Aiseā e Tautala ai i le Mea Moni?

O MANFRED e 18 ona tausaga na galue faataʻitaʻi i se ofisa. * Na faatulaga e le kamupani na ia galue ai e auai faatasi ma nisi foʻi o loo galulue faataʻitaʻi, i se aʻoga faavaitaimi e lua aso o le vaiaso e fai ai. I se tasi aso na vave tuua ai le aʻoga na i lo le taimi masani. E tusa ai ma āiāiga a le kamupani, e tatau ona toe foʻi e faigaluega i le taimi lea e totoe o le aso. Ae e na o Manfred na toe foʻi i le galuega a o le isi vaega na ō tafafao. E leʻi fuafuaina le alu ane o le pule o lea vaega i le ofisa. Ina ua ia vaaia Manfred na ia fesili atu: “Aiseā ua e lē alu ai i le aʻoga i le asō? A o fea le isi vaega?” O le ā le tali a Manfred e ao ona fai atu?

O se tulaga lava e masani ai na oo iā Manfred. Pe e tatau ona ia taʻu le mea moni, pe pepelo e puipuia ai le isi vaega o lana vasega? Afai e taʻu le mea moni, o le a afāina ai le isi vaega ma feita ai iā te ia. Pe lelei le pepelo i ia tulaga? O le ā se mea e te faia pe ana faapea o oe? O le a tatou toe talanoa iā Manfred i se taimi mulimuli ane, ae seʻi o tatou iloilo muamua po o le ā e aofia i le faia o se filifiliga pe taʻu le mea moni pe leai.

Feteenaʻiga Autū Mea Moni ma le Mea Lē Moni

I le amataga o le tala faasolopito o tagata, na faavae mea uma i mea moni. E lē mimilosesēina mea moni, ma e leai ni taaʻiga leaga po o ni tala sesē o le mea moni. O Ieova, Lē na faia mea uma o le “Atua faamaoni.” O ana afioga o le upu moni; e lē mafai ona tala pepelo, ma e na te inosia le pepelo ma i latou e faia le pepelo.—Salamo 31:5; Ioane 17:17; Tito 1:2.

Pe afai o le tulaga lenā, o fea la na pogai mai ai le pepelo? Na avatu e Iesu Keriso le tali saʻo ina ua ia fetalai i taʻitaʻi lotu tetee, o ē na saʻili e fasioti iā te ia: “O outou nai lo outou tamā le tiapolo, tou te fia faia foʻi mea e tuʻinanau i ai lo outou tamā. O le fasioti tagata ia talu le amataga, e lē tū lava ia i le upu moni, auā e lē o i totonu lava iā te ia le upu moni; a tautala ia i le tala pepelo, o lana lava lea e tautala aʻi, auā o le pepelo ia, ma le  tamā o le pepelo.” (Ioane 8:44) E mautinoa na faasino atu Iesu i le mea na tupu i le faatoʻaga i Etena ina ua faaosoosoina e Satani le uluaʻi ulugalii e lē usitai i le Atua, ma iʻu ai ina agasala ma oti.—Kenese 3:1-5; Roma 5:12.

Ua faailoa manino mai i le fetalaiga a Iesu, o Satani o le “tamā o le pepelo” o lē e pogai mai ai le pepelo ma mea lē moni. O loo faaauau ona avea Satani ma fautua sili o le pepelo ma o loo “faasesē i le lalolagi uma.” O ia e paʻū i ai le mamafa o le leaga ua fesagaʻia e tagata i aso nei ona o le taatele o le pepelo.—Faaaliga 12:9.

Na amata e Satani le Tiapolo le feteenaʻiga autū o mea moni ma mea e lē moni, ma o loo faaauau pea i aso nei. Ua aafia ai tulaga uma o tagata i le lautele ma tagata taʻitoʻatasi. O le auala e ola ai se tasi e iloa ai po o lē fea itu o loo ia lagolagoina. O i latou e i le itu a le Atua, e faavae o latou olaga i le upu moni o le Afioga a le Atua, le Tusi Paia. O so o se tasi e lē mulimuli i le ala o le upu moni, ua paʻū atu o ia, pe iloa pe lē iloa i lima o Satani, ona “o le lalolagi uma o loo nofo toʻilalo i loo leaga.”—1 Ioane 5:19; Mataio 7:13, 14.

Aiseā e Iai Faanaunauga e Pepelo?

