, ia outou mataala, ona o lē ua fai outou mona fili, o le tiapolo lea, o loo fealualuaʻi o ia e pei o se leona tagi, ua saʻili se tasi e ʻaina e ia.” (1 Peteru 5:8) E pei le Tiapolo o se leona, e taulaʻi atu i ē laiti ma lē lava lo latou poto masani. I aso anamua, sa feoaʻi solo leona i laufanua o Isaraelu ma e avea o ni faamataʻu i  meaola lalata. Afai e sē ese se tamaʻi mamoe mai le lafu, o le a faigofie ona puʻea o ia e se leona. E ono tuu atu e se mamoe fafine lona ola e puipuia ai lana tama. E ui i lea, e lē mafai lava ona faafetaiaʻia e se mamoe ua matua se leona. O lea la, na manaʻomia ai ni leoleo mamoe loto totoa e puipuia le lafu.—1 Samuelu 17:34, 35.

Ina ia puipuia ana mamoe faafaatusa mai le “leona tagi, ” ua faatulaga ai e Ieova leoleo mamoe faaleagaga e tausia le lafu mamoe i lalo o le taʻitaʻiga a “le Leoleo mamoe silisili,” o Iesu Keriso. (1 Peteru 5:4) Na avatu e Peteru i toeaina tofia le apoapoaʻiga lenei: “Ia outou leoleo i le lafu mamoe a le Atua o iā te outou, ia tausi i ai ma le loto, a e lē o le faatauanauina; aua foʻi neʻi faia ma le fia fai oloa, a o le loto fiafia.” (1 Peteru 5:1, 2) O la oulua lagolagosua o ni mātua, o le a mafai ai e nei leoleo mamoe ona fesoasoani i se talavou e faasaʻo lona ala faaleagaga.

Pe a manaʻomia ona aʻoaʻia e leoleo mamoe Kerisiano lau tama fouvale, atonu e te lagona se uunaʻiga e puipuia lau tama mai le aʻoaʻiga. Ae peitaʻi, o le faia o lena laasaga o le a avea o se mea sesē matuiā. Ua taʻua e Peteru: “Ia outou tetee atu [i le Tiapolo]”—ae lē o leoleo mamoe faaleagaga.—1 Peteru 5:9.

Pe a Ogaoga le Aʻoaʻiga

Pe a lē salamō lau tama ae o ia o se Kerisiano ua papatisoina, o le a ia ono maua se ituaiga o aʻoaʻiga malosi—o le faateʻaina mai le faapotopotoga Kerisiano. O le tele la o le avanoa e mafai ona lua toe feiloaʻi ai, e faalagolago i lona matua ma isi tulaga.

Pe afai o loo laitiiti pea lau tama ma o loo nofo i le aiga, o le a faaauau pea la ona e vaaia ona manaʻoga faaletino. O le a ia manaʻomia pea toleniga tau amio ma aʻoaʻiga, ma o lau tiute tauave lenā e fai. (Faataoto 1:8-18; 6:20-22; 29:17) E te ono manaʻo e fai se suʻesuʻega faale-Tusi Paia ma ia, e aofia ai le fai mai o sona sao. E mafai ona e faasino o ia i isi mau o le Tusi Paia, ma lomiga ua saunia e “le auauna faamaoni ma le mafaufau.” (Mataio 24:45) E mafai foʻi ona e ave lau tama i sauniga ma nonofo faatasi ma ia. O nei mea uma e fai ma le faamoemoe, e na te taliaina fautuaga a le Tusi Paia.

E ese la le tulaga pe afai o le tama lea e faateʻaina e lē o se tamaitiiti, ma o loo nofo ese mai le aiga. Na timaʻi e Paulo Kerisiano i Korinito anamua: “Ai se tasi ua taʻuusoina a e faitaaga, pe matapeʻapeʻa, pe ifo i tupua, pe agatele, pe onā, pe fao mea; aua lava neʻi tou feoaʻi, aua foʻi tou te aai faatasi ma lē o faapea.” (1 Korinito 5:11) A o tausia ni tiutefai faaleaiga e ao ona fai, lea e manaʻomia ai ona fesootaʻi atu i se tagata ua faateʻaina, e tatau ona taumafai se matua Kerisiano e ʻalofia ni sootaga e lē manaʻomia.

Pe a aʻoaʻia se tamaitiiti e leoleo mamoe Kerisiano, o le a lē o se gaoioiga atamai lou teena po o le taʻufaatauvaaina o a latou gaoioiga ua fai e faavae i le Tusi Paia. O lou ʻau ma lau tama fouvale o le a na lē mauaina ai se puipuiga moni e tetee atu ai i le Tiapolo. O le mea moni, o le a e tuua ai lou lava tulaga mālōlōina faaleagaga i se tulaga lamatia. I le isi itu, o le lagolagoina o taumafaiga a leoleo mamoe, o le a e tumau ai ma “mausalī . . . i le faatuatua” ma o le a maua ai e lau tama se fesoasoani e sili ona lelei.—1 Peteru 5:9.

O le a Tausia Oe e Ieova

Pe a fouvale lau tama, ia manatua e lē na o oe ua oo i lenā tulaga. Ua oo foʻi na tulaga i isi mātua Kerisiano. Po o ā lava puapuaga e tatou te fesagaʻia, ae e tausia lava i tatou e Ieova.—Salamo 68:19.

Ia faalagolago iā Ieova i le tatalo. Ia auaufaatasi pea ma le faapotopotoga Kerisiano. Ia lagolago i aʻoaʻiga a leoleo mamoe tofia. O le faia faapea, o le a mafai ai ona e tumau mausalī. O lau faaaʻoaʻoga lelei e ono fesoasoani i lau tama e tali atu ai i le talosaga a Ieova e toe foʻi atu iā te ia.—Malaki 3:6, 7.

[Ata i le itulau 18]

Ia maua le malosi mai le tatalo ma le faapotopotoga Kerisiano