Ua 105 Ona Tausaga ma se Faamoemoe Mausalī

O ELINE e aofia i tagata e toʻa 60 i Suetena na faamauina talu ai nei ua 105 pe sili atu tausaga le matutua. E 105 ona tausaga. E ui ua tausi i nofoaga o tagata matutua, ae o loo mafai lava e lona soifua mālōlōina ona auauna ai pea o se Molimau maelega a Ieova, le olaga lea na ia filifilia i le silia ma le 60 tausaga ua mavae.

Pe a talaʻi atu Eline i isi, ua ia faaaʻoaʻo i le faaaʻoaʻoga na faataatia e le aposetolo o Paulo a o nofo saisaitia i lona fale lea na leoleo e se tagata tau. Na talaʻi Paulo i tagata uma na asiasi ane iā te ia. (Galuega 28:16, 30, 31) I se tulaga talitutusa, ua faaaogā e Eline avanoa uma e talanoa atu ai i ē sa faamamāina le fale, o fomaʻi, tagata ʻoti ulu, teine ma tama tausimaʻi, ma isi e feiloaʻi i ai, e taʻu i ai le tala lelei o loo i le Tusi Paia. O nisi taimi, e valaaulia foʻi e uso ma tuafāfine o le faapotopotoga a latou tagata aʻoga o le Tusi Paia e asiasi atu iā Eline, ina ia maua ai ni aogā mai mea ua ia malamalama ai, ma lona poto masani.

E talisapaia e le faapotopotoga a Eline ona uiga tausaafia ma lona naunau fia iloa i mea. Fai mai se uso Molimau: “E ese le lelei o lona tomai e iloa ai pea mea o loo tutupu i le faapotopotoga. Na te manatua uma igoa o tamaiti o le faapotopotoga, ma i latou faatoʻā auai atu i le faapotopotoga.” Ua lausilafia foʻi Eline i le agaga talimālō, ona uiga agamālie, ma le iai o se vaaiga mautinoa i le olaga.

O le ā ua tumau ai le olioli o Eline ma taulaʻi atu i lona faamoemoe? Na te faitauina le mau i aso taʻitasi mai le tamaʻi tusi Iloiloina o le Tusi Paia i Aso Taʻitasi, lea e lomia e Molimau a Ieova. E faaaogā lana matatioata faalapopoʻa e faitau ai se vaega o le Tusi Paia i aso taʻitasi. E sauniuni mo sauniga faalevaiaso a Molimau a Ieova, ma e ui ua lē atoatoa lona malosi e auai ai, ae faalogologo i vaega o sauniga e puʻeina mai. O le faitau e lē aunoa o le Tusi Paia ma lomiga faale-Tusi Paia, ma le lē lafoaʻia o sauniga faa-Kerisiano, e mafai ai ona tatou ola i se olaga faamalieina ma uigā, e ui i le soifuaga matua.—Salamo 1:2; Eperu 10:24, 25.