E Talisapaia i Tatou e Ieova
E Talisapaia i Tatou e Ieova
“E lē amiolētonu le Atua, na te lē faagalogaloina la outou galuega ma le alofa ua outou faaali mai ai i lona suafa.”—EPERU 6:10.
1. Na faapefea ona talisapaia e Ieova le fafine Moapi o Ruta?
E MATUĀ tāua iā Ieova taumafaiga a i latou o loo saʻili moni e fai lona finagalo. E na te matuā tauia i latou. (Eperu 11:6) Sa iloa lelei e Poasa le uiga lenei o Ieova; o le ala lea o lona faapea atu i le fafine Moapi o Ruta, o lē sa tausi faamaoni i le tinā o lana tane: “Ia totogi Ieova i lau galuega, ia tuuina mai iā te oe se taui tele mai iā Ieova.” (Ruta 2:12) Pe na tauia e le Atua Ruta? E mautinoa lava o le tulaga lenā! Ae ā lea e faamauina tala e faatatau iā te ia i le Tusi Paia! Sa faaipoipo atu foʻi Ruta iā Poasa, ma avea ai o ia ma tupuaga o le tupu o Tavita faapea Iesu Keriso. (Ruta 4:13, 17; Mataio 1:5, 6, 16) Ua na o se tasi lenā mai le tele o faaaʻoaʻoga o i le Tusi Paia, o loo taʻua ai le talisapaia e Ieova o ana auauna.
2, 3. (a) Aiseā e uigaese ai le agaga talisapaia o Ieova? (e) Aiseā e mafai ai e Ieova ona faaalia le agaga talisapaia moni? Ia faataʻitaʻi.
2 I le silafaga a Ieova, o se amiolētonu iā te ia pe afai na te lē faaalia le agaga talisapaia. Fai mai le Eperu 6:10: “E lē amiolētonu le Atua, na te lē faagalogaloina la outou galuega ma le alofa ua outou faaali mai ai i lona suafa, auā na outou auauna i le ʻau paia, i le o loo outou auauna i ai.” E uigaese lenei manatu auā ua taʻua ai, e talisapaia e Ieova tagata faamaoni, e ui lava i lo latou tulaga agasala, ma ua lē oo ai i lona mamalu.—Roma 3:23.
3 I lo tatou tulaga lē lelei atoatoa, e ono tupu ifo ai se lagona faapea, ailoga e taulia a tatou galuega o le tuutoina i le Atua, ma e lē tatau i ai ni ana faamanuiaga. Peitaʻi, e malamalama lelei Ieova i uunaʻiga o a tatou gaoioiga. Na te silafia mai foʻi o tatou tulaga, ma matuā talisapaia pe a tatou auauna atu iā te ia ma le loto atoa. (Mataio 22:37) Seʻi faataʻitaʻi: Ua tau atu Tinā i luga o le laulau o loo taatia mai ai se meaalofa mo ia. O se ʻula taugofie. Atonu e tilotilo i ai ma manatu e lē tāua, ona lē ano lava lea i ai. Peitaʻi, o le tusi lea e iai faatasi ma le meaalofa, ua ia iloa ai, o le meaalofa e mai si ana tama teine laʻitiiti, lea na faaputuputu uma sana tupe e faatau ai lenei meaalofa. Ua toe suia nei le mafaufau o le tinā i le meaalofa. Atonu ua ootia lona loto ma tagi ai i le gaoioiga a si ana tama. Ona ia fusi atu lea ma faailoa iā te ia lona matuā talisapaia o lenei meaalofa.
4, 5. Sa faapefea ona faataʻitaʻi Iesu iā Ieova i le faaalia o le talisapaia?
4 E malamalama lelei Ieova i o tatou faalogona, ma mea e gata mai ai lo tatou mafai. O lea la, pe itiiti pe telē se auaunaga tatou te faia mo ia, e na te matuā talisapaia pe afai o le mea silisili lea ua tatou mafaia. Sa faaatagia lelei mai e Iesu lona Tamā i lenei vala. Seʻi toe manatu i le tala i si foaʻi faatauvaa a le fafine mativa ua oti lana tane. “Ua tepa aʻe [Iesu], ua silafia o ē mauʻoa, o lafo a latou taulaga i le mea e teu ai tupe. Ua silafia foʻi e ia le tasi fafine mativa ua oti lana tane, ua lafo i ai tupe iti e lua. Ona fetalai atu lea o ia, ‘E moni, ou te fai atu iā te outou, o mea a lenei fafine mativa ua oti lana tane ua lafo i ai, ua sili lea i a latou uma. Auā o i latou uma, ua latou lafo atu i taulaga nisi mea mai a latou mea ua tele; a o ia ua mativa, ua lafo e ia ana mea uma e ola ai sa iā te ia.’”—Luka 21:1-4.