O le mea moni “o le lalolagi uma” o loo nofo toʻilalo iā Satani o le māfuaaga lea e toʻatele ai tagata e tala pepelo. Ae e tatou te ono fesili, ‘Aiseā na faia ai e Satani le “tamā o le pepelo” lea tulaga?’ Na iloa e Satani o Ieova o le Pule Silisili ese o mea uma na Ia faia, e aofia ai le uluaʻi ulugalii. Ae na manaʻo Satani i lea tofiga mamalu ma maualuga, o se tulaga e leai sana aiā i ai. Ona o le matapeʻapeʻa ma le manatu faapito, na ia faufau ai e faoa le tulaga o Ieova. Na ia faaaogā ai loa tala pepelo ma le taufaasesē ina ia taulau ai ana faufauga.—1 Timoteo 3:6.

Ae faapefea aso nei? Pe e te lē ioe ea o le matapeʻapeʻa ma le manatu faapito o loo uunaʻia ai pea le toʻatele o tagata e pepelo? Ua faatumulia pisinisi matapeʻapeʻa, faiga piʻopiʻo faapolotiki, ma lotu sesē, i faiga taufaasesē, pepelo, taaʻiga leaga, ma faiga faagaoi. Aiseā? Pe lē ona ua uunaʻia tagata e le matapeʻapeʻa ma le fia sili po o le fia mauʻoa, manaʻo e taaʻina manatu o isi, po o tulaga e lē oo iai sa latou aiā? Na lapataʻi mai se taʻitaʻi poto o Isaraelu anamua, le tupu o Solomona: ‘O lē ua faataalise ona mauʻoa, e lē sao o ia.’ (Faataoto 28:20) Na tusi foʻi le aposetolo o Paulo: “O le manaʻo i tupe, o le pogai lea o mea leaga uma lava.” (1 Timoteo 6:10) E faasino atu foʻi lea faamatalaga i le faanaunau e maua le pule po o le tulaga maualuga.

O le fefe le isi pogai e pepelo ai—e fefe i āuga e oo i ai, po o manatu o isi pe a taʻu le mea moni. O se lagona masani le mananaʻo o tagata e fiafia mai isi, pe talia foʻi e isi i latou. Peitaʻi, o lea faanaunauga e uunaʻia ai i latou e pepelo e tusa lava pe itiiti, e ufiufi ai ni masei, nanā ai ni faamatalaga lē lelei, pe fia taʻuleleia ai foʻi. Na tusi Solomona: “O le fefe i tagata e tupu ai le mailei; a o lē faatuatua iā Ieova e faamamaluina o ia.”—Faataoto 29:25.

Faamaoni i le Atua o Mea Moni

O le ā le tali a Manfred ina ua fesiligia e le pule o le kamupani mo se faamalamalamaga? Na taʻu e Manfred le mea moni. Na ia faapea atu: “Na faatuua vave e le faiaʻoga le matou vasega ananei, lea na ou sau ai loa i le galuega. Ae o le isi vaega, e lē mafai ona ou fai atu se tala e uiga iā i latou. Atonu e mafai ona e fesili saʻo i ai pe a ō mai.”

Sa mafai e Manfred ona faia se tali poto e  taufaasesē, lea o le a alofagia ai o ia e le isi ʻaufaigaluega. Ae na iai ni ana māfuaaga lelei o lona faamaoni e pipii i le mea moni. O Manfred o se tasi o Molimau a Ieova. O lona faamaoni na tumau ai lona loto fuatiaifo lelei, ma maufaatuatuaina ai e lona pule. O se tasi o vaega o lana toleniga, na tofia Manfred e galue i le itu o maatāua, o se vaega e lē masani ona faataga ai ē galulue faataʻitaʻi. Ina ua mavae le 15 tausaga, na siitia le tulaga o le galuega a Manfred i le kamupani, ma o le pule lava lea e tasi na fesiligia o ia, na telefoni atu e faamālō iā te ia ma toe faamanatu le mea na tupu i tausaga ua mavae i le lelei o le faamaoni.

Ona o Ieova o le Atua o mea moni, o so o se tasi e manaʻo e iai se faiā vavalalata ma ia, e tatau ona “tuuʻese le pepelo” ma ‘tautala faamaoni.’ E fiafia se auauna a le Atua i mea moni. Na tusi se tane poto: “O le molimau faamaoni, e lē pepelo ia.” O le ā la le pepelo?—Efeso 4:25; Faataoto 14:5.

O le ā le Pepelo?

O pepelo uma e sesē, ae lē o sesē uma e pepelo. Aiseā? Ua faamatala e se lomifefiloi le pepelo o se “taʻutinoga lea o se mea ua iloa pe ua talitonuina e se tasi e lē moni, ma le faanaunauga e faasesē ai se isi.” Ioe o le pepelo e aofia ai le manatu e faasesēina se tasi. Ae o le taʻua ma le lē iloa o se mea sesē, e pei o le avatu i se tasi o ni faamatalaga lē saʻo, po o ni fuainumera sesē ma le lē iloa, e lē tutusa lea ma le pepelo.

