Amosa—O Lē na Galue i Sukamoru

I TUĀ i le senituri lona iva T.L.M., na faatonu ai e Amasia, o se ositaulaga amioleaga e tapuaʻi i le tamaʻi povi, le perofeta o Amosa e aua neʻi toe vavalo i Isaraelu. Sa tetee i ai Amosa ma faapea atu: “O le fagamanu aʻu, ma lē galue i sukamoru. A ua avea aʻu e Ieova sa ou mulimuli i le lafu mamoe, ma ua faapea mai Ieova iā te aʻu, Alu ia, inā e vavalo i loʻu nuu o Isaraelu.” (Amosa 7:14, 15) Mātau mai, o Ieova na tofiaina Amosa o se perofeta; e leʻi tofia e Amosa ia lava e avea ma perofeta. Ae o le ā le uiga o le tala a Amosa ina ua ia faapea atu, o ia o “lē galue” i sukamoru?

Na pau lava lea o le mau o loo maua ai le faaupuga Eperu lenei i le New World Translation, ae o loo faaliliu i le Tusi Paia faa-Samoa i le, o “lē galue.” O isi faaliliuga o le Tusi Paia e faaaogā ai faaupuga e pei “o lē aoaoina,” “o lē teuteuina,” po o “o lē totōina,” na i lo “o lē galue,” i sukamoru. Peitaʻi na taʻua i le tusi Economic Botany, o le faaliliuga e talafeagai ona iai mo lea faaupuga e faapea, “o lē tositosia pe tuituia” auā o le faaupuga lenei e faailoa mai ai se gaoioiga faapitoa e fai e se tagata o loo galue i sukamoru.

O lenei gaoioiga, e tusa e faaaogā e se tasi se mea e maai lona mata, e tositosi pe tuitui ai fua o le sukamoru. O se faiga sa lauiloa i aso anamuā i Aikupito ma Kuperu, ae e lē o toe faatinoina i aso nei i Isaraelu, ona ua tele isi ituaiga sukamoru po o mati ua ola ai i lenā vaipanoa. Peitaʻi sa aʻe lenā faiga o le tositosi pe tuitui fua o sukamoru, i tagata Isaraelu i aso o Amosa, auā o le sukamoru sa ola i lenā taimi i Isaraelu, o le ituaiga na maua mai i Aikupito.

E foliga mai, sa latou tositosi pe tuitui fua o le sukamoru, ina ia mafai ai ona mitiia e fua le vai ma oo ai ina susua pe a tausami. E faateleina ai foʻi le kasa e taʻu o le ethylene, lea e vave ai ona pula fua o le sukamoru, ma oo ai ina lapopoʻa ma suamalie. Ma talu ai o lea ua vave ona pula fua ma faaaogā, o le a leai ai se taimi mo iniseti faalafuā e faaleagaina ai fua.

E ui i lona talaaga faatauvaa o se leoleo manu ma o sē sa galue e puipuia fua o sukamoru, ae leʻi fefe pe mataʻu ai Amosa i ona fili. Na i lo lenā, na ia faalauiloa atu ma le loto tele feʻau faafaamasinoga a Ieova mo Isaraelu. Maʻeu se faaaʻoaʻoga lelei mo auauna a le Atua i aso nei, a o tatau foʻi ona latou faalauiloa atu se feʻau e ono lē fiafia i ai le toʻatele!—Mataio 5:11, 12; 10:22.