5 Sa malamalama Iesu i le tulaga o lenei fafine; ua oti lana tane ma e mativa foʻi. Sa silafia lelei la e Iesu le tāua o le meaalofa a le fafine, ma sa Ia matuā talisapaia lana foaʻi. O le silasila foʻi lenā a Ieova. (Ioane 14:9) Maʻeu la se faalaeiau iā te oe o lou iloa, po o le ā lava lou tulaga o iai, ae mafai ona talisapaia oe e Ieova ma lona Alo!
E Tauia e Ieova Lē e Mataʻu iā te Ia
6, 7. Aiseā ma na faapefea ona faaalia e Ieova lona talisapaia o Epetemeleka?
6 Ua taʻua soo i le Tusi Paia i latou na talisapaia e Ieova ona sa latou faia lona finagalo. Mo se faaaʻoaʻoga, o le tagata Aitiope o Epetemeleka, lea na iai i le vaitaimi o Ieremia, ma o ia o se auauna i le fale o le tupu amioleaga o Iuta, o Setekaia. Na logotala Epetemeleka i moliaga sesē sa fai e alii o Iuta e tuuaʻia ai Ieremia e faapea, o sē e tetee i le tupu. O le iʻuga, na lafoina Ieremia i se lua o palapala ina ia oti ai, e aunoa ma se meaʻai. (Ieremia 38:1-7) Sa iloa e Epetemeleka le matuā itagia o Ieremia ona o le feʻau na ia talaʻia. O lea sa leʻi fefe ai Epetemeleka e tulaʻi i luma o le tupu ma fai se ʻaiʻoiga. Na faapea atu ma le loto tele lenei Aitiope: “Le alii e le tupu, ua amio leaga ia tagata i mea uma ua latou faia iā Ieremia le perofeta, o lē ua latou tuuina ifo i le lua; e oti foʻi o ia i le mea ua i ai i le fia ʻai.” Ona poloaʻi atu lea o le tupu, ia ō ifo Epetemeleka ma nisi tane e toʻa 30, e laveaʻi i le perofeta a le Atua.—Ieremia 38:8-13.
7 Na silafia e Ieova le faatuatua o Epetemeleka, lea na mafai ai ona ia gaoioi ma le lē fefe. Sa matuā talisapaia e Ieova lea uiga o Epetemeleka, ma ia fetalai atu i ai e ala iā Ieremia e faapea: “Faauta, ou te faaoo aʻu upu i lenei aai ia malaia, a e lē ina ia manuia . . . A e ou te laveaʻi iā te oe i lea aso, . . . e lē tuuina foʻi oe i lima o tagata ua e fefe ai. Auā ou te faasaoina lava oe . . . a e avea lou ola mau vete; auā ua e faatuatua iā te aʻu.” (Ieremia 39:16-18) O le mea lenā na tupu. Sa laveaʻi e Ieova Epetemeleka ma Ieremia mai alii leaga o Iuta, ma ʻautau a Papelonia i se taimi mulimuli ane, ina ua latou osofaʻia Ierusalema. Ua faapea mai le Salamo 97:10: “O loo tausi e [Ieova] i agaga o ona tagata amio Atua; na te laveaʻiina i latou ai lima o ē amio leaga.”
E Tauia Oe e Lou Tamā o Lē Silasila i le Mea Lilo
8, 9. E pei ona sa fai e Iesu, o ā tatalo e talisapaia e Ieova?
8 Tatou te mautinoa foʻi e talisapaia ma faatāua e Ieova a tatou gaoioiga o le tuutoina iā te ia, e ala i manatu o loo taʻua e le Tusi Paia e uiga i le tatalo. Na faapea mai le poto o Solomona: “O le tatalo a ē amio saʻo o lona [le Atua] lea fiafia.” (Faataoto 15:8) I aso o Iesu, na pau le māfuaaga e tatalo ai taʻitaʻi lotu i nofoaga faitele, ina ia faaofo ai tagata, ae leʻi tatalo mai se agaga faamaoni. Na fetalai Iesu: “Ua maua e i latou lo latou taui.” Ona ia faatonu lea o ona soo: “A o oe, pe a e tatalo, inā ulu atu ia i lou afeafe, ma pupuni lona puipui, i le e tatalo ai i lou Tamā o i le mea lilo; o lou Tamā foʻi o lē silasila i le mea lilo, na te avatu se taui iā te oe.”—Mataio 6:5, 6.