E tatau foʻi ona tatou iloa pe tatau ona avatu se tali atoatoa i se tasi pe leai. O se faataʻitaʻiga, seʻi faapea na fesiligia Manfred e se pule o se isi kamupani i fesili lava ia e tasi. Po o le a taʻu e Manfred mea uma iā te ia? E leai. E lē taʻuina e Manfred mea uma i lea pule, auā e leai sana aiā i lea tulaga. Ae i le tulaga lava la lea, e sesē mo Manfred le faia o se pepelo.

O le ā se faaaʻoaʻoga na faataatia e Iesu i lenei vala? I se tasi taimi, na talanoa ai Iesu ma nisi e lē o ni ona soo na fia iloa fuafuaga o lana malaga. Na latou fautua atu: “Ia e tuua lenei mea, ma e alu ane i Iutaia.” O le ā le tali a Iesu? “Ō aʻe ia outou i lea tausamiga; ou te lē alu aʻe nei i lea tausamiga, auā e leʻi oo mai oʻu pō.” E leʻi umi, ae malaga atu loa Iesu i Ierusalema mo le tausamiga. Aiseā na ia tali atu ai faapea? Ona sa lē tatau ona latou iloa faamatalaga auʻiliʻili uma o le mea e feafioaʻi ai o ia. E leʻi pepelo la Iesu, ma na te leʻi avatu se tali atoatoa iā i latou, ina ia faaitiitia ai lamatiaga e latou te faaoo iā te ia ma ona soo. E lē o se pepelo lea auā na tusi le aposetolo o Peteru e uiga iā Keriso: “O lē na lē agasala lava, na lē iloa foʻi se pepelo i lona fofoga.”—Ioane 7:1-13; 1 Peteru 2:22.

Ae faapefea Peteru? I le pō na puʻea ai Iesu, pe leʻi faatolu ea ona pepelo Peteru ma faafiti e lē iloa Iesu? Ioe, na lolo atu Peteru i le fefe i  tagata ma pepelo ai. Ae na vave ona ia “tagi lotulotu” ma salamō, ma na faamagaloina lana agasala. Na ia aʻoaʻoina se lesona mai lana mea sesē na fai. Ina ua tuanaʻi ni nai aso, na ia tautala i tagata i le lautele e uiga iā Iesu, ma lē manaʻo e taofia e ui na faamataʻuina e faipule Iutaia i Ierusalema. O le faavaivai o Peteru mo sina taimi ma le vave ona ia toe malosi, o se faalaeiauga lea mo i tatou uma o ē faigofie ona lofitūina i ni vaivaiga ma tausuai vave i upu ma gaoioiga.—Mataio 26:69-75; Galuega 4:18-20; 5:27-32; Iakopo 3:2.

O le a Faatumauina le Mea Moni e Faavavau

Ua faapea mai le Faataoto 12:19: “O laugutu faamaoni, e faatumauina ia e faavavau; a o le laulaufaiva pepelo, ua se emo o le mata lea.” Ioe o le tautala i le mea moni, e tumau. E mautū ma faamalieina faiā a tagata pe a tautatala i mea moni ma gaoioi e ōgatusa ai ma na mea moni. E vave maua faamanuiaga i le tautala i le mea moni. E aofia ai se loto fuatiaifo mamā, se talaaga lelei, ma faamalosia ai le faiā a se ulugalii, aiga, uō, ma pisinisi foʻi.

O le pepelo e lē tumau, e iai le taimi e faailoa ai. O le laulaufaiva e tautala i tala pepelo e ono umi se taimi e fai ai, ae e lē tumau mea e lē moni. Ua faatulaga e Ieova le Atua o mea moni, se taimi e muta ai lona faapalepale i mea pepelo ma i latou o loo faia. Ua folafola mai le Tusi Paia, o le a aveesea e Ieova taaʻiga a Satani le Tiapolo, le tamā o le pepelo, o lē faasesē i le lalolagi uma. Ua toeitiiti ona faaumatia lea e Ieova le pepelo ma i latou o loo faia.—Faaaliga 21:8.

Maʻeu se mapusaga pe a faatumauina “laugutu faamaoni” e faavavau!

[Faamatalaga pito i lalo]

[Faamatalaga faaopoopo i le itulau 5]

E uunaʻia e le matapeʻapeʻa ma le manatu faapito tagata e pepelo

[Faamatalaga faaopoopo i le itulau 6]

O pepelo uma e sesē, ae lē o sesē uma e pepelo

[Ata i le itulau 6]

O le ā tatou te aʻoaʻoina mai le faafitia e Peteru o Keriso?

[Ata i le itulau 7]

O le tautala i le mea moni e mautū ma sologa lelei ai faiā