9 E leʻi faapea mai Iesu, e leaga le tatalo i luma o ni tagata e toʻatele. Sa iai foʻi ni taimi sa tatalo ai faapena Iesu. (Luka 9:16) E matuā talisapaia e Ieova pe a tatou tatalo atu iā te ia mai se loto faamaoni, e aunoa ma ni faanaunauga ia faaofo ai nisi. O a tatou lava tatalo na o i tatou, o se faailoaga lea o le loloto o lo tatou alofa iā Ieova ma faatuatuaina o ia. E lētioa fai ma masani a Iesu le alu ese na o ia i ni nofoaga toʻafilemu e tatalo ai. Na iai se taimi na ia tatalo ai i se taeaopō a o leʻi malamalama lelei. I le isi taimi, na ‘maliu aʻe ai ua na o ia i le mauga e tatalo.’ Ma i le pō ae malama le isi aso o le a filifilia ai ona aposetolo e toʻa 12, e aoina lelei lenā pō o tatalo Iesu.—Mareko 1:35; Mataio 14:23; Luka 6:12, 13.
10. Pe a atagia atu i a tatou tatalo o tatou lagona faamaoni, o le ā tatou te mautinoa ai?
10 O le mea moni lava, sa matuā uaʻi mai Ieova a o tatala atu lagona moni o si ona Alo i ana tatalo! Sa iai taimi na tatalo ai Iesu “ma le tagi tele ma loimata . . . na faafofogaina foʻi o ia ona o lona migao.” (Eperu 5:7; Luka 22:41-44) Pe a atagia atu i a tatou tatalo na lagona faamaoni, e mautinoa o le a faafofoga mai lo tatou Tamā o i le lagi, ma talia a tatou tatalo. Manatua, “e latalata mai Ieova iā i latou uma . . . o ē valaau iā te ia ma le faamaoni.”—Salamo 145:18.
11. O ā faalogona o Ieova i gaoioiga tatou te faia e lē o iloa mai e isi?
11 Afai e talisapaia e Ieova pe a tatou tatalo atu iā te ia i le mea lilo, e mautinoa foʻi la, na te talisapaia lo tatou usiusitai atu iā te ia i le mea lilo e lē o iloa atu i le vaaiga a isi! E ati mai le silafaga a Ieova i so o se mea tatou te faia faalilolilo. (1 Peteru 3:12) O lo tatou faia faapea e iloa ai o loo iā i tatou se “loto atoa” mo Ieova, o se loto e mamā ma maumauaʻi e fai le mea saʻo. (1 Nofoaiga a Tupu 28:9) O amioga faapena e fiafia ai le finagalo o Ieova.—Faataoto 27:11; 1 Ioane 3:22.
12, 13. E faapefea ona leoleomalu o tatou mafaufau ma loto, ma ia pei o le soo faamaoni o Natanielu?
12 O lona uiga, e tatau ona ʻaloese Kerisiano mai agasala faalilolilo, na e faaleaga ai le mafaufau ma le loto, e pei o le matamata i ata o amioga lē mamā, ma faiga sauā. E iai nisi agasala e mafai ona natia mai le vaaiga a tagata. Peitaʻi tatou te iloa “ua taatia fua ma ua aliali mai o mea uma lava i lana silafaga, tatou te taʻu atu iā te ia a tatou amio.” (Eperu 4:13; Luka 8:17) Seʻi tatou taumafai e ʻalofia mea e inosia e Ieova. Ona tatou maua lea o se lotofuatiaifo mamā, ma fiafia i le iloa o loo malie le finagalo o Ieova iā i tatou. E lē fesiligia le mea moni, e matuā talisapaia e Ieova le tagata “o lē savali ma le amio saʻo, ma ua fai le amiotonu, ma tautala ma le faamaoni i lona loto.”—Salamo 15:1, 2.
13 Ae faapefea ona leoleomalu o tatou mafaufau ma loto, a o tatou ola i se lalolagi ua tumu i le leaga? (Faataoto 4:23; Efeso 2:2) Ia faaaogā tatau sauniuniga uma a Ieova mo le faamalosia o lo tatou faatuatua. Ma e tatau foʻi ona tatou taumafai malosi e teena mea leaga ae fai le mea lelei, ma ia gaoioi vave e tetee ni faanaunauga lē tatau e oso ane, a o leʻi faapogaia ai se agasala. (Iakopo 1:14, 15) Maʻeu sou faagaeetia pe ana faapea o oe lea sa faasino i ai le fetalaiga a Iesu, e pei ona ia fetalai e uiga iā Natanielu: “Faauta, [i le tagata] e leai sona pepelo.” (Ioane 1:47) O le iʻuga, na maua e Natanielu lea sa igoa foʻi o Patolomaio, le faaeaga e avea ai o se tasi o aposetolo e 12 o Iesu.—Mareko 3:16-19.
Se “Ositaulaga Sili e Alofa ma Faamaoni”
14. O le ā le manatu o Iesu i le gaoioiga a Maria lea na fai, e ese mai le manatu o isi?
14 Sa atoatoa ona faataʻitaʻia e Iesu lona Tamā, i le auala e talisapaia ai i latou o loo auauna i le Atua mai se loto mamā. (Kolose 1:15) Mo se faaaʻoaʻoga, a o toe lima aso oo i lona maliu, na talimālō ai Simona mai Petania iā Iesu ma nisi o ona soo. A o faagasolo le latou afiafi, sa fai ai e Maria le tuafafine o Lasalo, ma o le uso o Mareta, se gaoioiga mataʻina. Na ia tago i “le uu nato tau tele” (e tusa lona tau ma le totogi o se tagata i le tausaga atoa), ma uu ai vae ma le ao o Iesu. (Ioane 12:3) Na faapea ane nisi sa iai: “Se ā le mea ua faamāumau ai lenā mea?” Peitaʻi sa manatu Iesu i le gaoioiga na fai e Maria, o se matuā tele o le loto foaʻi, ma e iai foʻi se uiga tāua i le faataʻimuaga o lona maliu ma lona tanuga lea ua lalata ane. O lea la, sa leʻi faitioina e Iesu Maria i lana gaoioiga na fai, ae sa viiviia o ia. Na fetalai atu Iesu: “O nuu uma i le lalolagi e talaʻiina atu i ai lenei tala lelei, e taʻua ai le mea ua faia e lenei fafine, e faamanatu ai iā te ia.”—Mataio 26:6-13.
15, 16. E faapefea ona aogā iā i tatou, le taimi na soifua ai Iesu o se tagata, ma auauna atu i le Atua?
15 O so tatou faaeaga le avea o Iesu ma o tatou Taʻitaʻi, aemaise le iā te ia o uiga talisapaia. A o soifua o se tagata, sa ia sauniuni ai mo le galuega na faataatia e Ieova mo ia, o le avea ma Ositaulaga Sili ma o le Tupu, muamua i le faapotopotoga o le ʻaufaauuina, ona sosoo lea ma le lalolagi uma.—Kolose 1:13; Eperu 7:26; Faaaliga 11:15.
16 A o leʻi afio mai Iesu i le lalolagi, ua leva lava ona iai ona lagona fiafia ma le māfana mo tagata. (Faataoto 8:31) O lona soifua o se tagata, ua mafai ai ona ia malamalama lelei i puapuaga o loo tatou fesagaʻia a o auauna atu i le Atua. Na tusi mai le aposetolo o Paulo: “O le mea lea ua tatau ai ina ia avea [Iesu] ia faapei o ona uso i mea uma lava, ina ia faia o ia ma ositaulaga sili e alofa ma faamaoni . . . Auā na tigāina o ia ina o faaosoosoina, o le mea lea ua mafai ai o ia ona fesoasoani i ē ua faaosoosoina.” E mafai e Iesu ona “tigā alofa faatasi ma i tatou i o tatou vaivai,” auā “ua faaosoosoina o ia i mea uma pei o i tatou, a ua leai se agasala iā te ia.”—Eperu 2:17, 18; 4:15, 16.
17, 18. (a) O ā lagona talisapaia o Iesu sa faaalia, i ana tusi ia na avatu i ekalesia e fitu i Asia Itiiti? (e) O le ā le mea na sauniunia ai Kerisiano faauuina?
17 Sa faamaonia le malamalama lelei o Iesu i puapuaga o loo fesagaʻi ma ona soo, i le taimi na toe tū ai. Seʻi mātau ana tusi na tuuina atu i ekalesia e fitu i Asia Itiiti, lea na tusitusia e le aposetolo o Ioane. Na fetalai atu Iesu i le ekalesia i Semurana: “Ua ou iloa au galuega, ma lou puapuaga, ma lou mativa.” Pe a toe faaupu le fetalaiga a Iesu, o lona uiga, ‘Ou te malamalama lelei i ou faafitauli; Ou te malamalama lelei i mea o loo e fesagaʻia.’ Sa oo foʻi o ia i nei puapuaga seʻia oo lava ina maliu. Ona ia fetalai atu lea, i ni lagona alofa ma le faalaeiau: “Ia e faamaoni seʻia oo i le oti, ona ou avatu ai lea iā te oe o le pale o le ola.”—Faaaliga 2:8-10.
18 O upu na tusi atu ai Iesu i ekalesia e fitu, ua manino mai ai lona malamalama lelei i luʻi o loo fesagaʻia e ona soo, ma lona talisapaia o lo latou tumau i le faamaoni. (Faaaliga 2:1–3:22) Aua neʻi galo, o i latou nei sa tusi atu i ai Iesu, o Kerisiano faauuina ua iai le faamoemoe e pule faatasi ma ia i le lagi. O lo latou mulimulituʻi i lo latou Alii, na sauniunia ai mo lo latou tofiga mamalu, o le faaoo mai o aogā o le taulaga togiola a Keriso, ina ia manuia ai tagata.—Faaaliga 5:9, 10; 22:1-5.
19, 20. Ua faapefea ona faaalia e le “motu o tagata e toʻatele” lo latou talisapaia o Ieova ma lona Alo?
19 Sa leʻi alofa Iesu i na o ona soo faauuina. Na ia alofa mai foʻi i “isi mamoe” faamaoni, e faitau miliona o loo faia aʻe ai le “motu o tagata e toʻatele mai atu nuu uma,” o ē o le a faasaoina mai le “puapuaga tele.” (Ioane 10:16; Faaaliga 7:9, 14) O loo lolofi mai i latou nei iā Iesu, ona o le talisapaia o lana taulaga togiola, ma lo latou faamoemoe i le ola e faavavau. O faapefea ona faaalia lo latou agaga talisapaia? E ala i lo latou “auauna foʻi [i le Atua] i lona malumalu i le ao ma le pō.”—Faaaliga 7:15-17.
20 I le itulau e 27 e oo i le 30, o loo iai le lipoti a le lalolagi aoao mo le tausaga faaleauaunaga e 2006. Ua manino mai i lenei lipoti, le auauna moni atu o nei faifeʻau faamaoni iā Ieova, “i lona malumalu i le ao ma le pō.” I lea tausaga e tasi, sa latou galulue ai faatasi ma se vaega itiiti o loo totoe o Kerisiano faauuina, mo se aofaʻiga o itula e 1,333,966,199 i le galuega talaʻi—ua tutusa lenā ma tausaga e 152,283!
Ia Faaalia Pea le Agaga Talisapaia!
21, 22. (a) Aiseā e tatau ai lava ona faaeteete Kerisiano i aso nei, a o latou faaalia le agaga talisapaia? (e) O le ā le manatu o le a tatou talanoaina i le mataupu o loo sosoo mai?
21 E matuā mataʻina le agaga talisapaia o loo faaalia e Ieova ma lona Alo, i a latou feutagaʻiga ma tagata lē lelei atoatoa. Ae pagā lea, o le toʻatele o tagata ua seāseā manatu i le Atua, ae ua mua ona uaʻi i o latou lava manaʻoga. A o faamatala e Paulo tagata o loo ola i nei “aso e gata ai,” na ia faapea mai: “O tagata o le a matuā manatu faapito ma matapeʻapeʻa i tupe . . . O le a matuā leai lava so latou loto faafetai.” (2 Timoteo 3:1-5, Phillips) E matuā ese na tagata mai Kerisiano moni! E tatalo atu Kerisiano iā Ieova, e nofosauni e usiusitai, ma auauna ma le loto atoa iā te ia. O se faailoaga o le talisapaia o mea uma ua faia e Ieova mo i latou.—Salamo 62:8; Mareko 12:30; 1 Ioane 5:3.
22 I le mataupu o loo sosoo mai, o le a tatou autaluina nisi o sauniuniga faaleagaga ua foaʻi mai e Ieova mo i tatou. Tau ina ia tupu pea lo tatou agaga talisapaia, a o tatou toe manatunatu i nei ‘mea alofa lelei.’—Iakopo 1:17.
O le a Faapefea Ona E Tali?
• Ua faaalia faapefea e Ieova, o ia o se Atua e agaga talisapaia?
• E faapefea ona tatou faafiafia le finagalo o Ieova, a o tatou iai i se nofoaga e lē o iloa mai e isi?
• Na faapefea ona faaalia e Iesu le agaga talisapaia?
• Na aogā faapefea iā Iesu le taimi na soifua ai o se tagata, i lona avea o se pule e alofa ma iai le agaga talisapaia?
[Fesili mo le Suʻesuʻega]
[Ata i le itulau 17]
E talisapaia e se matua sina gaoioiga a sana tama; e talisapaia foʻi e Ieova lo tatou avatu iā te ia o le mea silisili